30 C
Phnom Penh

ស្ថានទូត​បារាំង​សរសើរ​កម្ពុជា​ដែល​ហ៊ាន​បោះឆ្នោត​ថ្កោលទោស​រុស្ស៊ី​នៅ​ក្នុង​មហាសន្និបាត​អង្គការ​សហប្រជាជាតិ

ដោយ ឌឹ ខេមបូឌា ដេលី

បទវិភាគ

ស្ថានទូត​បារាំង​ប្រចាំ​នៅ​ប្រទេស​កម្ពុជា កោតសរសើរ​ការ​សម្រេច​ចិត្ត​របស់​ប្រទេស​កម្ពុជា ជា​ប្រទេស​មួយ​ក្នុង​ចំណោម​ប្រទេស​ចំនួន​១៤១ ផ្សេង​ទៀត ដែល​បាន​បោះឆ្នោត​គាំទ្រ​លើ​ដីកា​ដំណោះស្រាយ​ស្ដីពី​វិបត្តិ​សង្គ្រាម​នៅ​អ៊ុយក្រែន នៅ​ឯ​មហាសន្និបាត​អង្គការ​សហប្រជាជាតិ ដោយ​ទទូច​ទាមទារ​ឱ្យ​រុស្ស៊ី​បញ្ឈប់​ជាបន្ទាន់​នូវ​ការ​ប្រើប្រាស់​កម្លាំង​ប្រឆាំង​នឹង​អ៊ុយក្រែន ព្រមទាំង​ត្រូវ​ដក​កងកម្លាំង​យោធា​របស់​ខ្លួន​ចេញពី​ប្រទេស​អ៊ុយក្រែន។

ស្ថានទូត​បារាំង បាន​សរសេរ​នៅ​លើ​គណនី​ហ្វេសប៊ុក​របស់​ខ្លួន​នៅ​ថ្ងៃ​ទី​៣ មីនា នេះ​ថា បារាំង​សូម​កោតសរសើរ​ការ​សម្រេច​ចិត្ត​របស់​កម្ពុជា​កាល​ពី​ម្សិលមិញ (ថ្ងៃ​ទី​២ មីនា) ក្នុង​ការ​ចូលរួម​ជាមួយ​សមាជិក​អង្គការ​សហប្រជាជាតិ​ចំនួន ១៤០​ប្រទេស​ផ្សេង​ទៀត ដើម្បី​សម្ដែង​សាមគ្គីភាព​ជាមួយ​ប្រទេស​អ៊ុយក្រែន ដែល​រងគ្រោះ​ពី​ការ​ឈ្លានពាន​របស់​រុស្ស៊ី ដោយ​រំលោភ​លើ​ធម្មនុញ្ញ​របស់​អង្គការ​សហប្រជាជាតិ។

តំណាង​ប្រទេស​បារាំង​ទាំងមូល​លើកឡើង​ថា កម្ពុជា និង​ប្រទេស​បារាំង រួម​ជាមួយ​ប្រទេស​សមាជិក​ចំនួន ៩៤​ផ្សេង​ទៀត​ដែល​បាន​ធ្វើជា​សហស្ថាបនិក​នៃ​សេចក្តី​សម្រេច​ដែល​ត្រូវ​បាន​អនុម័ត​កាលពី​ម្សិលមិញ (ថ្ងៃ​ទី​២ មីនា) ប្រកាន់ខ្ជាប់​ដូចគ្នា​នូវ​ការគោរព​អធិបតេយ្យភាព និង​បូរណភាព​ដែនដី​នៃ​រដ្ឋ​នានា​ដែល​ជា​មូលដ្ឋាន​គ្រឹះ​នៃ​សណ្ដាប់ធ្នាប់​អន្តរជាតិ។ រដ្ឋាភិបាល​បារាំង​បាន​បញ្ចេញ​សារ​មួយ​ថា «យើង​រួមគ្នា​ដើម្បី​បញ្ចប់​ការ​ឈឺចាប់​របស់​ពលរដ្ឋ​អ៊ុយក្រែន និង​ស្វែងរក​មាគ៌ា​សន្តិភាព​សាជាថ្មី»

ឯកអគ្គរដ្ឋទូត​បារាំង​ប្រចាំ​កម្ពុជា លោក ហ្សាក់ ប៉ឺឡេ (Jacques Pellet)។

តាម​លទ្ធផល​បោះឆ្នោត​ដោយ​មហាសន្និបាត​អង្គការ​សហប្រជាជាតិ បាន​ចេញ​អនុម័ត​សេចក្តី​សម្រេច​មួយ​លើកដំបូង​នៅ​ថ្ងៃ​ទី​២ ខែ​មីនា ដែល​មាន​ឈ្មោះ​ថា «ការ​រួបរួម​ដើម្បី​សន្តិភាព»។ សេចក្តី​សម្រេច​គាំទ្រ​ដោយ​រដ្ឋ​ចំនួន ១៤១ រួម​ទាំង​កម្ពុជា​ផង​ដែរ ក្នុង​ចំណោម​ប្រទេស​ជា​សមាជិក​ទាំង ១៩៣ បាន​ជំរុញ​ឱ្យ​រុស្ស៊ី បញ្ឈប់​ជាបន្ទាន់​នូវ​ការប្រើប្រាស់​កងកម្លាំង​ឈ្លានពាន​ប្រឆាំង​នឹង​ប្រទេស​អ៊ុយក្រែន និង​ដក​ទ័ព​ចេញពី​អ៊ុយក្រែន​ឱ្យ​អស់។

កម្ពុជា​ក្នុង​នាម​ជា​ប្រធាន​អាស៊ាន ក្រៅពី​សម្រេច​បោះឆ្នោត​គាំទ្រ​អធិបតេយ្យ និង​បូរណភាព​ទឹកដី​របស់​អ៊ុយក្រែន កម្ពុជា​ក៏​បាន​ចូលរួម​ជា Co-Sponsor គឺជា​ប្រទេស​ចូលរួម​ផ្ដួចផ្ដើម ឬ​យល់ព្រម​ឲ្យ​គេ​កត់ត្រា​ថា​ជា​ប្រទេស​ចូលរួម​ផ្ដួចផ្ដើម​សេចក្តី​ព្រាង​នៃ​សេចក្តី​សម្រេច​ចិត្ត​របស់​អង្គការ​សហប្រជាជាតិ។

ចំណែក​ឯ​រុស្ស៊ី បេឡារូស កូរ៉េ​ខាងជើង ស៊ីរី និង​អេរីត្រេ បាន​បោះឆ្នោត​ប្រឆាំង​លើ​សេចក្តី​សម្រេច ខណៈ​ចិន ឥណ្ឌា និង​ប្រទេស​ចំនួន ៣៣​ផ្សេង​ទៀត បោះឆ្នោត​អនុបវាទ។ បើ​ទោះ​សេចក្តី​សម្រេច​របស់​មហាសន្និបាត​មិន​បាន​ចង​កាតព្វកិច្ច​ក៏ដោយ វា​មាន​ទម្ងន់​ផ្នែក​នយោបាយ ដើម្បី​ជំរុញ​ឱ្យ​រុស្ស៊ី​គោរព​តាម។

ឯកអគ្គរដ្ឋទូត​សហរដ្ឋ​អាមេរិក​ប្រចាំ​អង្គការ​សហប្រជាជាតិ អ្នកស្រី Linda Thomas-Greenfield បាន​ប្រាប់​មហាសន្និបាត​ថា ប្រទេស​រុស្ស៊ី​បាន​ត្រៀម​ខ្លួន​រួច​ជាស្រេច​ក្នុង​ការ​បង្កើន​ភាព​ឃោរឃៅ​នៃ​ការ​វាយលុក​របស់​ខ្លួន ហើយ​ជំរុញ​សមាជិក​ឲ្យ​នាំ​ទីក្រុង​មូស្គូ មក​ទទួល​ខុសត្រូវ​ចំពោះ​ការរំលោភ​ច្បាប់​អន្តរជាតិ​របស់​ខ្លួន។

ជា​ការ​ឆ្លើយតប បេសកជន​អង្គការ​សហប្រជាជាតិ​របស់​រុស្សី លោក Vassily Nebenzia បាន​បដិសេធ​ថា ទីក្រុង​មូស្គូ មិន​បាន​កំណត់​គោលដៅ​លើ​ជនស៊ីវិល​ទេ ហើយ​បាន​ចោទប្រកាន់​រដ្ឋាភិបាល​លោក​ខាងលិច​ថា​បាន​ជំរុញ​សមាជិក UN ឲ្យ​អនុម័ត​សេចក្តី​សម្រេច​មួយ​ដែល​អាច​បង្ក​ឲ្យ​មាន​អំពើ​ហិង្សា​បន្ថែម​ទៀត។ លោក​ថា សកម្មភាព​របស់​រុស្ស៊ី គឺជា​ប្រតិបត្តិការ​យោធា​ពិសេស​សំដៅ​បញ្ចប់​ការ​វាយប្រហារ​ដោយ​ចេតនា​លើ​ជនស៊ីវិល​នៅ​ក្នុង​សាធារណរដ្ឋ​ដែល​គាំទ្រ​ដោយ​ទីក្រុង​មូស្គូ គឺ Donetsk និង Luhansk នៅ​ភាគ​ខាងកើត​ប្រទេស​អ៊ុយក្រែន។

អ្នក​នាំពាក្យ​រដ្ឋាភិបាល​កម្ពុជា លោក ផៃ ស៊ីផាន បាន​ប្រាប់​សារព័ត៌មាន​ក្នុង​ស្រុក​ថា នេះ​គឺជា​ជំហរ​របស់​កម្ពុជា​ដែល​ផ្ដល់​តម្លៃ​ទៅលើ​សិទ្ធិមនុស្ស​ជា​សំខាន់ ជាជាង​រឿង​នយោបាយ។ លោក​ថា វា​ជា​ជំហរ​របស់​កម្ពុជា​តាំងពី​ឆ្នាំ​១៩៧៩ ថ្ងៃ​ទី​៧ មករា គឺ​តែងតែ​និយាយ​អំពី​សិទ្ធិ​រស់រាន​មាន​ជីវិត។

ទោះជាយ៉ាងណា​ក៏ដោយ អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា អះអាង​ថា កម្ពុជា​ធ្វើ​នេះ​ជា​រឿង​វៃឆ្លាត​មួយ ជា​ឱកាស​ទាញ​បាន​ផលប្រយោជន៍​ពី​ក្រុម​លោកសេរី​លើ​ជំហរ​មួយ​នេះ។ លោក​បន្ត​ថា កម្ពុជា​ក៏​បាន​ឃើញ​ច្បាស់​ដែរ​ថា បើ​មហាអំណាច​មួយ​ណា​ទៅ​ឈ្លានពាន​លើ​ប្រទេស​ទន់​ខ្សោយ​ទាំង​បំពាន មហាអំណាច​នោះ​នឹង​ត្រូវ​បាន​ចោមរោម​ដាក់​ទណ្ឌកម្ម​ជុំ​ទិស​ស្ទើរ​ងើប​មិន​ចង់​រួច៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស