30 C
Phnom Penh

មេដឹកនាំ​ដែល​ទទួល​ពានរង្វាន់​សន្តិភាព​គួរតែ​ទៅ​រុស្ស៊ី​និង​អ៊ុយក្រែន​ដើម្បី​ជួយ​ឱ្យ​មាន​សន្តិភាព​ឡើងវិញ

ដោយ ឌឹ ខេមបូឌា ដេលី

បទវិភាគ

នៅ​ពេល​ដែល​ពិភពលោក​កំពុងតែ​ភ័យខ្លាច​ការ​ផ្ទុះ​សង្គ្រាម​នៃ​អឺរ៉ុប​ខាងកើត និង​សង្គ្រាម​វាយលុក​ពី​មហាអំណាច​រុស្ស៊ី លើ​ប្រទេស​អ៊ុយក្រែន អ្នក​សង្កេតការណ៍ និង​អ្នកជំនាញ​ខាង​ផ្នែក​ដំណោះស្រាយ ឬ​ក៏​អ្នកជំនាញ​ផ្នែក​ពន្លត់​ភ្នក់ភ្លើង​សង្គ្រាម កំពុងតែ​សម្លឹង​មើល​ថា តើ​ការ​ទប់ស្កាត់​ស្ថានភាព​តានតឹង​នៅ​អឺរ៉ុប​ខាងកើត​នេះ​ដោយ​មធ្យោបាយ​ណា​ខ្លះ?

មកដល់​ពេលនេះ អ្នកជំនាញ​ផ្នែក​យោធា​មួយ​ចំនួន​នៅ​អឺរ៉ុប​ខាងកើត បារម្ភ​ខ្លាច​មាន​ការ​ប៉ះទង្គិច​គ្នា​មិន​ត្រឹមតែ​រុស្ស៊ី និង​អ៊ុយក្រែន​នោះ​ទេ គឺ​វា​អាច​រុស្ស៊ី និង​អង្គការ​យោធា​ណាតូ (NATO) ផង​ដែរ ព្រោះ​ពេលនេះ ណាតូ​បាន​ដាក់​ពង្រាយ​ទ័ព និង​សព្វាវុធ​រួចរាល់​អស់​ហើយ​នៅ​អឺរ៉ុប​ខាងកើត ជាពិសេស​ទៅ​លើ​ប្រទេស​ដែល​នៅ​ជាប់​នឹង​ព្រំដែន​ប្រទេស​រុស្ស៊ី។

កាលពី​សប្ដាហ៍​មុន ក្រុមប្រឹក្សា​សន្តិសុខ​អង្គការ​សហប្រជាជាតិ​បាន​បើក​កិច្ចប្រជុំ​របស់​ខ្លួន​ដើម្បី​ពិនិត្យ​មើល​ស្ថានភាព​នៅ​អឺរ៉ុប​ខាងកើត ជាពិសេស​បាន​ធ្វើការ​វាយតម្លៃ​អំពី​សកម្មភាព​អនុត្តរភាព​កងទ័ព​រុស្ស៊ី ដែល​កំពុង​រៀបចំ​ផែនការ​លុកលុយ​អ៊ុយក្រែន ហើយ​អាច​ប៉ះពាល់​ដល់​អឺរ៉ុប​ខាងកើត។ ក្នុង​កិច្ចប្រជុំ​នេះ ភាព​តានតឹង​បាន​ផ្ទុះឡើង​បន្ទាប់ពី​តំណាង​របស់​សហរដ្ឋ​អាមេរិក អង់គ្លេស ចង្អុល​មុខ​ចំៗ​ទៅ​លើ​តំណាង​ប្រទេស​រុស្ស៊ី ថា​ជា​អ្នក​បង្ក​ហេតុ។

តំណាង​ប្រទេស​រុស្ស៊ី បាន​ឆ្លើយតប​ដោយ​ប្រតិកម្ម​ថា ដើមចម​គឺ​កើត​ចេញពី​លោក​ខាងលិច និង​អង្គការ​ណាតូ។ នៅ​ក្នុង​នោះ តំណាង​ប្រទេស​ចិន ឡើង​ការពារ​រុស្ស៊ី។ កិច្ចប្រជុំ​បិទ​បញ្ចប់​បាន​ត្រឹមតែ​ឈ្លោះ​គ្នា និង​គំរាម​គ្នា​ទៅវិញ​ទៅមក​តែប៉ុណ្ណោះ។

តែ​យ៉ាងណា ប្រទេស​ភាគច្រើន​នៃ​ក្រុមប្រឹក្សា​សន្តិសុខ​អង្គការ​សហប្រជាជាតិ បាន​ទាមទារ​ឲ្យ​រុស្ស៊ី បន្ថយ​សកម្មភាព​យោធា​ទៅលើ​ប្រទេស​អ៊ុយក្រែន។ មកដល់​ពេលនេះ ស្ថានការណ៍​យោធា​នៅតែ​តានតឹង​នៅឡើយ។

ពិភពលោក​កំពុងតែ​ស្វែងរក​ជន​ទាំងឡាយ​ណា​ដែល​ជា​អ្នក​ស្ថាបនិក​សន្តិភាព និង​ជា​អ្នក​បាន​ពានរង្វាន់​ដោយសារ​ជា​អ្នក​ស្ថាបនិក​សន្តិភាព គួរ​ទៅ​ជួយ​រក​ដំណោះស្រាយ​នៅ​អឺរ៉ុប​ខាងកើត ហើយ​ក្រុម​នោះ ឬ​បុរស​នោះ​មិន​គួរ​អឹមអៀន​លាក់​ខ្លួន​នោះ​ទេ គឺ​គួរតែ​ចេញ​មុខ​ទៅ​ជួយ​រក​ដំណោះស្រាយ ដើម្បី​ឱ្យ​ឈាន​ទៅ​រក​ការ​កាត់បន្ថយ​ភាព​តានតឹង​នៅ​អឺរ៉ុប​ខាងកើត​ទាំងមូល។

បុរស​រូប​ណា​ដែល​មាន​ក្រុម​ខ្លួន​អះអាង​ថា​ជា​អ្នក​ស្ថាបនិក​សន្តិភាព​ពិភពលោក គួរ​ដឹកនាំ​គណប្រតិភូ​របស់​ខ្លួន​ចេញ​ទៅ​អឺរ៉ុប​ខាងកើត ចេញ​ទៅ​ប្រទេស​អ៊ុយក្រែន ហើយ​ជួប​ប្រធានាធិបតី​រុស្ស៊ី ជួប​ប្រធានាធិបតី​អ៊ុយក្រែន ដើម្បី​ឲ្យ​មេដឹកនាំ​ប្រទេស​ពីរ​នេះ​មក​អង្គុយ​តុ​ចរចា​ជាមួយ​គ្នា ហើយ​ឈាន​ទៅ​ដល់​ការ​កាត់បន្ថយ​ភាព​តានតឹង​ផ្នែក​យោធា​ដែល​កំពុង​កើតមាន​តាម​ព្រំដែន​នៃ​ប្រទេស​ទាំង​ពីរ។

ចុងក្រោយ​នេះ ប្រធានាធិបតី​បារាំង Macron បាន​ទៅ​ជួប​លោក ពូទីន និង​ប្រធានាធិបតី​អ៊ុយក្រែន ហេ្សឡេនស្គី ដោយ​បាន​សន្ទនា​គ្នា​ច្រើន​ម៉ោង​ក្នុង​ការ​រក​មធ្យោបាយ​បន្ថយ​កម្ដៅ​យោធា​តាម​ព្រំដែន​រុស្ស៊ី និង​អ៊ុយក្រែន។

ទីបំផុត មេដឹកនាំ​រុស្ស៊ី បាន​ត្រឹមតែ​ប្រាប់​លោក Macron ថា ជម្រើស​ការទូត​នៅតែ​លើ​តុ​ចរចា និង​ជម្រើស​កងទ័ព​ក៏​នៅ​លើ​តុ​ចរចា។ លោក ពូទីន បាន​ប្រាប់​ទៀត​ថា លោក​មិន​លើក​ទ័ព​វាយ​អ៊ុយក្រែន នោះ​ទេ ប៉ុន្តែ​ចលនា​កងទ័ព​របស់​រុស្ស៊ី មក​កាន់​អ៊ុយក្រែន​កាន់តែ​ខ្លាំង។ កាលពី​សប្ដាហ៍​មុន​ទៀត​នោះ ប្រធានាធិបតី​តួកគី ក៏​បាន​ទៅ​ជួប​ប្រធានាធិបតី​រុស្ស៊ី និង​អ៊ុយក្រែន ផង​ដែរ ដោយ​បញ្ចុះបញ្ចូល​ឲ្យ​មេដឹកនាំ​ទាំង​ពីរ​បន្ថយ​ភាព​តានតឹង​ដាក់​គ្នា​ផ្នែក​យោធា ហើយ​ជួប​គ្នា​ដោយ​ផ្ទាល់ ជាពិសេស​មេដឹកនាំ​តួកគី សម្របសម្រួល​ឲ្យ​រុស្ស៊ី​បន្ថយ​ការ​ដាក់​សម្ពាធ​យោធា​ទៅលើ​អ៊ុយក្រែន ដែល​ជា​ប្រទេស​ទន់ខ្សោយ។

ឥឡូវ​នេះ អធិការបតី​អាល្លឺម៉ង់ Olaf Scholz បាន​ធ្វើ​ដំណើរ​ទៅកាន់​ប្រទេស​រុស្ស៊ី និង​អ៊ុយក្រែន ដើម្បី​ជួប​មេដឹកនាំ​នៃ​ប្រទេស​ទាំង​ពីរ​នេះ គឺ​ក្នុង​បំណង​ផ្សះផ្សា​ប្រទេស​ទាំង​ពីរ​ឲ្យ​មាន​សន្តិភាព​ជាមួយ​គ្នា​ឡើងវិញ។ នៅ​ថ្ងៃ​ចន្ទ ទី​១៤ ខែ​កុម្ភៈ នេះ អធិការបតី​អាល្លឺម៉ង់ ត្រូវ​ទៅដល់​ទីក្រុង​មូស្គូ ហើយ​ថ្ងៃ​អង្គារ​បន្ទាប់មក​ត្រូវ​ទៅដល់​ទីក្រុង​គៀវ។ គោលបំណង​ទំនង​គឺ​ដូច​នឹង​ប្រធានាធិបតី​បារាំង Macron ផង​ដែរ។

តែ​ទីបំផុត មេដឹកនាំ​រុស្ស៊ី និង​មេដឹកនាំ​អ៊ុយក្រែន ពុំ​បាន​ជួប​គ្នា​នោះ​ទេ។ យ៉ាងនេះ​ក្ដី ប្រធានាធិបតី​អាមេរិក លោក ចូ បៃដិន ដែល​មិនមែន​ជា​អ្នក​សម្របសម្រួល​ឲ្យ​រុស្ស៊ី-អ៊ុយក្រែន​ត្រូវ​គ្នា​នោះ​ទេ គឺ​មេដឹកនាំ​មហាអំណាច​មួយ​នេះ​តែងតែ​ប្រើ​មធ្យោបាយ​មួយ គឺ​គំរាម​រុស្ស៊ី ដោយ​ព្រមាន​មិន​ឲ្យ​ក្រុង​មូស្គូ លើក​ទ័ព​វាយ​អ៊ុយក្រែន​នោះ​ទេ។ លោក បៃដិន ប្រាប់​លោក ពូទីន ថា​ក្រុង​មូស្គូ នឹង​ជួប​ផលវិបាក​ធ្ងន់ធ្ងរ បើ​ហ៊ាន​តែ​ឈ្លានពាន​អ៊ុយក្រែន ហើយ​ព្រមាន​ថា​កុំ​ប៉ះពាល់​ប្រទេស​សមាជិក​ណាតូ​ឱ្យ​សោះ។ សម្រាប់​លោក ពូទីន មិន​ទទួលយក​ការ​ព្រមាន​របស់​លោក បៃដិន នោះ​ទេ ហើយ​បាន​ប្រតិកម្ម​វិញ​ថា អ្វីៗ​ដែល​ធ្វើ​ឲ្យ​អ៊ុយក្រែន​ហ៊ាន​ប្រឈម​មុខ​នឹង​រុស្ស៊ី ក៏​ដោយសារតែ​អ៊ុយក្រែន អាង​អាមេរិក និង​អាង​ណាតូ​នៅ​ពីក្រោយ។

សម្រាប់​រុស្ស៊ី ព្រមាន​ថា អ្វីៗ​វា​អាច​ធូរស្រាល បើ​ណាតូ​ដើរ​ចេញពី​អ៊ុយក្រែន បើ​ណាតូ​លែង​មាន​កងទ័ព​របស់​ខ្លួន​នៅ​អឺរ៉ុប​ខាងកើត​ដែល​ជាប់​នឹង​ព្រំដែន​រុស្ស៊ី។

អ្នកជំនាញ​ផ្នែក​វិទ្យាសាស្ត្រ​នយោបាយ និង​យោធា នៅតែ​ព្រមាន​ថា ភាព​ផុយ​ស្រួយ​រវាង​កងទ័ព​រុស្ស៊ី និង​អ៊ុយក្រែន និង​ភាព​ផុយ​ស្រួយ​រវាង​កងទ័ព​រុស្ស៊ី និង​ណាតូ គឺ​ឡើង​កម្រិត​ខ្ពស់​បំផុត​នៅ​ពេលនេះ។

យ៉ាងណា ពិភពលោក​មាន​អ្នក​ស្ថាបនិក​សន្តិភាព​មួយ​ហើយ​ដែល​ទើប​តែ​ទទួល​បាន​ពានរង្វាន់​ពី​អង្គការ​មួយ​នៅ​កូរ៉េ​ខាងត្បូង គឺ​មាន​ឈ្មោះ​ថា​ជា​អ្នក​ស្ថាបនិក​សន្តិភាព​សកល។ បុរស​នេះ​គួរតែ​ដឹកនាំ​ប្រតិភូ​របស់​ខ្លួន​ទៅ​អឺរ៉ុប​ខាងកើត ដើម្បី​រុញ​ឲ្យ​មាន​សន្តិភាព​នៅ​តំបន់​នោះ ព្រោះ​អ្នក​ស្ថាបនិក​សន្តិភាព​នេះ​មាន​បទពិសោធន៍​ច្រើន​ណាស់​ក្នុង​ការ​ពន្លត់​ភ្នក់ភ្លើង​សង្គ្រាម​ក្នុង​ប្រទេស​ខ្លួនឯង។ ប៉ុន្តែ​ពុំ​មាន​បទពិសោធន៍​ម្ដង​ណា​ទេ​ចំពោះ​ភ្នក់ភ្លើង​សង្គ្រាម​នៅ​ប្រទេស​ដទៃ និង​តំបន់​ដទៃ​នៃ​ពិភពលោក។

អ្នក​ស្ថាបនិក​សន្តិភាព​សកល​នេះ គួរតែ​សាកល្បង​ទៅ​ប្រទេស​រុស្ស៊ី និង​អ៊ុយក្រែន ដើម្បី​ជួប​មេដឹកនាំ​ប្រទេស​ពីរ​នេះ ហើយ​បញ្ចុះបញ្ចូល​ឲ្យ​ពន្លត់​ភាព​តានតឹង​ផ្នែក​យោធា​នៅ​អឺរ៉ុប​ខាងកើត​ទាំងមូល។ តែ​យ៉ាងណា សូម​កុំ​ផ្ដល់​គំនិត​ថា បើ​អ្នក​ជា​ប្រទេស​ទន់ខ្សោយ គឺ​អ្នក​មិន​ត្រូវ​ហ៊ាន​ប្រឈម​មុខ​ជាមួយ​ប្រទេស​ខ្លាំង​នោះ​ទេ។ តែ​បើ​អ្នក​សុខចិត្ត​ទទួលយក​សន្តិភាព​ពី​ប្រទេស​ខ្លាំង គឺ​ប្រទេស​អ្នក​នឹង​បាន​សន្តិភាព ហើយ​អំណាច​របស់​អ្នក​នឹង​នៅតែ​រឹងមាំ​ដដែល គឺ​ប្រទេស​ខ្លាំង​នោះ​គេ​នឹង​ជួយ​ការពារ​អំណាច​របស់​អ្នក៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស