30 C
Phnom Penh

លោក ស ខេង ថា​ព្រៃឈើ​ពី​មុន​មើល​មេឃ​មិន​ឃើញ តែ​ឥឡូវ​រក​កន្លែង​ជ្រក​បាំង​ថ្ងៃ​មិន​បាន

ដោយ ឌឹ ខេមបូឌា ដេលី

បទវិភាគ

អនុប្រធាន​គណបក្ស​ប្រជាជន​កម្ពុជា និង​ជា​រដ្ឋមន្ត្រី​ក្រសួង​មហាផ្ទៃ លោក ស ខេង អះអាង​ថា កម្ពុជា​បាន​បាត់បង់​ព្រៃឈើ​យ៉ាង​គំហុក​នា​ពេល​បច្ចុប្បន្ន។ លោក​បន្ត​ថា កាលពី​មុន កម្ពុជា​សម្បូរ​ព្រៃឈើ​ហូរហៀរ មើល​មេឃ​មើល​ថ្ងៃ​មិន​ឃើញ តែ​ឥឡូវ​រក​កន្លែង​ជ្រក​បាំង​ថ្ងៃ​ក៏​មិន​បាន​ដែរ។

ថ្លែង​ក្នុង​សន្និបាត​បូក​សរុប​លទ្ធផល​ការងារ​ឆ្នាំ​២០២១ នៅ​ខេត្ត​បាត់ដំបង កាលពី​ថ្ងៃ​ទី​១០ ខែ​មីនា ឆ្នាំ​២០២២ លោក ស ខេង បាន​រំឭក​ថា នៅ​ទសវត្សរ៍​៩០ ព្រៃឈើ​នៅសល់​ច្រើន​ដែរ ប៉ុន្តែ​មក​ដល់​ពេលនេះ ព្រៃឈើ​ដែល​ជា​ធនធាន​ធម្មជាតិ​នៅសល់​តិចតួច​ប៉ុណ្ណោះ។ ករណី​នេះ បាន​បង្ហាញ​ឱ្យ​ឃើញ​ពី​ការ​បាត់បង់​ព្រៃឈើ​យ៉ាង​គំហុក​នា​ពេល​បច្ចុប្បន្ន។ លោក​បន្ត​ថា នៅ​ពេល​បច្ចុប្បន្ន​នេះ ព្រៃឈើ​ចាប់ពី​ស្រុក​សំឡូត ខេត្ត​បាត់ដំបង រហូត​ទៅដល់​ព្រំប្រទល់​ខេត្ត​កោះកុង កំពុង​រង​ការ​ទន្រ្ទាន។

លោក ស ខេង បាន​បញ្ជា​ទៅ​អាជ្ញាធរ​ពាក់ព័ន្ធ​ឱ្យ​ចុះទៅ​ពិនិត្យ​មើល​ការ​ទន្ទ្រាន និង​ការ​កាប់​បំផ្លាញ​ព្រៃឈើ​ក្នុង​ស្រុក​សំឡូត ក្នុង​នោះ​លោក​បាន​ណែនាំ​ថា វា​ជា​ការ​ងាយស្រួល​ណាស់​ដោយ​អាជ្ញាធរ​អាច​ស្នើសុំ Helicopter ណា​មួយ ឬ​ប្រើ Drone ដើម្បី​ថត​មើល​ពី​ខាងលើ​ក្នុង​តំបន់​ព្រៃឈើ​ដែល​រង​ការ​ទន្ទ្រាន​នោះ។

ក្រៅពី​ព្រៃឈើ លោក ស ខេង ក៏​បាន​រំលេច​អំពី​ការ​ហិនហោច​អស់​នៃ​កូនភ្នំ​នៅ​កម្ពុជា ដែល​ករណី​ទាំងអស់​នេះ​លោក​ថា​ថ្ងៃ​ក្រោយ​នឹង​ធ្វើ​ឱ្យ​កម្ពុជា​វេទនា។

កាលពី​ថ្ងៃ​ទី​២៨ ខែ​មករា ឆ្នាំ​២០២២ អង្គការ​លើកលែង​ទោស​អន្តរជាតិ បង្ហាញ​របាយការណ៍​ថ្មី​មួយ​ថា នៅ​ក្នុង​ឆ្នាំ​២០២១ នេះ ព្រៃឈើ​ជាង ៦​ពាន់​ហិកតារ​ក្នុង​ដែន​ជម្រក​សត្វព្រៃ​ចំនួន​ពីរ​នៅ​កម្ពុជា ត្រូវ​បាន​បំផ្លាញ​ដោយសារ​ដៃ​របស់​ក្រុម​មន្ត្រី​ពុករលួយ។

អង្គការ Amnesty International បាន​ចោទ​អាជ្ញាធរ​ពាក់ព័ន្ធ ជាពិសេស​មន្ត្រី​ក្រសួង​បរិស្ថាន​ថា​មិន​បាន​អើពើ និង​មិន​ខ្វល់​ចំពោះ​ការ​រាយការណ៍​របស់​ពលរដ្ឋ​ពាក់ព័ន្ធ​នឹង​បទល្មើស​នេះ​ឡើយ ខណៈ​សកម្មភាព​ចុះ​ទៅ​ស៊ើប​អង្កេត​របស់​មន្ត្រី​ក្រសួង​បរិស្ថាន​ខ្លះ ធ្វើឡើង​ដើម្បី​ទទួល​លុយ​ក្រោម​តុ​ពី​ជនល្មើស​តែប៉ុណ្ណោះ។

ប្រធាន​ផ្នែក​កិច្ចការ​វិបត្តិ និង​បរិស្ថាន​នៃ​អង្គការ Amnesty International លោក Richard Pearshouse បាន​លើកឡើង​ក្នុង​របាយការណ៍​ថា អាជ្ញាធរ​កម្ពុជា​ត្រូវ​បញ្ឈប់​ជាបន្ទាន់​នូវ​សកម្មភាព​បើក​ដៃ និង​ឃុបឃិត​ជាមួយ​ជន​ទុច្ចរិត​ដើម្បី​កាប់​បំផ្លាញ​ព្រៃឈើ​ទៀត។ លោក​ថា ការ​ទទួល​សំណូក និង​ការ​ប្រព្រឹត្ត​អំពើពុករលួយ​របស់​អាជ្ញាធរ​ពាក់ព័ន្ធ ក្នុង​នោះ​មាន​មន្ត្រី​ប៉ូលិស មន្ត្រី​នៃ​ក្រសួង​បរិស្ថាន កំពុង​ធ្វើ​ឱ្យ​ព្រៃឈើ​របស់​កម្ពុជា​ដែល​នៅ​សេសសល់​ដ៏​តិចតួច​បំផុត ត្រូវ​រលាយ​ហិនហោច​អស់។

ទោះបីជា​យ៉ាងណា កាលពី​កន្លងមក លោក ហ៊ុន សែន ប្រកាស​ក្ដែងៗ​ដោយ​កាត់​ក​ខ្លួនឯង រួម​ទាំង​បង្កើត​គណៈកម្មការ​បង្ក្រាប​បទល្មើស​ព្រៃឈើ​នៅ​ប្រទេស​កម្ពុជា​ឱ្យ​បាន​ដាច់ខាត​នោះ ត្រូវ​បរាជ័យ ក្នុង​នោះ​ព្រៃឈើ​នៅ​ប្រទេស​កម្ពុជា​ស្ទើរតែ​ហិនហោច​ចាប់តាំង​ពី​លោក ហ៊ុន សែន អះអាង​ថា​ការពារ​រហូត​មកដល់​ពេល​បច្ចុប្បន្ន​នេះ។

ប៉ុន្តែ​ប្រជា​សហគមន៍​អះអាង​ថា ព្រៃឡង់​នឹង​វិនាស​ក្នុង​ឆ្នាំ​២០២២ និង​ឆ្នាំ​២០២៣ បើ​សិន​រដ្ឋាភិបាល​មិន​អើពើ​ទប់ស្កាត់​នោះ ខណៈ​សកម្មភាព​កាប់​បំផ្លាញ និង​ដឹកជញ្ជូន​ឈើ​ចេញពី​តំបន់​ព្រៃឡង់​បាន​កើន​ឡើង​ខ្លាំង​យ៉ាង​គគ្រឹកគគ្រេង​ជាង​ពេល​កន្លងមក។

រដ្ឋលេខាធិការ និង​ជា​អ្នក​នាំពាក្យ​ក្រសួង​បរិស្ថាន លោក នេត្រ ភក្ដ្រា បាន​ប្រាប់​អ្នក​សារព័ត៌មាន​កន្លងមក​ថា អ្វី​ដែល​ជា​ការ​ចោទប្រកាន់​របស់​ក្រុម​សកម្មជន​មួយ​ចំនួន​ដែល​តែងតែ​ផ្សព្វផ្សាយ​ព័ត៌មាន​បែប​កុហក ថា​កម្ពុជា​អស់​ឈើ​ហើយ ប៉ុន្តែ​បើ​កម្ពុជា​អស់​ឈើ សួរ​ថា​តើ​របាយការណ៍​របស់​លោក ហេតុ​អ្វី​បាន​ជា​ចេញ​រហូត​មាន​ទៅ​ដល់ ៤៦,៨៦%? ហើយ​ស្ថានភាព​ជាក់ស្តែង ប្រជាពលរដ្ឋ​គឺ​គាត់​បាន​ដឹង​ច្បាស់​អំពី​វត្តមាន​នៃ​ព្រៃឈើ​នៅ​ក្នុង​តំបន់​ការពារ​ធម្មជាតិ។

បើ​តាម​របាយការណ៍​ស្ដីពី «ស្ថានភាព​បរិស្ថាន​លើក​ទី​៤ និង​សៀវភៅ​ធនធាន​គម្រប​ព្រៃឈើ​កម្ពុជា​ឆ្នាំ​២០១៨» ចេញផ្សាយ​នៅ​ថ្ងៃ​ទី​២៣ ខែ​កញ្ញា ឆ្នាំ​២០២១ របស់​ក្រសួង​បរិស្ថាន បាន​ឲ្យ​ដឹង​ថា ក្នុង​ឆ្នាំ​១៩៦៥ ព្រៃឈើ​លាតសន្ធឹង​លើ​ផ្ទៃដី ៧៣% នៃ​ផ្ទៃ​ប្រទេស ប៉ុន្តែ​ត្រឹម​ឆ្នាំ​២០១៨ ព្រៃឈើ​បាន​រួម​មក​នៅ​តិច​ជាង ៤៧% ហើយ​ចាប់ពី​ឆ្នាំ​២០១៤ មក ការ​បាត់បង់​គម្រប​ព្រៃឈើ​ពុំ​សូវ​មាន​ភាព​ធ្ងន់ធ្ងរ ប៉ុន្តែ​នៅ​កើត​មាន​ក្នុង​កម្រិត​មួយ​ថេរ។

នៅ​ក្នុង​វិស័យ​ព្រៃឈើ​នេះ កម្ពុជា​ក៏​បាន​បាត់បង់​ការ​គាំទ្រ​ពី​ទីភ្នាក់ងារ​សហរដ្ឋ​អាមេរិក​សម្រាប់​អភិវឌ្ឍន៍​អន្តរជាតិ (USAID) នៅ​ក្នុង​ការ​អនុវត្ត​គម្រោង​ព្រៃឡង់​បៃតង នៅ​តំបន់​ដែន​ជម្រក​សត្វព្រៃ​ព្រៃឡង់ ដែល​មាន​រយៈពេល ៥​ឆ្នាំ ចាប់ពី​ឆ្នាំ​២០១៨ ដល់​ឆ្នាំ​២០២៣ ដោយ​មាន​ទឹកប្រាក់​ប្រមាណ ២១​លាន​ដុល្លារ​អាមេរិក៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស