មេដឹកនាំខ្មែរដែលយោធាវៀតណាមលើកបន្តុប និងក្រាញអំណាចតត្រកូល លោក ហ៊ុន សែន អះអាងថា គណបក្សប្រជាជនកម្ពុជានឹងបើកសន្និបាតគណបក្សថ្នាក់ជាតិ ដើម្បីអនុម័តសម្រេចលើបេក្ខភាពបន្តវេនរបស់គណបក្ស និងក្បាលម៉ាស៊ីនគណៈរដ្ឋមន្ត្រីរបស់ខ្លួននៅចុងខែធ្នូ ឆ្នាំ២០២១ ខាងមុខនេះ។
អតីតកម្មាភិបាលខ្មែរក្រហមរូបនេះអះអាងក្នុងពិធីត្រួតពិនិត្យការដ្ឋានសាងសង់អាកាសយានដ្ឋានអន្តរជាតិភ្នំពេញថ្មី នៅថ្ងៃទី០៩ ខែធ្នូ ឆ្នាំ២០២១ នេះថា សមាជិកគណៈកម្មាធិការកណ្តាលគណបក្សកាន់អំណាច ត្រូវត្រៀមខ្លួនចូលរួមសន្និបាតគណៈកម្មាធិការកណ្តាល ដើម្បីអនុម័តសម្រេចកិច្ចការធំៗរបស់គណបក្ស ក្នុងនោះក៏នឹងត្រូវសម្រេចបេក្ខភាពនាយករដ្ឋមន្ត្រីបន្តវេនបន្ទាប់ពីរូបលោកផងដែរ នៅថ្ងៃទី២៤ ខែធ្នូ ឆ្នាំ២០២១ ខាងមុខនេះ។
កាលពីថ្ងៃទី២ ខែធ្នូ ឆ្នាំ២០២១ នេះ លោក ហ៊ុន សែន បានប្រកាសគាំទ្រកូនប្រុសច្បងរបស់លោក គឺលោក ហ៊ុន ម៉ាណែត ឱ្យឈរឈ្មោះជាបេក្ខភាពនាយករដ្ឋមន្ត្រី ប៉ុន្តែលោក ហ៊ុន សែន បញ្ជាក់ថា ការប្រកាសគាំទ្រនេះមិនមែនជាការប្រកាសរបស់គណបក្សនោះទេ គ្រាន់តែជាការបញ្ជាក់ជំហររបស់លោកម្នាក់ឯងក្នុងនាមជាប្រធានគណបក្សប៉ុណ្ណោះ។
ការប្រកាសបើកសន្និបាតបក្សកាន់អំណាចនេះ ធ្វើឡើងបន្ទាប់ពីអនុប្រធានបក្សកាន់អំណាច លោក ស ខេង ចេញលិខិតប្រកាសគាំទ្របេក្ខភាពលោក ហ៊ុន ម៉ាណែត កាលពីពេលថ្មីៗនេះ ប៉ុន្តែការសម្រេចចិត្តគាំទ្ររបស់លោក ស ខេង នេះហាក់បង្ហាញភាពអល់អែក ហើយត្រូវមើលឃើញថា ធ្វើឡើងក្រោយការគំរាមកំហែងពីលោក ហ៊ុន សែន តែប៉ុណ្ណោះ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី៩ ធ្នូ នេះថា លោក ហ៊ុន សែន មានការភ័យព្រួយយ៉ាងខ្លាំងថា តើត្រូវផ្ទេរអំណាចឱ្យកូនប្រុសរបស់លោកក្នុងពេលឆាប់ៗនេះ ឬក៏ត្រូវពន្យារពេលបន្តទៀត ដើម្បីធានាថាការផ្ទេរអំណាចនោះមានសុវត្ថិភាព មិនប៉ះពាល់ដល់គ្រឹះអំណាចរបស់លោកដែលខំកសាងរាប់សិបឆ្នាំមកហើយនោះ។
លោក គឹម សុខ អះអាងថា ការទាមទារឱ្យមានការធានាពីគណបក្សបែបនេះ គឺដើម្បីឱ្យលោក ហ៊ុន សែន ខ្លួនឯងកាន់តែមានទំនុកចិត្ត ព្រោះថាក្រោយពីលោក ហ៊ុន សែន ប្រកាសស្ទង់មតិរួចមក ផ្ទៃក្នុងគណបក្សកាន់អំណាចមិនមានការយល់គ្នាយ៉ាងខ្លាំង អំពីភាពមិនច្បាស់លាស់នៃអនាគតអ្នកជំនាន់ក្រោយពីក្រុមផ្សេងៗទៀតក្នុងគណបក្សនោះ ដែលអាចឈានទៅរកការផ្ទុះសង្គ្រាមដណ្ដើមកន្លែងកាន់កាប់អំណាចរៀងៗខ្លួនរបស់ពួកគេ។
អ្នកវិភាគរូបនេះបញ្ជាក់ថា ដើម្បីទប់ស្កាត់ការជ្រួលជ្រើមនៅផ្ទៃក្នុងបក្សរបស់ខ្លួន លោក ហ៊ុន សែន ត្រូវប្រើវិធីបង្ខំឲ្យគណបក្សរបស់ខ្លួនសម្រេចតាមបំណងរបស់គាត់ ទទួលយកលោក ហ៊ុន ម៉ាណែត មួយជំហានសិន។
លោកបន្តថា ការប្រកាសគាំទ្រកូនប្រុសរបស់គាត់ជាសាធារណៈកន្លងមក និងការប្រកាសធ្វើសង្គ្រាមជាមួយអ្នកមិនពេញចិត្តនឹងលោក ហ៊ុន ម៉ាណែត គឺជាល្បិចចាប់បង្ខំឱ្យគណបក្សកាន់អំណាចត្រូវតែយល់ព្រមនឹងបេក្ខភាពលោក ហ៊ុន ម៉ាណែត ដែលលោកបានជ្រើសរើស ដើម្បីបិទផ្លូវតវ៉ារបស់ក្រុមផ្សេងតែប៉ុណ្ណោះ៕