នៅមុនចេញដំណើរពីរដ្ឋធានីគៀវ នៃប្រទេសអ៊ុយក្រែន ដែលលោកបានជួបជាមួយប្រធានាធិបតី Volodymyr Zelenskiy កាលពីថ្ងៃចន្ទ ទី១៤ កុម្ភៈ លោក Olaf Scholz អធិការបតីអាល្លឺម៉ង់ បានទៅដល់ទីក្រុងមូស្គូ ហើយនៅថ្ងៃទី១៥ កុម្ភៈ។
តាមបណ្ដាញផ្សាយព័ត៌មាន BBC អធិការបតីអាល្លឺម៉ង់រូបនេះត្រូវជួបជាមួយប្រធានាធិបតីរុស្ស៊ី Vladimir Putin ដែលរំពឹងថា លោកនឹងស្នើឱ្យរុស្ស៊ី បន្ថយភាពតានតឹងទៅលើប្រទេសអ៊ុយក្រែន ក្រោមការសន្យារបស់លោកដែលធានាថា អ៊ុយក្រែននឹងមិនអាចក្លាយជាសមាជិកទី៣១ របស់អង្គការយោធាណាតូ (NATO) ឡើយ។ តែដំណឹងចុងក្រោយដែលតាមបណ្ដាញផ្សាយព័ត៌មាន BBC គឺរុស្ស៊ី ចាប់ផ្ដើមដកទ័ពរថក្រោះមួយចំនួនចេញពីទីតាំងនៅជាប់ព្រំដែនប្រទេសអ៊ុយក្រែន ដោយត្រឡប់ទៅមូលដ្ឋានរបស់ពួកគេវិញនៅថ្ងៃទី១៥ កុម្ភៈ នេះ។
ក្រសួងការពារជាតិរុស្ស៊ី បានប្រកាសថា ការធ្វើសមយុទ្ធដ៏ធំមួយទោះជានៅបន្ត តែអង្គភាពកងទ័ពមួយចំនួនត្រូវបានអនុញ្ញាតឱ្យត្រឡប់ទៅកាន់មូលដ្ឋានរបស់ពួកគេវិញ។
រុស្ស៊ី បានដាក់ពង្រាយទ័ពរបស់ខ្លួនជាប់នឹងព្រំដែនអ៊ុយក្រែន ដែលជាការព្រមានលើកទ័ពលុកលុយអតីតរដ្ឋចំណុះសហភាពសូវៀតមួយនេះ ព្រោះតែក្រុងមូស្គូ មិនចង់ឱ្យអ៊ុយក្រែន ក្លាយជាសមាជិករបស់អង្គការយោធាណាតូដាច់ខាត។ តែបែបនេះក្ដី ក្រុងមូស្គូ នៅតែច្រានចោលចំពោះការចោទថាការដាក់ពង្រាយទ័ពដ៏ច្រើនសន្ធឹកនេះ គឺដើម្បីលុកលុយអ៊ុយក្រែន។
អ្នកនាំពាក្យក្រសួងការពារជាតិរុស្ស៊ី Igor Konashenkov បាននិយាយថា កងទ័ពរុស្ស៊ីដែលត្រូវធ្វើសមយុទ្ធ គឺនៅតែស្ថិតនៅលើទីតាំងរបស់ខ្លួនរហូតដល់ថ្ងៃទី២០ ខែកុម្ភៈ ទើបអាចសម្រេចថាតើត្រូវដកមកវិញ ឬបន្តរក្សាទុកឱ្យលើទីតាំងដដែល។ បន្ទាប់ពីរុស្ស៊ី ប្រកាសដូចនេះ រដ្ឋាភិបាលអង់គ្លេស និងប្រទេសសម្ពន្ធមិត្តរបស់អាមេរិក នៅតែគិតថាការមិនដឹងចំនួនទ័ពជាក់លាក់ដែលត្រូវដកចេញពីទីតាំងជាប់ព្រំដែនអ៊ុយក្រែន គឺមិនប្រាកដថារុស្ស៊ីមានចេតនាធ្វើឱ្យធូរស្រាលស្ថានការណ៍យោធាជាមួយនឹងប្រទេសអ៊ុយក្រែននោះទេ។
តែយ៉ាងណា សញ្ញាដែលរុស្ស៊ីផ្ដល់ឱ្យនេះ ធ្វើឡើងបន្ទាប់ពីអធិការបតីអាល្លឺម៉ង់ ដែលមុនទៅដល់ទីក្រុងមូស្គូ នៅថ្ងៃទី១៥ កុម្ភៈ នេះ ហើយត្រូវជួបប្រធានាធិបតី លោក វ្លាឌីមៀរ ពូទីន គឺលោក Olaf Scholz បានស្នើសុំជាចំហឲ្យរុស្ស៊ី ជាអ្នកចាប់ផ្ដើមបន្ថយភាពតានតឹងដាក់ទៅលើអ៊ុយក្រែន ដោយសន្យាថានឹងធ្វើតាមសំណើរបស់រុស្ស៊ី ដែលសុំកុំឲ្យអ៊ុយក្រែន ជាសមាជិកយោធាណាតូ។
ប៉ុន្តែមេដឹកនាំអាល្លឺម៉ង់រូបនេះព្រមានថា បើក្រុងមូស្គូ លើកទ័ពឈ្លានពានអ៊ុយក្រែន គឺអាល្លឺម៉ង់នឹងសហការជាមួយសមាជិកណាតូធំៗ ដូចជាអាមេរិក អង់គ្លេស បារាំង កាណាដា ហុឡង់ដ៍ និងអ៊ីតាលី នឹងឆ្លើយតបទៅលើប្រទេសរុស្ស៊ី ដោយបិទខ្ទប់ទាំងស្រុងនូវទីផ្សាររបស់រុស្ស៊ី ដែលបញ្ចេញឧស្ម័នទៅលក់នៅអឺរ៉ុប និងបិទទាំងអស់នូវបំពង់បង្ហូរឧស្ម័នរបស់រុស្ស៊ី ដែលទៅទីផ្សារអឺរ៉ុបឆ្លងកាត់ប្រទេសអាល្លឺម៉ង់។
សម្រាប់ប្រធានាធិបតីអាមេរិក លោក ចូ បៃដិន ព្រមានថា បើរុស្ស៊ីឈ្លានពានអ៊ុយក្រែន គឺមានន័យថា រុស្ស៊ីចង់បិទបញ្ចប់ទំនាក់ទំនងការលក់ឧស្ម័នរបស់រុស្ស៊ី នៅលើទីផ្សារអឺរ៉ុប។ សេដ្ឋកិច្ចរបស់រុស្ស៊ី គឺពឹងផ្អែកខ្លាំងលើការលក់ឧស្ម័ននៅលើទីផ្សារអឺរ៉ុប។
ពីរដ្ឋធានីគៀវ ឯណោះវិញ ប្រធានាធិបតី Volodymyr Zelenskiy ដែលថ្លែងក្នុងទិវានៃក្ដីស្រឡាញ់ ១៤ កុម្ភៈ លោកបានអំពាវនាវសុំឱ្យជនរួមជាតិអ៊ុយក្រែន បង្ហូតទង់ជាតិអ៊ុយក្រែននៅតាមមុខផ្ទះរៀងៗខ្លួន ដែលលោកថាត្រូវនាំគ្នាស្រឡាញ់មាតុភូមិកំណើតរបស់ខ្លួន គឺកុំលក់ឧត្តមគតិរបស់ខ្លួនដើម្បីសន្តិភាពក្រោមសម្ពាធរបស់ប្រទេសឈ្លានពាន។ លោកបានទទូចថា នៅថ្ងៃបុណ្យជាតិ ១៦ កុម្ភៈ គឺជនរួមជាតិត្រូវនាំគ្នាច្រៀងចម្រៀងជាតិរបស់ខ្លួនឱ្យបានគ្រប់ៗគ្នា។
លោក Zelenskiy បានប្រាប់អធិការបតីអាល្លឺម៉ង់ថា ទាំងរូបលោក និងប្រជាជនអ៊ុយក្រែន នឹងមិនដោះដូរសន្តិភាពដោយការប្រគល់ដីឱ្យអ្នកឈ្លានពានឡើយ ប៉ុន្តែលោកសង្ឃឹមថា មហាអំណាចរុស្ស៊ី នឹងមិនធ្វើសង្គ្រាមវាយលុកអ៊ុយក្រែននោះទេ ខណៈលោកចាត់ទុកភាពភ័យខ្លាចថារុស្ស៊ី នឹងបើកទ្វារសង្គ្រាមវាយលុកលុយអ៊ុយក្រែន គឺគ្រាន់តែជាការបង្អើលប៉ុណ្ណោះ។ យ៉ាងនេះក្ដី មេដឹកនាំអ៊ុយក្រែនរូបនេះបានបង្ហើបថា មានគេប្រាប់លោកថា រុស្ស៊ីនឹងលើកទ័ពវាយប្រទេសអ៊ុយក្រែននៅថ្ងៃទី១៦ កុម្ភៈ តែសម្រាប់រូបលោកនៅតែមិនជឿឡើយ។
ទោះជាមេដឹកនាំអ៊ុយក្រែនរូបនេះមានសុទិដ្ឋិនិយមថា រុស្ស៊ីនឹងមិនលើកទ័ពវាយអ៊ុយក្រែនពិតមែន តែកងទ័ពអ៊ុយក្រែនដែលដាក់ពង្រាយតាមព្រំដែនជាប់នឹងរុស្ស៊ី គឺមានជាង ១៥ម៉ឺននាក់ជាមួយនឹងការហាត់សមសង្គ្រាមសឹងរាល់ថ្ងៃ។
យ៉ាងណា អ្នកសង្កេតការណ៍មួយចំនួនមើលឃើញថា រុស្ស៊ីកំពុងតថ្លៃជាមួយអ៊ុយក្រែនផង និងជាមួយអង្គការយោធាណាតូផង។ អ្វីដែលមហាអំណាចយោធាមួយនេះចង់បាន គឺមាន ៣ចំណុច៖
- ទី១ អ៊ុយក្រែនមិនអាចក្លាយជាសមាជិកណាតូដាច់ខាត។
- ទី២ កងទ័ពរបស់ណាតូ ត្រូវដក ឬកាត់បន្ថយចេញពីប្រទេសដែលបានដាក់ពង្រាយជាប់នឹងព្រំដែនរុស្ស៊ី។
- និងទី៣ រុស្ស៊ីចង់បានទឹកដីពីអ៊ុយក្រែនយ៉ាងតិចមួយក្នុងចំណោម ៣តំបន់ គឺតំបន់ដុនបាស់ គឺដូចកាលពីរុស្ស៊ី យកបានតំបន់គ្រីមៀរ ពីអ៊ុយក្រែន នៅក្រោមការបោះឆ្នោតប្រជាមតិផ្ដាច់ខ្លួនពីអ៊ុយក្រែន មកចំណុះឱ្យរុស្ស៊ីនៅឆ្នាំ២០១៤៕