ប្រទេសមួយនៅអាស៊ីដែលប្រជាធិបតេយ្យចាក់ឫសខ្លាំងរឹងមាំ ហើយជាប្រទេសមានសន្តិភាពទាំងផ្លូវកាយ និងផ្លូវចិត្ត បានឆ្លងកាត់ការបោះឆ្នោតមួយលើកទៀតហើយនៅពេលនេះ ដោយប្រជាជនសម្រេចជ្រើសរើសយកអ្នកនយោបាយម្នាក់មកពីបក្សប្រឆាំងវិញម្ដង ដើម្បីឱ្យដឹកនាំប្រទេស និងរដ្ឋាភិបាល។
លោក Yoon Suk-yeol បានឈ្នះគូប្រជែងរបស់លោកមិនដល់ ១% នោះទេនៅក្នុងការបោះឆ្នោតប្រធានាធិបតីកូរ៉េខាងត្បូង កាលពីថ្ងៃទី៩ មីនា។ បេក្ខជនមកពីបក្សកាន់អំណាច គឺគណបក្សប្រជាធិបតេយ្យ លោក Lee Jae-myung បានប្រកាសទទួលស្គាល់ជ័យជម្នះរបស់លោក Yoon Suk-yeol ដោយសេចក្ដីរីករាយគ្មានកំហឹងអ្វីឡើយ។
តាមលទ្ធផលបោះឆ្នោតដែលធ្វើឱ្យមានការភ្ញាក់ផ្អើល គឺការចាញ់ឈ្នះនឹងគ្នាមិនដល់ ១% នោះទេ គឺរវាង ៤៨,៦% ទល់នឹង ៤៧,៨% ហើយភាគរយដែលប្រជាជនចេញទៅបោះឆ្នោត គឺជាង ៧៧% ក្នុងចំណោមប្រជាជនមានឈ្មោះបោះឆ្នោតជាង ៤៤លាននាក់នៃចំនួនប្រជាជនជិត ៥២លាននាក់។ នេះបើយោងតាមការស្រង់មកចុះផ្សាយដោយសារព័ត៌មានអង់គ្លេស The Guardian។
លោក Yoon Suk-yeol មកពីគណបក្សអំណាចប្រជាជន (People Power Party)។ ប្រធានាធិបតីឈ្នះឆ្នោតរូបនេះ គឺជាអតីតអគ្គរដ្ឋអាជ្ញា។ លោកត្រូវបានក្រុមប្រឹក្សាបោះឆ្នោតរបស់កូរ៉េខាងត្បូង ប្រកាសថា លោកជាអ្នកឈ្នះនៅក្នុងការបោះឆ្នោតប្រធានាធិបតីអាណត្តិថ្មីនេះ។
លោក Yoon Suk-yeol បានហៅជ័យជម្នះរបស់លោក គឺជាជោគជ័យដ៏អស្ចារ្យរបស់ប្រជាជនកូរ៉េខាងត្បូង។ នៅចំពោះមុខអ្នកគាំទ្ររាប់ម៉ឺននាក់ លោកបានប្រកាសការពាររដ្ឋធម្មនុញ្ញ និងស្ថាប័នប្រជាធិបតេយ្យជាមួយនឹងការសន្យាបន្តកិច្ចសហប្រតិបត្តិការជាមួយសហរដ្ឋអាមេរិក និងប្រទេសជប៉ុន ដើម្បីពង្រឹងស្ថិរភាពក្នុងតំបន់។ លោកទទូចឱ្យប្រជាជនបន្តរួមសាមគ្គីគ្នា ដើម្បីកូរ៉េខាងត្បូងមានអំណាចមួយរឹងមាំ គឺអំណាច និងឆន្ទៈរបស់ប្រជាជន។
លោកក៏បានថ្លែងអរគុណដល់គូប្រជែងរបស់លោក គឺលោក Lee Jae-myung ដែលប្រកាសទទួលស្គាល់ជ័យជម្នះរបស់លោក។ មណ្ឌលបោះឆ្នោតដែលនាំឱ្យអ្នកនយោបាយបក្សប្រឆាំងនេះបានជ័យជម្នះ គឺនៅតំបន់ Busan។ នៅមុនការបោះឆ្នោតមួយថ្ងៃ គឺនៅថ្ងៃទី៨ ខែមីនា លោកបានទៅឃោសនានៅក្នុងតំបន់នេះដែលមានអ្នកគាំទ្ររាប់ម៉ឺននាក់ បានមកស្ដាប់វោហារសាស្ត្រនយោបាយរបស់លោក លើកឡើងអំពីយុទ្ធសាស្ត្រនៃការកសាងជាតិ ការពង្រឹងស្ថិរភាពលើឧបទ្វីបជាមួយនឹងប្រទេសកូរ៉េខាងជើង ដោយឈរលើកម្លាំងសហការជាមួយសហរដ្ឋអាមេរិក និងប្រទេសជប៉ុន។
សហរដ្ឋអាមេរិក និងប្រទេសជប៉ុន ប្រកាសអបអរសាទរភ្លាមៗនូវជ័យជម្នះរបស់លោក Yoon Suk-yeol ដែលក្លាយជាប្រធានាធិបតីនៃសាធារណរដ្ឋកូរ៉េខាងត្បូង។ តាមការិយាល័យអ្នកនាំពាក្យសេតវិមាន លោក Joe Biden បានបញ្ជូនសារអបអរសាទរជូនទៅលោក Yoon Suk-yeol ដោយសម្ដែងសេចក្ដីសង្ឃឹមអំពីចំណងមិត្តភាពរវាងក្រុងវ៉ាស៊ីនតោន និងក្រុងសេអ៊ូល កាន់តែរឹងមាំថែមទៀត។
ចំណែកនាយករដ្ឋមន្ត្រីជប៉ុន លោក Fumio Kishida បានផ្ញើសារអបអរសាទរដល់លោក Yoon Suk-yeol ផងដែរ។ នៅក្នុងសារអបអរសាទរនេះ លោក Kishida បានបង្ហាញក្ដីសង្ឃឹមផងដែរថា រូបលោកអាចនឹងធ្វើការយ៉ាងជិតស្និទ្ធជាមួយលោក Yoon Suk-yeol ដើម្បីស្ដារទំនាក់ទំនងរវាងកូរ៉េខាងត្បូង និងជប៉ុន ឱ្យប្រសើរឡើង។ សាររបស់លោក Kishida មានសេចក្ដីថា លោកសូមអបអរសាទរចំពោះជ័យជម្នះរបស់លោក Yoon Suk-yeol ក្នុងការបោះឆ្នោតនេះ ជាពិសេសនៅពេលនេះ គឺជាពេលដែលសហគមន៍អន្តរជាតិកំពុងប្រឈមមុខនឹងការផ្លាស់ប្ដូរដ៏ធំ។ ក្នុងស្ថានភាពនេះ គឺទំនាក់ទំនងល្អរវាងជប៉ុន និងកូរ៉េខាងត្បូង គឺជារឿងចាំបាច់មិនអាចខ្វះបានឡើយ។
លោក Yoon Suk-yeol ដែលជាអ្នកនយោបាយមកពីបក្សប្រឆាំងនៃគណបក្សអំណាចប្រជាជន ត្រូវបានមើលឃើញថា លោកមានភាពទើសទាល់ខ្លះៗដែលប្រធានាធិបតីផុតអាណត្តិ Moon Jae-in មានភាពទោរទន់នឹងរបបផ្ដាច់ការនៅកូរ៉េខាងជើង។ តាមបណ្ដាញផ្សាយព័ត៌មាន BBC លោក Yoon Suk-yeol ទំនងនឹងស្វែងរកដៃគូជាមួយក្រុមចតុភាគី ហៅថា Quad ដែលមាន ៤ប្រទេស គឺអាមេរិក ជប៉ុន អូស្ត្រាលី និងឥណ្ឌា ដើម្បីពង្រឹងកម្លាំងទប់ទល់នឹងកូរ៉េខាងជើង ហើយនឹងប្រទេសចិន។
ប្រទេសកូរ៉េខាងត្បូង មានរដ្ឋធម្មនុញ្ញមួយដ៏រឹងមាំក្នុងការពារសិទ្ធិរបស់ប្រជាជន និងស្ថាប័នប្រជាធិបតេយ្យ។ រដ្ឋធម្មនុញ្ញរបស់ប្រទេសនេះកាត់តម្រឹមអំណាចរបស់ប្រធានាធិបតី គឺអនុញ្ញាតឱ្យកាន់អំណាចបានតែ ៥ឆ្នាំប៉ុណ្ណោះ គឺមួយអាណត្តិ។ សម្រាប់លោក Yoon Suk-yeol មានពេលវេលាគ្រប់គ្រងអំណាចរបស់លោកបានតែ ៥ឆ្នាំប៉ុណ្ណោះ ហើយបើលោកមានកំហុសណាមួយអំឡុងកាន់អំណាចនេះ គឺរដ្ឋធម្មនុញ្ញនេះក៏បើកសិទ្ធិឱ្យតុលាការរដ្ឋធម្មនុញ្ញដកអំណាចពីលោកបានដែរ។
លោក Yoon Suk-yeol មានអាយុ ៦១ឆ្នាំ។ លោកទើបចូលប្រឡូកក្នុងបក្សអំណាចប្រជាជន (People Power Party) ក្នុងឆ្នាំ២០២១ ដោយលោកហក់ចេញពីតួនាទីជាអគ្គរដ្ឋអាជ្ញារបស់ប្រទេសកូរ៉េខាងត្បូង។ ភាពលេចធ្លោរបស់លោក គឺជាអ្នកផ្ដើមបណ្ដឹងដែលបានរកឃើញអ្នកស្រីប្រធានាធិបតី Park Geun-hye បណ្ដោយឱ្យជំនួយការជំនិតម្នាក់ប្រព្រឹត្តអំពើសូកប៉ាន់ និងពុករលួយ។ លោកត្រូវបានប្រជាជនកូរ៉េខាងត្បូង ដាក់រហស្សនាមថាជាចៅក្រមភ្នែកភ្លឺ ព្រោះលោកជាអ្នកបំបែកសំណុំរឿងរបស់អ្នកមានអំណាច និងមានប្រាក់ស្ដុកស្ដម្ភដែលប្រព្រឹត្តអំពើពុករលួយ៕