អតីតរដ្ឋមន្ត្រីក្រសួងសន្តិសុខជាតិកម្ពុជាក្នុងសម័យសាធារណរដ្ឋ អះអាងថា ពលរដ្ឋខ្មែរដែលភៀសខ្លួនពីការធ្វើទុក្ខបុកម្នេញនៅទឹកដីកម្ពុជា មករស់នៅលើទឹកដីសហរដ្ឋអាមេរិក ដែលពេញដោយសេរីភាព គឺពួកគេកំពុងចាញ់ល្បិចលួងលោមងាកទៅចូលរួមគាំទ្របណ្ដាញក្រុមបក្ខពួករបស់រដ្ឋាភិបាលខ្មែរដែលធ្លាប់ធ្វើបាបខ្លួនទៅវិញ។
លោក វ៉ាន សរ បានលើកឡើងក្នុងកិច្ចពិភាក្សាក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី២៣ កុម្ភៈ ថា ពលរដ្ឋខ្មែរដែលមានវាសនាមករស់នៅលើទឹកដីសេរីភាពសហរដ្ឋអាមេរិក គួរតែឈ្វេងយល់ និងសិក្សាឱ្យបានច្បាស់លាស់មុននឹងសម្រេចចិត្តគាំទ្របក្សកាន់អំណាចនៅក្រៅប្រទេស ព្រោះថាពលរដ្ឋខ្មែរដែលរស់នៅក្នុងនាមជាជនភៀសខ្លួនដោយសារតែការធ្វើទុក្ខបុកម្នេញពីរដ្ឋាភិបាលរបស់ខ្លួន គឺជាការរស់នៅដោយឈឺចាប់ជាទីបំផុត។
លោក វ៉ាន សរ បានលើកឡើងថា គណបក្សកាន់អំណាចមិនគួរបង្កើតព្យុះភ្លៀងតាមរុកកួនពលរដ្ឋខ្មែរដែលបានរស់នៅលើទឹកដីអាមេរិកបន្តទៀតនោះទេ ព្រោះថាបើគណបក្សខ្លួនពិតជាល្អមែន គួរតែបង្ហាញពីភាពល្អរបស់ខ្លួនដើម្បីឱ្យពលរដ្ឋខ្មែរនៅក្រៅស្រុកចូលរួមគាំទ្រដោយពេញចិត្ត មិនគួរប្រើវិធីទិញទឹកចិត្ត បំភិតបំភ័យ ដើម្បីឱ្យគេគាំទ្រគណបក្សរបស់ខ្លួននោះឡើយ។
លោក វ៉ាន សរ បានមានប្រសាសន៍បែបនេះក្រោយសម្គាល់ឃើញថា បក្សកាន់អំណាចរបស់លោក ហ៊ុន សែន បានពង្រាយសមាជិករបស់ខ្លួននៅបរទេសដើម្បីទាក់ទាញពលរដ្ឋខ្មែរនៅក្រៅស្រុកឱ្យគាំទ្រខ្លួនតាមវិធីទុច្ចរិតផ្សេងៗសព្វថ្ងៃនេះ។
ចំណែកឯសកម្មជនសហគមន៍ខ្មែរក្នុងទីក្រុងឡងប៊ិច លោក ទិត្យ ទិព្វផាណា បានលើកឡើងក្នុងកិច្ចពិភាក្សានេះដែរថា ពលរដ្ឋខ្មែរដែលរស់នៅជាជនភៀសខ្លួនលើទឹកដីសហរដ្ឋអាមេរិក ពិតមែនថាជាទឹកដីដែលពោរពេញដោយសេរីភាព ប៉ុន្តែក្នុងចិត្តពួកគេ គឺនៅតែរងាជានិច្ច ព្រោះថារដ្ឋាភិបាលកម្ពុជាដែលកំពុងគ្រប់គ្រងទឹកដីកំណើតរបស់ខ្លួន មិនបានផ្តល់ភាពកក់ក្តៅសម្រាប់ពួកគេនោះឡើយ មានតែការគំរាមកំហែងនៅពេលដែលអ្នកទាំងនោះមិនគាំទ្របណ្ដាញបក្ខពួករបស់ពួកគេដែលកំពុងចងក្រងនៅក្រៅស្រុកសព្វថ្ងៃនេះ។
សកម្មជនសហគមន៍ខ្មែរក្នុងទីក្រុងឡងប៊ិចរូបនេះ អះអាងថា បក្សកាន់អំណាចមិនត្រឹមតែដឹកនាំឱ្យមានការបែកបាក់ខ្មែរនៅក្នុងស្រុក ដោយមិនត្រឹមតែប្រកាន់និន្នាការនយោបាយប៉ុណ្ណោះទេ សូម្បីតែពលរដ្ឋខ្មែរនៅក្រៅស្រុកដូចជានៅសហរដ្ឋអាមេរិក ជាដើម ក៏បក្សកាន់អំណាចដាក់បណ្ដាញតាមបំបែក អូសទាញពលរដ្ឋខ្មែរឱ្យចូលបក្សរបស់ខ្លួនដែរ ដែលជាហេតុធ្វើឱ្យពលរដ្ឋខ្មែរនៅក្រៅស្រុកបែកបាក់សាមគ្គីគ្នាយ៉ាងធ្ងន់ធ្ងរ។
លោក ទិត្យ ទិព្វផាណា បញ្ជាក់ថា គណបក្សកាន់អំណាចរបស់លោក ហ៊ុន សែន កំពុងប្រើមនោគមន៍បញ្ចុះបញ្ចូលពលរដ្ឋខ្មែរនៅក្រៅស្រុកឱ្យចូលជាសមាជិករបស់ខ្លួន ក្នុងបំណងវាតទីដើម្បីយកសហគមន៍ខ្មែរក្នុងទឹកដីសហរដ្ឋអាមេរិក ធ្វើជាទីតាំងក្នុងការពង្រីកឥទ្ធិពលគណបក្សរបស់ខ្លួនដែលពួកគេកំពុងអនុវត្តនៅកម្ពុជាសព្វថ្ងៃនេះ។
ចាប់តាំងពីឆ្នាំ២០១៥ មក ឯកអគ្គរាជទូតកម្ពុជា ត្រូវបន្ថែមមុខងារ និងតួនាទីថ្មីមួយក្រៅពីកិច្ចការទូតរវាងប្រទេស និងប្រទេស គឺត្រូវចងក្រងសមាជិកសហគមន៍ខ្មែរបញ្ចូលជាសមាជិកគណបក្សប្រជាជនកម្ពុជា ហើយឯកអគ្គរាជទូតទាំងនោះមានមុខនាទីជាប្រធានគណៈកម្មាធិការបក្សប្រចាំប្រទេសដែលពួកគេតំណាងនោះ។
ឯកអគ្គរាជទូតបង្កើតបណ្ដាញសាខាបក្សដែលហៅថាក្រុមការងារយុវជនបក្សប្រចាំប្រទេសនោះ ក្រោមការចាត់តាំងយុវជនបក្សថ្នាក់កណ្តាលដែលដឹកនាំដោយលោក ហ៊ុន ម៉ាណែត ដែលជាបេក្ខជនអនាគតនាយករដ្ឋមន្ត្រីរបស់កម្ពុជា។
ទាក់ទិននឹងបញ្ហានេះ ក្រុមអ្នកឃ្លាំមើលសង្គមអះអាងថា គណបក្សកាន់អំណាចរបស់លោក ហ៊ុន សែន ព្យាយាមរៀបផែនការចាត់តាំង ពង្រឹងទាំងយុវជន និងមនុស្សចាស់នៅក្រៅប្រទេសយ៉ាងមមាញឹក ដូចជានៅកូរ៉េខាងត្បូង អូស្ត្រាលី បារាំង អង់គ្លេស និងសហរដ្ឋអាមេរិក ជាដើម ឲ្យចូលសមាជិកគាំទ្រគណបក្សរបស់ពួកគេ។
ដោយសារតែបក្សកាន់អំណាចរបស់លោក ហ៊ុន សែន អាចរៀបចំអ្នកគាំទ្រនៅក្រៅប្រទេសបានកាន់តែច្រើន ទើបពួកគេហ៊ានធ្វើសកម្មភាពនយោបាយជាចំហដែលខ្លួនមិនហ៊ានធ្វើពីមុនមក គឺការធ្វើបាតុកម្មប្រឆាំងវត្តមានរបស់លោក សម រង្ស៊ី លើទឹកដីសហរដ្ឋអាមេរិក កាលពីពេលថ្មីៗនេះ ដែលកាលពីមុនមានតែអ្នកគាំទ្រក្រុមប្រឆាំងបាតុកម្មនឹងវត្តមានរបស់លោក ហ៊ុន សែន ប៉ុណ្ណោះ ប៉ុន្តែពេលនេះបក្សកាន់អំណាចប្រើវិធីបក្សប្រឆាំងដើម្បីបំភ័ន្តភ្នែកពលរដ្ឋលើអំពើទុច្ចរិតរបស់ខ្លួន៕