អ្នកសង្កេតការណ៍កម្ពុជា រិះគន់ថា អ្នកនយោបាយនៅកម្ពុជាសព្វថ្ងៃនេះគ្រាន់តែជាអ្នកប្រកបមុខរបរក្នុងកិច្ចការនយោបាយប៉ុណ្ណោះ ព្រោះថាមេដឹកនាំនយោបាយទាំងនោះ មិនអាចមានលទ្ធភាព ឬសមត្ថភាពស្ដារលទ្ធិប្រជាធិបតេយ្យ ការគោរពសិទ្ធិមនុស្ស និងនីតិរដ្ឋសម្រាប់កម្ពុជាឱ្យរឹងមាំបានទេ។
អ្នកសង្កេតការណ៍កម្ពុជា លោក សុខ សុគន្ធ បានលើកឡើងក្នុងកិច្ចពិភាក្សាក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២១ ខែកុម្ភៈ ថា អ្នកនយោបាយនៅកម្ពុជា គឺជាក្រុមអ្នកនយោបាយដែលគ្មានគោលដៅដើម្បីជាតិពិតប្រាកដនោះទេ ប៉ុន្តែពួកគេគ្រាន់តែប្រឹងរកកន្លែងឈរជើង ដើម្បីជីវភាពនយោបាយខ្លួនឯងប៉ុណ្ណោះ មិនមែនដើម្បីប្រទេសជាតិ ឬប្រជាជននោះឡើយ។
ប្រភពដដែលអះអាងថា នៅពេលដែលកម្ពុជាសម្បូរទៅដោយអ្នកស្វែងរកប្រយោជន៍ផ្ទាល់ខ្លួនក្នុងកិច្ចការនយោបាយបែបនេះ នោះដំណើរការនៃការកសាងលទ្ធិប្រជាធិបតេយ្យនៅកម្ពុជា នឹងជួបឧបសគ្គកាន់តែធំ ស្របពេលដែលមេដឹកនាំបក្សកាន់អំណាចព្យាយាមក្តោបក្តាប់អំណាចមិនលែង ខណៈមេដឹកនាំបក្សប្រឆាំង លោក កឹម សុខា ត្រូវរងការរឹតត្បិតសេរីភាពរើខ្លួនមិនរួច ហើយលោក សម រង្ស៊ី ព្យាយាមបញ្ឆេះកម្ដៅនយោបាយឱ្យកាន់តែឆេះខ្លាំងឡើងៗនោះ។
លោក សុខ សុគន្ធ រិះគន់ថា ដើម្បីប្រយោជន៍ផ្ទាល់ខ្លួន និងមុខរបរក្នុងកិច្ចការនយោបាយខ្លួនឯង អ្នកនយោបាយទាំងនោះនាំគ្នាបំបែកបំបាក់ខ្មែរដោយការចោទប្រកាន់លើពលរដ្ឋដែលមាននិន្នាការនយោបាយផ្សេងពីក្រុមខ្លួន ជាជាងការដឹកនាំរកការផ្សះផ្សាបង្កើតនូវសាមគ្គីជាតិដែលអាចផ្តល់សេចក្តីសុខជូនពលរដ្ឋរបស់ខ្លួន។
ចំណែកសកម្មជនគណបក្សសង្គ្រោះជាតិ លោក ហ៊ុន កុសល បានលើកឡើងក្នុងកិច្ចពិភាក្សានេះដែរថា ដើម្បីបង្កើតនូវភាតរភាព និងការផ្សះផ្សាជាតិ មេដឹកនាំបក្សប្រឆាំងលោក កឹម សុខា តែងប្រកាសជំហរនយោបាយរបស់ខ្លួនជាច្រើនលើកច្រើនសា ដូចជា ការធ្វើនយោបាយដោយហិង្សា មិនយកជាតិសាសន៍ខ្លួនឯងជាសត្រូវ និងលុបបំបាត់នូវការចងគំនុំសងសឹករវាងខ្មែរនិងខ្មែរ កុំឱ្យកើតមានទៅថ្ងៃមុខ ជាដើម។
សកម្មជនបក្សប្រឆាំងរូបនេះរិះគន់ថា ក្នុងឋានៈជាមេដឹកនាំនយោបាយនៅកម្ពុជា ទាំងអតីតមេដឹកនាំបក្សប្រឆាំង លោក សម រង្ស៊ី និងមេដឹកនាំបក្សកាន់អំណាច លោក ហ៊ុន សែន បានបង្កនូវវិបត្តិធ្ងន់ធ្ងរសម្រាប់ជាតិខ្មែរទាំងមូល ដោយសារតែប្រយោជន៍រៀងៗខ្លួនរហូតធ្វើឱ្យប្រជាធិបតេយ្យនៅកម្ពុជាដើរថយក្រោយ ហើយរងការរិះគន់ជុំទិសពីមជ្ឈដ្ឋានជាតិ និងអន្តរជាតិសព្វថ្ងៃនេះ។
ដោយឡែកអ្នកវិភាគនយោបាយ និងសង្គម បណ្ឌិត ឡៅ ម៉ុងហៃ ធ្លាប់បានលើកឡើងកាលពីពេលថ្មីៗនេះថា អ្នកនយោបាយប្រជាធិបតេយ្យពិតប្រាកដ ត្រូវតែមានគំនិតដោះស្រាយបញ្ហា និងកសាងប្រទេសជាតិឱ្យបានរីកចម្រើន និងសុំឱ្យពលរដ្ឋសហការចូលរួមសកម្មក្នុងការអនុវត្តផែនការអភិវឌ្ឍន៍ប្រទេសរបស់ខ្លួន ដើម្បីជាតិមាតុភូមិឲ្យកាន់តែរីកចម្រើន ថ្កុំថ្កើង រុងរឿងទៅថ្ងៃអនាគត មិនមែនជាការហែកហួរគ្នាដើម្បីផលប្រយោជន៍ផ្ទាល់ខ្លួននោះឡើយ។
ទាក់ទិននឹងបញ្ហានេះ សហភាពអឺរ៉ុប និងបណ្តាប្រទេសលោកសេរីជាច្រើន កាលពីពេលកន្លងទៅ បានអំពាវនាវឱ្យអ្នកនយោបាយខ្មែរវិលទៅរកការចរចាបញ្ចប់ជម្លោះនយោបាយ ដោយតម្កល់ផលប្រយោជន៍ជាតិធំជាងផលប្រយោជន៍បុគ្គល និងបក្សរបស់ខ្លួន ប៉ុន្តែរហូតមកទល់នឹងពេលនេះ សង្គ្រាមនយោបាយដើម្បីការពារផលប្រយោជន៍របស់មេដឹកនាំនយោបាយនៅកម្ពុជា នៅតែបន្តឥតឈប់ឈរនៅឡើយ៕