29 C
Phnom Penh

តុលាការ​កំពូល​សម្រេច​ទម្លាក់​បទ​ចោទ​លើ​ឧកញ៉ា ថោង សារ៉ាត់ និង​អង្គរក្ស​ក្នុង​សំណុំរឿង​ឃាតកម្ម​លើ​ឧកញ៉ា អ៊ឹង ម៉េងជឺ

ដោយ ឌឹ ខេមបូឌា ដេលី

បទវិភាគ

តុលាការ​កំពូល​សម្រេច​ទម្លាក់​ចោល​បទ​ចោទ​លើ​ឧកញ៉ា ថោង សារ៉ាត់ និង​អង្គរក្ស ៣​នាក់​ទៀត​ក្នុង​សំណុំរឿង​ឃាតកម្ម​លើ​ឧកញ៉ា អ៊ឹង ម៉េងជឺ ដូច​ការ​សម្រេច​របស់​សាលា​ឧទ្ធរណ៍​ដែរ។

តុលាការ​កំពូល​បាន​បើក​សវនាការ​កាលពី​ថ្ងៃ​ទី​២៦ ខែ​មករា ឆ្នាំ​២០២២ លើ​បណ្ដឹង​សារទុក្ខ​មេធាវី​ការពារ​ក្ដី​ឱ្យ​គ្រួសារ​ឧកញ៉ា អ៊ឹង ម៉េងជឺ ប្រឆាំង​នឹង​ការ​សម្រេច​របស់​សាលា​ឧទ្ធរណ៍ ដែល​បាន​ទម្លាក់​ចោល​បទ​ចោទប្រកាន់ និង​ដោះលែង​ឧកញ៉ា ថោង សារ៉ាត់ និង​អង្គរក្ស ៣​នាក់​ទៀត ខណៈ​សាលាដំបូង​រាជធានី​ភ្នំពេញ​បាន​កាត់ទោស​ឱ្យ​ជនជាប់ចោទ​ទាំង ៥​នាក់​ជាប់​ពន្ធនាគារ​អស់​មួយ​ជីវិត។

តុលាការ​កំពូល នៅ​ថ្ងៃ​ទី​១៧ ខែ​កុម្ភៈ ឆ្នាំ​២០២២ បាន​ប្រកាស​សាលដីកា​ដោយ​តម្កល់​សេចក្ដី​សម្រេច​របស់​សាលា​ឧទ្ធរណ៍ ដែល​បាន​ទម្លាក់​ចោល​បទ​ចោទប្រកាន់​លើ​ឧកញ៉ា ថោង សារ៉ាត់ និង​អង្គរក្ស ៣​នាក់​ទៀត​ឱ្យ​មាន​សេរីភាព​វិញ ខណៈ​ជន​ជាប់ចោទ​ម្នាក់​ទៀត​ឈ្មោះ សៀង វាសនា តុលាការ​រក្សា​បទ​ចោទ និង​ឃុំ​ខ្លួន​នៅ​ពន្ធនាគារ​ដដែល។

បើ​តាម​ប្រធាន​ក្រុមប្រឹក្សា​ជំនុំជម្រះ​តុលាការ​កំពូល ឱ្យ​ដឹង​ថា មូលហេតុ​ដែល​សម្រេច​ទម្លាក់​បទ​ចោទ​លើ​ឧកញ៉ា ថោង សារ៉ាត់ និង​អង្គរក្ស ៣​នាក់​ទៀត គឺ​ដោយ​សំអាង​ថា ពួកគេ​មិន​ជាប់​ពាក់ព័ន្ធ​នឹង​ឃាតកម្ម​បាញ់​សម្លាប់​ឧកញ៉ា អ៊ឹង ម៉េងជឺ។ ចំណែក​ឈ្មោះ សៀង វាសនា តុលាការ​សម្រេច​ដាក់​ពន្ធនាគារ​អស់​មួយ​ជីវិត ក្រោម​ហេតុផល​ថា របាយការណ៍​នគរបាល​យុត្តិធម៌ និង​តំណាង​អយ្យការ​បាន​រក​ឃើញ​ថា ឈ្មោះ សៀង វាសនា ពិតជា​បាន​ប្រព្រឹត្ត​បទល្មើស​ដោយ​បាញ់​សម្លាប់​ឧកញ៉ា អ៊ឹង ម៉េងជឺ មែន។

តែ​យ៉ាងណា អំឡុង​ពេល​សវនាការ​កាលពី​ថ្ងៃ​ទី​២៦ ខែ​មករា ឆ្នាំ​២០២២ មេធាវី​ការពារ​ក្ដី​ឱ្យ​ឈ្មោះ សៀង វាសនា បាន​លើកឡើង​ថា មូលហេតុ​ដែល​កូនក្ដី​ឆ្លើយ​ចម្លើយ​បែប​នេះ​នៅ​នគរបាល​យុត្តិធម៌ ដោយសារតែ​មាន​ការ​ធ្វើ​ទារុកម្ម និង​ដាក់​ទណ្ឌកម្ម ខណៈ​ពេល​កើតហេតុ​នោះ​កូនក្ដី​របស់​គាត់​នៅ​ខេត្ត​កំពង់ឆ្នាំង មិន​បាន​នៅ​រាជធានី​ភ្នំពេញ​ឡើយ។

ឃាតកម្ម​កណ្ដាល​ក្រុង​ភ្នំពេញ​កើតឡើង​លើ​ថៅកែ​ស៊ីម៉ងត៍​សញ្ញា​ត្បូងពេជ្រ គឺ​ឧកញ៉ា អ៊ឹង ម៉េងជឺ ត្រូវ​បាន​ខ្មាន់​កាំភ្លើង​បាញ់​សម្លាប់​នៅ​មុខ​ហាង​លក់​ផ្លែឈើ​មួយ​កន្លែង​ក្នុង​រាជធានី​ភ្នំពេញ កាលពី​ខែ​វិច្ឆិកា ឆ្នាំ​២០១៤។ ក្រោយ​ឃាតកម្ម​នេះ សមត្ថកិច្ច​ចាប់​ខ្លួន​មនុស្ស ៥​នាក់ ក្នុង​នោះ​ក៏​មាន​ឧកញ៉ា ថោង សារ៉ាត់ ដែរ។

ក្នុង​សំណុំរឿង​ឃាតកម្ម​បាញ់​សម្លាប់​ឧកញ៉ា អ៊ឹង ម៉េងជឺ ចៅក្រម​សាលាដំបូង​រាជធានី​ភ្នំពេញ សម្រេច​ផ្ដន្ទាទោស​ឧកញ៉ា ថោង សារ៉ាត់ និង​អង្គរក្ស ៤​នាក់​ដាក់​ពន្ធនាគារ​ម្នាក់ៗ​អស់​មួយ​ជីវិត។ ប៉ុន្តែ​នៅ​ខែ​វិច្ឆិកា ឆ្នាំ​២០២០ ឧកញ៉ា ថោង សារ៉ាត់ និង​អង្គរក្ស ៣​នាក់ ក្នុង​នោះ​មាន​ឈ្មោះ កួយ ចាន់ថុល ឈ្មោះ មាស សម្បត្តិ ហៅ ទូច និង​ឈ្មោះ ឃុន ចិត្រា ត្រូវ​បាន​សាលា​ឧទ្ធរណ៍​ទម្លាក់​ចោល​បទ​ចោទប្រកាន់ និង​ដោះលែង​ឱ្យ​មាន​សេរីភាព ខណៈ​ឈ្មោះ សៀង វាសនា ត្រូវ​តុលាការ​រក្សា​បទ​ចោទប្រកាន់ និង​បន្ត​ឃុំ​ខ្លួន​នៅ​ពន្ធនាគារ​ដដែល៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស