ប្រធានាធិបតីរុស្ស៊ី លោក Vladimir Putin កាលពីថ្ងៃអង្គារ ទី១៥ កុម្ភៈ បានថ្លែងថា លោកត្រៀមខ្លួនរួចរាល់ក្នុងការបន្តធ្វើការជាមួយនឹងក្រុមបស្ចិមប្រទេសលើបញ្ហាសន្តិសុខ ដើម្បីបន្ធូរបន្ថយភាពតានតឹងជុំវិញបញ្ហាអ៊ុយក្រែន។
ការប្រកាសជំហររបស់មេដឹកនាំវិមានក្រឹមឡាំង បានធ្វើឡើងក្រោយពីប្រធានាធិបតីអាមេរិក និងនាយករដ្ឋមន្ត្រីអង់គ្លេស បង្ហើបថា នៅយប់ថ្ងៃពុធ ទី១៦ ខែកុម្ភៈ នេះ រុស្ស៊ីអាចលើកកងទ័ពចូលឈ្លានពានអ៊ុយក្រែន។
សេចក្ដីរាយការណ៍របស់ទីភ្នាក់ងារព័ត៌មាន AFP ឲ្យដឹងថា ប្រធានាធិបតីរុស្ស៊ី បានបញ្ជាក់នៅក្នុងសន្និសីទសារព័ត៌មានមួយបន្ទាប់ពីបានជួបប្រជុំជាមួយនឹងអធិការបតីអាល្លឺម៉ង់ Olaf Scholz ក្នុងទីក្រុងមូស្គូ។ ក្នុងសន្និសីទនេះ លោក ពូទីន បានថ្លែងថា ភាគីរុស្ស៊ីត្រៀមខ្លួនរួចរាល់ក្នុងការធ្វើការបន្ថែមទៀតក្នុងការចរចាដើម្បីបន្ថយកម្ដៅ។
តាមមេដឹកនាំរុស្ស៊ីរូបនេះ រុស្ស៊ីមិនចង់ឲ្យមានសង្គ្រាមនោះទេ ប៉ុន្តែរុស្ស៊ីមិនអាចបិទភ្នែករបស់ខ្លួននៅពេលសហរដ្ឋអាមេរិក និងអង្គការយោធាណាតូ (NATO) ប្រែក្រឡាស់ការបកស្រាយអំពីគោលការណ៍ស្ដីពីភាពមិនអាចបំបែកបាននៃសន្តិសុខអឺរ៉ុបខាងកើត ដែលលោកថាគ្មានប្រទេសណាមួយអាចពង្រឹងសន្តិសុខរបស់ខ្លួនដោយធ្វើឲ្យប៉ះពាល់ដល់ប្រទេសដទៃទៀតនោះទេ។
តាមប្រភពរបស់ AFP ជំនួបរវាងលោក Scholz ជាមួយនឹងលោក Putin បានប្រើពេលពេញមួយថ្ងៃ ហើយជំនួបនេះធ្វើឡើងបន្ទាប់ពីអធិការបតីអាល្លឺម៉ង់រូបនេះបានជួបប្រជុំជាមួយនឹងប្រធានាធិបតីអ៊ុយក្រែន លោក Volodymyr Zelenskiy នៅក្នុងរដ្ឋធានីគៀវ ប្រទេសអ៊ុយក្រែន។ នៅទីនោះហើយដែលលោក Scholz បង្ហាញការគាំទ្រមេដឹកនាំអ៊ុយក្រែន។
នៅពេលដែលអធិការបតីអាល្លឺម៉ង់ កំពុងជួបជាមួយប្រធានាធិបតីរុស្ស៊ី លោក ពូទីន ក្រសួងការពារជាតិនៃប្រទេសមហាអំណាចមួយនេះបានបញ្ជាក់អំពីការដកកងទ័ពមួយចំនួនចេញពីព្រំដែនជាប់ប្រទេសអ៊ុយក្រែន ដោយបានអះអាងថា ការចល័តកងទ័ពនៅតាមព្រំដែនជាប់នឹងអ៊ុយក្រែនប្រសិនបើស្ថានការណ៍ប្រែប្រួល គឺជាការចាំបាច់។
ក្រុមបស្ចិមប្រទេសបានបង្ហាញក្ដីបារម្ភជាខ្លាំងអំពីការបង្កើនកងទ័ពរបស់រុស្ស៊ីនៅជាប់ព្រំដែនប្រទេសអ៊ុយក្រែន និងអំពីលទ្ធភាពដែលរុស្ស៊ីអាចលុកលុយអ៊ុយក្រែន ព្រោះកងទ័ពរបស់ប្រទេសមហាអំណាចមួយនេះដាក់ពង្រាយមានជាង ១០ម៉ឺននាក់ ដោយមានទាំងសព្វាវុធធុនធ្ងន់ រួមកាំជ្រួច S-400 ដែលអាចបាញ់កម្ទេចរដ្ឋធានីគៀវ នៃប្រទេសអ៊ុយក្រែន ទៀតផង។
នៅក្នុងសន្និសីទសារព័ត៌មានរួមគ្នាកាលពីសប្ដាហ៍មុនជាមួយលោក បូរីស ចនសុន នាយករដ្ឋមន្ត្រីអង់គ្លេស លោក Jens Stoltenberg អគ្គលេខាធិការយោធាណាតូបានថ្លែងថា ស្ថានការណ៍នៅពេលនេះ គឺកំពុងប្រឈមនឹងគ្រោះថ្នាក់បំផុតចំពោះសន្តិសុខនៅអឺរ៉ុប ព្រោះចំនួនកងទ័ពរុស្ស៊ីដែលឡោមព័ទ្ធអ៊ុយក្រែន និងនៅខាងកើតអឺរ៉ុប នៅបន្តកើនឡើងនៅឡើយ។ អគ្គលេខាធិការអង្គការណាតូអះអាងថា ណាតូមិនបានគំរាមទៅលើរុស្ស៊ីមុនទេ តែលោកថាណាតូត្រូវតែត្រៀមខ្លួនក្នុងករណីស្ថានការណ៍អាក្រក់កើតឡើង។
លោក Jens Stoltenberg បានបញ្ជាក់ថា សម្ពន្ធមិត្តណាតូនៅតែបន្តតាំងចិត្តស្វែងរកដំណោះស្រាយការទូតជាមួយរុស្ស៊ីរហូតដល់ដំណាក់កាលចុងក្រោយ។
នៅក្នុងសន្និសីទសារព័ត៌មាននេះដែរ សម្រាប់នាយករដ្ឋមន្ត្រីអង់គ្លេស បានថ្លែងថា ខណៈនេះអឺរ៉ុបទាំងមូលកំពុងតែប្រឈមនឹងបញ្ហាសន្តិសុខធ្ងន់ធ្ងរ ដែលសម្ព័ន្ធណាតូត្រូវតែត្រៀមដើម្បីទប់សា្កត់ស្ថានការណ៍ដ៏គ្រោះថ្នាក់នេះ។
នៅពេលសួរចំករណីអ៊ុយក្រែន ដែលចង់ក្លាយជាសមាជិកណាតូ លោក បូរីស ចនសុន បានបង្ហើបថា អ៊ុយក្រែនមានសិទ្ធិចង់ក្លាយជាសមាជិករបស់ណាតូ ហើយក៏មានសិទ្ធិមិនចង់ក្លាយជាសមាជិកអង្គការនេះដែរ។
ជាមួយនឹងស្ថានការណ៍ដ៏តានតឹងនេះ នាយករដ្ឋមន្ត្រីដាណឺម៉ាក បានប្រកាសសុំឱ្យសហរដ្ឋអាមេរិកបញ្ជូនកងទ័ពមកតាំងនៅលើដីដាណឺម៉ាក ដើម្បីត្រៀមខ្លួនជាស្រេចក្នុងករណីផ្ទុះសង្គ្រាមណាមួយជាមួយរុស្ស៊ី។
កាលពីថ្ងៃព្រហស្បតិ៍ សប្ដាហ៍មុន អ្នកស្រី Liz Truss រដ្ឋមន្ត្រីការបរទេសអង់គ្លេស បានទៅជួបរដ្ឋមន្ត្រីការបរទេសរុស្ស៊ី នៅក្រុងមូស្គូ។ ក្រោយជំនួបនេះ អ្នកស្រីបានឱ្យដឹងថា ភាគីរុស្ស៊ីបានអះអាងជាថ្មីថា រុស្ស៊ីគ្មានគម្រោងវាយប្រហារលើអ៊ុយក្រែននោះទេ។
តែដំណឹងចុងក្រោយពី VOA ផ្សាយជាភាសាអង់គ្លេស ដែលស្រង់ប្រភពរបស់ចារកម្មយោធាណាតូ លោកអគ្គលេខាធិការ Jens Stoltenberg និយាយថា ពុំមានភស្តុតាងណាមួយជាផ្លូវការអំពីរុស្ស៊ីដកទ័ពចេញពីព្រំដែនជាប់នឹងអ៊ុយក្រែននោះទេ។ លោកថា រុស្ស៊ីនៅតែមានឱកាសបើកការវាយប្រហារលើអ៊ុយក្រែន ហើយអាចវាយលុកដោយទ្រង់ទ្រាយធំ ដែលលោកថា ណាតូត្រូវតែត្រៀមដើម្បីគ្រប់គ្រងស្ថានការណ៍ឱ្យបាន៕