28 C
Phnom Penh

លោក ស ខេង ស្នើ​សង្គម​ស៊ីវិល​និង​ភាគី​ពាក់ព័ន្ធ​ជួយ​ទប់ស្កាត់​គ្រឿងញៀន​ដែល​កំពុង​បំផ្លាញ​សង្គម

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​មហាផ្ទៃ លោក ស ខេង ស្នើ​ទៅ​គ្រប់​ភាគី​ទាំងអស់​ត្រូវ​សហការ​គ្នា​ជួយ​ទប់ស្កាត់​ដើម្បី​កុំ​ឱ្យ​គ្រឿងញៀន​បំផ្លាញ​សុខភាព​សាធារណៈ និង​សង្គម​ជាតិ ខណៈ​បញ្ហា​គ្រឿងញៀន​កំពុង​វាយលុក​ធ្ងន់ធ្ងរ​នៅ​កម្ពុជា។

ក្នុង​កិច្ចប្រជុំ​បូក​សរុប​សុវត្ថិភាព​ចរាចរណ៍​ប្រចាំ​ឆ្នាំ​នៅ​ទីស្ដីការ​ក្រសួង​សាធារណការ និង​ដឹកជញ្ជូន នៅ​ថ្ងៃ​ទី​៩ ខែ​កុម្ភៈ រដ្ឋមន្ត្រី​ក្រសួង​មហាផ្ទៃ លោក ស ខេង ជំរុញ​ឱ្យ​អាជ្ញាធរ​បន្ត​ខិតខំ​ទប់ស្កាត់​បទល្មើស​គ្រឿងញៀន​បន្ថែម​ទៀត​ដូច​ការ​ទប់ស្កាត់ Covid-19 ប៉ុន្តែ​លោក​ថា​បញ្ហា Covid-19 នឹង​ឈាន​ដល់​ទី​បញ្ចប់ តែ​សម្រាប់​បញ្ហា​គ្រឿងញៀន​វិញ គឺ​ពិបាក​នឹង​ឈាន​ទៅដល់​ទី​បញ្ចប់​ណាស់ ដោយសារតែ​បញ្ហា​នេះ​វា​បាន​កើតឡើង​សឹងតែ​គ្រប់​ទិសទី​ទៅ​ហើយ​នោះ។

លោក ស ខេង បង្ហាញ​ក្ដី​បារម្ភ​ថា គ្រឿងញៀន​កំពុង​វាយលុក និង​បំផ្លាញ​សុខភាព​សាធារណៈ រួម​ទាំង​សង្គម​ជាតិ ខណៈ​បច្ចុប្បន្ន ក្នុង​ចំណោម​អ្នក​ជាប់​ពន្ធនាគារ ៣​ម៉ឺន ៨​ពាន់​នាក់ គឺ​មាន​ជាង ២​ម៉ឺន​នាក់ ឬ​ស្មើ​នឹង ៥៤,៥២% ដែល​បាន​ជាប់​ពាក់ព័ន្ធ​ករណី​គ្រឿងញៀន។

ករណី​នេះ លោក​ស្នើ​ឱ្យ​បណ្តា​សារព័ត៌មាន អង្គការ​ក្រៅ​រដ្ឋាភិបាល សហការ​គ្នា​ទប់ស្កាត់​បទល្មើស​គ្រឿងញៀន ដើម្បី​ជួយ​ដោះស្រាយ និង​ការពារ​សង្គម​ជាតិ។ លើស​ពី​នេះ លោក​ថា​ក្រសួង​កំពុង​រៀបចំ​ឱ្យ​មាន​ការ​ស្ដារ​នីតិសម្បទា ដោយ​ការ​បន្សាប​គ្រឿងញៀន​ដើម្បី​បន្ថយ​ការ​ចង្អៀត​ណែន ខណៈ​អ្នក​ជាប់​ឃុំ​ក្នុង​ពន្ធនាគារ​បច្ចុប្បន្ន​ជា​អ្នក​ដែល​ពាក់ព័ន្ធ​គ្រឿងញៀន មាន​ទាំង​អ្នក​ដែល​រកស៊ី និង​អ្នក​ជក់​ផង​ដែរ។

អ្នកវិភាគ​នយោបាយ និង​សង្គម លោក គឹម សុខ យល់​ថា ការ​ថ្លែង​របស់​លោក ស ខេង អំពី​បំណង​ចង់​ដោះស្រាយ​វិបត្តិ​គ្រឿងញៀន​ដែល​ក្លាយ​ជា​បញ្ហា​សង្គម​ដ៏​ធ្ងន់ធ្ងរ​បច្ចុប្បន្ន និង​ការ​លើក​ទឹកចិត្ត​សមត្ថកិច្ច និង​ថ្នាក់​ដឹកនាំ​ខេត្ត​ឱ្យ​ចូលរួម​ដោះស្រាយ​នេះ លោក​ហាក់​និយាយ​ដោយ​ប្រយ័ត្នប្រយែង។ លើស​ពី​នេះ លោក ស ខេង ក៏​មិន​បង្ហាញ​ពី​ស្មារតី​រឹងប៉ឹង​ដូច​មុនៗ​ទេ ដែល​ទំនង​ជា​មាន​ការ​គំរាម ឬ​ណែនាំ​ពី​ផ្ទៃក្នុង​រដ្ឋាភិបាល ដែល​នាំ​ឱ្យ​គាត់​កែ​សេចក្ដី​ថ្លែង​ខ្លះ ស្ដាប់​ទៅ​ដូចជា​ជ្រាយ​ជាង​មុន។

លោក គឹម សុខ កត់សម្គាល់​ថា លោក ស ខេង បង្ហាញ​ការ​ជឿជាក់​ដោយ​បញ្ហា​គ្រឿងញៀន​អាច​ដោះស្រាយ​បាន ប៉ុន្តែ​លោក​ថ្លែង​ក្នុង​សំឡេង​ថ្នមៗ។ ករណី​នេះ បញ្ជាក់​ថា លោក​បាន​ដឹង​អំពី​វិធី​ដោះស្រាយ ប៉ុន្តែ​លោក​ត្រូវ​ថ្លែង​ថ្នម​ស្ថានការណ៍ ដោយសារតែ​គាត់​ទំនង​ជា​មិន​មាន​អំណាច​ចាត់ការ ដោយសារ​កន្លងមក លោក​បាន​បំភ្លឺ​ស្ទើរតែ​គ្មាន​លាក់លៀម​អំពី​ឥទ្ធិពល​អំណាច និង​ខ្សែ​បណ្ដាញ​ពួក​មេ​ឈ្មួញ​គ្រឿងញៀន ដែល​សូម្បី​មេដឹកនាំ​ក្រសួង​មហាផ្ទៃ​ដូច​រូប​គាត់​មិន​ហ៊ាន​លូក​ដៃ​ចាត់​វិធានការ​ផង​នោះ។

កាលពី​ថ្ងៃ​ទី​២៥ ខែ​មករា ឆ្នាំ​២០២២ រដ្ឋមន្ត្រី​ក្រសួង​មហាផ្ទៃ លោក ស ខេង បាន​ចេញ​បញ្ជា​ផ្ទាល់មាត់​ឱ្យ​ស្ថាប័ន​ពាក់ព័ន្ធ​ស្វែងរក​អ្នក​ទទួល​ខុសត្រូវ​ចំពោះ​ការ​អនុញ្ញាត​ឱ្យ​ក្រុមហ៊ុន​មួយ នាំចូល​សារធាតុ​ផ្សំ​ជា​គ្រឿងញៀន​ជាង ១០០​តោន​ចូល​មក​កម្ពុជា​ដោយ​ស្រប​ច្បាប់។

លោក ស ខេង ក៏​បាន​ប្រាប់​រដ្ឋមន្ត្រី​នៅ​ក្រសួង​ពាក់ព័ន្ធ​ដែល​ផ្តល់​អាជ្ញាប័ណ្ណ​នាំ​សារធាតុ​ផលិត​គ្រឿងញៀន​ចូល​កម្ពុជា បើ​ពុំ​ដូច្នេះ​ទេ រដ្ឋមន្ត្រី​រូប​នោះ​នឹង​ជាប់​ជំពាក់​នឹង​ការ​បំផ្លាញ​សុខភាព​សាធារណៈ និង​បំផ្លាញ​សេដ្ឋកិច្ច​សង្គម​ថែមទៀត។

ប្រធាន​អង្គការ​សម្ព័ន្ធ​គណនេយ្យ​ភាព​សង្គម​កម្ពុជា លោក សន ជ័យ ថ្លែង​ក្នុង​កម្មវិធី Idea Talk នៃ​សារព័ត៌មាន The Cambodia Daily ថា ការ​នាំចូល​សារធាតុ​គីមី​ផលិត​គ្រឿងញៀន​ចូល​កម្ពុជា​បាន វា​ពាក់ព័ន្ធ​នឹង​អំពើពុករលួយ​ធ្ងន់ធ្ងរ ទើប​ជំរុញ​ឱ្យ​ប្រព័ន្ធ​ចរាចរណ៍ និង​ជួញដូរ ឬ​ចែកចាយ​បាន​ទូលំទូលាយ និង​លឿន ថ្វីត្បិត​ការ​បង្ក្រាប និង​រឹបអូស​បាន​ច្រើន​ក៏​ពិតមែន ប៉ុន្តែ​អ្នក​ប្រើប្រាស់​ក៏​មាន​ច្រើន​ដែរ​បច្ចុប្បន្ន​នេះ។

លោក​បន្ត​ថា គ្រឿងញៀន​មិនមែន​ប៉ះពាល់​តែ​សុខភាព​សាធារណៈ បំផ្លាញ​មនុស្ស​នៅ​ក្នុង​សង្គម បង្កើត​ឱ្យ​មាន​អំពើ​ហិង្សា និង​ប្រជាពលរដ្ឋ​កាន់តែ​ក្រីក្រ​ទេ ប៉ុន្តែ​វា​ក៏​មាន​ឥទ្ធិពល​លើ​នយោបាយ បើ​សិន​អាជ្ញាធរ​មិន​អាច​ទប់ស្កាត់​បាន​នោះ​នៅ​ពេល​ខាងមុខ ហើយ​ឈ្មួញ​ធំៗ​ដែល​ជួញដូរ​គ្រឿងញៀន​នឹង​មាន​ឥទ្ធិពល​លើ​អ្នក​នយោបាយ​មិនខាន​ឡើយ។

លោក សន ជ័យ បន្ត​ថា បើសិនជា​គ្រឿងញៀន​មាន​ឥទ្ធិពល​លើ​អ្នក​នយោបាយ​នោះ វា​នឹង​ធ្វើ​ឱ្យ​ប្រព័ន្ធ​អភិបាលកិច្ច និង​សមត្ថភាព​នៃ​ការ​បង្ក្រាប​គ្រឿងញៀន​នឹង​ទន់ខ្សោយ។

បើ​តាម​អាជ្ញាធរ​​គ្រឿងញៀន​នៃ​ក្រសួង​មហាផ្ទៃ ឱ្យ​ដឹង​ថា ការ​បង្ក្រាប​បទល្មើស​គ្រឿងញៀន​កាលពី​ឆ្នាំ​២០២១ សមត្ថកិច្ច​ចាប់​ជនល្មើស​ជាង ១​ម៉ឺន ២​ពាន់​នាក់ ក្នុង​នោះ​អ្នកប្រើប្រាស់ ៣០% និង​អ្នក​ប្រព្រឹត្តិ​បទល្មើស​គ្រឿងញៀន​ដូចជា ជួញដូរ រក្សា​ទុក និង​ដាំដុះ​ចំនួន ៧០% ខណៈ​គ្រឿងញៀន​ត្រូវ​បាន​សមត្ថកិច្ច​រឹបអូស​បាន​ប្រហែល​ជា ៤​តោន​កន្លះ។ លើស​ពី​នេះ ការ​បង្ក្រាប​គ្រឿងញៀន​នៅ​ឆ្នាំ​២០២១ បាន​កើន​ឡើង​ប្រហែល ៣០% បើ​ធៀប​កាលពី​ឆ្នាំ​២០២០។

កាលពី​ខែ​មិថុនា ឆ្នាំ​២០២១ អង្គការ​សហប្រជាជាតិ​ដើម្បី​ប្រយុទ្ធ​ប្រឆាំង​នឹង​ឧក្រិដ្ឋកម្ម​គ្រឿងញៀន (UNODC) បាន​ចាត់ទុក​ប្រទេស​កម្ពុជា គឺ​ជា​គោលដៅ​នៃ​ក្រុម​ឧក្រិដ្ឋជន​គ្រឿងញៀន​ប្រើប្រាស់​សម្រាប់​ចរាចរ​គ្រឿងញៀន ផលិត និង​ចែកចាយ ក្រោយ​ពី​រក​ឃើញ​ថា ការ​ជួញដូរ​គ្រឿងញៀន​នៅ​ក្នុង​តំបន់​អាស៊ី​អាគ្នេយ៍​មួយ​នេះ​មិន​មាន​ការ​ថយ​ចុះ​ឡើយ បើ​ទោះបីជា​មាន​ការ​ឆ្លង​រីក​រាលដាល​នៃ​ជំងឺ Covid-19 ក្តី៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស