ជប៉ុន ចាប់ផ្ដើមនិយាយអំពីទស្សនកិច្ចរបស់មេដឹកនាំកម្ពុជា លោក ហ៊ុន សែន ទៅជួបមេរដ្ឋប្រហារភូមាឧត្តមសេនីយ៍ មីន អ៊ុងឡាំង កាលពីថ្ងៃទី៧ ខែមករា។
នៅក្នុងការសន្ទនាគ្នាតាមទូរស័ព្ទជាមួយនឹងសមភាគីកម្ពុជា លោក ប្រាក់ សុខុន លោក Yoshimasa Hayashi រដ្ឋមន្ត្រីការបរទេសជប៉ុន បានហៅទស្សនកិច្ចរបស់លោក ហ៊ុន សែន នាយករដ្ឋមន្ត្រីកម្ពុជាទៅភូមា ថាជាការខិតខំមួយដ៏ធំក្នុងនាមជាសមាជិកអាស៊ាន និងជាប្រធានអាស៊ានសម្រាប់ឆ្នាំ២០២២ ក្នុងដំណើរទៅដោះស្រាយវិបត្តិនៅប្រទេសភូមា ប៉ុន្តែលោកសម្ដែងការសោកស្ដាយដោយសារតែហិង្សានៅប្រទេសភូមា កាន់តែធ្ងន់ឡើង ទោះជាមេយោធាដាក់សំណើឲ្យមានបទឈប់បាញ់គ្នាក៏ដោយ។ នេះបើយោងតាមសេចក្ដីថ្លែងការណ៍របស់ក្រសួងការបរទេសជប៉ុន ដែលត្រូវបានសារព័ត៌មានប្រទេសសិង្ហបុរី The Strait Times ចុះផ្សាយនៅថ្ងៃពុធ ទី១២ មករា នេះ។
តាមសេចក្ដីថ្លែងការណ៍នេះ លោករដ្ឋមន្ត្រី Hayashi បានហៅទស្សនកិច្ចរបស់លោក ហ៊ុន សែន ថាបាននាំនូវពាក្យថាបទឈប់បាញ់គ្នាជាមួយនឹងកងកម្លាំងជនជាតិដើមភាគតិច។ លោករដ្ឋមន្ត្រីការបរទេស Hayashi បានអំពាវនាវដល់ពួកយោធាភូមា បញ្ឈប់អំពើហិង្សា និងស្ដារប្រជាធិបតេយ្យឡើងវិញ។
ជប៉ុន ជាប្រទេសមួយដែលមានទំហំពាណិជ្ជកម្មធំទី១ ជាមួយភូមា ប៉ុន្តែអំឡុងពេលភូមា ធ្លាក់ក្នុងអំពើហិង្សា និងសង្គ្រាមស៊ីវិលចាប់តាំងពីពួកយោធាធ្វើរដ្ឋប្រហារ អ្នកវិនិយោគជប៉ុនភាគច្រើនបានសម្រេចព្យួរគម្រោងវិនិយោគរបស់ខ្លួនជាច្រើន តែជប៉ុនគឺជាប្រទេសដ៏ខ្លាំងមួយដែរក្នុងការទប់ទល់ឥទ្ធិពលចិន នៅអាស៊ីអាគ្នេយ៍។
មកដល់ពេលនេះ ជប៉ុននៅតែមានទំនាក់ទំនងជាមួយពួកយោធាផង និងជាមួយរដ្ឋាភិបាលឯកភាពជាតិរបស់ក្រុមអ្នកប្រជាធិបតេយ្យប្រឆាំងរបបសឹកផង។ សម្រាប់ពួកយោធាភូមា រដ្ឋាភិបាលជប៉ុន មិនបានផ្ដល់ទិដ្ឋាការឱ្យមន្ត្រីទូតនៃរបបសឹកនេះចូលប្រទេសជប៉ុន ដើម្បីប្រគល់សាតាំងក្នុងនាមទូតរបស់ពួកយោធានោះទេ។ ជប៉ុន នៅតែទទួលស្គាល់ឯកអគ្គរដ្ឋទូតរបស់រដ្ឋាភិបាលអ្នកស្រី អ៊ុងសាន ស៊ូជី។
ក្រោយពីលោក ហ៊ុន សែន ដឹកនាំគណៈប្រតិភូកម្ពុជាទៅភូមា ដែលធ្វើឱ្យរបបសឹកបង្ហាញឆន្ទៈឱ្យមានបទឈប់បាញ់គ្នា គេសង្កេតឃើញប្រទេសធំចំនួនពីរនៅតំបន់អាស៊ី បានប្រកាសគាំទ្រកម្ពុជាក្នុងបេសកកម្មស្វែងរកដំណោះស្រាយលើវិបត្តិនយោបាយនៅប្រទេសភូមា។ ចិន និងឥណ្ឌា បានគាំទ្រកម្ពុជាក្នុងការរកដំណោះស្រាយនៅភូមា តាមរយៈការអនុវត្តកុងសង់ស៊ីស ៥ចំណុចរបស់សមាគមអាស៊ាន។
ក្នុងសន្និសីទសារព័ត៌មានប្រចាំថ្ងៃកាលពីថ្ងៃទី១០ ខែមករា លោក Wang Wenbin អ្នកនាំពាក្យនៃក្រសួងការបរទេសចិន បានឆ្លើយសំណួរពាក់ព័ន្ធនឹងដំណើរទស្សនកិច្ចរបស់លោក ហ៊ុន សែន ទៅកាន់ប្រទេសភូមា។ អ្នកនាំពាក្យរូបនេះចាត់ទុកជាដំណើរទស្សនកិច្ចប្រកបដោយជោគជ័យ។
អ្នកនាំពាក្យចិនរូបនេះបានហៅភូមា ជាសមាជិកនៃគ្រួសារអាស៊ាន ហើយសម្រាប់ភាគីចិន សូមគាំទ្រអាស៊ានក្នុងការដោះស្រាយបញ្ហាប្រទេសសមាជិកមួយនេះតាមរយៈការអនុវត្តកុងសង់ស៊ីស ៥ចំណុចដោយស្របនឹងក្របខ័ណ្ឌអាស៊ាន។ លើសពីនេះទៀត ភាគីចិន អះអាងថានឹងគាំទ្រពេញទំហឹងដល់កម្ពុជាដែលជាប្រធានប្តូរវេននៃសមាគមអាស៊ាន ក្នុងតួនាទីស្វែងរកដំណោះស្រាយវិបត្តិនៅភូមា តាមរយៈការសន្ទនាគ្នា។
នៅអាស៊ី ប្រទេសមួយទៀតដែលជាប្រទេសធំដូចប្រទេសចិនដែរ គឺប្រទេសឥណ្ឌា។ ប្រទេសនេះមានព្រំដែនជាប់ជាមួយនឹងភូមា ដល់ទៅ ១៦៤៣គីឡូម៉ែត្រ។ ប្រទេសធំនេះបានអះអាងថា ក្រុងញូវដេលី កំពុងយកចិត្តទុកដាក់អំពីស្ថានការណ៍សឹក និងនយោបាយនៅភូមា ដែលកម្ពុជាក្នុងនាមជាប្រធានអាស៊ានកំពុងសម្របសម្រួលឱ្យមានដំណោះស្រាយចំពោះវិបត្តិនៅប្រទេសភូមា។
សម្រាប់ឥណ្ឌា សូមគាំទ្រតួនាទីកម្ពុជាក្នុងនាមជាប្រធានអាស៊ាននៅឆ្នាំនេះ ដែលកម្ពុជាកំពុងស្វែងរកដំណោះស្រាយនៅភូមា។ នេះបើតាមសេចក្តីប្រកាសរបស់ក្រសួងការបរទេសកម្ពុជា។
ក្រសួងការបរទេសកម្ពុជា អះអាងថា ឥណ្ឌាប្រកាន់ជំហរដូចនេះក្នុងជំនួបមួយតាមទូរស័ព្ទរវាងលោក ប្រាក់ សុខុន និងលោក ស៊ូប្រាម៉ានយ៉ាំ ចៃហ្សានកា រដ្ឋមន្ត្រីការបរទេសឥណ្ឌា កាលថ្ងៃទី១០ មករា។ ជាការកត់សម្គាល់ ប្រទេសដែលមានសក្ដានុពល ទាំងជប៉ុន ចិន និងឥណ្ឌា គឺប្រភពជំនួញដ៏ធំនៅប្រទេសភូមា។
សម្រាប់ឥណ្ឌា និងជប៉ុន ជាប្រទេសដែលមិនចង់ឃើញភូមា បន្តធ្លាក់នៅក្រោមរបបសឹកនោះទេ។ មេដឹកនាំប្រទេសទាំងពីរនេះ ធ្លាប់បានសន្យានៅចំពោះមុខប្រធានាធិបតីសហរដ្ឋអាមេរិក កាលពីឆ្នាំទៅមិញនេះថា នឹងជួយស្វែងរកដំណោះស្រាយដើម្បីបញ្ចប់របបសឹក ហើយសន្យាជួយស្ដារប្រជាធិបតេយ្យនៅភូមា ឡើងវិញ៕