សហមេធាវីការពារក្តីឱ្យប្រធានគណបក្សសង្គ្រោះជាតិ រិះគន់ថា ការទាមទារឲ្យមេដឹកនាំបក្សប្រឆាំង លោក កឹម សុខា សារភាពតាមការចោទប្រកាន់របស់តុលាការ គឺជាការរំលោភលើបទដ្ឋានគតិយុត្តិ សិទ្ធិមនុស្ស ច្បាប់ជាតិ និងច្បាប់អន្តរជាតិយ៉ាងធ្ងន់ធ្ងរ ព្រោះថាដំណើរការនីតិវិធីរឿងក្តីឆាប់រហ័ស មិនមែនបង្ខំឲ្យភាគីជនជាប់ចោទសារភាពនោះទេ។
សហមេធាវីការពារក្តីមេដឹកនាំបក្សប្រឆាំង អ្នកស្រី ម៉េង សុភារី បានអះអាងនៅមុខអ្នកសារព័ត៌មានបន្ទាប់ពីសវនាការប្រធានគណបក្សសង្គ្រោះជាតិ នៅថ្ងៃទី២៥ ខែមករា ឆ្នាំ២០២២ នេះថា មេដឹកនាំបក្សប្រឆាំង លោក កឹម សុខា មិនមានអ្វីត្រូវសារភាពនោះទេ ព្រោះថាគាត់មិនមានទោសកំហុសដូចការចោទប្រកាន់នោះឡើយ។
មេធាវីរូបនេះអះអាងថា បើលោក កឹម សុខា សារភាពកំហុសទោសតាមការទាមទាររបស់តុលាការទាំងដែលខ្លួនមិនបានប្រព្រឹត្តនោះ ទោះជាទទួលបាននូវយុត្តិធម៌ ក៏ជាយុត្តិធម៌ក្លែងក្លាយដែរ ប៉ុន្តែតាមផ្លូវច្បាប់ គ្រប់ជនដែលត្រូវចោទត្រូវមានសិទ្ធិទទួលបានការជំនុំជម្រះក្តីដោយយុត្តិធម៌ និងឆាប់រហ័សគ្រប់គ្នាទាំងអស់។
ការអះអាងនេះ ធ្វើឡើងបន្ទាប់ពីសវនាការរបស់មេដឹកនាំបក្សប្រឆាំង លោក កឹម សុខា ដែលព្រះរាជអាជ្ញាទាមទារឱ្យប្រធានគណបក្សសង្គ្រោះជាតិសារភាពទោស ប្រសិនបើចង់ឱ្យរឿងក្តីនេះឆាប់ចប់។
នៅថ្ងៃទី២៥ ខែមករា ឆ្នាំ២០២២ នេះ សាលាដំបូងរាជធានីភ្នំពេញបានបើកសវនាការលើសំណុំរឿងមេដឹកនាំបក្សប្រឆាំង លោក កឹម សុខា បន្តទៀត ក្នុងនោះសហមេធាវីការពារក្តីលោក កឹម សុខា ស្នើសុំឱ្យក្រុមប្រឹក្សាជំនុំជម្រះពន្លឿននីតិវិធី និងបង្កើនចំនួនថ្ងៃបើកសវនាការដើម្បីឱ្យឆាប់បញ្ចប់រឿងក្តីនេះ ប៉ុន្តែត្រូវព្រះរាជអាជ្ញាប្រតិកម្មថា ប្រសិនបើចង់ឱ្យរឿងក្តីនេះឆាប់ចប់ លុះណាតែលោក កឹម សុខា សារភាពកំហុសរបស់ខ្លួន។
ប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ (PMD) លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៥ មករា នេះថា នីតិវិធីរបស់តុលាការធ្វើឱ្យយឺតយ៉ាវលើសំណុំរឿងប្រធានគណបក្សសង្គ្រោះជាតិនេះ គឺជាចេតនាយុទ្ធសាស្ត្រនយោបាយរបស់គណបក្សកាន់អំណាចប៉ុណ្ណោះ មិនមែនដោយសាររាំងស្ទះនីតិវិធីផ្លូវច្បាប់ណាមួយនោះឡើយ។
លោក ម៉ែន ណាត អះអាងថា ប្រសិនបើលោក កឹម សុខា មានសេរីភាពនយោបាយឡើងវិញ តើកម្លាំងក្រុមប្រឆាំង និងអ្នកស្រឡាញ់ប្រជាធិបតេយ្យអាចនឹងងើបឡើងវិញដែរឬអត់ ហើយវានឹងប៉ះពាល់ដល់ការផ្ទេរអំណាចរបស់លោក ហ៊ុន សែន កម្រិតណា? ករណីនេះជាហានិភ័យធំបំផុតសម្រាប់គណបក្សកាន់អំណាច។
ប្រធានក្រុមប្រឹក្សាភិបាលនៃ PMD រូបនេះបញ្ជាក់ថា សក្ដានុពលរបស់លោក កឹម សុខា នៅពេលនេះមានទំហំធំធេង បន្ទាប់ពីការលះបង់របស់គាត់ដើម្បីសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។ ជាងនេះទៀត នាយករដ្ឋមន្ត្រីអនាគតរបស់បក្សកាន់អំណាច មិនមែនជាដៃគូប្រកួតប្រជែងនយោបាយរបស់លោក កឹម សុខា ឡើយ។
ដោយឡែកប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ ធ្លាប់បានអះអាងថា តាមការទំនាក់ទំនងរបស់លោកជាមួយប្រធានគណបក្សសង្គ្រោះជាតិ លោក កឹម សុខា នាពេលកន្លងមក លោកមើលមិនឃើញថា លោក កឹម សុខា មានបំណងផ្ដួលរំលំរដ្ឋាភិបាលដូចការចោទប្រកាន់របស់តុលាការទាល់តែសោះ។
ទោះយ៉ាងណា នៅថ្ងៃទី២៥ ខែមករា ឆ្នាំ២០២២ នេះ គឺជាសវនាការលើកទីពីរហើយបន្ទាប់ពីតុលាការបានផ្អាកសវនាការរបស់ប្រធានគណបក្សសង្គ្រោះជាតិ អស់រយៈពេលប្រមាណ ២ឆ្នាំកន្លងមក ហើយសវនាការបន្ទាប់ នឹងធ្វើនៅថ្ងៃទី០២ ខែកុម្ភៈ សប្ដាហ៍ក្រោយនេះបន្តទៀត៕