លោកនាយករដ្ឋមន្ត្រី ហ៊ុន សែន ប្រកាសដាក់ឱ្យអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដើម្បីរៀបចំឡើងវិញនូវរចនាសម្ព័ន្ធ និងប្រព័ន្ធគ្រប់គ្រងរដ្ឋបាលសាធារណៈនៅថ្នាក់ក្រោមជាតិ ដោយឈរលើគោលការណ៍អភិវឌ្ឍន៍តាមបែបប្រជាធិបតេយ្យ។
លោក ហ៊ុន សែន បានប្រកាសជាផ្លូវការដាក់ឱ្យអនុវត្តនូវកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ ចាប់ពីឆ្នាំ២០២១ ដល់ឆ្នាំ២០៣០ ដែលតម្រូវឱ្យមន្ត្រីរាជការតាមក្រសួង-ស្ថាប័នថ្នាក់ក្រោមជាតិ និងដៃគូអភិវឌ្ឍន៍ រួមជាមួយអង្គការសង្គមស៊ីវិល ត្រូវតែចូលរួមអនុវត្តធ្វើកំណែទម្រង់សំខាន់ៗជាមួយគ្នាទៅថ្ងៃមុខ។
លោក ហ៊ុន សែន អះអាងថា ការកែទម្រង់វិមជ្ឈការ និងវិសហមជ្ឈការ គឺជាការពង្រឹងអភិបាលកិច្ចល្អដែលជាស្នូលនៃយុទ្ធសាស្ត្រចតុកោណរបស់រដ្ឋាភិបាលកម្ពុជា ដើម្បីរៀបចំឡើងវិញនូវរចនាសម្ព័ន្ធ និងប្រព័ន្ធគ្រប់គ្រងរដ្ឋបាលសាធារណៈនៅថ្នាក់ក្រោមជាតិ ដោយឈរលើគោលការណ៍អភិវឌ្ឍន៍តាមបែបប្រជាធិបតេយ្យ។ លោកបញ្ជាក់ថា ប្រព័ន្ធរដ្ឋបាលក្រុមប្រឹក្សាថ្នាក់ក្រោមជាតិ គឺជាតួអង្គទី១ ដែលត្រូវបង្កើតឡើងតាមរយៈនៃការបោះឆ្នោតដើម្បីធ្វើជាតំណាងឲ្យសំឡេង និងផលប្រយោជន៍ពលរដ្ឋក្នុងដែនសមត្ថកិច្ចរបស់ខ្លួន និងអនុវត្តការងារដែលឆ្លើយតបទៅនឹងតម្រូវការរបស់ពលរដ្ឋឱ្យមានប្រសិទ្ធភាព។
ការប្រកាសដាក់ឱ្យអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិនេះ ធ្វើឡើងបន្ទាប់ពីដំណាក់កាលទី១ នៃកម្មវិធីជាតិនេះត្រូវបានបញ្ចប់កាលពីចុងឆ្នាំ២០២០ កន្លងទៅ។
កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ របស់រដ្ឋាភិបាលកម្ពុជាមានរយៈពេល ១០ឆ្នាំ ខណៈដំណាក់កាលទី២ នេះ ត្រូវចាប់ផ្តើមអនុវត្តចាប់ពីឆ្នាំ២០២១ ដល់ឆ្នាំ២០៣០ បន្ទាប់ពីដំណាក់កាលទី១ បានចាប់ផ្តើមឡើងកាលពីឆ្នាំ២០១០ ហើយត្រូវបានបញ្ចប់កាលពីឆ្នាំ២០២០ កន្លងទៅ។
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២១ ខែមីនា ឆ្នាំ២០២២ អះអាងថា រដ្ឋបាលថ្នាក់ក្រោមជាតិអាចរៀបផែនការ អាចមានមធ្យោបាយដោះស្រាយ អាចធ្វើសេចក្តីសម្រេចដ៏ត្រឹមត្រូវក្នុងការឆ្លើយតបនឹងសំណើ សំណូមពរ និងតម្រូវការប្រជាពលរដ្ឋបានឆាប់រហ័ស និងមានប្រសិទ្ធភាពខ្ពស់ស្របតាមស្ថានការណ៍ជាក់ស្តែង។ លោកថា រដ្ឋបាលដែលនៅកៀកនឹងពលរដ្ឋ អាចដឹងសុខទុក្ខ និងតម្រូវការពិតប្រាកដរបស់ពលរដ្ឋយ៉ាងច្បាស់ និងត្រឹមត្រូវជាងរដ្ឋបាលដែលនៅឆ្ងាយពីប្រជាពលរដ្ឋ។
អ្នកនាំពាក្យរបស់សមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី២២ មីនា នេះថា ដំណើរការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិនាពេលកន្លងមក នៅមិនទាន់អនុវត្តបានត្រឹមត្រូវនៅឡើយទេ។ ជាក់ស្តែង ក្រុមប្រឹក្សាឃុំ-សង្កាត់ ស្រុក-ក្រុង រាជធានី-ខេត្ត តែងតែបំពេញតួនាទីរបស់ខ្លួនដោយផ្ដោតទៅលើប្រយោជន៍គណបក្សរបស់ពួកគេជាធំ ជាជាងបំពេញសេចក្តីត្រូវការរបស់ពលរដ្ឋ។
លោកបន្តថា គោលការណ៍ប្រជាធិបតេយ្យ គឺត្រូវតែអនុវត្តឱ្យស្របតាមឆន្ទៈ និងប្រយោជន៍របស់ពលរដ្ឋ ប៉ុន្តែការដកហូតសមាជិកក្រុមប្រឹក្សាឃុំ-សង្កាត់របស់គណបក្សសង្គ្រោះជាតិ ដែលត្រូវជំនួសដោយមនុស្សផ្សេងដែលមិនបានកើតឡើងដោយឆន្ទៈម្ចាស់ឆ្នោត គឺជាទង្វើប្រាសចាកគោលការណ៍ប្រជាធិបតេយ្យទាំងស្រុង។
លោក ស៊ឹង សែនករុណា អំពាវនាវឱ្យរដ្ឋាភិបាលកម្ពុជាត្រួតពិនិត្យលើការអនុវត្តការងាររបស់មន្ត្រីថ្នាក់ក្រោមជាតិទាំងអស់ឱ្យបានហ្មត់ចត់ ដើម្បីជំរុញការអភិវឌ្ឍស្របតាមគោលការណ៍ប្រជាធិបតេយ្យ សេរី ពហុបក្សពិតប្រាកដ និងដើម្បីបម្រើសេចក្តីត្រូវការរបស់ប្រជាពលរដ្ឋទូទៅដោយមិនប្រកាន់និន្នាការនយោបាយ៕