28 C
Phnom Penh

អាមេរិក​ប្រកាស​ពង្រឹង​កម្លាំង​សេដ្ឋកិច្ច​នៃ​ដៃគូ APEC ខណៈ​មហាអំណាច​មួយ​នេះ​ធ្វើជា​ម្ចាស់​ផ្ទះ​នៅ​ឆ្នាំ​២០២៣

ដោយ ឌឹ ខេមបូឌា ដេលី

បទវិភាគ

សហរដ្ឋ​អាមេរិក​ប្រកាស​បើក​វេទិកា​សហប្រតិបត្តិ​សេដ្ឋកិច្ច​អាស៊ី​ប៉ាស៊ីហ្វិក សម្រាប់​ឆ្នាំ​២០២៣ ដោយ​មាន​គោលដៅ​ពង្រឹង​កម្លាំង​វិនិយោគទុន និង​ពាណិជ្ជកម្ម​បើក​ចំហ​ជាមួយ​នឹង​ដៃគូ​ពាក់ព័ន្ធ​ទាំងអស់ ដោយ​ធានា​ឲ្យ​បាន​តំបន់​ឥណ្ឌូ​ប៉ាស៊ីហ្វិក​សេរី និង​បើក​ចំហ។

យោង​តាម​សេចក្ដី​ប្រកាស​ព័ត៌មាន​នៃ​ការិយាល័យ​អ្នក​នាំពាក្យ​ក្រសួង​ការបរទេស​សហរដ្ឋ​អាមេរិក Jen Psaki បាន​បញ្ជាក់​ថា សហរដ្ឋ​អាមេរិក​មាន​មោទកភាព​ដែល​ធ្វើជា​ម្ចាស់​ផ្ទះ​នៃ​វេទិកា​សហប្រតិបត្តិការ​សេដ្ឋកិច្ច​អាស៊ី​ប៉ាស៊ីហ្វិក ហៅ​កាត់​ថា APEC នៅ​ឆ្នាំ​២០២៣។ ក្នុង​សេចក្ដី​ប្រកាស​ព័ត៌មាន​នេះ លោក​ប្រធានាធិបតី ចូ បៃដិន និង​អនុ​ប្រធានាធិបតី អ្នកស្រី កាម៉ាឡា ហារីស នឹង​ជា​អធិបតីភាព​សម្រាប់​វេទិកា APEC នៅ​ឆ្នាំ​ក្រោយ​នេះ។

ជាមួយ​គ្នា​នេះ APEC នៅ​ឆ្នាំ​២០២៣ ផ្ដោត​សំខាន់​ទៅលើ​គោលដៅ​របស់​សហរដ្ឋ​អាមេរិក​ដែល​ពង្រីក និង​ធ្វើ​ឲ្យ​កាន់តែ​ស៊ីជម្រៅ​ថែម​ទៀត​នៃ​ទំនាក់ទំនង​សហប្រតិបត្តិការ​ផ្នែក​សេដ្ឋកិច្ច​នៅ​ក្នុង​តំបន់ ហើយ​សហរដ្ឋ​អាមេរិក​ថ្លែង​អំណរគុណ​ចំពោះ​សម្ព័ន្ធ​ដៃគូ APEC ដែល​គាំទ្រ​សហរដ្ឋ​អាមេរិក​ជា​អ្នក​រៀបចំ​វេទិកា​សេដ្ឋកិច្ច​អន្តរជាតិ​នេះ។

ជាមួយ​គ្នា​នេះ​ទៀត រដ្ឋការ​របស់​លោក ចូ បៃដិន ចាត់ទុក​ជា​អាទិភាព គឺ​កម្លាំង​សេដ្ឋកិច្ច​នៃ​ដៃគូ​សហប្រតិបត្តិការ APEC ដែល​កំណត់​អត្តសញ្ញាណ​រួម​ជាមួយ​គ្នា​ឆ្ពោះ​ទៅ​គោលដៅ​សំដៅ​ផ្ដល់​ការ​រីកចម្រើន​សម្រាប់​គ្រប់​ដៃគូ​ពាក់ព័ន្ធ​ទាំងអស់។ ក្នុង​ន័យ​នេះ រដ្ឋមន្ត្រី​ក្រសួង​ពាណិជ្ជកម្ម Gina Raimondo និង​ឯកអគ្គរដ្ឋទូត​សហរដ្ឋ​អាមេរិក​ទទួល​បន្ទុក​ផ្នែក​ពាណិជ្ជកម្ម Katherine Tai និង​ក្រុម​ការងារ​សហរដ្ឋ​អាមេរិក​ពេលនេះ កំពុងតែ​ធ្វើ​ការងារ​យ៉ាង​សកម្ម​ដើម្បី​ពង្រីកពង្រឹង​ដៃគូ​ទាំងអស់​នៃ​ក្របខ័ណ្ឌ​សេដ្ឋកិច្ច​ឥណ្ឌូ​ប៉ាស៊ីហ្វិក ដែល​ជា​គោលដៅ​នៃ​ការ​ចែករំលែក​ផលប្រយោជន៍​បទពិសោធន៍​ទៅ​ថ្ងៃ​អនាគត ដែល​ក្នុង​នោះ​រួម​មាន​ការ​សម្របសម្រួល​ទំនាក់ទំនង​ពាណិជ្ជកម្ម គំរូ​នៃ​ស្តង់ដារ​សេដ្ឋកិច្ច​ឌីជីថល និង​បណ្ដាញ​បច្ចេកទេស។

មួយ​វិញ​ទៀត វេទិកា APEC នៅ​ឆ្នាំ​២០២៣ សំដៅ​កាត់បន្ថយ​ឧស្ម័ន​កាបូនិច និង​បោស​សម្អាត​បរិស្ថាន​អាក្រក់។ មិន​តែប៉ុណ្ណោះ​ទៀត រដ្ឋមន្ត្រី​ការបរទេស Antony Bliken ដែល​ខណៈ​នេះ​កំពុង​ស្ថិតនៅ​ក្នុង​តំបន់​អាស៊ី​ប៉ាស៊ីហ្វិក គឺ​ជា​គោលដៅ​នៃ​ដំណើរ​ទស្សនកិច្ច​ពង្រឹង​ទំនាក់ទំនង​ការទូត ហើយ​បង្កើន​ការ​ចែករំលែក​នៃ​អាទិភាព​ទាំងឡាយ​របស់​សហរដ្ឋ​អាមេរិក។

សេចក្ដី​ប្រកាស​ព័ត៌មាន​របស់​ការិយាល័យ​អ្នក​នាំពាក្យ​ក្រសួង​ការបរទេស បាន​បញ្ជាក់​ទៀត​ថា សហរដ្ឋ​អាមេរិក​កំពុង​យកចិត្ត​ទុកដាក់​សហប្រតិបត្តិការ​ជិតស្និទ្ធ​ជាមួយ​នឹង​រដ្ឋាភិបាល​ថៃ ដែល​ឆ្នាំ​២០២២ នេះ គឺជា​ម្ចាស់​ផ្ទះ​នៃ​អ្នក​រៀបចំ​វេទិកា APEC ហើយ​នៅ​ឆ្នាំ​២០២៤ គឺ​ប្រទេស​ប៉េរ៉ូ ជា​អ្នក​បន្ត​រៀបចំ APEC បន្ទាប់ពី​សហរដ្ឋ​អាមេរិក។ គ្រប់​ដៃគូ​ទាំងអស់​នៃ​សម្ពន្ធភាព APEC គឺ​ស្ថិតនៅ​លើ​របៀបវារៈ​សម្រាប់​ផលប្រយោជន៍​នៃ​ប្រទេស​ដៃគូ​ទាំងអស់​នេះ។

ជាមួយ​គ្នា​នេះ ពី​ដែន​កោះ​តៃវ៉ាន់​ឯណោះ​វិញ ក្រសួង​ការបរទេស​ដែន​កោះ​នេះ​បាន​ប្រកាស​គាំទ្រ​ចំពោះ​សំណើ​របស់​សហរដ្ឋ​អាមេរិក ដែល​ស្នើ​បង្កើត​នូវ​ក្របខ័ណ្ឌ​សេដ្ឋកិច្ច​ឥណ្ឌូ​ប៉ាស៊ីហ្វិក ហៅ​កាត់​ថា IPEF ដោយ​ចាត់ទុក​សំណើ​នេះ​ថា​ជា​ការ​ដោះដូរ​ទស្សនៈ​គ្នា​ទៅវិញ​ទៅមក​ជាមួយ​នឹង​ទីក្រុង​វ៉ាស៊ីនតោន និង​ដៃគូ​សហប្រតិបត្តិការ​ក្នុង​តំបន់។ សេចក្ដី​ប្រកាស​របស់​ក្រសួង​ការបរទេស​ដែន​កោះ​តៃវ៉ាន់ ដែល​ថ្លែង​ដោយ​អ្នក​នាំពាក្យ គឺ​អ្នកស្រី Joanne Ou បាន​បញ្ជាក់​ថា សំណើ​របស់​សហរដ្ឋ​អាមេរិក​ពិតជា​មាន​តម្លៃ​ដែល​ដែន​កោះ​តៃវ៉ាន់​រីករាយ​នឹង​ចូលរួម​ផង​ដែរ ហើយ​វា​ដូចជា​សហប្រតិបត្តិការ​សេដ្ឋកិច្ច​ឥណ្ឌូ​ប៉ាស៊ីហ្វិក​ដូចនេះ​ដែរ។

ក្រសួង​ការបរទេស​តៃវ៉ាន់ សូម​ស្វាគមន៍​ការ​ប្ដេជ្ញា​ចិត្ត​របស់​សហរដ្ឋ​អាមេរិក​ដែល​ស្នើ​ឲ្យ​បង្កើត​នូវ​ក្របខ័ណ្ឌ​សេដ្ឋកិច្ច​ឥណ្ឌូ​ប៉ាស៊ីហ្វិក​មួយ​នេះ ដោយ​ចាត់ទុក​ថា​ជា​យន្តការ​សហប្រតិបត្តិការ​សេដ្ឋកិច្ច​ពាណិជ្ជកម្ម ហើយ​ក្លាយ​ជា​បណ្ដាញ​ទំនាក់ទំនង​ក្នុង​គោលដៅ​ពង្រឹង​សហប្រតិបត្តិការ​លើ​វិស័យ​សេដ្ឋកិច្ច និង​ពាណិជ្ជកម្ម​ទាំង​ទ្វេភាគី និង​ពហុភាគី ហើយ​ជា​គោលដៅ​នៃ​ការ​លើក​ទឹកចិត្ត​កាន់តែ​រឹងមាំ​ថែម​ទៀត​នៃ​សមាហរណកម្ម​សេដ្ឋកិច្ច​ឥណ្ឌូ​ប៉ាស៊ីហ្វិក។

យោង​តាម​សារព័ត៌មាន​របស់​កោះ​តៃវ៉ាន់ សំណើ​របស់​ប្រធានាធិបតី​អាមេរិក ចូ បៃដិន បាន​ធ្វើឡើង​នៅ​ឯ​កិច្ចប្រជុំ​កំពូល​អាស៊ី​បូព៌ា កាលពី​ខែ​តុលា ឆ្នាំ​២០២១ ដែល​ពេល​នោះ​សហរដ្ឋ​អាមេរិក​ពង្រីក​សម្ពន្ធភាព​នៅ​ក្នុង​តំបន់​ឥណ្ឌូ​ប៉ាស៊ីហ្វិក​ឲ្យ​កាន់តែ​មាន​ចំនួន​ច្រើន និង​កាន់តែ​រឹងមាំ។

សូម​ជម្រាប​ថា ប្រទេស​ដែល​ជា​សមាជិក​នៃ​កិច្ច​សហប្រតិបត្តិការ​ឥណ្ឌូ​ប៉ាស៊ីហ្វិក​មាន ២១​ប្រទេស គឺ​មាន​កោះ​តៃវ៉ាន់ តែ​ពុំ​មាន​កម្ពុជា ឡាវ ភូមា ដែល​ជា​សមាជិក​នៃ​សមាគម​អាស៊ាន​នោះ​ទេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស