ការិយាល័យអ្នកនាំពាក្យក្រសួងការបរទេសសហរដ្ឋអាមេរិក បានផ្សព្វផ្សាយនូវសេចក្ដីថ្លែងការណ៍រួមបីក្រសួង គឺក្រសួងហិរញ្ញវត្ថុ ក្រសួងពាណិជ្ជកម្ម និងក្រសួងការបរទេស ដែលប្រកាសព័ត៌មានអំពីការដាស់តឿនដល់អ្នកជំនួញជាតិអាមេរិកទាំងអស់ កុំឲ្យពាក់ព័ន្ធមុខជំនួញដែលមានជាប់ពាក់ព័ន្ធនឹងអំពើពុករលួយ និងការរំលោភសិទ្ធិមនុស្សនៅកម្ពុជា។
សេចក្ដីថ្លែងការណ៍រួមដែលធ្វើឡើងដោយក្រសួងទាំងបីនេះ ត្រូវបានមើលឃើញនៅក្នុងគេហទំព័ររបស់ក្រសួងការបរទេសអាមេរិក នៅថ្ងៃទី១១ វិច្ឆិកា នេះ។
សេចក្ដីថ្លែងការណ៍បានសរសេរលម្អិតថា៖
សហរដ្ឋអាមេរិកមានប្រវត្តិជាយូរមកហើយចំពោះការប្ដេជ្ញាចិត្តក្នុងការប្រយុទ្ធប្រឆាំងអំពើពុករលួយ និងគាំទ្រនីតិរដ្ឋនៅកម្ពុជា និងទូទាំងពិភពលោក។ ការវិវឌ្ឍថ្មីៗនៅកម្ពុជា រួមទាំងអំពើពុករលួយជាប្រព័ន្ធ ឧក្រិដ្ឋកម្មឆ្លងដែន និងការរំលោភសិទ្ធិមនុស្ស គំរាមកំហែងទៅលើផលប្រយោជន៍សន្តិសុខជាតិរបស់សហរដ្ឋអាមេរិក និងសេរីភាពជាមូលដ្ឋានរបស់ប្រជាជនកម្ពុជា សម្រាប់សហរដ្ឋអាមេរិកគឺមិនអាចទទួលយកបានឡើយ។
មន្ត្រីសហរដ្ឋអាមេរិកបានលើកឡើងពីកង្វល់ទាំងនេះជាមួយមេដឹកនាំកម្ពុជា ប៉ុន្តែគួរឲ្យសោកស្ដាយដែលពុំមានការផ្លាស់ប្ដូរប្រកបដោយអត្ថន័យម្តងណាឡើយ។
ក្រសួងការបរទេស ក្រសួងហិរញ្ញវត្ថុ និងក្រសួងពាណិជ្ជកម្មសហរដ្ឋអាមេរិក បានព្រមានអ្នកជំនួញសហរដ្ឋអាមេរិកដែលកំពុងប្រតិបត្តិការ ឬកំពុងពិចារណាប្រតិបត្តិការលើមុខជំនួញនៅកម្ពុជា ត្រូវប្រុងប្រយ័ត្នអំពីការពាក់ព័ន្ធនឹងអំពើពុករលួយ ឬរំលោភសិទ្ធិមនុស្សនៅកម្ពុជា។ ការអនុវត្តអាជីវកម្មដោយអំពើពុករលួយ គឺជាសកម្មភាពឧក្រិដ្ឋកម្ម និងការរំលោភសិទ្ធិមនុស្សដែលត្រូវជៀសវាងជាដាច់ខាត។
សេចក្ដីណែនាំរបស់ក្រសួងទាំងបីនេះ ពាក់ព័ន្ធនឹងចំណុចសំខាន់ចំនួនពីរដែលក្រុមហ៊ុនអាមេរិកាំងនៅក្នុងប្រទេសកម្ពុជាត្រូវជៀសវាងឲ្យបាន គឺ៖
- ទី១៖ សកម្មភាពហិរញ្ញវត្ថុខុសច្បាប់ និងហានិភ័យដែលពាក់ព័ន្ធនៅក្នុងវិស័យហិរញ្ញវត្ថុ អចលនទ្រព្យ កាស៊ីណូ និងហេដ្ឋារចនាសម្ព័ន្ធផ្សេងៗ។
- ទី២៖ ការជាប់ពាក់ព័ន្ធជាមួយអង្គភាព ឬអ្នកជំនួញ មន្ត្រីកម្ពុជាដែលពាក់ព័ន្ធនឹងការជួញដូរមនុស្ស ការជួញដូរសត្វព្រៃ និងគ្រឿងញៀន ព្រមទាំងហានិភ័យទាំងឡាយនៅក្នុងតំបន់មួយចំនួននៃវិស័យផលិតកម្ម និងការបំផ្លាញព្រៃឈើនៅកម្ពុជា។
មុខជំនួញទាំងអស់ ត្រូវតែអនុវត្តឱ្យសមស្របនឹងការណែនាំនេះ ដោយសំដៅកាត់បន្ថយហានិភ័យធ្វើឱ្យខូចកេរ្តិ៍ឈ្មោះ រំលោភច្បាប់ពាណិជ្ជកម្ម សេដ្ឋកិច្ចដែលទាក់ទងនឹងក្រុមហ៊ុន ឬអង្គភាពមុខជំនួញនៅកម្ពុជា ដែលអាចជាប់ពាក់ព័ន្ធអំពើពុករលួយ សកម្មភាពឧក្រិដ្ឋកម្ម សកម្មភាពហិរញ្ញវត្ថុខុសច្បាប់ ឬការរំលោភសិទ្ធិមនុស្ស។
លើសពីនេះទៀត តំណាងពាណិជ្ជកម្មសហរដ្ឋអាមេរិកនឹងធ្វើការវាយតម្លៃលើសិទ្ធិទទួលបានប្រព័ន្ធអនុគ្រោះទូទៅ GSP របស់កម្ពុជា ដែលជាផ្នែកមួយនៃការវាយតម្លៃ GSP ទូលំទូលាយសម្រាប់កម្ពុជា។ ការវាយតម្លៃនេះ នឹងត្រូវធ្វើឡើងបន្ទាប់ពីមានការអនុញ្ញាតឡើងវិញនៃអត្ថប្រយោជន៍កម្មវិធី GSP ហើយនឹងរួមបញ្ចូលផងដែរនូវលក្ខណៈវិនិច្ឆ័យសិទ្ធិទទួលបានជាថ្មី ឬវិសោធនកម្មដែលត្រូវសុំការអនុម័តឡើងវិញដោយសមាជិកសភាអាមេរិក។
ក្នុងន័យនេះ សហរដ្ឋអាមេរិកនឹងបន្តជំរុញឱ្យមានការទទួលខុសត្រូវចំពោះមុខជំនួញទាំងឡាយណាដែលពាក់ព័ន្ធនឹងសកម្មភាពឧក្រិដ្ឋកម្ម មុខជំនួញជាប់ទាក់ទិននឹងអំពើពុករលួយ និងការរំលោភសិទ្ធិមនុស្សនៅកម្ពុជា ដែលធ្វើឡើងតាមរយៈអន្តរាគមន៍របស់មន្ត្រីរដ្ឋាភិបាលពុករលួយក្នុងការជួយសម្របសម្រួលយ៉ាងជិតស្និទ្ធជាមួយនឹងកិច្ចការមុខជំនួញឯកជន និងដៃគូមុខជំនួញ។
ជាមួយគ្នានេះ ក្រសួងការបរទេសសហរដ្ឋអាមេរិក កាលពីថ្ងៃទី១០ ខែវិច្ឆិកា បានប្រកាសដាក់ទណ្ឌកម្មលើមន្ត្រីយោធាជាន់ខ្ពស់កម្ពុជាពីររូបបន្ថែមទៀត គឺនាយឧត្តមសេនីយ៍ ចៅ ភិរុណ អគ្គនាយកនៃអគ្គនាយកដ្ឋានសម្ភារៈបច្ចេកទេសនៃក្រសួងការពារជាតិ និងនាយឧត្ដមនាវី ទៀ វិញ មេបញ្ជាការកងទ័ពជើងទឹកកម្ពុជា។ អាមេរិកបានសម្រេចមិនអនុញ្ញាតឱ្យពួកគេទាំងពីរនាក់ចូលក្នុងទឹកដីអាមេរិកឡើយ។ មូលហេតុ គឺអាមេរិកចោទប្រកាន់ពួកគេថាបានប្រព្រឹត្តអំពើពុករលួយនៅឯមូលដ្ឋានកងទ័ពជើងទឹករាម។
ក្រសួងការបរទេសអាមេរិកបានចោទប្រកាន់ថា លោក ចៅ ភិរុណ អគ្គនាយកនៃអគ្គនាយកដ្ឋានសម្ភារៈបច្ចេកទេសនៃក្រសួងការពារជាតិ និងលោក ទៀ វិញ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងទឹក និងជាអគ្គលេខាធិការនៃគណៈកម្មាធិការជាតិសន្តិសុខលំហសមុទ្រ ថាបានជាប់ពាក់ព័ន្ធនឹងអំពើពុករលួយដែលធ្វើឱ្យខូចនីតិរដ្ឋ និងទំនុកទុកចិត្តរបស់ពលរដ្ឋលើស្ថាប័នរដ្ឋាភិបាល និងដំណើរការងារសាធារណៈ ដោយបានឃុបឃិតទាញយកប្រយោជន៍ពីការសាងសង់ និងការអភិវឌ្ឍអគារនៅមូលដ្ឋានកងទ័ពជើងទឹករាម ដែលសហរដ្ឋអាមេរិកសង្ស័យថាអនាគតអាចនឹងក្លាយជាមូលដ្ឋានកងទ័ពចិន៕