ក្រុមសកម្មជនបរិស្ថាន និងបណ្ដាញសហគមន៍ព្រៃឡង់ បានឲ្យដឹងថា សកម្មភាពរបស់កម្មករក្រុមហ៊ុនវៀតណាមមួយឈ្មោះ PNT មានទីតាំងនៅក្នុងឃុំរៀបរយ ស្រុករវៀង ខេត្តព្រះវិហារ កំពុងតែធ្វើសកម្មភាពកាប់ឈើ និងដឹកជញ្ជូនពីតំបន់ព្រៃឡង់ចូលទៅក្រុមហ៊ុនយ៉ាងសកម្មជារៀងរាល់ថ្ងៃ។
ប្រជាសហគមន៍ដែលបានចុះល្បាតតំបន់ព្រៃឡង់ កាលពីពេលថ្មីៗនេះបានឲ្យដឹងថា ក្រុមកម្មកររបស់ក្រុមហ៊ុនវៀតណាម PNT ទាំងនោះ ពួកគេធ្វើសកម្មភាពទាំងយប់ទាំងថ្ងៃ រួចដឹកជញ្ជូនឈើចេញពីតំបន់ព្រៃឡង់ចូលទៅក្នុងក្រុមហ៊ុននេះតែម្ដង។
ប្រជាសហគមន៍លើកឡើងថា ឈើមានតម្លៃជាច្រើនប្រភេទ រួមមាន គគីរ ឈើទាល ស្រឡៅ កកោះ និងពពេល ដែលមានមុខកាត់ចាប់ពី ៣តឹកដល់ ៦តឹក ប្រវែង ៣ម៉ែត្រឡើងទៅស្ថិតក្នុងដែនជម្រកសត្វព្រៃឡង់ កំពុងត្រូវបានកាប់ផ្តួលដើម្បីធ្វើអាជីវកម្មខុសច្បាប់។
យុវជន ស្រី ទីន បានប្រាប់សារព័ត៌មាន The Cambodia Daily ឲ្យដឹងថា ពេលបច្ចុប្បន្ននេះ ក្រុមហ៊ុន និងមន្ត្រីរបស់ក្រសួងបរិស្ថាន ហាក់បីដូចជាកំពុងតែសហការគ្នាក្នុងការកាប់បំផ្លាញព្រៃឈើនៅតំបន់ព្រៃឡង់ ដោយមន្ត្រីទាំងនោះមិនត្រឹមតែមិនបានទប់ស្កាត់ក្រុមអ្នកកាប់ឈើប៉ុណ្ណោះទេ តែបែរជាមកតាមដាន និងគំរាមកំហែងអ្នកការពារព្រៃឈើទៅវិញ។
លោកបន្ថែមទៀតថា ព្រៃឈើនៅតំបន់ព្រៃឡង់មាន ៩ទីតាំងផ្សេងគ្នាដែលក្រុមកម្មករទាំងនោះកំពុងកាប់រំលំដើមឈើ រួមមានបុស្សរាំង ជ្រាប់ក្បាលដំរី ស្រែកណ្ដាល អូរអាចម៍ដែក ភូមិចាស់ ភ្នំចោទ ប្រាសាទគោល ព្រៃស្រឡៅ និងស្រែតាង៉ុត។ លោកបន្ថែមថា តាមការកត់សម្គាល់ គឺសកម្មភាពទាំងនោះពួកគេប្រើប្រាស់គោយន្ត ២៧គ្រឿង រួមទាំងរថយន្តអារ៉េវ សម្រាប់ដឹកឈើហុបធំៗ ៣គ្រឿងថែមទៀត ហើយក្រុមកម្មករទាំងនោះធ្វើសកម្មភាពទាំងយប់ទាំងថ្ងៃ។
ក្រុមហ៊ុន ភីអ៊ិនធី (PNT Co., Ltd.) ទទួលបានដីសម្បទានសេដ្ឋកិច្ចពីរដ្ឋាភិបាលទំហំជិត ៨ពាន់ហិកតារ (៧៩០០ហិកតារ) នៅស្រុករវៀង ខេត្តព្រះវិហារ កាលពីឆ្នាំ២០១០ ក្រោមកិច្ចសន្យារយៈពេល ៧០ឆ្នាំ។ ក្រុមហ៊ុននេះមានម្ចាស់ជាជនជាតិវៀតណាម ឈ្មោះ ផាន់ ហួណាម (Phan Huu Nam)។
ក្នុងកិច្ចសន្យា ក្រុមហ៊ុននេះវិនិយោគដំណាំខ្លឹមចន្ទន៍ ចន្ទី និងដំណាំរួមផ្សំផ្សេងៗទៀត ប៉ុន្តែប្រជាសហគមន៍អះអាងថា ក្រុមហ៊ុនមិនបានដាំដុះតាមកិច្ចសន្យានោះទេ ផ្ទុយទៅវិញគឺពួកគេបានផ្ដោតលើការកាប់ឈើតែប៉ុណ្ណោះ។
កាលពីចុងឆ្នាំ២០២០ ប្រជាសហគមន៍ព្រៃឡង់ប្រទះឃើញឈើមូលធំៗជាង ៥០០ដើមត្រូវគេកាប់ចេញពីដីស្រែចម្ការរបស់ពលរដ្ឋ និងដឹកជញ្ជូនចូលក្នុងការដ្ឋានរបស់ក្រុមហ៊ុន PNT ជាបន្តបន្ទាប់ ដើម្បីអារច្រៀកធ្វើអាជីវកម្ម៕