ក្រសួងទេសចរណ៍ បានប្រកាសនៅថ្ងៃទី១៩ វិច្ឆិកា នេះថា ភ្ញៀវទេសចរក្នុងស្រុកប្រមាណជាង ១៣ម៉ឺននាក់ បានចេញដើរកម្សាន្តតាមរមណីយដ្ឋាននានាក្នុងប្រទេសនៅថ្ងៃទីមួយនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។
រមណីយដ្ឋានទេសចរណ៍សំខាន់ៗក្នុងប្រទេសចំនួន ៦កន្លែងដែលជាគោលដៅសម្រាប់ភ្ញៀវក្នុងស្រុកដើរលេងកម្សាន្ត ក្នុងនោះ៖
- ខេត្តព្រះសីហនុ ជាខេត្តមានប្រជាប្រិយភាពសម្រាប់ឱកាសឈប់សម្រាកឆ្នាំនេះ គឺមានភ្ញៀវចូលលេងកម្សាន្តនៅថ្ងៃទី១៨ ខែវិច្ឆិកា ត្រូវនឹងថ្ងៃទីមួយក្នុងព្រះរាជពិធីបុណ្យអុំទូកនេះ គឺចំនួនជាង ១ម៉ឺន ៨ពាន់នាក់។
- ខេត្តកំពត ជាប់លំដាប់លេខ២ គឺមានភ្ញៀវជាង ១ម៉ឺន ៥ពាន់នាក់ចូលលេងកម្សាន្ត។
- ខេត្តសៀមរាប លំដាប់ទី៣ គឺមានភ្ញៀវទៅលេងកម្សាន្តជាង ១ម៉ឺន ៥ពាន់នាក់។
- ខេត្តពោធិ៍សាត់ និងខេត្តមណ្ឌលគិរី មានភ្ញៀវទៅលេងកម្សាន្តប្រមាណ ១ម៉ឺននាក់។
រដ្ឋមន្ត្រីក្រសួងទេសចរណ៍ លោក ថោង ខុន បានបង្ហាញការកត់សម្គាល់ថា ចរន្តភ្ញៀវទេសចរមានភាពផុសផុលនៅគ្រប់គោលដៅទេសចរណ៍ទាំងអស់ទូទាំងប្រទេស រាប់ទាំងគោលដៅទេសចរណ៍វប្បធម៌ តំបន់ឆ្នេរ អេកូទេសចរណ៍ កសិទេសចរណ៍ និងរមណីយដ្ឋានកែច្នៃបែបលក្ខណៈគ្រួសារ ជាដើម។ លោកថា តាមការវាយតម្លៃបឋម ភ្ញៀវទេសចរនឹងមានចំនួនកាន់តែច្រើននៅថ្ងៃទីពីរ និងទីបីនៃព្រះរាជពិធីបុណ្យអុំទូកនេះ។
រដ្ឋមន្ត្រីក្រសួងទេសចរណ៍ បានបន្តថា បើទោះបីជាពុំមានការប្រារព្ធពិធីបុណ្យអុំទូកនៅរាជធានីភ្នំពេញ ក៏ពលរដ្ឋនៅតែដើរកម្សាន្តច្រើននៅមុខព្រះបរមរាជវាំង ខណៈដែលកន្លែងខ្លះក៏មានការរៀបចំការប្រណាំងទូកខ្នាតតូច ដូចជានៅកោះប្រាក់ ស្រុកកៀនស្វាយ ក្នុងខេត្តកណ្តាល និងនៅបន្ទាយឆ្មារ ក្នុងខេត្តបន្ទាយមានជ័យ ជាដើម ស្របពេលដែលរដ្ឋបាលរាជធានី-ខេត្តបានតុបតែងលម្អទីរួមខេត្ត និងទីប្រជុំជននានាឲ្យមានសោភណភាពដើម្បីទាក់ទាញភ្ញៀវទេសចរ។
ប្រភពដដែលបញ្ជាក់ថា អត្រាកក់បន្ទប់ស្នាក់នៅតាមសណ្ឋាគារ និងផ្ទះសំណាក់ គឺមានច្រើន ជាពិសេសខេត្តគោលដៅសំខាន់ៗ ដូចជាខេត្តព្រះសីហនុ ខេត្តកែប ខេត្តកំពត ខេត្តសៀមរាប ខេត្តមណ្ឌលគិរី និងខេត្តរតនគិរី ជាដើម ខណៈមូលដ្ឋានអាជីវកម្មទេសចរណ៍កាន់តែច្រើនបានបើកដំណើរការទទួលភ្ញៀវទេសចរឡើងវិញ។
លោក ថោង ខុន បានបញ្ជាក់ទៀតថា រដ្ឋបាលរាជធានី-ខេត្ត និងមន្ទីរទេសចរណ៍ បានខិតខំប្រឹងប្រែងក្នុងការពង្រឹងការអនុវត្តវិធានការសុវត្ថិភាពទេសចរណ៍ SOP របស់ក្រសួងទេសចរណ៍ និងវិធានការសុខាភិបាលនានាក្នុងការទប់ស្កាត់ការរីករាលដាលជំងឺ Covid-19 ខណៈដែលភ្ញៀវទេសចរក៏បានចូលរួមទប់ស្កាត់បានល្អប្រសើរ ពិសេសតាមរយៈការបង្ហាញកាត ឬបណ្ណែចាក់វ៉ាក់សាំង។
អ្នកឃ្លាំមើលសង្គមបានឲ្យដឹងដែរថា ស្ថានភាពភ្ញៀវទេសចរបានចេញដើរកម្សាន្តក្នុងឱកាសនេះ ក៏ជាសញ្ញាបង្ហាញថា ចរន្តសេដ្ឋកិច្ចរបស់ប្រជាពលរដ្ឋចាប់ផ្ដើមដំណើរការឡើងវិញខ្លះៗហើយ បន្ទាប់ពីរដ្ឋាភិបាលបានបិទខ្ទប់អស់រយៈពេល ២ឆ្នាំដោយសារតែវិបត្តិរាលដាលជំងឺ Covid-19៕