សកម្មជនសង្គម បរិស្ថាន សិទ្ធិមនុស្ស និងអតីតអ្នកសារព័ត៌មានវិទ្យុអាស៊ីសេរីផងសរុបចំនួន ២៧រូប បានទទួលពានរង្វាន់អ្នកការពារសិទ្ធិមនុស្សឆ្នើមពីក្រុមអង្គការសង្គមស៊ីវិល ដែលធ្វើការក្នុងវិស័យសិទ្ធិមនុស្សនៅកម្ពុជា ក្នុងឱកាសទិវាសិទ្ធិមនុស្ស ១០ ធ្នូ ឆ្នាំ២០២១ នេះ។
អង្គការសង្គមស៊ីវិល ៣១ស្ថាប័ន បានរួមគ្នារៀបចំទិវាសិទ្ធិមនុស្សអន្តរជាតិលើកទី៧៣ នៅទីលានប្រជាធិបតេយ្យ ស្ថិតក្នុងសង្កាត់ឫស្សីកែវ ខណ្ឌឫស្សីកែវ នៅព្រឹកថ្ងៃទី១០ ខែធ្នូ ឆ្នាំ២០២១ នេះ ក្រោមប្រធានបទ ស្ដារសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ក្រោមបរិបទ Covid-19 ដែលមានអ្នកចូលរួមប្រមាណជាង ២០០នាក់។
ទិវាសិទ្ធិមនុស្សក្រៅពីធ្វើឡើងនៅទីក្រុងភ្នំពេញ ក៏មានការរៀបចំទិវានេះនៅតាមបណ្ដាខេត្តមួយចំនួនទៀតផងដែរ។
អង្គការការពារសិទ្ធិមនុស្សលីកាដូ បានផ្សព្វផ្សាយក្នុងបណ្ដាញសង្គមរបស់ខ្លួននៅថ្ងៃទី១០ ធ្នូ នេះដែរថា សហគមន៍ដីធ្លី និងបរិស្ថាន សហគមន៍ជនជាតិដើមភាគតិច និងក្រុមសង្គមស៊ីវិលផ្សេងទៀត បានជួបជុំគ្នាដើម្បីប្រារព្ធទិវាសិទ្ធិមនុស្សអន្តរជាតិ នៅតាមបណ្ដាខេត្តចំនួន១១ផ្សេងគ្នា ចាប់ពីថ្ងៃទី០៥ ដល់ថ្ងៃទី១០ ខែធ្នូ ឆ្នាំ២០២១។
ប្រភពដដែលបានលើកឡើងថា បើទោះបីជាមានការធ្វើទុក្ខបុកម្នេញ និងរឹតត្បិតពីសំណាក់អាជ្ញាធរក៏ដោយ ប៉ុន្តែពលរដ្ឋប្រមាណជាង ២៤០០នាក់ បានចូលរួមជាមួយគ្នានៅក្នុងវេទិកាសាធារណៈ កិច្ចពិភាក្សា ការដង្ហែក្បួន និងពិធីសាសនា ដើម្បីអំពាវនាវដល់រដ្ឋាភិបាលឱ្យគោរពសិទ្ធិមនុស្ស និងដោះស្រាយករណីរំលោភយកដីធ្លីរបស់ពួកគាត់ ដែលបានអូសបន្លាយពេលជាច្រើនឆ្នាំ។
ក្រុមអ្នកចូលរួមក្នុងទិវាសិទ្ធិមនុស្សនៅឆ្នាំនេះ ក៏បានអំពាវនាវឱ្យរដ្ឋាភិបាលដោះលែង និងទម្លាក់ចោលការចោទប្រកាន់ទាំងអស់ប្រឆាំងនឹងអ្នកការពារសិទ្ធិមនុស្សដែលកំពុងជាប់ឃុំផងដែរ៕