28 C
Phnom Penh

សមាជិក​ព្រឹទ្ធសភា​អាមេរិក​ម្នាក់​អំពាវនាវ​ឱ្យ​ប្រជាជន​រុស្ស៊ី​ផ្ដួល​រំលំ​លោក ពូទីន ពី​អំណាច

ដោយ ឌឹ ខេមបូឌា ដេលី

បទវិភាគ

នៅ​ក្នុង​សំណេរ​មួយ​នៅ​លើ​បណ្ដាញ​សង្គម​ទ្វីតធើ (Twitter) សមាជិក​ព្រឹទ្ធសភា​អាមេរិក លោក Lindsey Graham បាន​ផ្ញើ​សារ​ទៅ​ប្រជាជន​រុស្ស៊ី ឱ្យ​ឡើង​ផ្ដួល​រំលំ​លោក ពូទីន ពី​អំណាច ដោយ​ចាប់​ទាញ​ជន​ផ្ដាច់ការ​រុស្ស៊ី​រូប​នេះ​ពី​អំណាច ដោយ​ការ​បញ្ចប់​ជីវិត​របស់​គាត់​តែម្តង។ លោក​បន្ត​ថា តើ​នៅ​រុស្ស៊ី​មាន​ក្រុម Brutus ដែរ​ឬ​ទេ?

ក្រុម Brutus គឺជា​ក្រុម​អត្តឃាត ជា​ក្រុម​សម្លាប់​មេដឹកនាំ​ណា​ដែល​ផ្ដាច់ការ។ ក្រុម​នេះ​ធ្លាប់​មាន​នៅ​ក្នុង​សង្គ្រាម​លោក​ទី​២ ដែល​វរសេនីយ៍ឯក​ម្នាក់​នៃ​កងទ័ព​អាល្លឺម៉ង់ បាន​ព្យាយាម​សម្លាប់​លោក Adolf Hitler តែ​មិន​បាន​សម្រេច​កាលពី​ឆ្នាំ​១៩៤៤។

សារ​របស់​សមាជិក​ព្រឹទ្ធសភា Lindsey Graham បាន​ហៅ​លោក Vladimir Putin ប្រធានាធិបតី​រុស្ស៊ី ថា​សម​ណាស់​តែ​ត្រូវ​បាន​ប្រជាជន​រុស្ស៊ី​ផ្ដួល​រំលំ ព្រោះ​ជន​ផ្ដាច់ការ​រូប​នេះ​គំរាម​សម្លាប់​ពិភពលោក​ដោយ​អាវុធ​ប្រល័យលោក​នុយក្លេអ៊ែរ។ លោក​ថា កងទ័ព​របស់​រុស្ស៊ី​ក្រោម​បញ្ជា​របស់​លោក ពូទីន កំពុង​វាយប្រហារ​លើ​ជនស៊ីវិល ហើយ​សូម្បី​រោងចក្រ​ថាមពល​នុយក្លេអ៊ែរ ក៏​កងទ័ព​រុស្ស៊ី​វាយ​បំផ្លាញ​ធ្វើ​ឱ្យ​ឆាបឆេះ ដែល​ជា​ការ​ភ័យ​ព្រួយ​ពី​ការ​សាយភាយ​វិទ្យុសកម្ម​រ៉េអាក់ទ័រ​របស់​រោងចក្រ​នេះ​បណ្ដាល​ឱ្យ​ប៉ះពាល់​សុខភាព និង​អាយុជីវិត​មនុស្ស​រាប់​ម៉ឺន​នាក់​នៅ​អ៊ុយក្រែន។

លោក​បន្ត​ថា មាន​ផ្លូវ​តែ​មួយ​គត់​ដែល​ប្រជាជន​រុស្ស៊ី​ត្រូវ​ជ្រើសរើស គឺ​ធ្វើ​ឃាត​លោក ពូទីន គឺ​ទើប​អូស​គាត់​ចេញពី​អំណាច​បាន ហើយ​បើ​ពុំនោះ​ទេ ពិភពលោក​នឹង​គ្រោះថ្នាក់​ដោយសារ​ជន​ផ្ដាច់ការ​រូប​នេះ។

សមាជិក​ព្រឹទ្ធសភា លោក Graham ព្រមាន​ថា ប្រសិនបើ​ប្រជាជន​រុស្ស៊ី​មិន​ងើប​ឡើង​អូស​ក​លោក ពូទីន ពី​អំណាច​ទេ គឺ​ប្រទេស​រុស្ស៊ី នឹង​បន្ត​ធ្លាក់​ក្នុង​ភាព​ងងឹត និង​ស្ថិតនៅ​ក្នុង​ភាព​ឯកោ​នៃ​ពិភពលោក។

តែ​បើ​តាម​ការ​ចុះផ្សាយ​របស់​បណ្ដាញ​ផ្សាយ​ព័ត៌មាន​របស់​អាមេរិក NPR ការ​អំពាវនាវ​របស់​សមាជិក​ព្រឹទ្ធសភា Lindsey Graham បាន​នាំ​ឲ្យ​មាន​ប្រតិកម្ម​ខ្លះៗ​ពី​សមាជិក​សភា និង​ព្រឹទ្ធសភា​អាមេរិក ដោយ​ហៅ​ពាក្យ​សម្ដី​របស់​លោក Graham ថា​មាន​ភាព​សាហាវ។ សមាជិក​ព្រឹទ្ធសភា Ted Cruz នៃ​រដ្ឋ​តិចសាស់ បាន​ប្រតិកម្ម​ដោយ​ហៅ​ថា​ជា​ការ​ប្រមាថ ហើយ​មាន​ភាព​មិន​សមរម្យ។

រីឯ​សមាជិក​សភា Omar D-Minn បាន​ទទូច​ឱ្យ​លោក Graham ធ្វើ​ចិត្ត​ឲ្យ​ត្រជាក់​បន្តិច ព្រោះ​ស្ថានការណ៍​នៃ​សង្គ្រាម​រុស្ស៊ី-អ៊ុយក្រែន បើ​មិន​ប្រុងប្រយ័ត្ន នឹង​អាច​ទាញ​ទៅ​រក​សង្គ្រាម​លោក​ទី​៣។

នាយក​ទំនាក់ទំនង​នៃ​ស្ថាប័ន​ព្រឹទ្ធសភា លោក Kevin Bishop បាន​និយាយ​ថា គេ​គួរ​ប្រាប់​ទៅ​ប្រជាជន​រុស្ស៊ី​ថា គួរ​បញ្ចប់​របប​លោក ពូទីន ដោយ​ការ​ធ្វើ​រដ្ឋប្រហារ គឺជា​ការ​សមរម្យ​មួយ។

តែ​យ៉ាង​នេះ​ក្ដី ឯកអគ្គរដ្ឋទូត​រុស្ស៊ី ប្រចាំ​នៅ​សហរដ្ឋ​អាមេរិក លោក Anatoly Antonova បាន​ប្រតិកម្ម​នឹង​ការ​អំពាវនាវ​របស់​សមាជិក​ព្រឹទ្ធសភា Graham ដោយ​បាន​ហៅថា​ជា​វោហារសាស្ត្រ​ប្រមាថ​ជីវិត​មេដឹកនាំ​ម្នាក់។

លោក​ថា​សេចក្ដី​ថ្លែងការណ៍​របស់​អ្នក​នយោបាយ​អាមេរិក​ដូចនេះ មិន​អាច​ទទួលយក​បាន​ទេ។ តែ​ជាមួយ​គ្នា​នេះ អ្នក​នាំពាក្យ​សេតវិមាន Jen Psaki បាន​និយាយ​ថា ពាក្យ​សម្ដី​របស់​លោក Graham មិន​តំណាង​ឱ្យ​រដ្ឋការ​លោក បៃដិន នោះ​ទេ គឺ​គ្រាន់តែ​ជា​ទស្សនៈ​របស់​បុគ្គល​ម្នាក់​ប៉ុណ្ណោះ។

យ៉ាងនេះ​ក្ដី លោក ពូទីន កំពុង​ក្លាយ​ជា​មេដឹកនាំ​រុស្ស៊ី​ដែល​ជាប់​ចោទ​ពី​បទ​ឧក្រិដ្ឋកម្ម​សង្គ្រាម​ដោយ​តុលាការ​យុត្តិធម៌​អន្តរជាតិ ICJ ករណី​លើក​ទ័ព​ឈ្លានពាន​អ៊ុយក្រែន និង​ការ​បាញ់​ប្រហារ​ទៅលើ​សហគមន៍​ស៊ីវិល​នៅ​អ៊ុយក្រែន ហើយ​សំណុំរឿង​កំពុង​ទាញ​ឱ្យ​របប​លោក ពូទីន ទៅ​ការពារ​ខ្លួន​នៅ​តុលាការ​អន្តរជាតិ​មួយ​នេះ​តាម​បណ្ដឹង​របស់​ប្រធានាធិបតី​អ៊ុយក្រែន លោក Zelenskiy៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស