សិក្ខាសាលានៅសហរដ្ឋអាមេរិកដែលដឹកនាំដោយអតីតមេបក្សប្រឆាំង លោក សម រង្ស៊ី កាលពីសប្តាហ៍មុន បានទាមទារឱ្យរដ្ឋាភិបាលកម្ពុជារៀបចំការបោះឆ្នោតដោយសេរី ត្រឹមត្រូវ និងយុត្តិធម៌ ប៉ុន្តែមិនបានទាមទារឲ្យលោក ហ៊ុន សែន ទម្លាក់ចោលការចោទប្រកាន់លោក កឹម សុខា ដែលកំពុងជាប់បណ្តឹងពីបទក្បត់ជាតិដែលមានអាមេរិកនៅពីក្រោយនោះទេ។
គណបក្សសង្គ្រោះជាតិនៅក្រៅប្រទេស បានផ្សព្វផ្សាយសេចក្តីជូនដំណឹងរបស់ខ្លួន នៅថ្ងៃទី២២ ខែកុម្ភៈ ឆ្នាំ២០២២ ថា គណៈកម្មាធិការអចិន្ត្រៃយ៍ និងថ្នាក់ដឹកនាំគណបក្សសង្គ្រោះជាតិនៅក្រៅប្រទេស បានសម្រេចដាក់ចេញនូវផែនការសម្រាប់ឆ្នាំ២០២២ ដោយជំរុញឱ្យរដ្ឋាភិបាលកម្ពុជាទម្លាក់ចោលបទចោទទៅលើអ្នកទោសនយោបាយ ដើម្បីបើកលំហសេរីភាពនៅកម្ពុជាឡើងវិញ។
សេចក្តីប្រកាសព័ត៌មានដដែលនោះអះអាងថា មន្ត្រីបក្សប្រឆាំងនៅក្រៅប្រទេសទាមទារឱ្យមានការបោះឆ្នោតដោយសេរី ត្រឹមត្រូវ និងយុត្តិធម៌នៅកម្ពុជា ដើម្បីធានាឱ្យពលរដ្ឋដែលជាម្ចាស់ឆ្នោតមានសេរីភាពពេញលេញក្នុងការជ្រើសរើសតំណាងស្របច្បាប់ និងស្របតាមឆន្ទៈរបស់ខ្លួន។
ក្រុមសកម្មជនបក្សប្រឆាំងនៅក្រៅប្រទេសភាគីលោក សម រង្ស៊ី កាលពីសប្តាហ៍មុនបាននាំគ្នាបើកសិក្ខាសាលារយៈពេល ៣ថ្ងៃក្នុងទីក្រុង Jacksonville រដ្ឋ Florida សហរដ្ឋអាមេរិក ប៉ុន្តែសិក្ខាសាលានេះត្រូវគេរិះគន់ថា ពួកគេបានប្រើឈ្មោះគណបក្សសង្គ្រោះជាតិជាឈ្នាន់ដើម្បីកៀរគរអ្នកគាំទ្រ និងថវិកាសម្រាប់ជួយឧបត្ថម្ភដំណើរការគណបក្សភ្លើងទៀន ដែលបានងាកចេញពីគណបក្សសង្គ្រោះជាតិទៅវិញ។
ក្រុមមន្ត្រីបក្សប្រឆាំងទាំងនោះបានប្រើទង់គណបក្សភ្លើងទៀន និងអុជទៀនបំភ្លឺជាសញ្ញាតំណាងនៃការជួបជុំរបស់ពួកគេ។ អ្នកទាំងនោះក៏បាននាំគ្នាស្រែកជយោគណបក្សភ្លើងទៀនផងដែរ។
យ៉ាងណាក៏ដោយ សិក្ខាសាលានោះគេមិនបានឃើញតំណាងសាខាគណបក្សសង្គ្រោះជាតិនៅក្រៅប្រទេសចូលរួមនោះទេ ដូចជាតំណាង CNRP-A និងតំណាង CNRP-O ជាដើម គឺមានតែក្រុម សម រង្ស៊ី និយមតែប៉ុណ្ណោះ។
អនុប្រធានប្រតិបត្តិនៃចលនាពលរដ្ឋដើម្បីប្រជាធិបតេយ្យ លោក អ៊ាប គឹមសេង បានប្រាប់សារព័ត៌មាន The Cambodia Daily នៅថ្ងៃទី២២ កុម្ភៈ នេះថា ខ្លឹមសារនៃសេចក្តីប្រកាសព័ត៌មានរបស់មន្ត្រីបក្សប្រឆាំងទាំងនោះ បានបង្ហាញឱ្យឃើញថា ពួកគេបានចាកចេញឆ្ងាយពីស្មារតីរបស់គណបក្សសង្គ្រោះជាតិទៅហើយ ព្រោះថាក្នុងលិខិតនោះ ពួកគេមិនបានទាមទារឱ្យមានវត្តមានគណបក្សសង្គ្រោះជាតិក្នុងការបោះឆ្នោតខាងមុខ និងដោះលែងមេដឹកនាំរបស់ខ្លួន គឺលោក កឹម សុខា ឡើយ។
លោក អ៊ាប គឹមសេង រិះគន់ថា សិក្ខាសាលាមួយដែលបង្កើតឡើងដោយគ្មានផែនការក្នុងការសង្គ្រោះគណបក្សរបស់ខ្លួនដែលត្រូវគេរំលាយ និងទាមទាររកយុត្តិធម៌សម្រាប់មេដឹកនាំរបស់ខ្លួនបែបនេះ គឺជាឈុតឆាកមួយក្នុងចេតនាដើម្បីបន្លំភ្នែកពលរដ្ឋទៅតាមចរន្តនយោបាយរបស់ពួកគេប៉ុណ្ណោះ។ ជាងនេះទៀត សកម្មភាពជាក់ស្តែងក្នុងការជួបជុំនោះ ក៏បានបង្ហាញពីការគាំទ្រគណបក្សភ្លើងទៀនរបស់ពួកគេដែរ។
បន្ទាប់ពីវត្តមានគណបក្សភ្លើងទៀន ក្នុងទីលាននយោបាយ មន្ត្រីបក្សប្រឆាំងភាគីលោក សម រង្ស៊ី បាននាំគ្នាចូលរួមធ្វើនយោបាយជាមួយគណបក្សនេះជាបន្តបន្ទាប់។ ជាក់ស្តែងកាលពីថ្ងៃទី១៥ ខែកុម្ភៈ កន្លងទៅនេះ លោក ចាន់ ចេង អ្នកស្រី ពត ពៅ និងលោក កែត ឃី ដែលជាមន្ត្រីបក្សប្រឆាំងភាគីលោក សម រង្ស៊ី ត្រូវបានព្រះមហាក្សត្រផ្តល់នីតិសម្បទានយោបាយឡើងវិញ ដែលគេអាចសន្មតបានថា អ្នកទាំងនោះនឹងទៅចូលរួមជាមួយគណបក្សភ្លើងទៀន ដូចមន្ត្រីបក្សប្រឆាំងមុនៗដែរ ក្នុងនោះមានដូចជា លោក ថាច់ សេដ្ឋា ជាដើម៕