សហមេធាវីការពារក្តីឱ្យប្រធានគណបក្សសង្គ្រោះជាតិ លោក កឹម សុខា លើកឡើងថា ស្ថានភាពនយោបាយនៅកម្ពុជាពេលនេះ មានក្រុមអ្នកនយោបាយបញ្ឆោត និងក្រុមអ្នកនយោបាយបញ្ឆេះ ដែលកំពុងតែយកឈ្មោះមេដឹកនាំបក្សប្រឆាំង លោក កឹម សុខា ទៅឃោសនាដើម្បីបោកប្រាស់ម្ចាស់ឆ្នោត។
មេធាវីការពារក្តីឱ្យប្រធានបក្សប្រឆាំង លោក ចាន់ ចេន បានសរសេរលើគណនី Facebook របស់ខ្លួននៅថ្ងៃទី២០ ធ្នូ នេះថា ក្រុមអ្នកនយោបាយបញ្ឆោត និងបញ្ឆេះទាំងនោះតែងវាយប្រហារ ជេរប្រមាថ មួលបង្កាច់ បន្តុះបង្អាប់ប្រធានគណបក្សសង្គ្រោះជាតិ លោក កឹម សុខា ថាប្រជាពលរដ្ឋលែងគាំទ្រទៀតហើយ សូម្បីតែលោក កឹម សុខា ជួបអង្គទូតតំណាងរបស់ប្រទេសនានា ក៏ពួកគេថាជាការងារអត់ប្រយោជន៍ដែរ។
លោក ចាន់ ចេន រិះគន់ថា ដោយសារពួកគេចង់កេងចំណេញនយោបាយខ្លាំងពេក ក្រោយការបន្តុះបង្អាប់លោក កឹម សុខា មិនបានផលអ្វី ក៏នាំគ្នាកុហកពលរដ្ឋខ្មែរថា ពួកគេបង្កើតបក្សដើម្បីរង់ចាំលោក កឹម សុខា ចូលរួមដឹកនាំ ពីព្រោះពួកគេមិនបានបែកចេញពីលោក កឹម សុខា នោះទេ ហើយពួកគេក៏ចង់ជួបអង្គទូតនៃប្រទេសនានាដូចលោក កឹម សុខា ដែរ។
លោក ចាន់ ចេន បញ្ជាក់ថា ការលើកឡើងរបស់អ្នកនយោបាយទាំងនោះ ជាការបង្ហាញថា ពួកគេកំពុងតែទទួលស្គាល់នូវគុណតម្លៃរបស់លោក កឹម សុខា ផងដែរ។
មេធាវីការពារក្តីរូបនេះ ចោទជាសំណួរថា បើពួកគេគិតថាលោក កឹម សុខា អស់ប្រជាប្រិយជាមេដឹកនាំហើយនោះ ហេតុអ្វីក៏នៅតែយកឈ្មោះគាត់ទៅភ្ជាប់ជាមួយក្រុមខ្លួន ដើម្បីកុហកពលរដ្ឋបែបនេះ? ម្យ៉ាងវិញទៀត បើពួកគេរិះគន់ថា នយោបាយការទូតរបស់លោក កឹម សុខា ឥតប្រយោជន៍ ហេតុអ្វីពួកគេចង់ជួបតំណាងអង្គទូតទាំងនោះដូចលោក កឹម សុខា ដែរ?
ការរិះគន់នេះ ធ្វើឡើងដើម្បីទិតៀនគណបក្សនយោបាយមួយចំនួនដែលតែងកុហកភូតភរពលរដ្ឋ ថាគណបក្សរបស់ពួកគេមានលោក កឹម សុខា នៅពីក្រោយ ឬបង្កើតឡើងដើម្បីរង់ចាំលោក កឹម សុខា មកដឹកនាំ ជាដើម។
ប្រធានគណបក្សកម្ពុជានិយម លោក យ៉ែម បុញ្ញឫទ្ធិ ធ្លាប់បានប្រាប់សារព័ត៌មានក្នុងស្រុកមួយឈ្មោះ ខ្មែរថាមស៍ (Khmer Times) ថា លោកស្វាគមន៍លោក កឹម សុខា ឲ្យចូលរួមជាមួយគណបក្សរបស់លោកនៅឆ្នាំ២០២៣ ខាងមុខ នៅពេលដែលលោក កឹម សុខា អាចចូលរួមក្នុងសកម្មភាពនយោបាយឡើងវិញម្តងទៀត។
ជុំវិញបញ្ហាស្រដៀងគ្នានេះ បើទោះជាអតីតមេដឹកនាំបក្សប្រឆាំង លោក សម រង្ស៊ី បានសម្រេចចេញទៅគាំទ្រគណបក្សចាស់របស់លោកវិញ គឺបក្សភ្លើងទៀន ហើយក៏ដោយ ប៉ុន្តែអតីតមេបក្សប្រឆាំងរូបនេះនៅតែឃោសនាទៅកាន់អ្នកគាំទ្រគណបក្សសង្គ្រោះជាតិថា ស្មារតីរួបរួម សម រង្ស៊ី និង កឹម សុខា គឺនៅដដែល។
យ៉ាងណាក៏ដោយ កូនស្រីច្បងប្រធានគណបក្សសង្គ្រោះជាតិ កញ្ញា កឹម មនោវិទ្យា ធ្លាប់បានលើកឡើងថា ការចោទប្រកាន់របស់លោក សម រង្ស៊ី និងបក្ខពួករបស់គាត់មកលើលោក កឹម សុខា តាំងពីឆ្នាំ២០០៧ រហូតមកដល់ពេលនេះ គឺក្នុងបំណងកាច់បំបាក់លោក កឹម សុខា ដោយភាពច្រណែនរបស់លោក សម រង្ស៊ី តែប៉ុណ្ណោះ។
ក្រុមអ្នកឃ្លាំមើលសង្គម លើកឡើងថា លោក កឹម សុខា បានពុះពារគ្រប់ឧបសគ្គជាច្រើនដើម្បីលុបបំបាត់គំនុំព្យាបាទសងសឹករវាងខ្មែរនិងខ្មែរ រវាងបុគ្គលនិងបុគ្គល ដោយការចាប់ផ្តើមពីខ្លួនលោកផ្ទាល់ក្នុងការធ្វើជាគំរូ ដើម្បីសម្របសម្រួលនយោបាយជាតិឆ្ពោះទៅរកការផ្សះផ្សា និងបង្រួបបង្រួមជាតិខ្មែរទាំងមូលទៅថ្ងៃមុខ៕