34 C
Phnom Penh

លោក ហ៊ុន សែន ធ្វើ​ទស្សនកិច្ច​នៅ​ភូមា​ស្រប​ពេល​ពលរដ្ឋ​ប្រឆាំង​របប​សឹក​មិន​ពេញ​ចិត្ត

ដោយ ឌឹ ខេមបូឌា ដេលី

បទវិភាគ

ប្រមុខ​រដ្ឋាភិបាល​កម្ពុជា លោក ហ៊ុន សែន បាន​ទៅដល់​ប្រទេស​ភូមា ក្នុង​ដំណើរ​ទស្សនកិច្ច​ស្វះស្វែង​រក​ការ​ផ្សះផ្សា​សម្របសម្រួល​នយោបាយ​របស់​ប្រទេស​ភូមា នៅ​ថ្ងៃ​សុក្រ ទី​៧ មករា នេះ ដូច​អ្វី​ដែល​លោក​បាន​គ្រោង​ទុក។ ប៉ុន្តែ​បេសកកម្ម​របស់​លោក ហ៊ុន សែន នៅ​ពេលនេះ រង​ការ​រិះគន់ និង​បង្ហាញ​ពី​ការ​មិន​សប្បាយ​ចិត្ត​របស់​ពលរដ្ឋ​ភូមា​ដែល​ស្រឡាញ់​លទ្ធិប្រជាធិបតេយ្យ ហើយ​ប្រឆាំង​នឹង​របប​យោធា​របស់​លោក មីន អ៊ុងឡាំង។

តាម​សេចក្ដី​ប្រកាស​ព័ត៌មាន​របស់​ក្រសួង​ការបរទេស​កម្ពុជា ឱ្យ​ដឹង​ថា ដំណើរ​ទស្សនកិច្ច​រយៈពេល ២​ថ្ងៃ​របស់​នាយករដ្ឋមន្ត្រី​កម្ពុជា នឹង​លើកឡើង​អំពី​កិច្ចសហប្រតិបត្តិការ​ទ្វេភាគី និង​ពហុភាគី​ជាមួយ​លោក មីន អ៊ុងឡាំង ព្រមទាំង​ផ្ដោត​ទៅលើ​ការ​វិវឌ្ឍ​ថ្មីៗ​នៅ​ក្នុង​តំបន់​អាស៊ាន​ផង​ដែរ។

សារព័ត៌មាន​របស់​ភូមា​ឈ្មោះ Mynamar Now បាន​រាយការណ៍​ថា កិច្ចខិតខំ​ប្រឹងប្រែង​របស់​លោក ហ៊ុន សែន ជួយ​ដល់​មេ​រដ្ឋប្រហារ​យោធា​ភូមា នៅ​ពេលនេះ ដើម្បី​ឲ្យ​មាន​សិទ្ធិ​ពេញលេញ​ចូល​ទៅ​ក្នុង​កិច្ចប្រជុំ​កំពូល​អាស៊ាន វា​គឺជា​ការ​ប្រមាថ​ដល់​ប្រជាជន​ភូមា។ ប្រភព​ដដែល​បន្ត​ថា វត្តមាន​នៃ​ប្រតិភូ​ពី​កម្ពុជា មាន​ន័យ​ថា ជា​ការ​គាំទ្រ​ទៅ​របប​សឹក​យោធា​ភូមា ដែល​ពិភពលោក​កំពុង​ថ្កោលទោស។

ក្នុង​ដំណើរ​ទស្សនកិច្ច​របស់​លោក ហ៊ុន សែន ដែល​ពលរដ្ឋ​ភូមា​ស្វាគមន៍​ក្នុង​ស្ថានភាព​អាប់អួ​នេះ បើ​តាម​ការ​ផ្សាយ​ក្នុង​បណ្ដាញ​សង្គម​របស់​ទូរទស្សន៍​ជាតិ​កម្ពុជា តាំងពី​ចាប់ផ្ដើម​ចេញ​ដំណើរ​រហូត​ដល់​ចុះចត​យន្តហោះ​នៅ​ភូមា គឺ​ពលរដ្ឋ​ភូមា​បាន​បញ្ចេញមតិ​យោបល់ ឬ Comments ដោយ​រិះគន់​ខ្លាំងៗ​សម្ដែង​ការ​មិន​ពេញចិត្ត មិន​ស្វាគមន៍​ចំពោះ​ដំណើរ​នេះ​ឡើយ។ Comments ខ្លះ​បាន​ចោទប្រកាន់​ថា ដំណើរ​ទស្សនកិច្ច​របស់​ប្រមុខ​រដ្ឋាភិបាល​កម្ពុជា គឺជា​ការ​គាំទ្រ​ឲ្យ​មាន​របប​វាល​ពិឃាត​នៅ​ប្រទេស​ភូមា ដូច​ដែល​កម្ពុជា ធ្លាប់​មាន។

នាយក​ប្រតិបត្តិ​នៃ​អង្គការ​ឃ្លាំមើល​សិទ្ធិមនុស្ស Human Rights Watch លោក Kenneth Roth កាលពី​ថ្ងៃ​ទី​៦ មករា បាន​សរសេរ​នៅ​លើ​បណ្ដាញ​សង្គម​ធ្វីតធើ (Twitter) ថា វា​អាក្រក់​ណាស់​ទៅ​ហើយ​ដែល​នាយករដ្ឋមន្ត្រី​កម្ពុជា លោក ហ៊ុន សែន ក្នុង​នាម​តំណាង​អាស៊ាន​ទៅ​ជួប​មេ​រដ្ឋប្រហារ​នៅ​ពេល​ដែល​របប​សឹក​ភូមា មិន​ឲ្យ​លោក ហ៊ុន សែន ជួប​មេដឹកនាំ​ប្រជាធិបតេយ្យ​ដែល​កំពុង​ត្រូវ​បាន​ឃុំ​ខ្លួន ដូចជា​អ្នកស្រី អ៊ុងសាន ស៊ូជី ជាដើម​នោះ។

គេ​នៅ​មាន​ការ​ព្រួយ​បារម្ភ​អំពី​ភាព​លម្អៀង​របស់​លោក ហ៊ុន សែន ជាមួយ​នឹង​ពួក​យោធា​ភូមា​ទៅ​លើ​ការ​អនុវត្ត​កុងសង់ស៊ីស ៥​ចំណុច​របស់​មេដឹកនាំ​អាស៊ាន ដែល​បាន​ឯកភាព​គ្នា​នៅ​ក្នុង​កិច្ចប្រជុំ​កាលពី​ខែ​មេសា ឆ្នាំ​២០២១ កន្លងទៅ ដោយ​ប្រាប់​យោធា​ភូមា​ត្រូវ​បញ្ចប់​ហិង្សា និង​ស្ដារ​ប្រជាធិបតេយ្យ​ឡើងវិញ​តាមរយៈ​ការ​ចរចា​រវាង​ពួក​យោធា និង​ភាគី​ពាក់ព័ន្ធ​ទាំងអស់។

សមាជិក​ក្រុម​ចម្រុះ​ប្រឆាំង​របប​សឹក Chit Win Maung និយាយ​ថា គោលការណ៍ ៥​ចំណុច តាម​មើល​ទៅ គឺ​មេដឹកនាំ​កម្ពុជា​ចង់​ទុក​ចោល ខណៈ​គេ​រក​ឃើញ​ថា កម្ពុជា​បាន​បញ្ជូន​សារលិខិត​ទៅ​កាន់​មេដឹកនាំ​យោធា​ភូមា ដោយ​អបអរ​សាទរ​ទិវា​ឯករាជ្យ​ជាតិ​ភូមា​ដែល​បាន​ប្រារព្ធ​ឡើង​កាលពី​ថ្ងៃ​ទី​៤ ខែ​មករា។

ចាប់តាំង​ពី​ថ្ងៃ​រដ្ឋប្រហារ​ទី​១ ខែ​កុម្ភៈ ឆ្នាំ​២០២១ រហូត​មក​ទល់​ពេល​នេះ របប​សឹក​ភូមា​បាន​ឃុំ​ខ្លួន​មេដឹកនាំ​គណបក្ស​ឈ្នះ​ឆ្នោត អ្នកស្រី អ៊ុងសាន ស៊ូជី ក្រោម​បទ​ចោទប្រកាន់​ចំនួន ១១​ករណី និង​បាន​សម្លាប់​ពលរដ្ឋ​ខ្លួនឯង​ជាង ១៣០០​នាក់ រួម​ទាំង​កុមារ​ផង ហើយ​មនុស្ស​ជាង ១​ម៉ឺន ១​ពាន់​នាក់​ផ្សេង​ទៀត ត្រូវ​បាន​ឃុំឃាំង ហើយ​បាន​ធ្វើ​ទារុណកម្ម​អ្នក​ជាប់ឃុំ​យ៉ាង​ព្រៃផ្សៃ ដូចជា​ការ​បង្អត់​អាហារ បង្អត់​ទឹក សម្លាប់ និង​ចាប់​រំលោភ​ស្ត្រី​ទាំង​ក្នុង និង​ក្រៅ​ពន្ធនាគារ ជាដើម៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស