 សម្រេចលុបឈ្មោះបេក្ខជនចំនួន ១១រូបមកពីគណបក្សនយោបាយចំនួន២ ចេញពីបញ្ជីឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់សម្រាប់នីតិកាលទី៥ នេះ ព្រោះមិនចេះអក្សរ។){kind=link}
គណៈកម្មាធិការជាតិរៀបចំការបោះឆ្នោត (គ.ជ.ប) សម្រេចលុបឈ្មោះបេក្ខជនចំនួន ១១រូបមកពីគណបក្សនយោបាយចំនួន២ ចេញពីបញ្ជីឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់សម្រាប់នីតិកាលទី៥ នេះ ព្រោះមិនចេះអក្សរ។
ក្នុងសេចក្តីសម្រេចនៅថ្ងៃទី១៨ ខែមីនា ដោយបង្ហាញថា បេក្ខជនទាំង ១១រូបដែលត្រូវបាន គ.ជ.ប លុបចេញពីបញ្ជីបោះឆ្នោតសម្រាប់នីតិកាលទី៥ ឆ្នាំ២០២២ នេះ ក្នុងនោះមកពីគណបក្សភ្លើងទៀន និងគណបក្សឆន្ទៈខ្មែរ។
គ.ជ.ប ដដែលថាមកដល់ថ្ងៃនេះ បេក្ខភាពមកពីគណបក្សភ្លើងទៀន មានចំនួន ៧រូបហើយត្រូវបានលុបឈ្មោះចេញពីបញ្ជីបោះឆ្នោត ក្នុងនោះម្នាក់នៅសង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ ខណៈបេក្ខភាព ៦នាក់ទៀតមកពីឃុំជំនាប់ ស្រុកថ្មបាំង ខេត្តកោះកុង។ ចំណែកបេក្ខភាព ៤រូបផ្សេងទៀតមកពីគណបក្សឆន្ទៈខ្មែរ នៅសង្កាត់វត្តភ្នំ ខណ្ឌដូនពេញ រាជធានីភ្នំពេញ។
បើតាមសេចក្តីសម្រេចរបស់ គ.ជ.ប បញ្ជាក់ថា ការលុបឈ្មោះបេក្ខភាពទាំងនោះចេញពីបញ្ជីឈ្មោះបោះឆ្នោតនេះ ធ្វើឡើងតាមបណ្តឹងពលរដ្ឋដែលបានប្តឹងមកស្ថាប័នជាតិរៀបចំការបោះឆ្នោត ដើម្បីស្នើសុំឱ្យលុបឈ្មោះបេក្ខភាពទាំងនោះចេញ។ ពលរដ្ឋដែលប្ដឹងមក គ.ជ.ប ក្នុងនោះមានឈ្មោះ អ៊ុំ ចន្ទដារ៉ា លោក សៀង វាសនា និងឈ្មោះ កែវ ប៊ុនធឿន។
ពាក់ព័ន្ធនឹងរឿងនេះ កាលពីថ្ងៃទី១៧ ខែមីនា ឆ្នាំ២០២២ គ.ជ.ប បានចេញសេចក្តីសម្រេចមួយបន្ទាប់ពីបានធ្វើសវនាការសង្ខេប ដោយបង្ហាញភស្តុតាងដាក់បន្ទុកដែលចេញដើមបណ្ដឹងទាំងនោះ។ សវនាការសង្ខេបនោះ គ.ជ.ប ក៏បានបង្ហាញពីមានភាពរឹងមាំតាមផ្លូវច្បាប់ ខណៈចម្លើយសារភាពរបស់បេក្ខភាពនីមួយៗក៏បានបញ្ជាក់ថា ខ្លួនពិតជាមិនចេះអាន និងសរសេរខ្មែរ។ បេក្ខភាពទាំងនោះមិនបានបំពេញប្រវត្តិរូប និងការប្រកាសយល់ព្រមឈរឈ្មោះជាបេក្ខជនផ្ទាល់របស់ពួកគេដែរ។
ប្រធានគណបក្សឆន្ទៈខ្មែរ លោក គង់ មុនីកា បានប្រាប់សារព័ត៌មានក្នុងស្រុកថា លោកភ្ញាក់ផ្អើលនៅពេលទទួលបានដំណឹងពីការសម្រេចរបស់ គ.ជ.ប ប្រឆាំងបេក្ខភាពរបស់គណបក្សក្រៅរដ្ឋាភិបាលមួយនេះ។
លោកថា កន្លងមក គណបក្សនេះបានជ្រើសរើសបេក្ខភាពដែលឈរឈ្មោះទាំងនោះដោយបានសិក្សាពីប្រវត្តិច្បាស់លាស់។ លោកបន្តថា គណបក្សរបស់លោកនឹងចុះអង្កេតរឿងនេះដោយម៉ត់ចត់។ លោកថា នេះគឺជារូបភាពគំរាមកំហែង និងជាចេតនានយោបាយពីភាគីណាមួយប្រឆាំងគណបក្សក្រៅរដ្ឋាភិបាលច្រើនជាង។
នាយកប្រតិបត្តិអង្គការនិចហ្វិច លោក សំ គន្ធាមី បានប្រាប់សារព័ត៌មានក្នុងស្រុកថា រូបភាពនៃការយាយី និងហិង្សាផ្នែកនយោបាយនៅក្នុងនីតិកាលទី៥ នេះ ហាក់ដូចជាមានស្ថានភាពធ្ងន់ធ្ងរ បើធៀបនឹងដំណើរការនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិមុនៗ។ លោកបន្ថែមថា ប្រសិនបើរកឃើញថាសវនាការដែលសម្រេចលុបឈ្មោះនេះមានភាពមិនត្រឹមត្រូវ គណបក្សនយោបាយសាមី គួរប្តឹងតវ៉ាប្រឆាំងនឹងសេចក្តីសម្រេចនេះដោយផ្អែកទៅតាមនីតិវិធី និងបទបញ្ញត្តិដែលមានជាធរមាន។
រហូតមកទល់ពេលនេះ យ៉ាងហោចណាស់មានគណបក្សនយោបាយចំនួន១៧ បានដាក់បញ្ជីបេក្ខភាពរបស់ខ្លួនចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០២២។ ចំពោះប្រតិទិនដែលបានកំណត់រួចហើយអំពីថ្ងៃបោះឆ្នោតជ្រើសរើសមេឃុំចៅសង្កាត់ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ខាងមុខនេះ៕