29 C
Phnom Penh

លោក ហ៊ុន សែន ព្រម​ដើរ​តាម​ការ​ចង្អុល​បង្ហាញ​របស់​មេដឹកនាំ​អាស៊ាន​អំពី​ការ​ស្វែងរក​ដំណោះស្រាយ​នៅ​ភូមា

ដោយ ឌឹ ខេមបូឌា ដេលី

បទវិភាគ

ទីបំផុត នាយករដ្ឋមន្ត្រី​កម្ពុជា​ដែល​គេ​ដាក់​រហស្សនាម​ថា បុរស​ខ្លាំង​នៃ​កម្ពុជា បាន​ទទួល​យក​ការ​ចង្អុល​បង្ហាញ​ពី​មេដឹកនាំ​នៃ​បណ្ដា​ប្រទេស​អាស៊ាន ដែល​បាន​ប្រាប់​ថា​ត្រូវ​បង្ខំ​ឲ្យ​មេ​រដ្ឋប្រហារ​ភូមា ឧត្តមសេនីយ៍ មីន អ៊ុងឡាំង ត្រូវ​អនុវត្ត​គោលការណ៍​ឯកភាព ៥​ចំណុច​នៃ​កិច្ចប្រជុំ​កំពូល​អាស៊ាន​នៅ​ប្រទេស​ឥណ្ឌូនេស៊ី ដែល​បាន​ធ្វើឡើង​កាលពី​ថ្ងៃ​ទី​២៤ ខែ​មេសា ឆ្នាំ​២០២១។

នៅ​ក្នុង​កិច្ចសន្ទនា​គ្នា​តាម​ទូរស័ព្ទ​ជាមួយ​មេ​រដ្ឋប្រហារ មីន អ៊ុងឡាំង លោក ហ៊ុន សែន បាន​ស្នើសុំ​ឲ្យ​មេ​រដ្ឋប្រហារ​ភូមា​រូប​នេះ​បញ្ចប់​អំពើ​ហិង្សា ដោយ​ត្រូវ​បញ្ឈប់​រាល់​សកម្មភាព​ហិង្សា​ទាំងឡាយ​ណា​ដែល​កំពុង​កើតមាន​នៅ​ប្រទេស​ភូមា ហើយ​បើក​ផ្លូវ​ឲ្យ​ប្រេសិត​អាស៊ាន​ទៅ​ជួប​ភាគី​ពាក់ព័ន្ធ​ទាំងអស់។

លោក ហ៊ុន សែន បាន​ថ្លែង​ប្រាប់​មេ​រដ្ឋប្រហារ​ភូមា​ទៀត​ថា រូបលោក​ចង់​ឃើញ​អាស៊ាន​មាន​ការ​សាមគ្គី​គ្នា ហើយ​អាស៊ាន​មាន ១០​ប្រទេស។

នាយករដ្ឋមន្ត្រី​កម្ពុជា លោក ហ៊ុន សែន ជួប​ពិភាក្សា​ជាមួយ​មេ​រដ្ឋប្រហារ​ភូមា លោក មីន អ៊ុងឡាំង (Min Aung Hlaing) តាមរយៈ​ប្រព័ន្ធ​វីដេអូ​នៅ​ថ្ងៃ​ទី​២៦ ខែ​មករា ឆ្នាំ​២០២២។ (រូបភាព​ពី​ហ្វេសប៊ុក​លោក ហ៊ុន សែន)

ជំហរ​របស់​លោក ហ៊ុន សែន ដែល​ប្រែប្រួល ត្រូវ​គេ​មើល​ឃើញ​ថា​លោក​បាន​ដើរ​បណ្ដោយ​ទិស​វិញ​នេះ គឺ​បន្ទាប់ពី​មេដឹកនាំ ៣​ប្រទេស​នៃ​សមាគម​អាស៊ាន ដូចជា​នាយករដ្ឋមន្ត្រី​នៃ​ប្រទេស​សិង្ហបុរី និង​ប្រទេស​ម៉ាឡេស៊ី រួម​នឹង​ឥណ្ឌូនេស៊ី ដែល​ត្រូវ​បាន​លោក ហ៊ុន សែន ភ្ជាប់​ទូរស័ព្ទ ហើយ​បាន​សន្ទនា​គ្នា​អំពី​តួនាទី​កម្ពុជា​ជា​ប្រធាន​អាស៊ាន និង​ការ​ដែល​លោក ហ៊ុន សែន ទៅ​ជួប​ឧត្តមសេនីយ៍ មីន អ៊ុងឡាំង កាលពី​ថ្ងៃ​ទី​៧ ខែ​មករា ដែល​ទីបំផុត លោក​វិល​ត្រឡប់​មកវិញ​ពុំ​បាន​នាំមក​នូវ​លទ្ធផល​ជាក់ស្ដែង​នោះ​ទេ។

នៅ​ក្នុង​ជំនួប​ជាមួយ​ឧត្តមសេនីយ៍ មីន អ៊ុងឡាំង មេដឹកនាំ​កម្ពុជា លោក ហ៊ុន សែន ដែល​គេ​មើល​ឃើញ​ថា​ជា​បុរស​ដើរ​បញ្ច្រាស​ទិស​ទៅ​ជួប​មេ​រដ្ឋប្រហារ​ភូមា ទោះបីជា​មាន​ការ​រិះគន់​ក៏ដោយ​នោះ គឺ​ក្នុង​ជំនួប​នោះ គណៈប្រតិភូ​កម្ពុជា និង​របប​សឹក​ភូមា បាន​ចេញ​សេចក្ដី​ថ្លែងការណ៍​រួមគ្នា ហើយ​សេចក្ដី​ថ្លែងការណ៍​នោះ ពួក​យោធា​ភូមា​យល់ព្រម​ឱ្យ​មាន​បទ​ឈប់​បាញ់​គ្នា​រហូត​ដល់​ចុង​ឆ្នាំ​២០២២។ ប៉ុន្តែ​នៅ​ពេល​ដែល​ឧត្តមសេនីយ៍​មេ​រដ្ឋប្រហារ​ភូមា​រូប​នេះ​បាន​ចុះហត្ថលេខា​ស្នើ​ឲ្យ​មាន​បទ​ឈប់​បាញ់​គ្នា​នេះ គឺ​កងទ័ព​របស់​របប​សឹក​បន្ត​បើក​ការ​វាយប្រហារ​ទៅលើ​កម្លាំង​ប្រឆាំង​ដដែល។

មិន​តែប៉ុណ្ណោះ សូម្បីតែ​វាយប្រហារ​ទៅលើ​ជនស៊ីវិល​ក៏​របប​សឹក​អាច​ធ្វើ​បាន​ដែរ។ ដោយ​មើល​ឃើញ​បែប​នេះ មេដឹកនាំ​ប្រទេស​ទាំង​បី​នេះ​ដែល​នាយករដ្ឋមន្ត្រី​កម្ពុជា​បាន​សុំ​ជួប​តាម​ទូរស័ព្ទ បាន​ផ្ដល់​អនុសាសន៍ និង​យោបល់​ជាច្រើន គឺ​ដូច​ការ​ណែនាំ​ឱ្យ​មេដឹកនាំ​កម្ពុជា​ត្រូវ​ប្រុងប្រយ័ត្ន​ចំពោះ​ឥរិយាបថ​របស់​លោក​ឧត្តមសេនីយ៍ មីន អ៊ុងឡាំង ព្រោះតែ​មេ​រដ្ឋប្រហារ​រូប​នេះ​ពុំ​ដែល​គោរព​ការ​សន្យា​របស់​ខ្លួន​នោះ​ទេ។

នាយករដ្ឋមន្ត្រី​កម្ពុជា លោក ហ៊ុន សែន ជួប​សន្ទនា​តាម​ទូរស័ព្ទ​ជាមួយ​ប្រធានាធិបតី​ឥណ្ឌូនេស៊ី លោក ចូកូ វីដូដូ (Joko Widodo) នៅ​ថ្ងៃ​ទី​២១ ខែ​មករា ឆ្នាំ​២០២២។ (រូបថត​ពី​ហ្វេសប៊ុក​លោក ហ៊ុន សែន)

ប្រធានាធិបតី​ឥណ្ឌូនេស៊ី បាន​ដាស់តឿន​ច្រើន​ជាងគេ​ដល់​លោក ហ៊ុន សែន ដោយ​បាន​រំឭក​ថា គោលការណ៍​កុងសង់ស៊ីស ៥​ចំណុច​កាលពី​ថ្ងៃ​ទី​២៤ មេសា គឺ​មិន​ត្រូវ​អូស​រំលង​នោះ​ទេ។

លោក ចូកូ វីដូដូ បាន​ព្រមាន​ថា បើ​របប​សឹក​ភូមា​មិន​អនុវត្ត​បាន​នូវ​ចំណុច​ទាំង​៥ នេះ ជាពិសេស​បញ្ឈប់​អំពើ​ហិង្សា និង​ការ​ដោះលែង​អ្នក​ជាប់​ឃុំ​ដែល​ពួក​យោធា​ចាប់​ខ្លួន​ដោយសារតែ​ប្រឆាំង​របប​សឹក​ឲ្យ​មាន​សេរីភាព​ឡើងវិញ រួម​ទាំង​អ្នកស្រី អ៊ុងសាន ស៊ូជី គឺ​ពួក​យោធា​មិន​ត្រូវ​អនុញ្ញាត​ឲ្យ​ចូលរួម​ប្រជុំ​ជាមួយ​មេដឹកនាំ​អាស៊ាន​ដាច់ខាត។

នាយករដ្ឋមន្ត្រី​កម្ពុជា លោក ហ៊ុន សែន ជួប​សន្ទនា​តាម​ជាមួយ​នាយករដ្ឋមន្ត្រី​នៃ​សាធារណរដ្ឋ​សិង្ហបុរី លោក Lee Hsien Loong តាម​ប្រព័ន្ធ​វីដេអូ​នៅ​ថ្ងៃ​ទី​១៤ ខែ​មករា ឆ្នាំ​២០២២។ (រូបថត​ពី​ហ្វេសប៊ុក​លោក ហ៊ុន សែន)

ចំណែក​ឯ​នាយករដ្ឋមន្ត្រី​សិង្ហបុរី និង​ម៉ាឡេស៊ី ដែល​លោក ហ៊ុន សែន បាន​ភ្ជាប់​ទូរស័ព្ទ​ទៅ​សុំ​មតិ​ផង​ដែរ​នោះ ក៏​បាន​ណែនាំ​លោក ហ៊ុន សែន កុំ​ឱ្យ​ទុកចិត្ត​លោក មីន អ៊ុងឡាំង ឱ្យ​សោះ ព្រោះ​មេ​រដ្ឋប្រហារ​រូប​នេះ​សន្យា តែ​មិន​ដែល​គោរព​ការ​សន្យា​របស់​ខ្លួន​បាន​នោះ​ទេ។

នាយករដ្ឋមន្ត្រី​កម្ពុជា លោក ហ៊ុន សែន ជួប​សន្ទនា​ជាមួយ​នាយករដ្ឋមន្ត្រី​នៃ​ប្រទេស​ម៉ាឡេស៊ី លោក Ismail Sabri Yaakob តាម​ប្រព័ន្ធ​វីដេអូ​នៅ​ថ្ងៃ​ទី​២៥ ខែ​មករា ឆ្នាំ​២០២២។ (រូបថត​ពី​ហ្វេសប៊ុក​លោក ហ៊ុន សែន)

ក្នុង​រយៈពេល​ចុងក្រោយ​នេះ លោក​នាយករដ្ឋមន្ត្រី ហ៊ុន សែន បាន​ព្យាយាម​បំភ្លឺ​អំពី​ដំណើរ​ទស្សនកិច្ច​របស់​លោក​ទៅ​ជួប​មេ​រដ្ឋប្រហារ​ភូមា ដោយ​ពន្យល់ និង​លើក​ហេតុផល​ផង​ថា ទស្សនកិច្ច​របស់​លោក​ទោះបី​ជួប​ឧត្តមសេនីយ៍ មីន អ៊ុងឡាំង ក៏ដោយ ក៏​មិន​បាន​លើក​ទឹកចិត្ត ឬ​ក៏​ផ្ដល់​យោបល់​ឱ្យ​ពួក​យោធា​បំផ្លាញ​គោលការណ៍ ៥​ចំណុច​របស់​អាស៊ាន​នោះ​ទេ។ លោក​បាន​ពន្យល់​ទៀត​ថា ទោះ​ជា​លទ្ធផល​បាន​តិចតួច ក៏​វា​ជា​ចំណុច​ចាប់ផ្ដើម​បណ្ដើរៗ​ដែរ។

ប៉ុន្តែ​សម្រាប់​រដ្ឋមន្ត្រី​ការបរទេស​ម៉ាឡេស៊ី រិះគន់​ធ្ងន់ៗ​ទៅលើ​លោក ហ៊ុន សែន ព្រោះតែ​មេដឹកនាំ​កម្ពុជា​បាន​ហៅ​ឧត្តមសេនីយ៍ មីន អ៊ុងឡាំង ជា​នាយករដ្ឋមន្ត្រី​នៃ​សាធារណរដ្ឋ​សហភាព​មីយ៉ាន់ម៉ា។

ចំពោះ​ការ​ហៅ មីន អ៊ុងឡាំង ថា​ជា​នាយករដ្ឋមន្ត្រី បាន​ផ្ដើម​ឲ្យ​មេដឹកនាំ​អាស៊ាន​មាន​ភាព​ស្រឡាំងកាំង ហើយ​ពួកគេ​ចាត់ទុក​កម្ពុជា​ធ្វើ​សេចក្ដី​សម្រេច​ដែល​ចាត់ទុក មីន អ៊ុងឡាំង ជា​នាយករដ្ឋមន្ត្រី​របស់​ប្រទេស​ភូមា គឺជា​ការ​ផ្ទុយ​នឹង​គោលការណ៍​ឯកច្ឆន្ទ​របស់​អាស៊ាន ដែល​មិន​ទទួលស្គាល់​ឧត្តមសេនីយ៍​ភូមា​រូប​នេះ​ជា​មេដឹកនាំ​ប្រទេស​ភូមា​នោះ​ទេ។

រដ្ឋមន្ត្រី​ការបរទេស​ម៉ាឡេស៊ី បាន​រិះគន់​ទៀត​ថា ការ​ដែល​ទៅ​ជួប​លោក មីន អ៊ុងឡាំង ដោយ​មិន​បាន​សួរនាំ​សមាជិក​អាស៊ាន​ដូច​គ្នា គឺ​ពិត​ណាស់​កម្ពុជា​ដើរ​បញ្ច្រាស​ទិស ហើយ​ប្រមាថ​លើ​គោលការណ៍​អាស៊ាន​ថែមទៀត។ ប៉ុន្តែ​មេដឹកនាំ​កម្ពុជា គឺ​លោក ហ៊ុន សែន ដែល​បាន​ជួប​សន្ទនា​ជាមួយ​នាយករដ្ឋមន្ត្រី​ម៉ាឡេស៊ី បាន​ប្រាប់​ទៅ​មេដឹកនាំ​ម៉ាឡេស៊ី វិញ​ថា រដ្ឋមន្ត្រី​ការបរទេស​របស់​ប្រទេស​នេះ​មាន​ភាព​ព្រហើន គឺ​មិន​យល់​អ្វី​ដែល​ហៅថា​ដំណើរការ​ការទូត។

យ៉ាងណា ការ​ដែល​មេដឹកនាំ​កម្ពុជា​ទទួល​យក​ការ​ចង្អុល​បង្ហាញ​របស់​មេដឹកនាំ​អាស៊ាន​ដែល​ថា​ត្រូវ​គោរព​គោលការណ៍ ៥​ចំណុច​របស់​អាស៊ាន​ឱ្យ​បាន​ម៉ត់ចត់​ជា​មុន​សិន​នោះ គឺ​មើល​ទៅ​បុរស​ខ្លាំង​កម្ពុជា​រូប​នេះ​បាន​ដើរ​ស្រប​នឹង​គោលដៅ និង​គោលការណ៍​អាស៊ាន​ឡើងវិញ​ហើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស