គណៈកម្មាធិការកណ្តាលរបស់គណបក្សកាន់អំណាចដែលមានដើមកំណើតពីបក្សកុម្មុយនីស្តវៀតណាម បានសម្រេចជាឯកច្ឆន្ទគាំទ្រកូនប្រុសច្បងលោក ហ៊ុន សែន គឺលោក ហ៊ុន ម៉ាណែត ជាផ្លូវការឱ្យជាប់ជាបេក្ខភាពនាយករដ្ឋមន្ត្រីបន្តពីឪពុករបស់ខ្លួនទៅថ្ងៃមុខ ក្រោយពេលលោក ហ៊ុន សែន បើកការគំរាមកំហែងលើអស់មន្ត្រីកុំឲ្យមានការជំទាស់ផែនការរបស់លោក។
គណៈកម្មាធិការកណ្តាលរបស់គណបក្សកាន់អំណាច បានចេញសេចក្តីជូនដំណឹងនៅថ្ងៃសុក្រ ចុងសប្តាហ៍នេះថា ក្នុងសន្និបាតគណៈកម្មាធិការកណ្តាលរបស់ខ្លួន ក៏បានសម្រេចជ្រើសតាំងលោក ទៀ បាញ់ និងអ្នកស្រី ម៉ែន សំអន ជាអនុប្រធានគណបក្សក្នុងពេលបច្ចុប្បន្ននេះបន្ថែមលើចំនួនអនុប្រធានបក្សដែលមានស្រាប់ និងគាំទ្រលោក ហ៊ុន សែន ជាបេក្ខភាពនាយករដ្ឋមន្ត្រីសម្រាប់អាណត្តិបន្តបន្ទាប់ទៀត ព្រមទាំងបោះឆ្នោតគាំទ្រឱ្យលោក ហ៊ុន ម៉ាណែត ធ្វើជាបេក្ខភាពនាយករដ្ឋមន្ត្រីបន្តតំណែងពីលោក ហ៊ុន សែន នៅថ្ងៃអនាគតផងដែរ។
ការសម្រេចបោះឆ្នោតជ្រើសរើសកូនប្រុសមេដឹកនាំបក្សកាន់អំណាចឱ្យធ្វើជាបេក្ខជននាយករដ្ឋមន្ត្រីបន្តពីឪពុករបស់ខ្លួនបែបនេះ ត្រូវគេមើលឃើញថា មិនមែនជាឆន្ទៈពិតប្រាកដរបស់សមាជិកគណៈកម្មាធិការកណ្តាលទាំងនោះទេ ប៉ុន្តែដោយសារមានការគំរាមកំហែង និងការទិញទឹកចិត្តពីលោក ហ៊ុន សែន តែប៉ុណ្ណោះ។
ក្រៅពីការតែងតាំងមនុស្សថ្មីបន្តវេនក្នុងបរិយាកាសរបស់គណបក្សប្រជាជនកម្ពុជា ហាក់អាប់អួរបន្តិចក្នុងការលើកឲ្យលោក ហ៊ុន ម៉ាណែត ធ្វើប្រធានគណបក្ស និងជាបេក្ខជននាយករដ្ឋមន្ត្រីនៅថ្ងៃអនាគតបន្តតំណែងត្រកូល ហ៊ុន នោះ គឺមានតែងតាំងលោក ស សុខា កូនប្រុសរបស់លោក ស ខេង និងលោក សាយ សំអាល់ កូនប្រុសរបស់លោក សាយ ឈុំ និងជាកូនប្រសារបស់លោក ឌិត មន្ទី ឲ្យធ្វើជាអនុប្រធានគណបក្សប្រជាជនកម្ពុជានៅពេលអនាគតផងដែរ។
នៅមុនសន្និបាតកើតឡើងនៅពេលនេះ លោក ហ៊ុន សែន បានប្រកាសហើយថា លោកនិងមនុស្សសំខាន់ៗមួយចំនួននៅក្នុងគណបក្សប្រជាជនកម្ពុជា ក្នុងនោះមានទាំងលោក ស ខេង និងលោក ទៀ បាញ់ ផង បានជួបគ្នាមុនអ្វីដែលលោក ហ៊ុន សែន ចាត់ទុកថាវាជាការពិគ្រោះយោបល់ និងរកវិធីដើម្បីដោះស្រាយវិបត្តិកើតឡើងប្រសិនបើអត់ពីលោកទៅ។
លើសពីនេះទៅទៀត នៅមុនមួយថ្ងៃនៃអង្គសន្និបាតជ្រើសរើសបេក្ខភាពនាយករដ្ឋមន្ត្រី និងកំណែទម្រង់ផ្ទៃក្នុងបក្ស គេក៏សង្កេតឃើញវត្តមានប្រធានាធិបតីនៃប្រទេសវៀតណាម ក៏បានមកបំពេញទស្សនកិច្ចនៅកម្ពុជាដែរ។ នៅក្នុងដំណើរទស្សនកិច្ចដ៏កម្ររបស់លោក ង្វៀន ស៊ួនហ្វុក (Nguyen Xuan Phuc) នេះ ត្រូវគេមើលឃើញថា ហាក់ជាប់ជួននៃអង្គសន្និបាតរបស់បក្សប្រជាជនកម្ពុជា ដែលគ្រោងនឹងរៀបចំឡើងនៅថ្ងៃទី២៤ ខែធ្នូ នេះ។
បើទោះជាបែបណា នៅក្នុងដំណើរបំពេញទស្សនកិច្ចនេះ លោក ហ៊ុន សែន បាននាំកូនប្រុសរបស់លោកទាំង ៣នាក់ ផ្តល់ការស្វាគមន៍ជាលក្ខណៈគ្រួសារនៅគេហដ្ឋានរបស់លោក មុននឹងពិធីជ្រើសរើសកូនប្រុសច្បងរបស់លោកមកដល់។
ស្ថិតក្រោមហេតុផលនេះហើយដែលអ្នកវិភាគមើលឃើញថា លោក ហ៊ុន ម៉ាណែត អាចនឹងយកគំរូនៃការដឹកនាំតាមបែបឪពុករបស់លោក និងផ្ដាច់ការ ប្រសិនបើពិតជាក្លាយជានាយករដ្ឋមន្ត្រីនៅថ្ងៃអនាគតមែន។
ប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២៤ ធ្នូ នេះថា លោកសូមអបអរសាទរលោក ហ៊ុន សែន ដែលបានសម្រេចបំណងក្នុងការតែងតាំងកូនរបស់គាត់ជានាយករដ្ឋមន្ត្រីបន្តវេន ដែលគាត់ប៉ងប្រាថ្នាជាយូរមកហើយនោះ ប៉ុន្តែការតែងតាំងបេក្ខភាពនាយករដ្ឋមន្ត្រីរបស់បក្សនេះ ទោះជាធ្លាក់ទៅលើមន្ត្រីមួយណាក៏ដោយក្នុងបក្សនោះ មិនមែនដើម្បីរកផលប្រយោជន៍ជូនជាតិនោះទេ គឺដើម្បីតែរកផលប្រយោជន៍ឱ្យគណបក្ស និងបក្ខពួករបស់ពួកគេតែប៉ុណ្ណោះ។
លោក ម៉ែន ណាត បញ្ជាក់ថា អ្វីដែលពលរដ្ឋខ្មែរត្រូវការ គឺគណបក្សនយោបាយមួយដែលដឹកនាំប្រទេសទៅរកការរក្សាអធិបតេយ្យភាព បូរណភាពទឹកដី និងឯករាជ្យជាតិរបស់ខ្លួន។ ប៉ុន្តែអ្វីដែលមេដឹកនាំកាន់អំណាចបច្ចុប្បន្ន និងអ្នកបន្តវេនកាន់កាប់អំណាចនៅថ្ងៃអនាគតរបស់បក្សដែលមានសារជាតិមកពីបក្សកុម្មុយនីស្តនោះ គឺដើម្បីតែថែរក្សាអំណាច និងពឹងបរទេសឱ្យជួយជ្រោមជ្រែងអំណាចខ្លួនឯងតាមរយៈការសម្បទានទឹកដីកម្ពុជា ក្នុងរូបភាពមិត្តភាពម៉ឺនឆ្នាំ ឬមិត្តដែកថែបតែប៉ុណ្ណោះ។
កាលពីដើមខែធ្នូ ឆ្នាំ២០២១ មេដឹកនាំបក្សកាន់អំណាចដែលវៀតណាមលើកបន្តុប លោក ហ៊ុន សែន គំរាមថា អ្នកដែលចង់ដណ្តើមតំណែងធ្វើជាបេក្ខភាពនាយករដ្ឋមន្ត្រីពីកូនប្រុសរបស់លោក ត្រូវតែធ្វើឃាតលោកជាមុនសិន ហើយបុរសខ្លាំងនៅកម្ពុជារូបនេះគំរាមថា អ្នកដែលប៉ុនប៉ងធ្វើឃាតលោក ពួកគេក៏មិនមានជីវិតរស់នៅដែរ ហើយសង្គ្រាមច្បាស់ជានឹងផ្ទុះឡើងជាមិន៕