លោក ហ៊ុន សែន ជំរុញឱ្យសមាជិកគណបក្សប្រជាជនកម្ពុជា ដែលកំពុងរស់នៅសហរដ្ឋអាមេរិក ងើបឡើងតវ៉ាដើម្បីសួរទៅអាមេរិកពីវិធានការដកសញ្ជាតិអាមេរិក ដូចការអះអាងរបស់លោក សម រង្ស៉ី មែនឬមិនមែន។
ការជំរុញរបស់លោក ហ៊ុន សែន ធ្វើឡើងនៅក្នុងពិធីដាក់សម្ពោធឱ្យប្រើប្រាស់ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ឬស្ពានភ្ជាប់និស្ស័យ នៅព្រឹកថ្ងៃទី២៣ ខែវិច្ឆិកា ឆ្នាំ២០២១ នេះ។ លោក ហ៊ុន សែន បង្ហាញការហួសចិត្តចំពោះការលើកឡើងរបស់លោក សម រង្ស៊ី ដែលព្រមានដកសញ្ជាតិអាមេរិកពីពលរដ្ឋខ្មែរដែលគាំទ្ររដ្ឋាភិបាលកម្ពុជា។ លោកចាត់ទុកការលើកឡើងរបស់លោក សម រង្ស៊ី ថាផ្ដាច់ការតាំងពីមិនទាន់ឡើងកាន់អំណាច។
លោក ហ៊ុន សែន បន្តថា មន្ត្រីខ្មែរនៅក្នុងជួររដ្ឋាភិបាលមួយចំនួនដែលកំពុងបម្រើការងាររៀងរាល់ថ្ងៃក៏មានសញ្ជាតិអាមេរិកដែរ ប៉ុន្តែបច្ចុប្បន្នមិនទាន់មានអ្នកណាម្នាក់ត្រូវរដ្ឋាភិបាលអាមេរិកដកសញ្ជាតិអាមេរិកនៅឡើយ។
ករណីនេះ លោក ហ៊ុន សែន ជំរុញឱ្យប្រជាពលរដ្ឋខ្មែរដែលជាសមាជិកសមាជិកាគណបក្សប្រជាជនកម្ពុជាកំពុងរស់នៅអាមេរិក ត្រូវងើបឈរឡើងធ្វើបាតុកម្មសួរទៅសមាជិកសភាសហរដ្ឋអាមេរិក ថាពិតជាដកសញ្ជាតិមែនឬអត់ បើដកមែនត្រូវរៀបចំបង្វេចមកស្រុកខ្មែរវិញ។
នៅថ្ងៃដដែលនេះដែរ លោកនាយករដ្ឋមន្ត្រី ហ៊ុន សែន ក៏បានចំអកឱ្យក្រុមប្រឆាំងដែលរិះគន់អំពីបញ្ហាសាំងឡើងថ្លៃ ដោយលោកជំរុញឱ្យអ្នកទាំងនោះមិនចាំបាច់ប្រើប្រាស់មធ្យោបាយធ្វើដំណើរទេ ហើយនាំគ្នាដើរដោយថ្មើរជើងល្អជាង។
មេដឹកនាំដែលក្រាញអំណាចជិត ៤០ឆ្នាំរូបនេះ បានហៅក្រុមអ្នករិះគន់ចំពោះដំណោះស្រាយនយោបាយលើសេវាសាំងឡើងថ្លៃនេះ ថាជាក្រុមដែលទិតៀនមិនចេះចប់ តែខ្លួនប្រើប្រាស់មធ្យោបាយធ្វើដំណើរមិនចេះឈប់ឈរ។
លោកអះអាងថា សាំងឡើងថ្លៃនេះមិនមែនតែកម្ពុជាមួយទេ ពោលប្រទេសនៅលើពិភពលោកទាំងអស់ ក៏ត្រូវប្រឈមមុខចំពោះការឡើងថ្លៃដូចគ្នានេះដែរ។ លោកបន្ថែមថា ប្រសិនបើអ្នកប្រឆាំងដែលទើសទាល់នឹងសាំងឡើងថ្លៃនេះ ពួកគេគួរឈប់ប្រើប្រាស់មធ្យោបាយធ្វើដំណើរដូចជាឡាន និងម៉ូតូតទៅទៀតទៅ។
លោកអះអាងថា មិនពេញចិត្តនឹងសាំងឡើងថ្លៃ ប៉ុន្តែនាំគ្នាសម្រុកដើរកម្សាន្តនៅថ្ងៃបុណ្យអុំទូក នាំឱ្យរថយន្តស្ទះផ្លូវស្ទើរធ្វើដំណើរទៅណាមិនរួច។
សេចក្តីប្រកាសព័ត៌មានរបស់ក្រសួងពាណិជ្ជកម្ម កាលពីថ្ងៃទី១៦ ខែវិច្ឆិកា ឱ្យដឹងថា ដើម្បីជួយសម្រួលជីវភាពពលរដ្ឋ និងដោយមានការរួមចំណែកពីក្រុមហ៊ុនចែកចាយប្រេងឥន្ធនៈនៅកម្ពុជាផង លោក ហ៊ុន សែន សម្រេចបញ្ចុះតម្លៃលក់រាយប្រេងឥន្ធនៈចំនួន ៤សេនដុល្លារក្នុងមួយលីត្រ។ សេចក្តីប្រកាសព័ត៌មានបន្តថា ការអនុវត្តនេះគិតចាប់ពីថ្ងៃទី១៦ ដល់ថ្ងៃទី៣០ ខែវិច្ឆិកា ឆ្នាំ២០២១។
បើទោះជាបែបណា លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ធ្លាប់បញ្ជាក់ថា សាំងឡើងថ្លៃនេះធ្វើឱ្យប៉ះពាល់ខ្លាំងសម្រាប់អ្នកដែលមានជីវភាពក្រីក្រ ជាពិសេសអ្នកដែលមានមុខរបរសេដ្ឋកិច្ចក្រៅប្រព័ន្ធ។ ការឡើងថ្លៃប្រេងឥន្ធនៈនេះ វាបានជំរុញឱ្យទំនិញសព្វសារពើនៅលើទីផ្សារក្នុងប្រទេសកម្ពុជា ក៏ត្រូវបង្ខំចិត្តឡើងទៅតាមនោះដែរ។
លោក វន់ ពៅ អះអាងថា អ្វីដែលចម្លែកសម្រាប់កម្ពុជា នៅត្រង់តម្លៃប្រេងឥន្ធនៈនៅលើទីផ្សារអន្តរជាតិធ្លាក់ចុះ តែតម្លៃប្រេងសាំងនៅកម្ពុជានៅតែលក់រាយក្នុងតម្លៃខ្ពស់ដដែល៕