មន្ត្រីគយខេត្តស្ទឹងត្រែង ចោទប្រកាន់មេគយខេត្តស្ទឹងត្រែង លោក សាយ សូផា និងមេគយច្រកទ្វារព្រំដែនកម្ពុជា-ឡាវ លោក ម៉ៅ សំអឿន ថាបានឃុបឃិតគ្នាប្រព្រឹត្តអំពើពុករលួយកិបកេងលុយបង់ពន្ធជាចំណូលថវិការដ្ឋជិត ៥ម៉ឺនដុល្លារអាមេរិកជាមួយថៅកែក្រុមហ៊ុននាំចូលសម្ភារៈសំណង់ពីប្រទេសឡាវ។
មន្ត្រីគយប្រចាំខេត្តស្ទឹងត្រែងជាច្រើនរូប បាននាំគ្នាសរសេរលិខិតមកកាន់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី៧ ខែកុម្ភៈ ឆ្នាំ២០២២ នេះថា មេគយខេត្តស្ទឹងត្រែង លោក សាយ សូផា និងមេគយច្រកទ្វារព្រំដែនកម្ពុជា-ឡាវ លោក ម៉ៅ សំអឿន បានតម្រូវឲ្យថៅកែក្រុមហ៊ុននាំចូលសម្ភារៈសំណង់ពីប្រទេសឡាវ បង់ពន្ធចូលរដ្ឋត្រឹមតែជាង ៣០% ប៉ុណ្ណោះ គឺបង់ពន្ធចំនួន ៣៣០តោនក្នុងចំនួនដែកនាំចូលសរុប ១ពាន់តោន។
ប្រភពដដែលរៀបរាប់ថា ចំណែកឯចំនួនដែក ៧៧០តោនទៀត មេគយលោក សាយ សូផា និងមេច្រកព្រំដែន លោក ម៉ៅ សំអឿន មិនបានតម្រូវឱ្យក្រុមហ៊ុននាំចូលសម្ភារៈសំណង់ SHUN CHAO PHNOM PENH CO., LTD បង់ពន្ធចូលក្នុងបញ្ជីរដ្ឋនោះទេ។
មន្ត្រីគយទាំងនោះបញ្ជាក់ថា ក្នុងទម្ងន់ដែក ១តោន រដ្ឋតម្រូវឱ្យក្រុមហ៊ុនបង់ពន្ធចំនួន ៦៤ដុល្លារអាមេរិក ដូច្នេះក្នុងទំហំដែក ៧៧០តោន រដ្ឋត្រូវបាត់ចំណូលដល់ទៅ ៤៩២៨០ដុល្លារអាមេរិកឯណោះ។
ក្រុមមន្ត្រីគយខាងលើអះអាងថា មេគយលោក សាយ សូផា បានបញ្ជាឲ្យគណនេយ្យកររបស់ខ្លួនបញ្ចេញសម្ភារៈសំណង់ដែលខ្លួនបានរក្សាទុកតាំងពីពាក់កណ្តាលខែមករា ឆ្នាំ២០២២ មកនោះឲ្យឈ្មួញដឹកចូលទៅដាក់ក្នុងឃ្លាំងដែលមានមូលដ្ឋាននៅទីក្រុងភ្នំពេញ អស់ ៧៧០តោន ដើម្បីឱ្យចំនួនដែកដែលនៅសល់ត្រូវគ្នាជាមួយនឹងឯកសារដែលខ្លួនបានបញ្ជូនទៅក្នុងឯកសារបង់ពន្ធរបស់រដ្ឋមានចំនួនត្រឹមតែ ៣៣០តោននោះ។
ប្រភពមន្ត្រីគយទាំងនោះបញ្ជាក់ថា បើយោងតាមថៅកែក្រុមហ៊ុនដែលនាំចូលសម្ភារៈសំណង់ផ្សេងទៀតត្អូញត្អែរថា មេគយលោក សាយ សូផា និងមេគយច្រកទ្វារព្រំដែន លោក ម៉ៅ សំអឿន តែងតែប្រើឈ្មោះអគ្គនាយកនៃអគ្គនាយកដ្ឋានគយ និងរដ្ឋាករ លោក គុណ ញឹម និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន មកគាបសង្កត់ពួកគេ ប៉ុន្តែសម្រាប់ក្រុមហ៊ុន SHUN CHAO PHNOM PENH CO., LTD តែងតែលួចលាក់ការបង់ពន្ធនាំចូលរហូតមកដោយគ្មានចំណាត់ការអ្វីទាំងអស់ ក្រោមការឃុបឃិតរបស់មេច្រកព្រំដែន និងមេគយខេត្តស្ទឹងត្រែង ទាំងពីររូបនេះ។
មន្ត្រីទាំងនោះបានអំពាវនាវឱ្យអគ្គនាយកនៃអគ្គនាយកដ្ឋានគយ និងរដ្ឋាករ លោក គុណ ញឹម និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ជួយត្រួតពិនិត្យការអនុវត្តរបស់មេគយខេត្តស្ទឹងត្រែង លោក សាយ សូផា និងមេគយច្រកទ្វារព្រំដែនកម្ពុជា-ឡាវ លោក ម៉ៅ សំអឿន ទាំងពីរនេះ ដើម្បីកុំឱ្យមានសាច់ស្អុយក្នុងស្ថាប័នរដ្ឋតទៅទៀត។
ក្រុមអ្នកឃ្លាំមើលសង្គមរិះគន់ថា អំពើពុករលួយនៅកម្ពុជាកំពុងតែចាក់ឫសយ៉ាងជ្រៅចូលទៅក្នុងស្ថាប័នជាតិ ដែលកំពុងទាញទម្លាក់កម្ពុជាចូលទៅក្នុងចំណោមប្រទេសក្រីក្រដែលងើបមុខមិនរួច ប្រសិនបើរដ្ឋាភិបាលកម្ពុជាមិនមានវិធានការច្បាប់ច្បាស់លាស់លើមន្ត្រីខិលខូចដែលកំពុងចងបណ្ដាញ ដើម្បីបំផ្លាញជាតិក្នុងស្ថាប័នរដ្ឋទេនោះ។
ទោះយ៉ាងណា មកទល់នឹងម៉ោងផ្សាយនេះ សារព័ត៌មាន The Cambodia Daily ទាក់ទងលោក សាយ សូផា និងលោក ម៉ៅ សំអឿន ដើម្បីសុំការបកស្រាយជុំវិញការចោទប្រកាន់នេះមិនទាន់បាននៅឡើយទេ៕