 ចេញផ្សាយរបាយការណ៍ប្រចាំឆ្នាំរបស់ខ្លួនស្ដីពី «សិទ្ធិនយោបាយ និងសេរីភាពជនស៊ីវិល» ថាកម្ពុជាជាប្រទេសដែលគ្មានសិទ្ធិសេរីភាពក្នុងចំណោមប្រទេសអាស៊ានចំនួន៥ ផ្សេងទៀត។){kind=link}
អង្គការឃ្លាំមើលសេរីភាពពិភពលោក (Freedom House) ចេញផ្សាយរបាយការណ៍ប្រចាំឆ្នាំរបស់ខ្លួនស្ដីពី «សិទ្ធិនយោបាយ និងសេរីភាពជនស៊ីវិល» ថាកម្ពុជាជាប្រទេសដែលគ្មានសិទ្ធិសេរីភាពក្នុងចំណោមប្រទេសអាស៊ានចំនួន៥ ផ្សេងទៀត។
ក្នុងរបាយការណ៍ប្រចាំឆ្នាំ២០២១ ដែលចេញផ្សាយនៅខែកុម្ភៈ ឆ្នាំ២០២២ របស់អង្គការឃ្លាំមើលសេរីភាពពិភពលោក (Freedom House) ក៏បានវាយតម្លៃប្រទេសសិង្ហបុរី ម៉ាឡេស៊ី ហ្វីលីពីន និងឥណ្ឌូនេស៊ី ស្ថិតក្នុងចំណោមប្រទេសមានសេរីភាពខ្លះ (Partly Freedom) ប៉ុន្តែអ្វីដែលគួរឲ្យចាប់អារម្មណ៍នោះ Freedom House បានឲ្យចំណាត់ថ្នាក់ទីម័រខាងកើត ស្ថិតក្នុងចំណោមប្រទេសដែលមានសេរីភាពពេញលេញ។
របាយការណ៍បានលើកឡើងថា ប្រទេសដែលមានសេរីភាពពេញលេញ ហើយទទួលបាន ១០០ពិន្ទុពេញនោះរួមមាន ន័រវែស ហ្វាំងឡង់ និងស៊ុយអែត។ រីឯបណ្តាប្រទេសផ្សេងទៀតដែលស្ថិតក្នុងចំណោម Top 10 រួមមាន នូវែលហ្សេឡង់ កាណាដា ដាណឺម៉ាក ហុឡង់ដ៍ អ៊ុយរុយហ្គាយ អៀរឡង់ និងលុចហ្សំបួរ។
ទាក់ទងនឹងរបាយការណ៍នេះ លោក ជិន ម៉ាលីន អ្នកនាំពាក្យក្រសួងយុត្តិធម៌ និងជាអនុប្រធានគណៈកម្មាធិការសិទ្ធិមនុស្សកម្ពុជា បានលើកឡើងថា របាយការណ៍នេះមិនខុសគ្នាពីរបាយការណ៍របស់ក្រុមអង្គការសង្គមស៊ីវិលមួយចំនួននៅក្នុងស្រុកដែលមាននិន្នាការប្រឆាំងរដ្ឋាភិបាល ដែលតែងតែចេញរបាយការណ៍រិះគន់ស្ថានភាពសិទ្ធិមនុស្ស និងប្រជាធិបតេយ្យដែលខុសពីការពិតជាក់ស្តែងនៅក្នុងប្រទេសកម្ពុជានោះទេ។ លោកថា របាយការណ៍នេះមិនខុសពីរបាយការណ៍របស់ក្រុមអង្គការអន្តរជាតិមួយចំនួនដែលធ្វើសកម្មភាពក្នុងចេតនានយោបាយរិះគន់កម្ពុជា នៅលើឆាកអន្តរជាតិនោះដែរ។
លោកអះអាងថា ជាក់ស្តែងពលរដ្ឋប្រើប្រាស់សេរីភាពរបស់ពួកគេដោយមិនមានការគាបសង្កត់នោះទេ។ ទោះបីមានការរិះគន់លើរដ្ឋាភិបាលយ៉ាងណាក៏ដោយ ក៏កម្ពុជានៅតែប្រកាន់ខ្ជាប់នូវវិធានការច្បាប់ក្នុងការលើកស្ទួយសិទ្ធិសេរីភាពរបស់ពលរដ្ឋ។ លោកថា ការវាយតម្លៃរបស់អង្គការនេះមិនឆ្លុះបញ្ចាំងពីការពិតនោះឡើយ។
អ្នកនាំពាក្យអង្គការការពារសិទ្ធិមនុស្សអាដហុក លោក ស៊ឹង សែនករុណា បានថ្លែងប្រាប់សារព័ត៌មាន The Cambodia Daily ថា ចាប់តាំងពីមានការរំលាយគណបក្សសង្គ្រោះជាតិ នៅឆ្នាំ២០១៧ មក ពិន្ទុសេរីភាពនៅកម្ពុជាមានការធ្លាក់ចុះគួរឲ្យកត់សម្គាល់ ជាពិសេសការរឹតត្បិតសិទ្ធិនយោបាយ និងសិទ្ធិពលរដ្ឋ។
លោកថា របាយការណ៍របស់អង្គការ Freedom House គឺយោងទៅតាមស្ថានភាពជាក់ស្តែង ពីព្រោះកន្លងមកសហគមន៍អឺរ៉ុបក៏ដូចជាអ្នកជំនាញផ្នែកសិទ្ធិមនុស្សរបស់អង្គការសហប្រជាជាតិ តែងទាមទារឲ្យកម្ពុជាស្ដារឡើងវិញនូវលទ្ធិប្រជាធិបតេយ្យ និងការគោរពសិទ្ធិមនុស្ស។
លោក ស៊ឹង សែនករុណា បានលើកឡើងទៀតថា ការលើកឡើងនៅក្នុងរបាយការណ៍នោះថាសិទ្ធិនយោបាយមានការធ្លាក់ចុះ គឺប្រហែលជាគេមើលទៅលើការចាប់ខ្លួន និងការចោទប្រកាន់តាមផ្លូវតុលាការទៅលើមេដឹកនាំអតីតគណបក្សប្រឆាំង និងសកម្មជនអតីតគណបក្សប្រឆាំង ព្រមទាំងសកម្មជនសិទ្ធិមនុស្ស និងបរិស្ថានផងដែរ៕