34 C
Phnom Penh

បទវិភាគ៖ តើ​លោក ហ៊ុន សែន អាច​ប្រើ​យុទ្ធសាស្ត្រ​ឈ្នះ​ឈ្នះ​ចំពោះ​អាស៊ាន​ដូច​នៅ​កម្ពុជា​ដែរ​ឬ​ទេ?

ដោយ ឌឹ ខេមបូឌា ដេលី

បទវិភាគ

លោក​នាយករដ្ឋមន្ត្រី ហ៊ុន សែន ត្រូវ​បាន​ពិភពលោក​ហៅថា​មេដឹកនាំ​ផ្ដាច់ការ។ ពាក្យ​ផ្ដាច់ការ​មាន​ន័យ​ស្មើ​នឹង​ពាក្យ​ថា ទុច្ចរិត ឃោរឃៅ ឬ​បំពាន​ច្បាប់។ ដូច្នេះ អ្វី​ដែល​លោក ហ៊ុន សែន ទទួល​បាន​សម្រាប់​ខ្លួន​គាត់ និង​រមែងតែ​អួត​ក្អេងក្អាង​នោះ គឺ​សុទ្ធតែ​ជា​អ្វីៗ​ដែល​បាន​មក​ដោយសារ​អំពើ​ឃោរឃៅ ឬ​បំពាន​ច្បាប់។

លោក ហ៊ុន សែន តែងតែ​អួត​អំពី​យុទ្ធសាស្ត្រ «ឈ្នះ​ឈ្នះ» របស់​គាត់។ បើ​អ៊ីចឹង នោះ​ក៏​ជា​យុទ្ធសាស្ត្រ​ទុច្ចរិត ឬ​បំពាន​ច្បាប់​ដែរ។ ព្រោះ​តែ​លោក ហ៊ុន សែន តែងតែ​ប្រើ​យុទ្ធសាស្ត្រ​នេះ​ហើយ ទើប​ប្រទេស​កម្ពុជា​ក្លាយ​ជា​សង្គម​ឃោរឃៅ និង​រំលោភ​ច្បាប់​ឥត​ឈប់ឈរ ដែល​បណ្តាល​ឱ្យ​ប្រជាពលរដ្ឋ​ខ្មែរ ជាពិសេស​អ្នក​ក្រីក្រ​ជួប​តែ​រឿង​អយុត្តិធម៌ និង​ទុក្ខវេទនា។

ក្នុង​ប្រទេស​កម្ពុជា លោក ហ៊ុន សែន តែងតែ​មាន​អំនួត​អំពី​អ្វី​ដែល​គាត់​ហៅថា​យុទ្ធសាស្ត្រ «ឈ្នះ​ឈ្នះ»។ គាត់​មាន​អំនួត​បែប​នេះ មកពី​គាត់​បាន​កម្ទេច​ដៃគូ​ប្រឆាំង​របស់​គាត់​ទាំងអស់​ក្នុង​ប្រទេស​កម្ពុជា និង​បាន​ប្រមូល​ផ្តុំ​អំណាច​ក្តោប​ក្តាប់​ពេញ​ដៃ។ គាត់​បាន​អះអាង​ថា ជោគជ័យ​របស់​គាត់​ទាំងនេះ គឺ​បាន​មក​ដោយ​យុទ្ធសាស្ត្រ «ឈ្នះ​ឈ្នះ» របស់​គាត់ ឬ​ហៅ​ម្យ៉ាង​ទៀត​ថា ធ្វើ​យ៉ាងណា​ក៏ដោយ​ឲ្យ​តែ​ឈ្នះ​ដៃ ដែល​មាន​ន័យ​ដូចគ្នា​នឹង​ឃ្លា​អង់គ្លេស «the end justifies the means» ឬ​ប្រែ​ថា «ឲ្យ​តែ​ដល់​គោលដៅ ប្រើ​មធ្យោបាយ​បែប​ណា​ក៏​បាន​ដែរ»។

បើ​គេ​ពិនិត្យ​មើល​មធ្យោបាយ​ដែល​លោក ហ៊ុន សែន យក​ឈ្នះ​គូប្រកួត និង​ការ​ពង្រឹង​អំណាច​របស់​គាត់​ចាប់តាំង​ពី​ឆ្នាំ​១៩៩៣ មក គេ​ប្រាកដជា​ឃើញ​ច្បាស់​ថា វិធី​ពីរ​ដែល​គាត់​បាន​ប្រើ​នោះ​គឺ បំបែក និង​កម្ទេច​តាម​ផែនការ​រៀបចំ​នា​ពាក់កណ្តាល​ទសវត្ស​១៩៩០ ដើម្បី​បំបែក និង​គ្រប់គ្រង (divide and conquer) ខ្មែរក្រហម គេ​ឲ្យ​ឈ្មោះ​ជា​អក្សរ​កាត់​អង់គ្លេស​ថា DIFID ឬ ប្រែ​ថា៖

  • divide បំបែក
  • infiltrate ជ្រៀត​ចូល
  • force បង្ខំ
  • incorporate បញ្ចូល​គ្នា
  • defect ដាក់​អាវុធ​ចុះចូល។

ប៉ុន្តែ ដើម្បី​ទទួល​បាន​ជោគជ័យ​ក្នុង​ការ​ប្រើ​វិធី​ទាំង​ពីរ​នេះ លោក ហ៊ុន សែន ចាំបាច់​ត្រូវតែ​ប្រើ​វិធី​ទុច្ចរិត​ជាច្រើន ដូចជា ទិញ គំរាម សំឡុត កម្ទេច ឬ​សម្លាប់​ចោល ជាដើម។ នៅ​ពេល​ដែល​លោក ហ៊ុន សែន ប្រើ​វិធី​ទុច្ចរិត​ទាំងនេះ លោក ហ៊ុន សែន មិន​ដែល​ខ្វល់​នឹង​ច្បាប់​ជាតិ ឬ​អន្តរជាតិ​អ្វី​ឡើយ។

ជាក់ស្តែង គាត់​បាន​កម្ចាត់​គណបក្ស​ហ៊្វុនស៊ិនប៉ិច និង​គណបក្ស​សង្គ្រោះ​ជាតិ ហើយ​គាត់​បាន​ឈ្នះ​ក្រុម​ទាំង​ពីរ​នេះ​មែន។ ប៉ុន្តែ​គាត់​ឈ្នះ​គណបក្ស​ហ៊្វុនស៊ិនប៉ិច ក្នុង​ការ​បោះឆ្នោត​ជាតិ​ឆ្នាំ​១៩៩៨ បន្ទាប់ពី​គាត់​ធ្វើ​រដ្ឋប្រហារ​យោធា​ក្នុង​ឆ្នាំ​១៩៩៧ ដើម្បី​គ្រប់គ្រង​អំណាច​ទាំងអស់ ដោយ​រួម​ទាំង​គណៈកម្មការ​ជាតិ​រៀបចំ​ការ​បោះឆ្នោត​ផង។ ដូចគ្នា​ដែរ លោក ហ៊ុន សែន ឈ្នះ​ការ​បោះឆ្នោត​ជាតិ ១០០% ក្នុង​ឆ្នាំ​២០១៨ បន្ទាប់ពី​គាត់​ចាប់​លោក កឹម សុខា ប្រធាន​គណបក្ស​សង្គ្រោះ​ជាតិ និង​រំលាយ​គណបក្ស​នេះ​នា​ចុង​ឆ្នាំ​២០១៧។

ទីស្នាក់ការ​កណ្តាល​អតីត​គណបក្ស​សង្គ្រោះ​ជាតិ ស្ថិត​នៅ​សង្កាត់​ចាក់អង្រែលើ រាជធានី​ភ្នំពេញ។

ដូច្នេះ ការ​ឈ្នះ​របស់​លោក ហ៊ុន សែន លើ​គណបក្ស​ហ៊្វុនស៊ិនប៉ិច និង​គណបក្ស​សង្គ្រោះ​ជាតិ គឺ​សុទ្ធតែ​ជា​ការ​ឈ្នះ​ដោយ​អំពើ​ទុច្ចរិត ព្រោះ​ឈ្នះ​ដោយ​មិន​ហ៊ាន​ប្រកួត​ដោយ​ស្មើ​ភាព សេរីភាព យុត្តិធម៌ និង​សុចរិត។

រីឯ​ផ្ទៃក្នុង​បក្ស​របស់​គាត់​វិញ​ក៏​ដូចគ្នា​ដែរ គាត់​បាន​បង្ខំ​គេ​ឯង​ឱ្យ​ធ្វើ​អ្វីៗ​តាម​ការ​ចង់​បាន​របស់​គាត់។ តែ​បើ​នរណា​ហ៊ាន​ជំទាស់ ឬ​មិនព្រម​សម្រប​តាម​ទេ​នោះ គាត់​អាច​នឹង​បង្កើត​បញ្ហា ឬ​កម្ចាត់​អ្នក​នោះ​ចោល​តែម្តង។

ឧទាហរណ៍ គាត់​បង្ក្រាប​ក្រុម​លោក ជា ស៊ីម តាមរយៈ​ការ​ចាប់​ខ្លួន​មនុស្ស​ជុំវិញ​លោក ជា ស៊ីម ដាក់​ពន្ធនាគារ ជាដើម។ ស្រដៀង​គ្នា​ដែរ គាត់​បាន​គំរាម​លោក ស ខេង និង​អ្នក​ឯ​ទៀត​ឱ្យ​យល់ព្រម​ទទួល​យក​កូនប្រុស​ច្បង​របស់​គាត់​ជា​បេក្ខជន​ស្នង​តំណែង​នាយករដ្ឋមន្ត្រី

លោក​នាយករដ្ឋមន្ត្រី ហ៊ុន សែន និង​រដ្ឋមន្ត្រី​ក្រសួង​មហាផ្ទៃ លោក ស ខេង។

ការ​គំរាម​បែប​នោះ ត្រូវ​បាន​លោក ហ៊ុន សែន ធ្វើឡើង​ជា​សាធារណៈ​នៅ​មុន​ពេល​មាន​ការ​សម្រេច​ជា​ផ្លូវការ​របស់​គណបក្ស​កុម្មុយនីស្ត​ផ្ដាច់ការ​មួយ​នេះ។ លោក ហ៊ុន សែន តែងតែ​មាន​អំនួត​អំពី​ជ័យជម្នះ ឬ​ការ​ឈ្នះ​បែប​នេះ ហើយ​គាត់​ធ្លាប់​លើកឡើង​ថា នេះ​ជា​ជ័យជម្នះ​ដែល​បាន​មកពី​យុទ្ធសាស្ត្រ «ឈ្នះ​ឈ្នះ» របស់​គាត់។

ដូច្នេះ យុទ្ធសាស្ត្រ «ឈ្នះ​ឈ្នះ» របស់​លោក ហ៊ុន សែន គឺ​ការ​ប្រើ​កម្លាំង​បាយ ឬ​អំពើ​ទុច្ចរិត​បំផ្លាញ​គេ​ដើម្បី​ជ័យជម្នះ​របស់​ខ្លួន។ រីឯ​អត្ថន័យ «ឈ្នះ​ឈ្នះ» របស់​លោក ហ៊ុន សែន គឺ​គាត់​ជា​អ្នក​ឈ្នះ ឬ​ចំណេញ​រហូត ហើយ​ភាគី​ដទៃ គឺជា​អ្នក​ចាញ់​រហូត។ ឧទាហរណ៍ ក្រុម​គ្រួសារ និង​បក្សពួក​គាត់​ប្លន់​យក​ដី​ប្រជាពលរដ្ឋ​ចំនួន​ជាង ១០០​ហិកតារ។ ដល់​ពេល​ប្រជាពលរដ្ឋ​ម្ចាស់​ដី​តវ៉ា លោក ហ៊ុន សែន បញ្ជា​អ្នក​ប្លន់​នោះ​ឱ្យ​ផ្តល់​ដី​សង​ប្រជាពលរដ្ឋ​វិញ​ប្រមាណ ១០​ហិកតារ ដើម្បី​បញ្ចប់​ការ​តវ៉ា។ ប្រជាពលរដ្ឋ​ម្ចាស់​ដី​អត់​ជម្រើស ក៏​យល់ព្រម​ទទួល​យក​ទាំង​ឈឺចាប់។ លោក ហ៊ុន សែន ហៅ​ដំណោះស្រាយ​បែប​នេះ​ថា​ជា​ដំណោះស្រាយ «ឈ្នះ​ឈ្នះ»។

តាម​ពិត អ្នក​ប្លន់​ដី​ជា​អ្នក​ឈ្នះ ព្រោះ​បាន​ដី​ប្រមាណ ៩០​ហិកតារ​ដោយ​គ្មាន​ចំណាយ​លុយ​មួយ​រៀល រីឯ​ប្រជាពលរដ្ឋ​ម្ចាស់​ដី​ជា​អ្នក​ខាតបង់។ រឿង​បែប​នេះ​បាន​កើតឡើង​ចំពោះ​ប្រជាពលរដ្ឋ​អតីត​សហគមន៍​បឹងកក់ ប្រជាកសិករ និង​សហគមន៍​ក្រីក្រ​ដទៃ​ទៀត​នៅ​ទូទាំង​ប្រទេស​កម្ពុជា។ មិន​តែប៉ុណ្ណោះ ប្រជាពលរដ្ឋ​ម្ចាស់​ដី​ដែល​បាន​ទទួល​ដី​ខ្លះ​មកវិញ​នោះ បែរជា​ត្រូវ​សម្ដែង​ការ​អរគុណ​លោក ឬ​អរគុណ​សន្តិភាព​ផង។

តាម​ពិត យុទ្ធសាស្ត្រ ឬ​វិធី «ឈ្នះ​ឈ្នះ» ក្នុង​ការ​ដោះស្រាយ​ទំនាស់ ឬ​វិបត្តិ​អ្វី​មួយ គួរតែ​ជា​វិធី ឬ​ដំណោះស្រាយ​ដែល​មាន​យុត្តិធម៌​សម្រាប់​ភាគី​ទាំង​សងខាង។ វា​មាន​ន័យ​ថា ភាគី​ទាំង​ពីរ​អាច​ទទួល​បាន​ផល និង​ស្ងប់ចិត្ត​ទាំងអស់​គ្នា។ ប៉ុន្តែ​វិធី «ឈ្នះ​ឈ្នះ» របស់​លោក ហ៊ុន សែន គឺ​គាត់​ជា​អ្នក​ឈ្នះ ហើយ​គេ​ជា​អ្នក​ចាញ់។

អ៊ីចឹង​វា​មាន​ន័យ​ថា លោក ហ៊ុន សែន ជា​មនុស្ស​មិន​យល់​ពី​អ្វី​ដែល​ហៅថា «ឈ្នះ​ឈ្នះ» ឬ​យុត្តិធម៌​ទាំងអស់​គ្នា​នោះ​ទេ។ ដោយសារ​តែ​គាត់​ជា​មនុស្ស​បែប​នេះ ទើប​ប្រទេស និង​ប្រជាពលរដ្ឋ​ខ្មែរ​ដែល​ស្ថិត​ក្រោម​អំណាច​គ្រប់គ្រង​របស់​លោក ហ៊ុន សែន ជិត ៤០​ឆ្នាំ​មក​នេះ ជួប​តែ​ភាព​ក្រីក្រ និង​រង​ទុក្ខវេទនា​ឥត​ល្ហែ។

ប៉ុន្តែ​លោក ហ៊ុន សែន ហាក់​នៅតែ​មាន​អំនួត​នឹង​អ្វី​ដែល​គាត់​ហៅថា យុទ្ធសាស្ត្រ «ឈ្នះ​ឈ្នះ» របស់​គាត់​នេះ បើ​ទោះបី​កម្ពុជា​ក្លាយ​ជា​ប្រទេស​ដ៏​ក្រីក្រ​បំផុត​មួយ​ក្នុង​លោក​នៅ​ក្រោម​អំណាច​នៃ​យុទ្ធសាស្ត្រ​នេះ​ក្តី។

ថ្មីៗ​នេះ គាត់​បាន​អួត​ក្អេងក្អាង​ថា គាត់​នឹង​ប្រើ​យុទ្ធសាស្ត្រ​នេះ​ដើម្បី​ដោះស្រាយ​បញ្ហា​នយោបាយ​នៃ​ប្រទេស​ភូមា ក្នុង​ខណៈ​គាត់​ក្លាយ​ជា​ប្រធាន​អាស៊ាន​ប្តូរ​វេន​សម្រាប់​ឆ្នាំ​២០២២ នេះ។

សំណួរ​សួរ​ថា តើ​គាត់​អាច​ប្រើ​យុទ្ធសាស្ត្រ «ឈ្នះ​ឈ្នះ» របៀប​គាត់​នេះ​ដើម្បី​ដោះស្រាយ​បញ្ហា​ក្នុង​ក្របខ័ណ្ឌ​អាស៊ាន​ទៅ​រួច​ដែរ​ឬ​ទេ? ប្រសិនបើ​គាត់​នៅតែ​បន្ត​ប្រើ​វិធី​នេះ តើ​វា​នឹង​មាន​អ្វី​កើតឡើង​ចំពោះ​អាស៊ាន?

ថ្វីបើ​វិបត្តិ​នយោបាយ​ក្នុង​ប្រទេស​ភូមា​ជា​បញ្ហា​ផ្ទៃក្នុង​នៃ​ប្រទេស​នេះ​ក៏ដោយ ប៉ុន្តែ​វា​បាន​ក្លាយ​ជា​បញ្ហា​អន្តរជាតិ ក្នុង​សហគមន៍​អាស៊ាន ដោយសារតែ​មេដឹកនាំ​ពិភពលោក ជាពិសេស​បណ្តា​ប្រទេស​ប្រជាធិបតេយ្យ​មិន​ទទួលស្គាល់​ក្រុម​យោធា​ភូមា ដែល​ដណ្តើម​អំណាច​តាមរយៈ​រដ្ឋប្រហារ​ផ្តួល​រំលំ​រដ្ឋាភិបាល​ស៊ីវិល​របស់​លោកស្រី អ៊ុងសាន ស៊ូជី ដែល​ឈ្នះ​ឆ្នោត​កាលពី​ចុង​ឆ្នាំ​២០២១ កន្លងទៅ។ ការ​មិន​ទទួលស្គាល់​ពី​សហគមន៍​អន្តរជាតិ និង​អាស៊ាន​ចំពោះ​របប​រដ្ឋប្រហារ គឺជា​ការ​ផ្តល់​យុត្តិធម៌​ចំពោះ​គណបក្ស​រងគ្រោះ និង​ប្រជាពលរដ្ឋ​ភូមា​ដែល​ជា​ម្ចាស់​ឆ្នោត ហើយ​ក៏​ជា​ការ​បង្ហាញ​ការ​ដឹង​ខុស​ដឹង​ត្រូវ​របស់​មេដឹកនាំ​សហគមន៍​អន្តរជាតិ និង​អាស៊ាន​ផង​ដែរ។ ប៉ុន្តែ​ការ​គិត​បែប​នេះ សុទ្ធតែ​ផ្ទុយពី​លោក ហ៊ុន សែន ដែល​ធ្លាប់តែ​មិន​ខ្វល់​រឿង​យុត្តិធម៌ ឬ​ភាព​ខុសត្រូវ​អ្វី​ឡើយ​ក្នុង​ការ​ដោះស្រាយ​បញ្ហា​ក្នុង​ប្រទេស​កម្ពុជា​តាម​វិធី «ឈ្នះ​ឈ្នះ» របស់​គាត់។

នាយករដ្ឋមន្ត្រី​កម្ពុជា លោក ហ៊ុន សែន និង​មេ​រដ្ឋប្រហារ​ភូមា លោក មីន អ៊ុងឡាំង (Ming Aung Lhaing) ជួប​គ្នា​នៅ​ប្រទេស​ភូមា ថ្ងៃ​ទី​៧ ខែ​មករា ឆ្នាំ​២០២២។ (រូបថត​ពី​ហ្វេសប៊ុក​លោក ហ៊ុន សែន)

ដូច្នេះ របៀប​ធ្វើការ ការ​យល់ដឹង​ខុសត្រូវ​រវាង​មេដឹកនាំ​ផ្ដាច់ការ​លោក ហ៊ុន សែន និង​មេដឹកនាំ​អាស៊ាន គឺ​មាន​ភាព​ខុស​គ្នា។

របៀប​ធ្វើការ​របស់​អាស៊ាន គឺ​ឈរ​លើ​គោលការណ៍​កុងសង់ស៊ីស ឬ​ការ​សម្រេច​ចិត្ត​រួម​គ្នា រីឯ​របៀប​ធ្វើការ​របស់​លោក ហ៊ុន សែន គឺ​ឯកតោភាគី ឬ​អ្វីៗ​ស្រេច​តែ​អញ។ អ៊ីចឹង តើ​លោក ហ៊ុន សែន អាច​អនុវត្ត​របៀប​ធ្វើការ​អញ​និយម ឬ​អ្វីៗ​ស្រេច​តែ​អញ​ក្នុង​ក្របខ័ណ្ឌ​អាស៊ាន​បាន​ដែរ​ឬ​ទេ?

គេ​ជឿ​ថា ក្រុម​អ្នក​នយោបាយ​ខ្មែរ​នានា​ទាំង​ក្នុង និង​ក្រៅ​គណបក្ស​ប្រជាជន​កម្ពុជា ពិបាក​ទទួលយក​នូវ​ចរិត​អញ​និយម​របស់​លោក ហ៊ុន សែន ដែល​បាន​អនុវត្ត​ក្នុង​ប្រទេស​កម្ពុជា​រាប់​សិប​ឆ្នាំ​មកនេះ ប៉ុន្តែ​ពួកគេ​ទ្រាំ​លេប​ក្រួស​លេប​ថ្ម ក៏​ព្រោះតែ​លោក ហ៊ុន សែន ជា​បុគ្គល​មាន​អំណាច​ខ្លាំង។ គេ​អាច​ធ្វើការ​សន្និដ្ឋាន​បែប​នេះ​ដោយ​ផ្អែកលើ​ចរិត​ច្រងេងច្រងាង​របស់​លោក ហ៊ុន សែន ដែល​គំរាមកំហែង​គេ​ឯង​ឱ្យ​ទទួលយក​អ្វីៗ​ដែល​គាត់​ចង់​បាន។ អ៊ីចឹង​វា​មាន​ន័យ​ថា អ្នក​នយោបាយ​ទាំងនោះ​មិន​ពេញចិត្ត​នឹង​លោក ហ៊ុន សែន ទេ ហើយ​អ្វី​ដែល​ពួកគេ​ទទួលយក​នោះ គឺជា​ការ​បង្ខំ​ចិត្ត។

ដូច្នេះ តើ​លោក ហ៊ុន សែន អាច​នឹង​ប្រើ​អំណាច​បង្ខំ​ឱ្យ​មេដឹកនាំ​អាស៊ាន​ទទួលយក​អ្វីៗ​ដែល​គាត់​ចង់​បាន​ជា​ឯកតោភាគី​នោះ​ដែរ​ឬ​ទេ? លោក ហ៊ុន សែន គ្មាន​អំណាច​អ្វី​បង្ខំ​មេដឹកនាំ​ទាំងនោះ​ឡើយ។ ដូច្នេះ ប្រសិនបើ​លោក ហ៊ុន សែន នៅតែ​ធ្វើ​ចរិត​អញ​និយម​ដោយ​ព្យាយាម​ទទួលស្គាល់ និង​ការពារ​មេដឹកនាំ​រដ្ឋប្រហារ​ភូមា មីន អ៊ុងឡាំង (Ming Aung Hlaing) នោះ​គាត់​នឹង​ឯកោ ហើយ​កិច្ចការ​អាស៊ាន​ក្នុង​អាណត្តិ​គាត់​ជា​ប្រធាន នឹង​ជាប់​គាំង។

ប៉ុន្តែ​លោក គឹម សុខ អ្នកវិភាគ​បញ្ហា​សង្គម បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ថ្ងៃ​២៥ ខែ​មករា កន្លងទៅ​នេះ​ថា លោក ហ៊ុន សែន ទំនង​ជា​បន្ទន់​ឥរិយាបថ​កែ​កំហុស​របស់​ខ្លួន និង​ធ្វើ​តាម​មេដឹកនាំ​អាស៊ាន​វិញ​ក្នុង​សំណុំរឿង​វិបត្តិ​នយោបាយ​នៃ​ប្រទេស​ភូមា​នេះ។ ប្រសិន​បើ​ដូច្នេះ​មែន វា​មាន​ន័យ​ថា យុទ្ធសាស្ត្រ «ឈ្នះ​ឈ្នះ» របស់​លោក ហ៊ុន សែន គឺ​មិន​ត្រឹមត្រូវ និង​មិន​អាច​ប្រើ​ការ​បាន​ទេ​ក្នុង​ក្របខ័ណ្ឌ​អាស៊ាន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស