អ្នកតាមដានស្ថានការណ៍នយោបាយកម្ពុជា រិះគន់មន្ត្រីក្រសួងយុត្តិធម៌ដែលជំរុញឱ្យប្រធានគណបក្សសង្គ្រោះជាតិ លោក កឹម សុខា សារភាពទោស ថាបំពានទៅលើគោលការណ៍ច្បាប់យ៉ាងធ្ងន់ធ្ងរ លោក កឹម សុខា អាចប្តឹងអំពីការរំលោភរដ្ឋធម្មនុញ្ញទៅក្រុមប្រឹក្សាធម្មនុញ្ញ។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានសរសេរលើគណនីហ្វេសប៊ុករបស់លោកកាលពីថ្ងៃទី៧ ខែមីនា ថា ការលើកយកសំណុំរឿងលោក កឹម សុខា មកបកស្រាយរបស់អ្នកនាំពាក្យក្រសួងយុត្តិធម៌ លោក ជិន ម៉ាលីន គឺបំពានទៅលើគោលការណ៍ច្បាប់យ៉ាងធ្ងន់ធ្ងរ។
លោកថា ការបំពានទាំងនោះមានដូចជា ការលើកឡើងសំណុំរឿងរបស់តុលាការដែលស្ថិតនៅក្រោមនីតិវិធីជំនុំជម្រះ រំលោភលើឯករាជភាពនៃអំណាចតុលាការ និងរំលោភលើរដ្ឋធម្មនុញ្ញដែលបានចែងពីការបែងចែកអំណាច ជាដើម។
បណ្ឌិត ឡៅ ម៉ុងហៃ អះអាងថា លោក កឹម សុខា អាចប្តឹងអំពីការរំលោភរដ្ឋធម្មនុញ្ញនៃការលើកឡើងរបស់អ្នកនាំពាក្យក្រសួងយុត្តិធម៌រូបនេះទៅក្រុមប្រឹក្សាធម្មនុញ្ញ តាមរយៈតុលាការកំពូល ឬប្តឹងសុំឱ្យតុលាការចេញដីកាបដិសេធការលើកឡើងនេះ។
លោកបន្តទៀតថា ជាងនេះទៀត លោក កឹម សុខា ក៏អាចប្តឹងទៅព្រះមហាក្សត្រដែលជាអ្នកធានាឯករាជ្យនៃអំណាចតុលាការ ដើម្បីសុំឱ្យព្រះអង្គចាត់ឧត្ដមក្រុមប្រឹក្សានៃអង្គចៅក្រម បដិសេធការលូកដៃចូលក្នុងកិច្ចការតុលាការលើសំណុំរឿងរបស់លោកផងដែរ។
ការអះអាងនេះ ធ្វើឡើងបន្ទាប់ពីអ្នកនាំពាក្យក្រសួងយុត្តិធម៌ ចោទមេដឹកនាំប្រឆាំងថាកំពុងព្យាយាមបំភ្លៃសាធារណមតិតាមរយៈវីដេអូភស្តុតាងដោះបន្ទុក ដែលក្រុមមេធាវីរបស់លោកដាក់ជូនតុលាការនាពេលកន្លងមក។
កាលពីថ្ងៃទី៥ ខែមីនា ឆ្នាំ២០២២ អ្នកនាំពាក្យក្រសួងយុត្តិធម៌ លោក ជិន ម៉ាលីន បានចោទថា ប្រធានបក្សប្រឆាំង លោក កឹម សុខា កំពុងព្យាយាមបំភ្លៃសាធារណមតិតាមរយៈវីដេអូភស្តុតាងរបស់លោក។ អ្នកនាំពាក្យរូបនេះជំរុញឱ្យមេដឹកនាំបក្សប្រឆាំងសារភាពទោស ដើម្បីបានការសម្រាលទោសពីតុលាការទៅវិញ។
អ្នកតាមដានស្ថានការណ៍នយោបាយកម្ពុជា លោក សុខ សុគន្ធ បានលើកឡើងក្នុងកិច្ចពិភាក្សានៃកម្មវិធី Idea Talk របស់សារព័ត៌មាន The Cambodia Daily កាលពីរាត្រីថ្ងៃទី៧ ខែមីនា ឆ្នាំ២០២២ ថា ក្រសួងយុត្តិធម៌កំពុងបំពានលើច្បាប់ប្រទេសខ្លួនឯងក្នុងនាមជាអ្នកដឹកនាំអនុវត្តច្បាប់ ព្រោះសំណុំរឿងលោក កឹម សុខា កំពុងនៅក្នុងតុលាការ មិននៅស្ថិតក្នុងដែនសមត្ថកិច្ចរបស់ក្រសួងយុត្តិធម៌ដែលត្រូវសម្រេចនោះទេ។
លោក សុខ សុគន្ធ លើកឡើងថា តុលាការកម្ពុជាសព្វថ្ងៃនេះបានដើរតួយ៉ាងពេញលេញធ្វើជាឧបករណ៍នយោបាយរបស់បក្សកាន់អំណាច។ ដូច្នេះក្រសួងយុត្តិធម៌ ដែលមានតួនាទីជាអ្នកធានានូវដំណើរការនៃភាពត្រឹមត្រូវរបស់តុលាការ ត្រូវតែជំរុញការអនុវត្តច្បាប់ឱ្យបានល្អប្រសើរ។
មាត្រា១២៨ថ្មី នៃរដ្ឋធម្មនុញ្ញចែងថា អំណាចតុលាការជាអំណាចឯករាជ្យ ហើយគ្របដណ្តប់ទៅលើរឿងក្តីទាំងអស់ ចំណែកមាត្រា១៣០ថ្មីនៃរដ្ឋធម្មនុញ្ញ ចែងថា គ្មានអង្គណាមួយនៃអំណាចនីតិប្បញ្ញត្តិ ឬនីតិប្រតិបត្តិ អាចជ្រៀតជ្រែកលើអំណាចតុលាការអ្វីបានឡើយ៕