មេដឹកនាំបក្សប្រឆាំងដែលកំពុងរងការគាបសង្កត់សេរីភាពពីបក្សកាន់អំណាច តាមរយៈប្រព័ន្ធតុលាការ លោក កឹម សុខា អះអាងថា សហភាពអឺរ៉ុបមានគោលបំណងចង់ជួយដល់សេដ្ឋកិច្ចកម្ពុជាលើវិស័យវាយនភណ្ឌ និងរោងចក្រកាត់ដេរ ប៉ុន្តែកម្ពុជាត្រូវតែអនុវត្តតាមគុណតម្លៃស្នូលរបស់សហភាពអឺរ៉ុប គឺការគោរពសិទ្ធិមនុស្ស លំហលទ្ធិប្រជាធិបតេយ្យ និងការបោះឆ្នោតដោយសេរី និងយុត្តិធម៌។
ប្រធានគណបក្សសង្គ្រោះជាតិ ដែលពុំទាន់មានសេរីភាពពេញលេញនៅឡើយ លោក កឹម សុខា បានសរសេរលើទំព័រហ្វេសប៊ុករបស់លោកកាលពីថ្ងៃទី១៣ ខែមីនា ឆ្នាំ២០២២ ថា សហភាពអឺរ៉ុបមានគោលបំណងពង្រឹងកិច្ចសហប្រតិបត្តិការជាមួយកម្ពុជា ក្នុងបំណងចង់ជួយដល់សេដ្ឋកិច្ចកម្ពុជា លើកកម្ពស់ជីវភាពពលរដ្ឋខ្មែរ ជាពិសេសលើវិស័យវាយនភណ្ឌ និងរោងចក្រកាត់ដេរ ដូចជាវិស័យពាណិជ្ជកម្ម និងការវិនិយោគផ្សេងៗ ជាដើម។
មេដឹកនាំបក្សប្រឆាំងរូបនេះអះអាងថា ដើម្បីឆ្ពោះទៅរកការសហការបានល្អ កម្ពុជាត្រូវតែអនុវត្តតាមគុណតម្លៃស្នូលរបស់សហភាពអឺរ៉ុប គឺការគោរពសិទ្ធិមនុស្ស សិទ្ធិនយោបាយរបស់ពលរដ្ឋ លទ្ធិប្រជាធិបតេយ្យ រួមទាំងសេរីភាពសារព័ត៌មាន អង្គការសង្គមស៊ីវិល សហជីព និងការបោះឆ្នោតស្របតាមបទដ្ឋានដែលជាគោលការណ៍ប្រជាធិបតេយ្យពហុនិយម ដែលជាជម្រើសដ៏ល្អសម្រាប់ម្ចាស់ឆ្នោតផងដែរ។
លោក កឹម សុខា បញ្ជាក់ថា គណៈកម្មការកិច្ចការបរទេសនៃសហភាពអឺរ៉ុប បានសម្ដែងការព្រួយបារម្ភយ៉ាងខ្លាំងអំពីលំហប្រជាធិបតេយ្យ សិទ្ធិពលរដ្ឋ និងនយោបាយ សិទ្ធិសង្គមស៊ីវិល និងសេរីភាពរបស់លោក ដែលពាក់ព័ន្ធនឹងនីតិវិធីយឺតយ៉ាវរបស់តុលាការក្រុងភ្នំពេញសព្វថ្ងៃនេះ។
កាលពីថ្ងៃទី១៣ ខែមីនា ឆ្នាំ២០២២ មេដឹកនាំបក្សប្រឆាំង លោក កឹម សុខា បានជួបពិភាក្សាជាមួយគណៈប្រតិភូតំណាងសហភាពអឺរ៉ុប អ្នកស្រី ផៅឡា ផាមផាឡូនី (Paola PAMPALONI) ដែលជាអនុប្រធានទទួលបន្ទុកតំបន់អាស៊ី-ប៉ាស៊ីហ្វិកនៃគណៈកម្មការកិច្ចការបរទេសសហភាពអឺរ៉ុប មកកាន់ប្រទេសកម្ពុជា។ ជំនួបនេះជាផ្នែកមួយនៃការសន្ទនារវាងសហភាពអឺរ៉ុប-ប្រ៊ូសសែល និងសមភាគីកម្ពុជាក្នុងក្របខ័ណ្ឌគណៈកម្មការចម្រុះសហភាពអឺរ៉ុប-កម្ពុជាលើកទី១១ ក្នុងឆ្នាំ២០២២។
អ្នកស្រី Paola PAMPALONI បានសរសេរលើបណ្ដាញសង្គម Twitter របស់អ្នកស្រី កាលពីថ្ងៃទី១៣ ខែមីនា ឆ្នាំ២០២២ ថា អ្នកស្រីមានភាពរីករាយដែលបានជួបជាមួយមេដឹកនាំបក្សប្រឆាំង លោក កឹម សុខា នៅទីក្រុងភ្នំពេញ និងបានស្តាប់ប្រសាសន៍របស់លោកអំពីស្ថានភាពនៃការជំនុំជម្រះក្តីរបស់តុលាការក្រុងភ្នំពេញនាពេលកន្លងមក។ អ្នកស្រីរំពឹងថា កម្ពុជានឹងមានដំណោះស្រាយយ៉ាងឆាប់រហ័សដោយការបើកលំហសិទ្ធិសេរីភាពស៊ីវិល និងនយោបាយឲ្យបានទូលំទូលាយ ដែលជាធាតុផ្សំយ៉ាងសំខាន់សម្រាប់ការបោះឆ្នោតដោយសេរី និងយុត្តិធម៌នៅឆ្នាំ២០២២ និងឆ្នាំ២០២៣ នៅកម្ពុជា នាពេលខាងមុខនេះ។
មេដឹកនាំបក្សប្រឆាំង លោក កឹម សុខា ត្រូវតុលាការក្រុងភ្នំពេញចោទប្រកាន់ពីបទឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាលកម្ពុជា រហូតឈានដល់ការចាប់ខ្លួនដាក់ពន្ធនាគារកាលពីឆ្នាំ២០១៧ កន្លងទៅ។ រហូតដល់ពេលនេះ តុលាការកម្ពុជានៅមិនទាន់មានភស្តុតាងត្រឹមត្រូវណាមួយដើម្បីកាត់ទោសលោកនៅឡើយទេ។
ចំណែកបរទេសដែលតុលាការចោទថាជាអ្នកនៅពីក្រោយលោក កឹម សុខា ក្នុងផែនការផ្តួលរំលំនោះ ក៏តុលាការមិនបានបង្ហាញថាជាប្រទេសណានោះដែរ។
ជារឿយៗ តំណាងសហគមន៍អឺរ៉ុប តំណាងស្ថានទូតសហរដ្ឋអាមេរិក និងបណ្តាប្រទេសជាច្រើនទៀត តែងទាមទារឲ្យរដ្ឋាភិបាលរបស់បុរសខ្លាំងកម្ពុជា លោក ហ៊ុន សែន បើកលំហប្រជាធិបតេយ្យ ការគោរពសិទ្ធិមនុស្ស និងបើកសិទ្ធិសេរីភាពដល់មេដឹកនាំបក្សប្រឆាំងឡើងវិញផងដែរ៕