28 C
Phnom Penh

ADHOC ទាមទារ​ឱ្យ​រដ្ឋាភិបាល​បញ្ឈប់​ការ​ប្រើ​ប្រព័ន្ធ​តុលាការ​ដើម្បី​ចោទ​និង​ឃុំ​ពលរដ្ឋ​រងគ្រោះ​ដីធ្លី

ដោយ ឌឹ ខេមបូឌា ដេលី

បទវិភាគ

សមាគម​ការពារ​សិទ្ធិមនុស្ស​អាដហុក ទាមទារ​ឱ្យ​រដ្ឋាភិបាល​កម្ពុជា​បញ្ឈប់​ការ​ប្រើប្រាស់​ប្រព័ន្ធ​តុលាការ​ក្នុង​ការ​ចោទប្រកាន់ និង​ចាប់​ឃុំ​ខ្លួន​ពលរដ្ឋ​ក្នុង​រឿង​ជម្លោះ​ដីធ្លី ដើម្បី​បំបាក់​ស្មារតី​ពលរដ្ឋ​ម្ចាស់​ដី​ឱ្យ​ឈប់​ប្រើ​សិទ្ធិ​ក្នុង​ការ​ទាមទារ​រក​យុត្តិធម៌។

សមាគម​ការពារ​សិទ្ធិមនុស្ស និង​អភិវឌ្ឍន៍​នៅ​កម្ពុជា ហៅថា​អាដហុក (ADHOC) បាន​ចេញ​របាយការណ៍​មួយ​កម្រាស់ ៣៤​ទំព័រ​ក្រោម​ចំណងជើង​ថា «ការ​បន្ត​ចោទប្រកាន់-ការ​ចាប់​ឃុំ​ខ្លួន​ពលរដ្ឋ​ក្នុង​រឿង​វិវាទ​ដីធ្លី» ដែល​បាន​ចេញផ្សាយ​នៅ​ថ្ងៃ​អង្គារ ទី​៨ កុម្ភៈ។

របាយការណ៍​របស់​សមាគម​ការពារ​សិទ្ធិមនុស្ស​អាដហុក ឱ្យ​ដឹង​ថា ការ​រំលោភបំពាន​ដីធ្លី​ទៅ​លើ​ពលរដ្ឋ​ពី​សំណាក់​អ្នក​មាន​អំណាច និង​បុគ្គល​មាន​ទ្រព្យសម្បត្តិ បាន​ធ្វើ​ឱ្យ​មាន​ការ​ចាប់​ខ្លួន និង​ចោទប្រកាន់​ពលរដ្ឋ​ជា​ម្ចាស់​ដី។ ក្នុង​នោះ​ពលរដ្ឋ​ចំនួន ១៥៧​នាក់​បាន​ក្លាយ​ជា​ជនរងគ្រោះ​ដោយ​កំពុង​ជាប់​បណ្តឹង​អាជ្ញា និង​ដាក់​ឱ្យ​នៅ​ក្រោម​ការ​ត្រួតពិនិត្យ​របស់​តុលាការ ខណៈ​ជនរងគ្រោះ​ចំនួន ១៧​នាក់​ទៀត កំពុង​ត្រូវ​បាន​ឃុំ​ខ្លួន​បណ្ដោះអាសន្ន​នៅ​ពន្ធនាគារ។

ប្រភព​ដដែល​ឲ្យ​ដឹង​ទៀត​ថា ពលរដ្ឋ​រងគ្រោះ​ម្នាក់​ធ្លាក់​ខ្លួន​មាន​ជំងឺ​ធ្ងន់ធ្ងរ​រហូត​ដល់​ស្លាប់ ក្រោយ​ពេល​បញ្ជូន​ទៅ​ដល់​មន្ទីរពេទ្យ។

ករណី​ប្រជា​សហគមន៍​វិវាទ​ដីធ្លី​ជាប់​បណ្តឹង​អាជ្ញា និង​ដាក់​ឱ្យ​ស្ថិតនៅ​ក្រោម​ការ​ត្រួតពិនិត្យ​របស់​តុលាការ​ដែល​មាន​ច្រើន​ជាងគេ ក្នុង​នោះ​មាន​ខេត្ត​ត្បូងឃ្មុំ ៤៤​នាក់ ខេត្ត​ឧត្ដរមានជ័យ ២៨​នាក់ ខេត្ត​កណ្តាល ២១​នាក់ ខេត្ត​ក្រចេះ ១៨​នាក់ និង​ខេត្ត​កំពង់ស្ពឺ ១៥​នាក់។

របាយការណ៍​លើកឡើង​ថា កត្តា​ចម្បង​ដែល​នាំ​ឱ្យ​មាន​ការ​ចោទប្រកាន់ និង​ឃុំ​ខ្លួន​ពលរដ្ឋ​ក្នុង​រឿង​វិវាទ​ដីធ្លី​នេះ គឺ​ដើម្បី​បំបាក់​ស្មារតី​ពលរដ្ឋ​ម្ចាស់​ដី ស្រប​ពេល​ដែល​ពួកគាត់​លែង​ហ៊ាន​ប្រើ​សិទ្ធិ​ក្នុង​ការ​ទាមទារ​តវ៉ា​ស្វែងរក​យុត្តិធម៌។

ក្រៅពី​ការ​ចោទប្រកាន់ និង​ចាប់​ឃុំ​ខ្លួន​នោះ ក៏​មាន​ការ​គំរាមកំហែង និង​ការ​ប្រើប្រាស់​កម្លាំង​ប្រដាប់​អាវុធ​បាញ់​រះ​ទៅលើ​ពលរដ្ឋ​ដែល​តវ៉ា​រឿង​វិវាទ​ដីធ្លី​ផង​ដែរ។ ជាក់ស្ដែង​នៅ​ក្នុង​ឆ្នាំ​២០២១ វិវាទ​ដីធ្លី​ធំៗ​បាន​កើន​ឡើង​ខ្ពស់ និង​មាន​លក្ខណៈ​ធ្ងន់ធ្ងរ ដោយសារ​មាន​ការ​ប្រើ​អំពើ​ហិង្សា​វាយ​បង្ក្រាប ចាប់​ខ្លួន ឃុំ​ខ្លួន បាញ់​ប្រហារ ធ្លាក់​ខ្លួន​ឈឺ​ធ្ងន់​ក្នុង​ពន្ធនាគារ ដូចជា​ករណី​វិវាទ​នៅ​ស្រុក​កណ្ដាលស្ទឹង នៃ​ខេត្ត​កណ្ដាល រវាង​ក្រុមហ៊ុន OCIC ធ្វើ​អាកាសយានដ្ឋាន ខណៈ​ករណី​វិវាទ​នៅ​ក្នុង​ស្រុក​ស្អាង នៃ​ខេត្ត​កណ្ដាល ដដែល​ក៏​មាន​សកម្មជន​ម្នាក់​ស្លាប់​ក្រោយ​ពេល​បញ្ជូន​ពី​ពន្ធនាគារ​ដល់​មន្ទីរពេទ្យ។

ចំណែក​វិវាទ​ដីធ្លី​នៅ​ខេត្ត​ត្បូងឃ្មុំ ខេត្ត​បន្ទាយមានជ័យ ខេត្ត​ព្រះសីហនុ ខេត្ត​កំពង់ស្ពឺ ខេត្ត​កោះកុង ខេត្ត​សៀមរាប ខេត្ត​កំពង់ធំ និង​ខេត្ត​មណ្ឌលគិរី ជាដើម ក៏​មាន​ការ​បាញ់​គំរាមកំហែង និង​ចាប់​វាយ​ខ្នោះ​ប្រជាពលរដ្ឋ​ម្ចាស់​ដី​ដូច​គ្នា​ដែរ។

របាយការណ៍​ដដែល​លើកឡើង​ថា ក្នុង​ឆ្នាំ​២០២១ ពលរដ្ឋ​ជាង ១​ម៉ឺន ៧​ពាន់​គ្រួសារ (១៧០៣៣​គ្រួសារ) ក្នុង​នោះ​ជនជាតិ​ដើម​ភាគតិច​ជាង ១៣០០​គ្រួសារ (១៣៤៧​គ្រួសារ) បាន​រង​ផល​ប៉ះពាល់​ដោយសារ​វិវាទ​ដីធ្លី​ដែល​មាន​ទំហំ​ជាង ៥​ម៉ឺន ២​ពាន់​ហិកតារ (៥២៦០១​ហិកតារ)។ សមាគម​អាដហុក​បញ្ជាក់​ទៀត​ថា ការ​រំលោភ​ដីធ្លី​របស់​ពលរដ្ឋ​ដែល​កំពុង​លេចធ្លោ​ជាងគេ​នា​ពេល​កន្លងមក និង​បច្ចុប្បន្ន​នេះ គឺ​មាន​ជាប់​ពាក់ព័ន្ធ​បុគ្គល​មាន​អំណាច និង​បុគ្គល​អ្នក​មាន​ទ្រព្យ។

ទោះ​យ៉ាងណា សមាគម​អាដហុក ស្នើ​រដ្ឋាភិបាល​បញ្ឈប់​ការ​ប្រើប្រាស់​ប្រព័ន្ធ​តុលាការ​ចាប់​ឃុំ​ខ្លួន ចោទប្រកាន់​ពលរដ្ឋ​ក្នុង​រឿង​វិវាទ​ដីធ្លី ដោយ​ចាត់ទុក​សកម្មភាព​ទាំងអស់​នេះ​ថា​កំពុង​ដើរ​ផ្ទុយពី​គោលការណ៍​ច្បាប់​ជាតិ និង​អន្តរជាតិ ក៏ដូចជា​យន្តការ​សិទ្ធិមនុស្ស​អន្តរជាតិ ព្រមទាំង​អនុសាសន៍​អង្គការ​សហប្រជាជាតិ​ពាក់ព័ន្ធ​នឹង​វិវាទ​ដីធ្លី​មួយ​ចំនួន។

សមាគម​អាដហុក បាន​ផ្ដល់​អនុសាសន៍​ដល់​រដ្ឋាភិបាល​កម្ពុជា ត្រូវ​បញ្ឈប់​ការ​ប្រើប្រាស់​កងកម្លាំង​ប្រដាប់​អាវុធ​បង្ក្រាប​អ្នក​ទាមទារ​ដោយ​សន្តិវិធី ដើម្បី​ការពារ​ភាគី​ក្រុមហ៊ុន បុគ្គល​មាន​ទ្រព្យ និង​មាន​អំណាច។ ចំណែក​ឯ​ក្រសួង​ពាក់ព័ន្ធ តុលាការ និង​គណៈកម្មការ​ដោះស្រាយ​វិវាទ​ដីធ្លី ត្រូវ​ពន្លឿន និង​ពង្រឹង​ការ​ដោះស្រាយ​បញ្ចប់​វិវាទ​ដីធ្លី​ដែល​នៅ​កក​ស្ទះ​ឱ្យ​ឆាប់​ចប់ មាន​តម្លាភាព យុត្តិធម៌ និង​មិន​លម្អៀង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស