 ទាំង ៨នាក់ ដែលកំពុងជាប់ពន្ធនាគារព្រៃស ក្រោយពីអ្នកទាំង ៨នាក់ត្រូវបានជាប់ឃុំខ្លួនអស់រយៈពេលជាង ១ខែមកហើយនោះ។){kind=link}
សង្គមស៊ីវិលបង្ហាញការសោកស្តាយដែលតុលាការមិនអនុញ្ញាតឱ្យពួកគាត់ចូលជួបសួរសុខទុក្ខថ្នាក់ដឹកនាំសហជីពនៃក្រុមហ៊ុន ណាហ្គាវើលដ៍ (NAGA World) ទាំង ៨នាក់ ដែលកំពុងជាប់ពន្ធនាគារព្រៃស ក្រោយពីអ្នកទាំង ៨នាក់ត្រូវបានជាប់ឃុំខ្លួនអស់រយៈពេលជាង ១ខែមកហើយនោះ។
ការលើកឡើងនេះ បន្ទាប់ពីអង្គការសង្គមស៊ីវិល ក្នុងនោះក៏មាននាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា (CCHR) បានដាក់សំណើទៅសាលាដំបូងរាជធានីភ្នំពេញ ដើម្បីស្នើសុំចូលសួរសុខទុក្ខថ្នាក់ដឹកនាំសហជីពណាហ្គាវើលដ៍ ក្នុងមួយខែម្ដងៗចាប់ពីខែមករា ឆ្នាំ២០២២ តទៅ។
ឆ្លើយតបនឹងសំណើនេះ ចៅក្រមស៊ើបសួរសាលាដំបូងរាជធានីភ្នំពេញ បានចេញលិខិតមួយកាលថ្ងៃទី១ ខែកុម្ភៈ ឆ្នាំ២០២២ ដោយលើកឡើងថា សំណើសុំសួរសុខទុក្ខឈ្មោះ ឈឹម ស៊ីថរ, រី សុវណ្ណឌី, សុន ស្រីពេជ្រ, ហៃ សុភាព, ឃ្លាំ សុបិន្ដ, ទូច សិរីមាស, ឈឹម សុខន និងឈ្មោះ សុខ ណារិន ក្នុងមួយខែម្ដងចាប់ពីខែមករា ឆ្នាំ២០២២ ទៅនេះ ចៅក្រមមិនអនុញ្ញាតទេ។
ការមិនអនុញ្ញាតរបស់ចៅក្រមស៊ើបសួរ លោក អ៊ឹម វណ្ណៈ នេះ ក្រោមហេតុផលថា ចៅក្រមស៊ើបសួរកំពុងបន្តស្រាវជ្រាវលើបុគ្គលមួយចំនួនទៀតដែលចៅក្រមត្រូវកោះហៅចូលសួរបំភ្លឺទៀត។
នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា (CCHR) អ្នកស្រី ចក់ សុភាព សោកស្ដាយដែលតុលាការបដិសេធសំណើរបស់ក្រុមអង្គការសង្គមស៊ីវិល។ អ្នកស្រីបានសរសេរនៅលើ Facebook របស់អ្នកស្រីនៅថ្ងៃព្រហស្បតិ៍ ទី៣ កុម្ភៈ នេះថា ពេលណាតុលាការមិនទាន់កាត់ទោសជាស្ថាពរលើពួកគេ នោះមានន័យថាពួកគាត់ទាំង ៨នាក់មិនទាន់មានទោសឡើយ ហើយក៏មានសិទ្ធិក្នុងការទទួលបានការសួរសុខទុក្ខពីមិត្តជាបណ្ដាញអង្គការសង្គមស៊ីវិល និងសហជីពនានាដែរ។
ជាមួយគ្នានេះដែរ អ្នកស្រី ចក់ សុភាព ថាការសម្រេចដាក់ឃុំខ្លួនពួកគាត់ដោយរង់ចាំការបើកសវនាការនេះ ជាជម្រើសមួយដែលតុលាការបានយកមកអនុវត្តចំពោះសកម្មជនការពារសិទ្ធិមនុស្ស បរិស្ថាន សកម្មជនសង្គម រួមទាំងអ្នកនយោបាយផងដែរ។
អ្នកស្រីចាត់ទុកការសម្រេចរបស់តុលាការនេះ ថាបានធ្វើឱ្យប៉ះពាល់ដល់សិទ្ធិទទួលបានការជំនុំជម្រះដោយយុត្តិធម៌របស់ពួកគាត់យ៉ាងខ្លាំង ជាពិសេសសិទ្ធិសន្មតថាគ្មានទោស ដរាបតុលាការកាត់ទោសជាស្ថាពរ ខណៈកន្លងមក អ្នករាយការណ៍ពិសេសអង្គការសហប្រជាជាតិក៏ធ្លាប់ផ្តល់អនុសាសន៍ថា ជម្រើសដាក់ឃុំខ្លួនដោយរង់ចាំសវនាការរបស់តុលាការកម្ពុជា គួរត្រូវធ្វើឡើងជាជម្រើសចុងក្រោយ និងចាំបាច់បំផុតតែប៉ុណ្ណោះ។
កាលពីថ្ងៃទី៥ ខែមករា ឆ្នាំ២០២២ ថ្នាក់ដឹកនាំ និងសកម្មជនសហជីពចំនួន ៨នាក់ ក្នុងនោះមានប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន ណាហ្គាវើលដ៍ កញ្ញា ឈឹម ស៊ីថរ ផងត្រូវបានតុលាការសម្រេចឃុំខ្លួនបណ្ដោះអាសន្នក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង ៤៩៥ នៃក្រមព្រហ្មទណ្ឌ ក្រោយពីពួកគេធ្វើកូដកម្មអហិង្សាទាមទារសិទ្ធិ និងលក្ខខណ្ឌការងារប្រសើរនៅក្នុងក្រុមហ៊ុនល្បែងស៊ីសងមួយនេះ។
វិវាទការងារក្រុមហ៊ុន ណាហ្គាវើលដ៍ នេះ បានជំរុញឱ្យបុគ្គលិកក្រុមហ៊ុនជាង ១ពាន់នាក់បាននាំគ្នាតវ៉ា និងដាក់ញត្តិនៅតាមស្ថានទូតប្រទេសលោកសេរី រួមទាំងសហភាពអឺរ៉ុបប្រចាំកម្ពុជា ដើម្បីស្នើសុំឱ្យជួយជំរុញទៅរដ្ឋាភិបាលកម្ពុជាដោះលែងតំណាងទាំង ៨នាក់ និងដោះស្រាយវិវាទការងារដល់ពួកគេផងដែរ ខណៈតំណាងស្ថានទូតនានាបានអះអាងថា ខ្លួនកំពុងតាមដាន និងឃ្លាំមើលយ៉ាងដិតដល់។
យ៉ាងណាក៏ដោយ កាលពីថ្ងៃទី២៥ ខែមករា ឆ្នាំ២០២២ មេដឹកនាំជាន់ខ្ពស់គណបក្សកាន់អំណាច លោក ស ខេង បានជំរុញទៅភាគីពាក់ព័ន្ធដោះស្រាយបញ្ចប់វិវាទការងារនៅក្រុមហ៊ុន ណាហ្គាវើលដ៍ ឱ្យបានឆាប់ ខណៈឯកអគ្គរដ្ឋទូតអាល្លឺម៉ង់ប្រចាំនៅកម្ពុជា បង្ហាញការគាំទ្រចំពោះប្រសាសន៍របស់រដ្ឋមន្ត្រីក្រសួងមហាផ្ទៃ លោក ស ខេង ដែលជំរុញទៅស្ថាប័នពាក់ព័ន្ធឱ្យពន្លឿនដោះស្រាយបញ្ចប់វិវាទការងារនៅក្រុមហ៊ុន ណាហ្គាវើលដ៍ ឱ្យបានឆាប់។
គិតត្រឹមថ្ងៃទី៣ ខែកុម្ភៈ ឆ្នាំ២០២២ នេះ មានរយៈពេលជាង ១ខែហើយដែលបុគ្គលិកក្រុមហ៊ុនកាស៊ីណូណាហ្គាវើលដ៍ បានធ្វើកូដកម្មទាមទារការដោះស្រាយលក្ខខណ្ឌការងារ ៩ចំណុច និងដោះលែងតំណាងសហជីពចំនួន ៨នាក់ដែលកំពុងជាប់ពន្ធនាគារព្រៃស៕