ពលរដ្ឋបង្ហាញក្ដីបារម្ភអំពីតម្លៃប្រេងសាំងហក់ឡើង ៥០០រៀលបន្ថែមទៀតក្នុងមួយលីត្រ ខណៈរដ្ឋាភិបាលលោក ហ៊ុន សែន បានអះអាងថា ការឡើងថ្លៃនេះបណ្ដាលមកពីវិបត្តិនៃសង្គ្រាមរវាងរុស្ស៊ី និងអ៊ុយក្រែន ដែលជាប្រទេសផលិតប្រេងធំ។
ក្នុងសេចក្ដីប្រកាសព័ត៌មានចុះថ្ងៃទី១៦ ខែមីនា ឆ្នាំ២០២២ ក្រសួងពាណិជ្ជកម្ម ឱ្យដឹងថា ចាប់ពីថ្ងៃទី១៦ ដល់ថ្ងៃទី៣១ ខែមីនា ឆ្នាំ២០២២ តម្លៃសាំងធម្មតា និងប្រេងម៉ាស៊ូតបានហក់ឡើងចំនួន ៥៣០០រៀលក្នុងមួយលីត្រ ខណៈតម្លៃសាំងស៊ូពែហក់ឡើងដល់ ៥៨៥០រៀលក្នុងមួយលីត្រ។
តម្លៃប្រេងឥន្ធនៈចាប់ផ្ដើមហក់ឡើងចាប់ពីថ្ងៃនេះ ខណៈកាលពីថ្ងៃទី១ ដល់ថ្ងៃទី១៥ ខែមីនា តម្លៃប្រេងសាំងធម្មតាមានតម្លៃ ៤៨០០រៀលក្នុងមួយលីត្រ។ ចំណែកប្រេងម៉ាស៊ូតតម្លៃ ៤៥០០រៀលក្នុងមួយលីត្រប៉ុណ្ណោះ។
កាលពីថ្ងៃទី២ ខែមីនា ឆ្នាំ២០២២ លោក ហ៊ុន សែន បានថ្លែងថា ការឡើងថ្លៃប្រេងសាំងនេះមិនមែនតែនៅកម្ពុជានោះទេ ដោយលោកថាសូម្បីតែប្រទេសផលិតប្រេងក៏ឡើងថ្លៃដែរ។
តម្លៃប្រេងសាំងបានហក់ឡើងនេះ បានបង្កឱ្យពលរដ្ឋមួយចំនួនដែលកំពុងប្រកបរបរដឹកជញ្ជូនទំនិញ និងអ្នកដំណើរប្រើប្រាស់ រួមទាំងកសិករដែលបានប្រើប្រាស់ប្រេងសាំង បានបង្ហាញក្តីបារម្ភពីការថយចុះប្រាក់ចំណូល ខណៈពួកគេកំពុងរងផលប៉ះពាល់ដោយសារការរីករាលដាលនៃជំងឺកូវីដ-១៩ អស់រយៈពេលជាង ២ឆ្នាំរួចទៅហើយនោះ។
ជាក់ស្ដែង បើតាមអ្នកលក់ដូរតាមផ្ទះ អ្នកដឹកអីវ៉ាន់តាមអនឡាញ អ្នករត់ម៉ូតូឌុប អ្នករត់រ៉ឺម៉កកង់៣ និងអ្នកបើកបររថយន្តតាក់ស៊ី បានលើកឡើងប្រហាក់ប្រហែលគ្នាថា នៅតាមតំបន់ជាយក្រុង និងតាមបណ្តាខេត្តមួយចំនួន ប្រេងសាំងធម្មតាមានតម្លៃ ៥៥០០រៀល ខណៈស្ថានីយប្រេងខ្លះបានអស់ប្រេងក្នុងស្តុកថែមទៀតផង។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានប្រាប់សារព័ត៌មានក្នុងស្រុកកន្លងមកថា កន្លងទៅលោកនាយករដ្ឋមន្ត្រី ហ៊ុន សែន បានអនុញ្ញាតផ្តល់ការឧបត្ថម្ភធន ៤សេនដុល្លារក្នុង ១លីត្រ ហើយក្រសួងក៏បានអនុវត្តជាហូរហែមកដែរ។ ក្រៅពីនេះ ក្រសួងពាណិជ្ជកម្មនឹងបន្តប្រឹងប្រែងពិនិត្យ និងតាមដាន បើសភាពការណ៍នេះនៅតែមិនល្អ ហើយប្រសិនបើតម្លៃប្រេងសាំងនៅតែឡើងថ្លៃទៀត នោះក្រសួងនឹងបើកកិច្ចប្រជុំជាមួយវិស័យឯកជន។
លោកបញ្ជាក់ថា វិធានការតទៅមុខទៀត គឺមិនព្រងើយកន្តើយចំពោះបញ្ហានេះឡើយ កាលណាតម្លៃប្រេងឡើងខ្ពស់ដល់ដំណាក់កាលត្រូវជជែកជាមួយវិស័យឯកជន ដើម្បីស្វះស្វែងរកវិធីសាស្ត្រធ្វើយ៉ាងណាសម្រួលថា ខាងភាគីឯកជនអាចទទួលយកបាន ហើយពលរដ្ឋអាចមានប្រេងប្រើប្រាស់បាន។
លោក ប៉ែន សុវិជាតិ អះអាងថា កម្ពុជាចៀសមិនផុតពីបញ្ហាតម្លៃប្រេងឥន្ធនៈប្រែប្រួលនោះទេ ដោយសារតែជាប្រទេសនាំចូលប្រេង ដូចនេះត្រូវតែពឹងផ្អែកលើតម្លៃប្រេងអន្តរជាតិ៕