ពលរដ្ឋនៅសហគមន៍ឧត្ដមស្រែខ្ពស់ ក្នុងខេត្តកំពង់ស្ពឺ បានឲ្យដឹងថា សមាជិកសហគមន៍ចំនួន ៣នាក់បានរងរបួល ដោយសារតែក្រុមទាហានបានប្រើអំពើហិង្សាក្នុងពេលពួកគាត់បានព្យាយាមចូលទៅការពារ និងទប់ស្កាត់ក្រុមទាហានទាំងនោះកុំឲ្យឈូសឆាយ និងកាប់ទន្ទ្រានដីព្រៃសហគមន៍ឧត្ដមស្រែខ្ពស់ ក្នុងស្រុកឱរ៉ាល់ ខេត្តកំពង់ស្ពឺ នៅថ្ងៃទី២២ ខែកុម្ភៈ ឆ្នាំ២០២២។
តាមការប្រកាសរបស់សហគមន៍ឧត្តមស្រែខ្ពស់ នៅថ្ងៃទី២២ កុម្ភៈ នេះបានឲ្យដឹងថា សមាជិកសហគមន៍ឧត្តមស្រែខ្ពស់ និងសហគមន៍ត្រពាំងជោរ ប្រមាណ ៣០នាក់ បាននាំគ្នាទៅទប់ស្កាត់ក្រុមទាហាន «ង៧០» ដែលបានដឹកនាំកម្លាំងប្រមាណ ២០នាក់ទៅកាប់រំលំដើមឈើចម្រុះនៅព្រៃសហគមន៍ឧត្តមស្រែខ្ពស់ ស្ថិតក្នុងឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ។
ប្រភពដដែលបានឲ្យដឹងថា នៅក្នុងហេតុការណ៍ខាងលើ ក្រុមទាហានផ្ទុះអាវុធ ២គ្រាប់គំរាមពលរដ្ឋ និងបានប្រើប្រាស់ហិង្សាលើពលរដ្ឋសមាជិកសហគមន៍ចំនួន ៣នាក់ឲ្យរងរបួស។
ក្រុមសហគមន៍បានបន្តថា ពលរដ្ឋដែលរងគ្រោះដោយក្រុមទាហានប្រើអំពើហិង្សានោះ មានឈ្មោះ កាក់ សឿន ភេទប្រុស អាយុ ៤១ឆ្នាំ ឈ្មោះ ម៉េង វី ភេទប្រុស អាយុ ២៥ឆ្នាំ និងឈ្មោះ ឃន ធុច ភេទស្រី អាយុ ៥៩ឆ្នាំ។
ប្រជាសហគមន៍បានអះអាងទៀតថា កងកម្លាំងទាហាននៃកងពលតូច «ង៧០» ដែលក្នុងនោះមានឈ្មោះ អៀម ម៉ៅ និងឈ្មោះ ប៉ែន សារិទ្ធ បានដឹកនាំកម្លាំងមានទាំងគ្រឿងចក្រផង និងកម្លាំងពលរដ្ឋផង បានចូលទៅឈូសឆាយទន្ទ្រានយកដីក្នុងសហគមន៍ឧត្តមស្រែខ្ពស់អស់រយៈពេលប្រមាណ ៥ខែមកហើយ។
ប្រភពដដែលបានបញ្ជាក់ថា ក្រុមទាហានចូលទៅកាប់ទន្ទ្រាននេះ គឺបន្ទាប់ពីពលរដ្ឋបានទទួលដំណឹងថា ដីនេះត្រូវបានលោក ហ៊ុន សែន ចេញអនុក្រឹត្យកាត់ដីដែនជម្រកសត្វព្រៃភ្នំឱរ៉ាល់នៅក្នុងសហគមន៍ឧត្តមស្រែខ្ពស់ស្ថិតក្នុងឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដែលពលរដ្ឋបានថែរក្សា និងអភិរក្សជិត ២០ឆ្នាំ ចំនួនជិត ៣០០ហិកតារ (២៦២,២៤ហិកតារ) ឲ្យទៅក្រុមទាហាននៃកងពលតូច «ង៧០» ជាកងអង្គរក្សរបស់លោក ហ៊ុន សែន។
ព្រៃសហគមន៍ការពារធនធានធម្មជាតិឧត្ដមស្រែខ្ពស់ ត្រូវបានបង្កើតឡើងនៅឆ្នាំ២០០៣ ដោយពេលនោះមានទំហំផ្ទៃដីជាង ២ពាន់ហិកតារ ប៉ុន្តែបច្ចុប្បន្ន អ្នកភូមិឲ្យដឹងថា ដីព្រៃសហគមន៍នេះនៅសល់ជាង ៨០០ហិកតារប៉ុណ្ណោះ។
ប្រជាសហគមន៍នៅឃុំត្រពាំងជោរ ស្នើសុំអាជ្ញាធររក្សាទុកដីព្រៃដែលនៅសេសសល់មិនដល់ ១ពាន់ហិកតារនេះ ដើម្បីឲ្យពួកគាត់ទទួលផលប្រយោជន៍ពីតំបន់ព្រៃឈើមួយនេះតាមមុខរបរប្រពៃណី ដូចជាការរកផ្សិត រកវល្លិ លែងគោក្របី ជាដើម៕