រដ្ឋមន្ត្រីក្រសួងមហាផ្ទៃ លោក ស ខេង ថ្លែងថា ប្រទេសមួយចំនួនមិនទទួលយកអ្នកទោសដែលជាជនជាតិរបស់ខ្លួនឡើយ បន្ទាប់ពីប្រព្រឹត្តបទល្មើសនៅកម្ពុជា ហើយអាជ្ញាធរចាប់បញ្ជូនទៅវិញ ដែលករណីនេះបានក្លាយជាបន្ទុកមួយផ្នែកទៀតដល់កម្ពុជា។
ថ្លែងក្នុងពិធីបិទសន្និបាតបូកសរុបលទ្ធផលការងារ និងទិសដៅបន្តរបស់រដ្ឋបាលខេត្តព្រះសីហនុ នាថ្ងៃពុធ ទី៩ មីនា នេះ លោក ស ខេង បានថ្លែងថា មានតែសាធារណរដ្ឋប្រជាមានិតចិន ប៉ុណ្ណោះដែលសហការល្អជាមួយកម្ពុជា ដោយទទួលយកអ្នកទោសជាជនជាតិរបស់ខ្លួនវិញ ហើយបន្តយកទៅអនុវត្តទោសនៅប្រទេសចិន ក្រោយបញ្ចប់ការបំពេញបែបបទនៅកម្ពុជា។
ចំណែកប្រទេសខ្លះ លោក ស ខេង ថាមិនព្រមទទួលយក (អ្នកទោស) ទៅប្រទេសខ្លួនវិញឡើយ បើទោះបីជារដ្ឋាភិបាលប្រទេសនោះបានដឹងហើយថាជនជាតិរបស់ខ្លួននោះ។
រដ្ឋមន្ត្រីក្រសួងមហាផ្ទៃបញ្ជាក់ថា កន្លងមក កម្ពុជាធ្លាប់ស្នើឱ្យប្រទេសមួយទទួលយកជនជាតិរបស់ខ្លួនត្រឡប់ទៅវិញ ប៉ុន្តែនៅពេលបញ្ជូនទៅ បែរជារដ្ឋាភិបាលប្រទេសនោះបដិសេធ។ លោកថា ចំណុចនេះមានការពិបាក ទោះបីជាអាជ្ញាធរបានខិតខំប្រឹងប្រែងធ្វើការងារនេះក៏ដោយ។
ការថ្លែងរបស់លោក ស ខេង ហាក់ទំនងចង់សំដៅទៅលើរដ្ឋាភិបាលប្រទេសវៀតណាម បន្ទាប់ពីជនជាតិវៀតណាមជាច្រើនបានព្យាយាមត្រឡប់ទៅប្រទេសកំណើតវិញតាមច្រកព្រំដែនក្អមសំណ ស្រុកលើកដែក ខេត្តកណ្ដាល ប៉ុន្តែអាជ្ញាធរវៀតណាមបែរជាបិទមិនឱ្យជនជាតិរបស់ខ្លួនអាចធ្វើដំណើរទៅស្រុកកំណើតរបស់ពួកគេវិញនោះឡើយ ចាប់តាំងពីខែមិថុនា ឆ្នាំ២០២១ ដល់ខែមីនា ឆ្នាំ២០២២ នេះ។
កាលពីថ្ងៃទី២៣ ខែកុម្ភៈ ឆ្នាំ២០២២ លោកនាយឧត្តមសេនីយ៍ ប៉ោ ភក្តិ អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃ បានប្រកាសចំឈ្មោះប្រទេសនោះ គឺវៀតណាម ដែលមិនព្រមទទួលយកជនអន្តោប្រវេសន៍របស់ខ្លួនវិញដែលត្រឡប់ទៅពីកម្ពុជា។
របាយការណ៍ពីសមាគមខ្មែរ-វៀតណាមនៅកម្ពុជា ដែលដកស្រង់ទៅចុះផ្សាយដោយសារព័ត៌មាន VN EXPRESS របស់វៀតណាម កាលពីចុងឆ្នាំ២០២១ បានឲ្យដឹងថា នៅក្នុងភូមិសាស្ត្ររាជធានីភ្នំពេញតែមួយប៉ុណ្ណោះ យ៉ាងហោចណាស់មានជនជាតិវៀតណាមប្រមាណ ៣ម៉ឺននាក់កំពុងរស់នៅ។
ប៉ុន្តែក្រុមអ្នកសង្កេតការណ៍ជឿថា ចំនួនពលរដ្ឋវៀតណាមទាំងស្របច្បាប់ និងខុសច្បាប់ក្នុងទីក្រុងភ្នំពេញ និងនៅទូទាំងប្រទេសកម្ពុជា អាចមានច្រើនជាងនេះរាប់សិបដងទៀតឯណោះ៕