ក្រសួងការបរទេសចិន បានកោះហៅឯកអគ្គរាជទូតជប៉ុន ប្រចាំនៅប្រទេសចិនភ្លាមៗឱ្យចូលរួមកិច្ចប្រជុំយ៉ាងបន្ទាន់មួយ អំពីសេចក្ដីថ្លែងការណ៍របស់អតីតនាយករដ្ឋមន្ត្រីជប៉ុន លោក ស៊ីនហ្សូ អាបេ ដែលបានប្រកាន់ជំហរការពារកោះតៃវ៉ាន់ និងការជំរុញឱ្យអាមេរិកចាប់ដៃជាមួយជប៉ុន ប្រឆាំងអន្តរភាពរបស់ចិន លើករណីកោះតៃវ៉ាន់។
អតីតនាយករដ្ឋមន្ត្រីជប៉ុន ដ៏មានឥទ្ធិពលរូបនេះបានថ្លែងនៅក្នុងវេទិកាមួយដែលត្រូវបានរៀបចំឡើងដោយវិទ្យាស្ថាននយោបាយនៅតៃវ៉ាន់ ហើយត្រូវបានស្រង់មកចុះផ្សាយដោយទីភ្នាក់ងារសារព័ត៌មាន Reuters កាលពីថ្ងៃទី១ ធ្នូ។
នៅក្នុងជំនួបជាមួយឯកអគ្គរាជទូតជប៉ុន លោក Hideo Tarumi ឧបការីរដ្ឋមន្ត្រីការបរទេសចិន អ្នកស្រី Hua Chunying បានហៅការថ្លែងរបស់លោក អាបេ ពាក់ព័ន្ធកោះតៃវ៉ាន់ ថាជាពាក្យសម្ដីខុសឆ្គង និងរំលោភលើបទដ្ឋានជាមូលដ្ឋាននៃទំនាក់ទំនងរវាងប្រទេសចិន និងជប៉ុន។
លោក ស៊ីនហ្សូ អាបេ បានថ្លែងតាមរយៈប្រព័ន្ធវីដេអូទៅកាន់វេទិកាថ្នាក់តំបន់មួយរៀបចំឡើងដោយវិទ្យាស្ថាននយោបាយរបស់តៃវ៉ាន់ ថា ប្រជុំកោះ Senkaku ដែលចិនហៅថា Diaoyu ស្ថិតនៅកៀកកោះតៃវ៉ាន់ ហើយក្នុងនោះដែនកោះ Sakishima និង Yonaguni មានចម្ងាយតែ ១០០គីឡូម៉ែត្រប៉ុណ្ណោះពីដែនកោះតៃវ៉ាន់។ លោក អាបេ បានសង្កត់ធ្ងន់ជុំវិញបញ្ហានេះថា ការវាយប្រហារណាមួយទៅលើកោះតៃវ៉ាន់ ក៏អាចបង្កគ្រោះថ្នាក់ធ្ងន់ធ្ងរទៅដល់ដែនកោះជប៉ុនទាំងនេះ ហើយចាំបាច់ជប៉ុនត្រូវតែឆ្លើយតប។
អតីតនាយករដ្ឋមន្ត្រីជប៉ុនរូបនេះបានថ្លែងទៀតថា គ្រាអាសន្នរបស់តៃវ៉ាន់ ក៏ដូចជាគ្រាអាសន្នរបស់ជប៉ុន ហើយក៏ជាគ្រាអាសន្នសម្រាប់សម្ពន្ធភាពរវាងជប៉ុន-អាមេរិកផងដែរ គឺជប៉ុន និងអាមេរិកត្រូវតែជួយកោះតៃវ៉ាន់។ លោកប្រាប់ទៅប្រជាជននៅទីក្រុងប៉េកាំង ជាពិសេសលោកប្រធានាធិបតី ស៊ី ជីនពីង ថា មិនគួរមានការយល់ច្រឡំក្នុងបញ្ហានេះឡើយ។
អតីតនាយករដ្ឋមន្ត្រីជប៉ុន លោក ស៊ីនហ្សូ អាបេ បានថ្លែងបើកទំព័រខែថ្មីនេះថា ប្រទេសជប៉ុន និងសហរដ្ឋអាមេរិក មិនគួរឈរនៅស្ងៀមនោះឡើយ ប្រសិនបើប្រទេសចិនវាយប្រហារកោះតៃវ៉ាន់។
សេចក្ដីថ្លែងការណ៍របស់លោក អាបេ បាននាំឱ្យមានប្រតិកម្ម ដោយចាត់ទុកលោក អាបេ ជាអ្នកបង្ករឿង និងរំលោភធ្ងន់ធ្ងរដល់អធិបតេយ្យភាពរបស់ចិន និងរំលោភគោលនយោបាយចិនតែមួយ។
បើតាមសេចក្តីថ្លែងការណ៍មួយនៃក្រសួងការបរទេសចិន ចេញផ្សាយនៅថ្ងៃព្រហស្បតិ៍ ទី២ ធ្នូ នេះគឺនៅចំពោះមុខឯកអគ្គរាជទូតជប៉ុន អ្នកស្រី Hua Chunying តំណាងឲ្យក្រសួងការបរទេសចិន បានឆ្លើយតបទៅវិញថា ការអត្ថាធិប្បាយរបស់លោក អាបេ គឺជាការប្រឆាំងដោយបើកចំហចំពោះអធិបតេយ្យភាពរបស់ប្រទេសចិន និងបានផ្តល់ការគាំទ្រយ៉ាងមុតមាំដល់កងកម្លាំងឯករាជ្យតៃវ៉ាន់ ដែលអ្នកស្រីថាប្រទេសចិនប្រឆាំងយ៉ាងដាច់ខាតចំពោះការលើកឡើងបែបនេះ។
ប្រទេសជប៉ុន គឺជាមូលដ្ឋានយោធារបស់សហរដ្ឋអាមេរិក ក្នុងនោះនៅលើកោះ Okinawa ដែលនៅក្បែរកោះតៃវ៉ាន់។
ប្រសិនបើសហរដ្ឋអាមេរិកជ្រើសរើសយកការការពារតៃវ៉ាន់ ក្នុងករណីដែលចិនបើកការវាយប្រហារទៅលើកោះដែលចិនថាជាខេត្តរបស់ខ្លួន គឺជាការរញ្ជួយដល់កោះ Okinawa។
ស្របពេលដែលសកម្មភាពយោធារបស់ចិន កាន់តែខ្លាំង រដ្ឋមន្ត្រីការពារជាតិអាមេរិក និងកូរ៉េខាងត្បូង ជួបពិភាក្សាគ្នាដើម្បីពង្រឹងសម្ពន្ធភាពដែលមើលទៅគឺជាការបង្ហាញកម្លាំងប្រឆាំងនឹងចិន។
តាមការចេញផ្សាយដោយទីភ្នាក់ងារសារព័ត៌មានកូរ៉េខាងត្បូង Yonhap រដ្ឋមន្ត្រីការពារជាតិអាមេរិក Lloyd Austin បានធ្វើដំណើរមកដល់ទឹកដីកូរ៉េខាងត្បូង និងជួបពិភាក្សាផ្ទាល់ជាមួយរដ្ឋមន្ត្រីការពារជាតិកូរ៉េខាងត្បូង លោក Su Wook នៅព្រឹកថ្ងៃព្រហស្បតិ៍ ទី០២ ខែធ្នូ។ បន្ទាប់ពីការជួបពិភាក្សា ប្រមុខការពារជាតិទាំងពីរប្រកាសចេញនូវការពង្រឹងសម្ពន្ធភាពយោធារាប់ទសវត្សរ៍រវាងប្រទេសទាំងពីរ។
លោក Lloyd Austin បានបង្ហាញការប្ដេជ្ញាជាថ្មីទៀតចំពោះការប្រើប្រាស់សមត្ថភាពយ៉ាងពេញលេញរបស់សហរដ្ឋអាមេរិក ដើម្បីការពារសុវត្ថិភាពកូរ៉េខាងត្បូង។
នៅមុនជួបពិភាក្សាជាមួយរដ្ឋមន្ត្រីការពារជាតិកូរ៉េខាងត្បូង លោក Lloyd Austin បានលើកឡើងថា សម្ពន្ធភាពរវាងអាមេរិក និងកូរ៉េខាងត្បូង គឺជាស្នូលនៃសន្តិភាព និងសន្តិសុខនៅក្នុងតំបន់នេះដែលលោកថាប្រទេសទាំងពីរត្រូវធ្វើការជាមួយគ្នា ដើម្បីឆ្ពោះទៅរកតំបន់ឥណ្ឌូ-ប៉ាស៊ីហ្វិកដែលសេរី និងបើកចំហ។ បច្ចុប្បន្ន សហរដ្ឋអាមេរិក មានកងទ័ពជិត ៣ម៉ឺននាក់នៅលើទឹកដីកូរ៉េខាងត្បូង។
នៅរយៈពេលចុងក្រោយនេះ សហរដ្ឋអាមេរិកកំពុងតែទាញប្រទេសកូរ៉េខាងត្បូងឱ្យក្លាយជាដៃគូនៃក្រុមចតុភាគីហៅថា Quad ដែលក្រុមនេះគឺជាកម្លាំងយោធាដ៏ធំមួយ គឺមានអាមេរិក ឥណ្ឌា ជប៉ុន និងអូស្ត្រាលី ហើយមើលទៅក្រុងសេអ៊ូល ក៏ពេញចិត្តផងដែរ។ គោលដៅរបស់សហរដ្ឋអាមេរិក គឺប្រមូលកម្លាំងយោធាដើម្បីទប់ទល់នឹងឥទ្ធិពលរបស់ចិន។ សម្រាប់កូរ៉េខាងត្បូង បើបានក្លាយជាដៃគូយោធារបស់ក្រុមចតុភាគីនេះ ក៏អាចជាកម្លាំងធំមួយទប់ទល់នឹងអំណាចយោធារបស់ប្រទេសកូរ៉េខាងជើងផងដែរ៕