ក្រសួងការបរទេសកម្ពុជា អះអាងថា មេដឹកនាំបក្សកាន់អំណាច លោក ហ៊ុន សែន និងមេដឹកនាំវៀតណាម លោក ង្វៀន ស៊ុនហ្វុក និងលោក ផាម ម៉ិញជិញ បានឯកភាពគ្នាថា ប្រទេសទាំងពីរចាំបាច់ត្រូវតែធ្វើការជាមួយគ្នាយ៉ាងជិតស្និទ្ធ ដើម្បីលើកកម្ពស់បន្ថែមទៀតនូវយន្តការទ្វេភាគីដែលមានស្រាប់។
ក្រសួងការបរទេសកម្ពុជា បានចេញសេចក្តីប្រកាសព័ត៌មានកាលពីថ្ងៃទី៣១ ខែមករា ឆ្នាំ២០២២ ថា មេដឹកនាំបក្សកាន់អំណាច លោក ហ៊ុន សែន បានសន្ទនាតាមទូរស័ព្ទដើម្បីជូនពរឆ្នាំថ្មីដល់ប្រធានាធិបតីថ្មីវៀតណាម លោក ង្វៀន ស៊ុនហ្វុក និងលោក ផាម ម៉ិញជិញ ដែលជានាយករដ្ឋមន្ត្រីវៀតណាម កាលពីថ្ងៃទី២៩ ខែមករា ឆ្នាំ២០២២ កន្លងទៅនេះ។
ប្រភពដដែលអះអាងថា មេដឹកនាំកម្ពុជា លោក ហ៊ុន សែន និងមេដឹកនាំវៀតណាម លោក ង្វៀន ស៊ុនហ្វុក និងលោក ផាម ម៉ិញជិញ បានឯកភាពគ្នាផ្តល់អាទិភាពដល់ការអនុវត្តកិច្ចព្រមព្រៀងនានាដែលបានចុះហត្ថលេខារួចនាពេលកន្លងមក ព្រមទាំងយល់ព្រមគាំទ្រគ្នាទៅវិញទៅមកក្នុងវេទិកាតំបន់ និងអន្តរជាតិផងដែរ។
អនុប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ លោក គឹម សុខ បានសរសេរលើគណនី Facebook របស់លោកនៅថ្ងៃទី១ កុម្ភៈ នេះ ដោយលើកជាសំណួរថា ហេតុអ្វីជំនួញអចលនទ្រព្យដូចជាការសង់ផ្ទះល្វែងលក់ បង់រំលស់កើនឡើងយ៉ាងគគ្រឹកគគ្រេងនៅកម្ពុជា ស្របពេលដែលសេដ្ឋកិច្ចកម្ពុជាកំពុងតែដាំក្បាលចុះយ៉ាងខ្លាំង ហើយពលរដ្ឋខ្មែរមិនមានការងារកាន់តែច្រើនឡើងៗផងនោះ។
អ្នកវិភាគរូបនេះព្រមានថា សូមប្រជាពលរដ្ឋខ្មែរបង្កើនការប្រុងប្រយ័ត្ននិគមជនវៀតណាមរស់នៅលើទូកបណ្ដែតទឹកខុសច្បាប់ នាំគ្នាឡើងគោកទិញផ្ទះល្វែងបង់រំលស់ មករស់នៅជាមួយពលរដ្ឋខ្មែរដែលអាចឱ្យពួកគេមានសិទ្ធិពេញលេញក្នុងការកាន់កាប់អចលនវត្ថុស្របច្បាប់ ដោយសារនយោបាយជំនួញអចលនទ្រព្យរបស់វៀតណាមដែលបានបញ្ជូនលុយទៅកាន់ប្រតិបត្តិកររបស់ពួកគេដើម្បីធ្វើជំនួញនេះ។
លោក គឹម សុខ បញ្ជាក់ថា នេះជាល្បែងមួយក្នុងកិច្ចសន្យាដែលលោក ហ៊ុន សែន និងលោក ហ៊ុន ម៉ាណែត អនុវត្តតាមមហិច្ឆតាឈ្លានពានរបស់វៀតណាម ជាថ្នូរឲ្យមេដឹកនាំក្រុងហាណូយ ជួយជ្រោមជ្រែងផែនការផ្ទេរអំណាចតត្រកូលរបស់ខ្លួនដែលកំពុងរៀបចំសេណារីយ៉ូសព្វថ្ងៃនេះ។
ចំណែកអ្នកសង្កេតការណ៍កម្ពុជា លោក សុខ សុគន្ធ បានលើកឡើងក្នុងកិច្ចពិភាក្សាកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី៣១ ខែមករា ដែលសំដៅដល់ទំនាក់ទំនងកម្ពុជា-វៀតណាម ថា មេដឹកនាំខ្មែរ លោក ហ៊ុន សែន កំពុងប្រឈមនឹងគ្រោះថ្នាក់នយោបាយការទូតរបស់ខ្លួន ដោយងាកទៅរកចិន ដែលធ្វើឱ្យវៀតណាម ដែលជាមិត្តម៉ឺនឆ្នាំមិនសប្បាយចិត្ត។
លោក សុខ សុគន្ធ អះអាងថា ទោះមេដឹកនាំកម្ពុជាមាននយោបាយការទូតបែបណាក៏ដោយ ក៏វៀតណាមបានរៀបចំបណ្ដាញសេណារីយ៉ូចូលក្នុងរដ្ឋាភិបាលរបស់លោកយ៉ាងជ្រៅ ដើម្បីបង្កើតនូវអំពើពុករលួយ ការជិះជាន់ និងការបំបែកបំបាក់រវាងខ្មែរនិងខ្មែរ ដោយប្រើលោក ហ៊ុន សែន ជាឧបករណ៍ ប៉ុន្តែចុងក្រោយ ពួកគេនឹងដកលោក ហ៊ុន សែន ចោលនៅពេលអស់ប្រយោជន៍សម្រាប់ពួកគេ៕