ទីប្រឹក្សារបស់លោក ហ៊ុន សែន ស្នើទៅរដ្ឋមន្ត្រីក្រសួងមហាផ្ទៃ លោក ស ខេង ឱ្យពិនិត្យមើលអភិបាលស្រុកអូររាំង និងមន្ត្រីមួយចំនួនទៀតនៅខេត្តមណ្ឌលគិរី ដែលបានប្រើអំណាចរបស់ខ្លួនគំរាមកំហែងយកដីជនជាតិដើមភាគតិច និងដីរដ្ឋធ្វើជាកម្មសិទ្ធិដើម្បីយកទៅលក់បន្តឱ្យឈ្មួញ។
ក្នុងលិខិតអន្តរាគមន៍របស់លោក ប៉ែន អ៊ាន ដែលជាទីប្រឹក្សាផ្ទាល់លោក ហ៊ុន សែន ដាក់ទៅរដ្ឋមន្ត្រីក្រសួងមហាផ្ទៃ លោក ស ខេង ចុះថ្ងៃទី១១ ខែមករា ឆ្នាំ២០២២ ដែលទើបត្រូវបានផ្សព្វផ្សាយឱ្យដឹងថា អភិបាលស្រុកអូររាំង លោក សៀក មុន្នី បានក្លែងបន្លំឯកសារ និងស្នាមមេដៃយកដីពលរដ្ឋទៅលក់ឱ្យឧកញ៉ា ស្រី ចន្ធូ។
លើសពីនេះ អភិបាលស្រុកអូររាំង លោក សៀក មុន្នី បានធ្វើប័ណ្ណសិទ្ធិគំរាមកំហែងដោយទិញដីពីពលរដ្ឋក្នុងតម្លៃទាប ដើម្បីយកទៅលក់បន្ត និងអភិវឌ្ឍ ហើយបានប្រើអំណាចឱ្យមន្ត្រីក្រោមឱវាទរបស់ខ្លួនទៅគំរាមកំហែងជនជាតិដើមភាគតិចថែមទៀត ខណៈទំនាស់ដីធ្លីរបស់ពលរដ្ឋជាមួយអ្នកមានលុយ និងមានអំណាចដែលកំពុងកើតឡើង ដោយអភិបាលស្រុករូបនេះមិនបានអើពើដោះស្រាយ។
លិខិតដដែលអះអាងថា ការដែលអភិបាលស្រុកអូររាំង លោក សៀក មុន្នី ប្រើប្រាស់អំណាចមិនខ្លាចច្បាប់បែបនេះ ដោយសារលោកមានខ្សែបក្សពួកនៅក្រសួងមហាផ្ទៃ ជាអ្នកជួយជ្រោមជ្រែង បើទោះបីជាកន្លងមកថ្នាក់ដឹកនាំក្រសួងមហាផ្ទៃ ធ្លាប់បានណែនាំថា ករណីនោះធ្វើឱ្យខូចប្រជាប្រិយភាពរបស់បក្ស និងប៉ះពាល់លោក ហ៊ុន សែន ក៏ដោយ។
លោក ប៉ែន អ៊ាន បានស្នើទៅលោក ស ខេង ឱ្យស្រាវជ្រាវករណីនេះឱ្យបានច្បាស់លាស់ និងមានតម្លាភាព យុត្តិធម៌គ្រប់ភាគី ហើយត្រូវពិន័យចំពោះមន្ត្រីដែលបានប្រព្រឹត្តខុស ដើម្បីការពារថ្នាក់ដឹកនាំដ៏ត្រឹមត្រូវរបស់រដ្ឋាភិបាល។
ក្រៅពីស្នើក្រសួងមហាផ្ទៃ ពិនិត្យ ទីប្រឹក្សាលោក ហ៊ុន សែន បានឱ្យក្រសួងកសិកម្មដែលកំពុងចុះស្រាវជ្រាវនៅខេត្តមណ្ឌលគិរី ធ្វើការឱ្យមានតម្លាភាពស្របទៅតាមច្បាប់ និងគោលការណ៍របស់រដ្ឋាភិបាល។
យ៉ាងណាក៏ដោយ ចាប់តាំងពីថ្ងៃទី១១ ដល់ថ្ងៃទី២៤ ខែមករា នេះ ក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មិនទាន់បង្ហាញលទ្ធផលជាសាធារណៈដែលខ្លួនចុះស្រាវជ្រាវនៅក្នុងខេត្តមណ្ឌលគិរី នៅឡើយ។
បើតាមជនជាតិដើមភាគតិចធ្លាប់លើកឡើងថា ជម្លោះដីធ្លីនៅខេត្តមណ្ឌលគិរី ពិបាកដោះស្រាយ ដោយសារអ្នករំលោភយកជាសាច់ញាតិ និងគ្រួសារលោក ហ៊ុន សែន ក្នុងនោះមានលោកស្រី ហ៊ុន ម៉ាណា លោក ហ៊ុន ជា ជាដើម ខណៈដីមួយចំនួនទៀតជារបស់កូនៗលោក ជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង់ ព្រមទាំងមន្ត្រី និងឧកញ៉ាផ្សេងៗទៀត។
កាលពីខែតុលា ឆ្នាំ២០២១ រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា លោក ស ខេង ធ្លាប់ថ្លែងជាសាធារណៈដោយទទួលស្គាល់ថា មន្ត្រីមានអំណាចមួយចំនួនបានទន្ទ្រានកាន់កាប់ដីរដ្ឋដោយខុសច្បាប់នៅខេត្តមណ្ឌលគិរី។
លោក ស ខេង បានបង្ហាញការសោកស្ដាយចំពោះមន្ត្រីទាំងនោះ ដែលបានប្រើអំណាចរបស់ខ្លួនទៅរំលោភយកដីធ្លីប្រជាពលរដ្ឋ និងទ្រព្យសម្បត្តិរបស់រដ្ឋមកធ្វើជាកម្មសិទ្ធិផ្ទាល់ខ្លួន។ លោកចាត់ទុកការរំលោភយកដីធ្លីពលរដ្ឋ និងទ្រព្យសម្បត្តិរបស់រដ្ឋនោះ ដោយសារតែភាពលោភលន់របស់មន្ត្រីទាំងនោះ៕