សាលាដំបូងរាជធានីភ្នំពេញ បានចេញដីកាបង្គាប់ឲ្យលោក កឹម សុខា ប្រធានគណបក្សសង្គ្រោះជាតិ ចូលសវនាការនៅព្រឹកថ្ងៃទី១៩ ខែមករា ឆ្នាំ២០២២ ខាងមុខនេះ ក្នុងសំណុំរឿងបទចោទ សន្ទិដ្ឋិភាពជាមួយបរទេស។
សមាសភាពក្រុមប្រឹក្សាជំនុំជម្រះនៅក្នុងសវនាការនេះវិញរួមមាន លោក កូយ សៅ ប្រធានក្រុមប្រឹក្សាជំនុំជម្រះ លោក សេង លាង ចៅក្រមប្រឹក្សា លោក ធាម ច័ន្ទពិសិដ្ឋ ចៅក្រមប្រឹក្សា ហើយមានលោក ប្លង់ សុផល ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញជាតំណាងអយ្យការសវនាការ។
លោក ចាន់ ចេន សហមេធាវីការពារក្តីលោក កឹម សុខា បានប្រាប់សារព័ត៌មាន The Cambodia Daily ថា មេធាវីរបស់លោក កឹម សុខា ចំនួនបួននាក់នឹងចូលសវនាការនាពេលនោះជាមួយលោក កឹម សុខា។ មេធាវីបួននាក់នោះរួមមាន លោក ចាន់ ចេន លោក អាង ឧត្តម លោក ផែង ហេង និងអ្នកស្រី ម៉េង សុភារី។ លោក ចាន់ ចេន អះអាងថា ក្រុមមេធាវីរបស់លោកបានត្រៀមខ្លួនរួចរាល់ហើយក្នុងការការពារកូនក្តីរបស់ពួកគេនៅថ្ងៃទី១៩ ខែមករា ខាងមុខនេះ។
ក្នុងដីកាកោះហៅចុះថ្ងៃទី១៣ ខែធ្នូ ឆ្នាំ២០២១ ដែលចេញដោយតំណាងអយ្យការអមសាលាដំបូងរាជធានីភ្នំពេញ លោក ប្លង់ សុផល បានតម្រូវឱ្យលោក កឹម សុខា ត្រូវចូលរួមសវនាការក្នុងសំណុំរឿង «សន្ទិដ្ឋិភាពជាមួយបរទេស» នៅព្រឹកថ្ងៃទី១៩ ខែមករា ឆ្នាំ២០២២ ជាកំហិត។
លោក កឹម សុខា ដែលរងការចោទប្រកាន់ពីបទ «ត្រូវរ៉ូវជាមួយបរទេសចង់ផ្ដួលរំលំរដ្ឋាភិបាល» ត្រូវបានតុលាការរាជធានីភ្នំពេញបើកការជំនុំជម្រះកាលពីអំឡុងខែមករា ឆ្នាំ២០២០ និងបានបន្តនីតិវិធីរហូតមកដល់ចុងខែមីនា ឆ្នាំ២០២០ ហើយសវនាការនេះត្រូវបានតុលាការសម្រេចផ្អាករហូតមក ក្រោមហេតុផលទប់ស្កាត់ការឆ្លងរីករាលដាលនៃជំងឺ Covid-19។
ក្រោយពីសវនាការបានផ្អាកនោះ ក្រុមមេធាវីរបស់លោក កឹម សុខា បានដាក់លិខិតទៅតុលាការ ដើម្បីស្នើសុំឱ្យបន្តនីតិវិធី ប៉ុន្តែលិខិតនោះត្រូវបានតុលាការបដិសេធរហូត។
ប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ (PMD) លោក ម៉ែន ណាត បានសរសេរនៅលើទំព័រ Facebook ដោយចាត់ទុកសំណុំរឿងរបស់លោក កឹម សុខា ជារឿងនយោបាយ។
លោកអំពាវនាវឱ្យតុលាការទម្លាក់ចោលបទចោទប្រកាន់លើប្រធានគណបក្សប្រឆាំង លោក កឹម សុខា ជាស្ថាពរដើម្បីឈានទៅរកដំណោះស្រាយបញ្ហារបស់ជាតិរួមគ្នា និងបញ្ចប់បញ្ហាវិបត្តិនានានៅកម្ពុជា។ លើសពីនេះ លោកជំរុញឱ្យតុលាការ និងរដ្ឋាភិបាល ទម្លាក់ចោលបទចោទទៅលើអ្នកនយោបាយផ្សេងទៀតផងដែរ។
គិតមកដល់បច្ចុប្បន្ននេះ មានរយៈពេល ៤ឆ្នាំមកហើយដែលសេរីភាពធ្វើនយោបាយរបស់លោក កឹម សុខា ត្រូវបានបាត់បង់ទាំងស្រុង ចាប់តាំងពីសមត្ថកិច្ចចាប់ខ្លួនលោកកាលពីថ្ងៃទី៣ ខែកញ្ញា ឆ្នាំ២០១៧ ហើយយកទៅដាក់គុកត្រពាំងផ្លុង ក្នុងខេត្តត្បូងឃ្មុំ ជាប់ព្រំដែនប្រទេសវៀតណាម៕