ប្រជាសហគមន៍រងគ្រោះរាប់រយនាក់ បានមកជួបជុំគ្នានៅមុខសាលាដំបូងខេត្តកោះកុង ដើម្បីទាមទារឱ្យតុលាការទម្លាក់ចោលរាល់បទចោទលើតំណាងសហគមន៍របស់ពួកគេ ស្របពេលដែលតុលាការកោះហៅតំណាងពលរដ្ឋ ២នាក់ឱ្យចូលទៅបំភ្លឺនៅព្រឹកថ្ងៃពុធ ទី៨ ធ្នូ ក្រោមបទបរិហារកេរ្តិ៍ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។
នៅថ្ងៃទី៨ ខែធ្នូ ឆ្នាំ២០២១ ពលរដ្ឋរាប់រយនាក់មកពីសហគមន៍ចំនួន៧ ដូចជាសហគមន៍ក្រុម១៧៥ និងសហគមន៍ក្រុម៧៦៦ ក្នុងស្រុកស្រែអំបិល ស្រុកបុទុមសាគរ និងស្រុកថ្មបាំង ខេត្តកោះកុង បានប្រមូលផ្ដុំគ្នានៅមុខសាលាដំបូងខេត្តកោះកុង ដើម្បីបង្ហាញការគាំទ្រដល់តំណាងសហគមន៍របស់ពួកគេដែលបានចូលទៅបំភ្លឺនៅតុលាការ។
ពួកគេទាមទារឲ្យសាលាដំបូងខេត្តកោះកុង ទម្លាក់ចោលរាល់បទចោទទាំងអស់លើតំណាងសហគមន៍ទាំងពីរនាក់នោះ ព្រោះថាតំណាងសហគមន៍របស់ខ្លួនមិនបានប្រព្រឹត្តល្មើសទៅនឹងច្បាប់ណាមួយនោះទេ ប៉ុន្តែតុលាការបែរជាចោទប្រកាន់យ៉ាងអយុត្តិធម៌លើពួកគេទៅវិញ។
តំណាងពលរដ្ឋ ២នាក់ គឺអ្នកស្រី ផាវ ញ៉ើង និងអ្នកស្រី សេង លីន ត្រូវបានសាលាដំបូងខេត្តកោះកុង កោះហៅឱ្យចូលសវនាការឆ្លើយបំភ្លឺករណីចោទប្រកាន់ពីបទញុះញង់ឱ្យប្រព្រឹត្តអំពើបង្កឱ្យមានភាពវឹកវរដល់សន្តិសុខសង្គម និងបរិហារកេរ្តិ៍ជាសាធារណៈ នៅថ្ងៃទី៨ ខែធ្នូ ឆ្នាំ២០២១ ទៅតាមបណ្ដឹងរបស់អ្នកស្រី ឆាយ វី ដែលជាអតីតតំណាងសហគមន៍ដូចគ្នា។
កាលពីចុងឆ្នាំ២០១៩ ប្រជាសហគមន៍ ១៧៥គ្រួសារ ស្ថិតក្នុងឃុំជីខលើ ស្រុកស្រែអំបិល ខេត្តកោះកុង បានប្ដឹងទៅរដ្ឋមន្ត្រីក្រសួងមហាផ្ទៃ លោក ស ខេង ដោយចោទប្រកាន់អតីតតំណាងសហគមន៍ អ្នកស្រី ឆាយ វី ថាបានញុះញង់ឱ្យប្រជាពលរដ្ឋលក់ដីរបស់សហគមន៍ឱ្យទៅឧកញ៉ាមួយចំនួនក្នុងខេត្តកោះកុង ប៉ុន្តែត្រូវអតីតតំណាងសហគមន៍រូបនោះច្រានចោល និងប្ដឹងបកទៅតុលាការវិញ ដែលបានបន្តរឿងក្តីចោទប្រកាន់នោះរហូតដល់សព្វថ្ងៃនេះ។
មកទល់នឹងពេលនេះ សារព័ត៌មាន The Cambodia Daily នៅមិនទាន់អាចទាក់ទងអតីតតំណាងសហគមន៍ខេត្តកោះកុង អ្នកស្រី ឆាយ វី ដើម្បីបំភ្លឺពីការចោទប្រកាន់នេះបាននៅឡើយទេ៕