ក្រុមសិទ្ធិមនុស្សក្នុងស្រុកបន្តធ្វើយុទ្ធនាការក្នុងសប្តាហ៍ទី១៣ ទាមទារឱ្យដោះលែងសកម្មជននានាដែលកំពុងជាប់ឃុំខ្លួនទាំងអយុត្តិធម៌សព្វថ្ងៃនេះ បើទោះបីជាសកម្មជនខ្លះត្រូវបានតុលាការដោះលែងហើយក៏ដោយ។
នៅថ្ងៃទី១០ ខែវិច្ឆិកា នេះ សមាគមការពារសិទ្ធិមនុស្សអាដហុក មជ្ឈមណ្ឌលសិទ្ធិមនុស្សកម្ពុជា អង្គការលីកាដូ និងអង្គការដទៃទៀត នាំគ្នាទាមទារឱ្យមានការដោះលែងសកម្មជនការពារបរិស្ថាន ៦រូបទៀត ដូចជាលោក ថុន រដ្ឋា កញ្ញា ឡុង គន្ធា កញ្ញា ភួន កែវរស្មី កញ្ញា ស៊ុន រដ្ឋា លោក យឹម លាងហ៊ី និងលោក លី ចាន់ដារ៉ាវុត ដែលតែងតែធ្វើសកម្មភាពការពារបរិស្ថាន និងធនធានធម្មជាតិ ដែលត្រូវអាជ្ញាធរចាប់ខ្លួនទាំងអយុត្តិធម៌តាំងពីអំឡុងខែកញ្ញា ឆ្នាំ២០២០ មក។
មន្ត្រីជាន់ខ្ពស់របស់សមាគមការពារសិទ្ធិមនុស្សអាដហុក លោក ស៊ឹង សែនករុណា និយាយថា ការទាមទាររបស់សង្គមស៊ីវិលគឺដើម្បីជំរុញឱ្យមានការផ្តល់យុត្តិធម៌ដល់សកម្មជនបរិស្ថាន និងជួយបញ្ចៀសនូវការរិះគន់ និងការដាក់ទណ្ឌកម្មនានាពីសហគមន៍អន្តរជាតិលើកម្ពុជាផងដែរ នៅពេលដែលរដ្ឋាភិបាលកម្ពុជាបើកលំហសេរីភាពបញ្ចេញមតិ និងដោះលែងសកម្មជនបរិស្ថានទាំងនោះឱ្យមានសេរីភាពឡើងវិញ។
លោកបន្តថា បើទោះបីជានៅពេលនេះតុលាការសម្រេចដោះលែងសកម្មជនបរិស្ថានខ្លះហើយក៏ដោយ ក៏ពួកគេនៅមិនទាន់មានសេរីភាពពេញលេញដែរ ព្រោះថាពួកគេនៅតែស្ថិតក្រោមការតាមដានរបស់តុលាការនៅឡើយ។ ជាងនេះទៀត ករណីកុមារា កាក់ សុវណ្ណច្ឆ័យ ដែលជាអនីតិជន ក៏ត្រូវស្ថិតក្រោមការតាមដានរបស់តុលាការដូចគ្នាដែរ ខណៈតុលាការមិនបានផ្តល់យុត្តិធម៌លើកុមារាម្នាក់ដែលមានជំងឺខ្សោយបញ្ញាស្មារតីទាល់តែសោះ ចំពោះការចោទប្រកាន់ និងការផ្ដន្ទាទោសរបស់ខ្លួនលើកុមារារូបនេះ។
លោក ស៊ឹង សែនករុណា អំពាវនាវឱ្យរដ្ឋាភិបាលកម្ពុជា ទម្លាក់ចោលនូវរាល់បទចោទទាំងអស់លើសកម្មជននានាដែលកំពុងត្រូវបានឃុំខ្លួនសព្វថ្ងៃនេះ ត្បិតអ្នកទាំងនោះគឺជាធនធានមនុស្សដ៏សំខាន់បំផុតក្នុងការចូលរួមជាមួយរដ្ឋាភិបាល ដើម្បីថែរក្សាធនធានធម្មជាតិដែលកំពុងរងការបំផ្លិចបំផ្លាញយ៉ាងធ្ងន់ធ្ងរនៅកម្ពុជា ដោយមានការផ្សំគំនិតរវាងឈ្មួញទុច្ចរិត និងមន្ត្រីខិលខូចក្នុងពេលបច្ចុប្បន្ននេះ។
សកម្មជនដែលកំពុងរងការឃុំខ្លួន និងកាត់ទោសទាំងអយុត្តិធម៌សព្វថ្ងៃនេះមានចំនួនប្រមាណជា ៥០នាក់ រួមមានប្រធានសហជីពកម្ពុជា លោក រ៉ុង ឈុន អ្នកនាង ឈឿន ដារ៉ាវី លោក ហ៊ុន វណ្ណៈ និងយុវជនដែលអង្គការសង្គមស៊ីវិលធ្វើយុទ្ធនាការទាមទារឱ្យដោះលែងនៅសប្តាហ៍នេះផងដែរ។ ខណៈយុវជនមួយចំនួនទៀត ត្រូវបានដោះលែងសាកល្បងកាលពីពេលថ្មីៗនេះ ប៉ុន្តែពួកគេនៅតែស្ថិតក្រោមការតាមដានរបស់តុលាការនៅឡើយ៕