ចៅក្រមសាលាដំបូងរាជធានីភ្នំពេញ បដិសេធសំណើរបស់មេបក្សប្រឆាំង លោក កឹម សុខា ក្នុងការស្នើសុំចេញទៅចូលរួមកិច្ចប្រជុំក្នុងវេទិកាស្ដីពីគោលនយោបាយពិភពលោករបស់អង្គការ Global Solution ក្នុងទីក្រុងប៊ែរឡាំង ប្រទេសអាល្លឺម៉ង់ នៅថ្ងៃទី២៨ និងទី២៩ ខែមីនា ឆ្នាំ២០២២ ខាងមុខនេះ ប៉ុន្តែចៅក្រមបានបង្គាប់ឲ្យលោក កឹម សុខា ចូលរួមប្រជុំតាមប្រព័ន្ធវីដេអូជំនួសវិញ។
សហមេធាវីការពារក្តីប្រធានគណបក្សសង្គ្រោះជាតិ លោក ចាន់ ចេន បានប្រាប់អ្នកសារព័ត៌មានបន្ទាប់ពីសវនាការនៅថ្ងៃទី២៣ ខែមីនា ឆ្នាំ២០២២ ថា តុលាការបានច្រានចោលនូវសំណើរបស់មេធាវីការពារក្តីប្រធានបក្សប្រឆាំង ដោយមិនអនុញ្ញាតឱ្យលោក កឹម សុខា ទៅចូលរួមក្នុងវេទិការកដំណោះស្រាយសកលនៅប្រទេសអាល្លឺម៉ង់ នោះទេ ប៉ុន្តែតុលាការបង្វែរឱ្យលោក កឹម សុខា ចូលរួមកិច្ចប្រជុំនេះតាមប្រព័ន្ធវីដេអូជំនួសវិញ។
មេធាវីការពារក្តីឲ្យលោក កឹម សុខា រូបនេះបានសម្ដែងការខកចិត្តយ៉ាងខ្លាំងចំពោះការសម្រេចចិត្តរបស់តុលាការបែបនេះ ព្រោះថាក្នុងលិខិតអញ្ជើញដែលមេធាវីបានដាក់ជូនតុលាការកាលពីថ្ងៃទី២១ ខែមីនា កន្លងទៅ បានបញ្ជាក់យ៉ាងច្បាស់ថា អគ្គលេខាធិការរបស់អង្គការ Global Solution បានអញ្ជើញលោក កឹម សុខា ឱ្យទៅចូលរួមកិច្ចប្រជុំនេះដោយផ្ទាល់ ដើម្បីផ្តល់អនុសាសន៍ទៅកាន់ពិភពលោក និងមានកម្មវិធីជួបជុំក្រុមពិភាក្សាតូចៗជាមួយមេដឹកនាំប្រទេសជាច្រើនទៀតផងដែរ។
នៅថ្ងៃទី២៣ ខែមីនា ឆ្នាំ២០២២ នេះ សាលាដំបូងរាជធានីភ្នំពេញ បានបើកសវនាការលើសំណុំរឿងប្រធានបក្សប្រឆាំង លោក កឹម សុខា ដោយពិនិត្យលើភស្តុតាងដោះបន្ទុកដែលបានដាក់ជូនដោយមេធាវីការពារក្តីលោក កឹម សុខា។
នៅថ្ងៃទី២៣ ខែមីនា ឆ្នាំ២០២២ នេះ សារព័ត៌មាន The Cambodia Daily ទទួលបានលិខិតអញ្ជើញរបស់អគ្គលេខាធិការនៃអង្គការ Global Solution ដែលបានអញ្ជើញប្រធានគណបក្សសង្គ្រោះជាតិ លោក កឹម សុខា ឱ្យទៅចូលរួមក្នុងវេទិកាគោលនយោបាយពិភពលោកក្នុងប្រទេសអាល្លឺម៉ង់ ពីប្រភពដ៏ជឿទុកចិត្ត។
ខ្លឹមសារនៅក្នុងលិខិតនោះសរសេរថា អញ្ជើញលោក កឹម សុខា ឱ្យចូលរួមជាវាគ្មិនធ្វើបាឋកថាក្នុងសន្និសីទដំណោះស្រាយសកល នៅថ្ងៃទី២៨ និងទី២៩ ខែមីនា ឆ្នាំ២០២២ ខាងមុខនេះ។ លិខិតដដែលលើកឡើងថា ការចូលរួមរបស់មេបក្សប្រឆាំងរូបនេះ នឹងពិភាក្សាទៅលើបញ្ហាប្រឈមសំខាន់ៗអំពីគោលនយោបាយសកលសម្រាប់ប្រទេសជាសមាជិក G20 និងប្រទេសជាសមាជិក G7 ក្នុងឆ្នាំ២០២២ នេះ និងឆ្នាំបន្តទៀត ជាពិសេសពិភាក្សាលើប្រជាធិបតេយ្យូបនីយកម្មដើម្បីចូលរួមស្ដារឡើងវិញនូវការអភិវឌ្ឍផ្នែកសេដ្ឋកិច្ច និងសង្គម។
ប្រភពដដែលបញ្ជាក់ថា គំនិតផ្ដួចផ្ដើមដំណោះស្រាយសកលនេះ ធ្វើឡើងដើម្បីបន្តកិច្ចការរបស់ប្រទេសជាសមាជិក G20 ដែលនឹងគាំទ្រដល់ការកាន់តួនាទីជាប្រធានប្តូរវេនរបស់ជំនួបកំពូល G20 ក៏ដូចជាការផ្សារភ្ជាប់ការងាររបស់ប្រធានអាណត្តិមុន និងអាណត្តិក្រោយផងដែរ ខណៈប្រធានប្តូរវេនសម្រាប់ឆ្នាំ២០២២ នេះ ពួកគេបានគាំទ្រដល់ប្រទេសឥណ្ឌូនេស៊ី។
ជុំវិញការអញ្ជើញមេដឹកនាំនយោបាយនៅកម្ពុជានេះ អង្គការ Global Solution បានដាក់លិខិតអញ្ជើញមេដឹកនាំបក្សប្រឆាំង លោក កឹម សុខា តែម្នាក់គត់ ចំណែកមេដឹកនាំបក្សកាន់អំណាចលោក ហ៊ុន សែន និងអតីតមេដឹកនាំប្រឆាំង លោក សម រង្ស៊ី មិនទទួលបានការអញ្ជើញឱ្យចូលរួមក្នុងវេទិកាគោលនយោបាយពិភពលោកនេះទេ។
ក្រុមអ្នកសង្កេតការណ៍លើកឡើងថា លិខិតអញ្ជើញរបស់អង្គការ Global Solution ឱ្យលោក កឹម សុខា ចូលរួមក្នុងវេទិកាគោលនយោបាយពិភពលោកនេះ ជាការបញ្ជាក់អំពីជំហរអន្តរជាតិដែលតែងឱ្យតម្លៃលើការដឹកនាំនយោបាយអហិង្សារបស់មេដឹកនាំបក្សប្រឆាំង លោក កឹម សុខា នេះដែរ។ ជាងនេះទៅទៀត លិខិតអញ្ជើញនេះស្មើនឹងច្រានចោលរាល់ការចោទប្រកាន់របស់តុលាការកម្ពុជាគ្រប់យ៉ាងលើមេដឹកនាំបក្សប្រឆាំង លោក កឹម សុខា ថែមទៀតផង។
លោក កឹម សុខា ធ្លាប់បានអះអាងកាលពីពេលកន្លងទៅថា បើទោះបីជាលោកមិនទាន់មានសេរីភាពពេញលេញក៏ដោយ ក៏បណ្តាប្រទេសលោកសេរីនៅតែទទួលស្គាល់អំពីគុណតម្លៃរបស់លោកក្នុងការងារសិទ្ធិមនុស្ស ប្រជាធិបតេយ្យ គោលការណ៍អហិង្សា និងការស្វែងរកដំណោះស្រាយលើបញ្ហានានាដោយសន្តិវិធី ដើម្បីបម្រើប្រយោជន៍ជាតិខ្មែរ៕