អ្នកទោសចំនួន ៧នាក់បានទម្លាយរបងថ្មរត់ចេញពីពន្ធនាគារខេត្តស្ទឹងត្រែង កាលពីរំលងអាធ្រាត្រថ្ងៃទី៨ ខែវិច្ឆិកា ឆ្នាំ២០២១ ស្ថិតនៅភូមិបាចុង សង្កាត់ព្រះបាទ ក្រុងស្ទឹងត្រែង ខេត្តស្ទឹងត្រែង។
ស្នងការនគរបាលខេត្តស្ទឹងត្រែង បានផ្សព្វផ្សាយតាមបណ្ដាញសង្គមរបស់ខ្លួននៅថ្ងៃទី៨ ខែវិច្ឆិកា នេះ ជូនដំណឹងទៅសាធារណជនពីភិនភាគអ្នកទោសទាំង ៧រូបនេះមានភ្ជាប់រូបថតផង ដើម្បីផ្ដល់ដំណឹងដល់សមត្ថកិច្ចជំនាញធ្វើការឃាត់ខ្លួនអ្នកទោសទាំងនោះមកវិញ។
តាមប្រភពព័ត៌មានបានឱ្យដឹងថា អ្នកទោសវាយជញ្ជាំងទម្លាយរត់គេចខ្លួន ខណៈនោះមន្ត្រីអនុរក្សពន្ធនាគារបានប្រើប្រាស់អាវុធបាញ់ចំនួន ៤គ្រាប់ ដើម្បីគំរាមបញ្ឈប់ ប៉ុន្តែមិនអាចរារាំងបាន។
តាមការពិនិត្យទីតាំងជាក់ស្តែង សមត្ថកិច្ចបានរកឃើញឧបករណ៍ធ្វើសិប្បកម្ម និងវត្ថុរឹងមួយចំនួនដែលជាឧបករណ៍សម្រាប់ទម្លាយជញ្ជាំងរបងថ្ម មានដូចជាប្រដាប់ខួង ដែកត្រសេះ កំណាត់ឈើ ខ្នើយ ភួយ ដើម្បីខ្ទប់វាយមិនឱ្យឮសំឡេង។
សារព័ត៌មានក្នុងស្រុកឈ្មោះ «ថ្មីៗ» បានដកស្រង់សម្ដីលោក ម៉ែន គង់ អ្នកនាំពាក្យខេត្តស្ទឹងត្រែង ថា សមត្ថកិច្ចទូទាំងខេត្តកំពុងតាមស្រាវជ្រាវចាប់ខ្លួនអ្នកទោស ៧នាក់ដែលបានវាយទម្លាយជញ្ជាំងរត់គេចខ្លួនកាលពីម៉ោង ៣ទៀបភ្លឺថ្ងៃទី៨ វិច្ឆិកា។
លោក ម៉ែន គង់ បានឲ្យដឹងថា ពួកគេទាំង ៧នាក់បានប្រើកំណាត់ឈើវាយទម្លាយជញ្ជាំងពន្ធនាគារ ដើម្បីរត់គេចខ្លួន។ លោកបញ្ជាក់ថា អ្នកទោសដែលរត់ចេញទាំងនោះមានអ្នកជាប់ទោសមួយជីវិតម្នាក់។ ក្រៅពីនេះ មានអ្នកទោសម្នាក់ត្រូវជាប់ពន្ធនាគារ ៤ឆ្នាំ ហើយអ្នកផ្សេងទៀត គឺជាប់ទោសប្រមាណ ២០ឆ្នាំ។
ប្រភពដដែលបញ្ជាក់ទៀតថា ក្រុមអ្នកទោសទាំងនោះប្រាកដជាបានរៀបគម្រោងទុកជាមុន ប៉ុន្តែសម្រាប់នរណាខ្លះដែលជាប់ពាក់ព័ន្ធនេះ លោក ម៉ែន គង់ សុំមិនទាន់បកស្រាយឡើយ ដោយរង់ចាំការស៊ើបអង្កេតបន្ថែម៕