លោក ហ៊ុន សែន នៅថ្ងៃចន្ទ ទី៧ មីនា នេះ ប្រាប់ទៅប្រជាពលរដ្ឋឱ្យរកវិធីដោះស្រាយជម្លោះក្រៅប្រព័ន្ធតុលាការ ដើម្បីកាត់បន្ថយការចំណាយច្រើន។
ថ្លែងក្នុងពិធីសម្ពោធឱ្យប្រើប្រាស់មន្ទីរពេទ្យកម្ពុជា-ចិន នៅខេត្តត្បូងឃ្មុំ នាថ្ងៃចន្ទនេះ លោក ហ៊ុន សែន អះអាងថា ខេត្តត្បូងឃ្មុំ ដែលទើបបំបែកចេញពីខេត្តកំពង់ចាម នោះ មានទាំងសាលាដំបូង និងសាលាឧទ្ធរណ៍ ដែលផ្ដល់ភាពងាយស្រួលជាងមុនដល់ពលរដ្ឋ ដោយមិនចាំបាច់ឡើងទៅសាលាឧទ្ធរណ៍នៅរាជធានីភ្នំពេញ ដើម្បីស្វែងរកយុត្តិធម៌ដូចពេលកន្លងមក។
លោកថា ការបង្កើតសាលាឧទ្ធរណ៍នៅតាមបណ្ដាខេត្តមួយចំនួននៃប្រទេសកម្ពុជានាពេលនេះ ដើម្បីធ្វើកំណែទម្រង់ប្រព័ន្ធតុលាការក្នុងការផ្ដល់សេវាយុត្តិធម៌ដល់ពលរដ្ឋឱ្យកាន់តែប្រសើរ។
តែយ៉ាងណា លោក ហ៊ុន សែន អំពាវនាវឲ្យពលរដ្ឋដោយកុំបង្កើតជម្លោះ ដោយថាការមានជម្លោះ ឬក្ដីក្ដាំគ្នាម្ដងៗ គឺអស់លុយច្រើន ដោយសារតែឡើងតុលាការ ដូច្នេះលោកថាបើមានជម្លោះ គួររកវិធីដោះស្រាយក្រៅប្រព័ន្ធតុលាការវិញ។
ការថ្លែងរបស់លោក ហ៊ុន សែន នាពេលនេះ ហាក់ដូចជាបង្ហាញថា បើសិនជាមិនមានប្រាក់ទេ កុំឡើងតុលាការរកយុត្តិធម៌ធ្វើអី ខណៈកន្លងមក ប្រព័ន្ធយុត្តិធម៌នៅកម្ពុជាបានរងការរិះគន់ខ្លាំងពាក់ព័ន្ធនឹងអំពើពុករលួយ។
ជាក់ស្ដែងកាលពីខែកុម្ភៈ ឆ្នាំ២០២២ ឧត្ដមសេនីយ៍ផ្កាយ៣ ឧកញ៉ា ឌួង ងៀប បានលាតត្រដាងអំពីការទទួលរងភាពអយុត្តិធម៌ដោយសារប្រព័ន្ធតុលាការកម្ពុជា។ លោក ឌួង ងៀប បាននិយាយនៅក្នុងវីដេអូឃ្លីបចំនួនពីរថា លោកគ្មានលទ្ធភាពរកប្រាក់ជាង ៥លានដុល្លារ ដើម្បីតម្កល់នៅតុលាការតាមការបង្គាប់របស់ចៅក្រម ជាថ្នូរនឹងមិនចេញដីកាឃុំខ្លួននោះទេ ហើយថាបញ្ហានេះ លោកទាល់ច្រកហើយ និងសម្រេចចិត្តដើរចូលពន្ធនាគារដោយខ្លួនឯង។
របាយការណ៍របស់អង្គការតម្លាភាពអន្តរជាតិ ចេញផ្សាយកាលពីខែមករា ឆ្នាំ២០២២ រកឃើញថា អំពើពុករលួយនៅកម្ពុជារយៈពេល ២ឆ្នាំជាប់គ្នាៗនៅតែស្ថិតក្នុងលំដាប់ថ្នាក់ខ្ពស់ជាងគេ បើធៀបទៅនឹងប្រទេសជាសមាជិកអាស៊ានដទៃទៀត ហើយថាប្រព័ន្ធយុត្តិធម៌ជាផ្នែកមួយដែលបានទាញទម្លាក់ពិន្ទុនៃការវាយតម្លៃពីកម្រិតអំពើពុករលួយនៅកម្ពុជានេះ៕