30 C
Phnom Penh

អ្នក​តស៊ូ​មតិ៖ កម្ពុជា​ទំនង​ជា​មិន​រួច​ខ្លួន​ពី​ទណ្ឌកម្ម​របស់​អាមេរិក​និង​អឺរ៉ុប ករណី​បិទ​ផ្លូវ​លោក កឹម សុខា

ដោយ ឌឹ ខេមបូឌា ដេលី

បទវិភាគ

ក្រុម​អ្នក​តស៊ូ​មតិ​ខ្មែរ​នៅ​ក្រៅ​ស្រុក អះអាង​ថា លោក ហ៊ុន សែន ទំនង​ជា​មិន​អាច​រួច​ខ្លួន​ពី​ទណ្ឌកម្ម​របស់​សហរដ្ឋ​អាមេរិក និង​អឺរ៉ុប​នោះ​ទេ ទោះបីជា​ខំ​បង្អាក់​ដំណើរ​របស់​មេដឹកនាំ​បក្ស​ប្រឆាំង លោក កឹម សុខា មិន​ឲ្យ​ទៅ​ធ្វើជា​វាគ្មិន​ក្នុង​វេទិកា​គោល​នយោបាយ​ពិភពលោក​នៅ​ប្រទេស​អាល្លឺម៉ង់ ក៏ដោយ។

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​លទ្ធិប្រជាធិបតេយ្យ លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​២៩ មីនា ថា ក្រោយ​វេទិកា​ពិភពលោក​នេះ​មិន​យូរ​ប៉ុន្មាន សហគមន៍​អន្តរជាតិ​អាច​នឹង​ដាក់​ចេញ​នូវ​សេណារីយ៉ូ​ថ្មី​ទាក់ទង​ទៅ​នឹង​នយោបាយ​ប្រជាធិបតេយ្យូបនីយកម្ម​កម្ពុជា ដើម្បី​កំណត់​ផ្លូវ​ឲ្យ​រដ្ឋាភិបាល​លោក ហ៊ុន សែន ដើរ​ទៅ​ថ្ងៃ​មុខ​ជាមិនខាន។

លោក គឹម សុខ អះអាង​ថា មេដឹកនាំ​បក្ស​កាន់​អំណាច លោក ហ៊ុន សែន អាច​ប្រើ​អត្តចរិត​ក្អេងក្អាង​ថា​គាត់​មិន​ខ្លាច​នឹង​បំបាក់​មុខ​សហគមន៍​អន្តរជាតិ ចំពោះ​ការ​រាំង​ខ្ទប់​ដំណើរ​ទៅ​ចូលរួម​កិច្ចប្រជុំ​របស់​លោក កឹម សុខា ក្នុង​វេទិកា​គោល​នយោបាយ​ពិភពលោក​ទេ ប៉ុន្តែ​គាត់​គួរ​តែ​ដឹង​ថា សហគមន៍​អន្តរជាតិ​មិនមែន​ធ្វើ​តេស្ដ​អំពី​គោលជំហរ​របស់​កម្ពុជា​ចោល​ទទេៗ​នោះ​ឡើយ ហើយ​ជា​លទ្ធផល ក្រោយ​ព្រឹត្តិការណ៍​វេទិកា​អន្តរជាតិ​នេះ អាច​នឹង​មាន​ប្រតិកម្ម​លើ​រដ្ឋាភិបាល​ឯក​បក្ស​របស់​គាត់​បន្ថែម​ទៀត​ពី​សហគមន៍​អន្តរជាតិ​ទាំងនោះ។

អ្នកវិភាគ​នយោបាយ និង​សង្គម​រូប​នេះ​បញ្ជាក់​ថា ការ​អញ្ជើញ​លោក កឹម សុខា តែ​ម្នាក់​ពី​ប្រទេស​កម្ពុជា​ពាក់ព័ន្ធ​នឹង​ក្រុម​ប្រទេស​ឧស្សាហកម្ម​ជឿនលឿន​ដាច់គេ​ទាំង ២០ លើ​ពិភពលោក ពុំ​មែន​ជា​រឿង​លេងសើច​នោះ​ឡើយ។ លោក​បញ្ជាក់​ថា ការ​អញ្ជើញ​នេះ​គឺជា​ការ​សម្រិតសម្រាំង​ទាំង​បុគ្គលិក​លក្ខណៈ​របស់​បុគ្គល​ជា​វាគ្មិន​ដែល​មាន​ស្មារតី​ដោះស្រាយ​បញ្ហា ហើយ​សម្លឹង​ទៅ​ដល់​លក្ខខណ្ឌ​ដោះស្រាយ​វិបត្តិ​នយោបាយ​កម្ពុជា ដែល​សហគមន៍​អន្តរជាតិ​កំពុង​ព្រួយបារម្ភ​ពី​ការ​វិវឌ្ឍ​ទៅជា​វិបត្តិ​ផ្សេង​ទៀត ដែល​នឹង​ជះ​ឥទ្ធិពល​អាក្រក់​ដល់​តំបន់ អន្តរជាតិ និង​ពិភពលោក​ក្នុង​ពេល​បច្ចុប្បន្ន​នេះ។

សាលាដំបូង​រាជធានី​ភ្នំពេញ​បាន​ច្រានចោល​នូវ​សំណើ​សុំ​របស់​មេដឹកនាំ​បក្ស​ប្រឆាំង លោក កឹម សុខា ទៅ​ចូលរួម​វេទិកា​គោល​នយោបាយ​ពិភពលោក​នៅ​ប្រទេស​អាល្លឺម៉ង់ កាលពី​ថ្ងៃ​ទី​២៣ ខែ​មីនា កន្លងទៅ។

មេដឹកនាំ​បក្ស​ប្រឆាំង លោក កឹម សុខា កាលពី​ថ្ងៃ​ទី​២៨ ខែ​មីនា ឆ្នាំ​២០២២ បាន​សម្ដែង​ការ​សោកស្តាយ​ដែល​មិន​អាច​ធ្វើ​ដំណើរ​ទៅ​ចូលរួម​វេទិកា​ពិភពលោក​ជាមួយ​បណ្តា​ប្រទេស​មហាអំណាច​សេដ្ឋកិច្ច G7 និង G20 តាម​កម្មវិធី​ដែល​បាន​គ្រោងទុក ដោយសារតែ​សិទ្ធិ​សេរីភាព​របស់​លោក​ត្រូវ​បាន​ហាមឃាត់។

មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មុត ចន្ថា បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃ​ទី​២៩ មីនា ថា ការ​អញ្ជើញ​ឱ្យ​លោក កឹម សុខា ទៅ​ចូលរួម​គឺ​ធ្វើឡើង​ក្នុង​បំណង​ប្រមូល​ទស្សនៈ និង​អនុសាសន៍​របស់​មេដឹកនាំ​ល្បីៗ​ដើម្បី​ចងក្រង​សម្រាប់ G20 និង G7 ក្នុង​ការ​ដោះស្រាយ​បញ្ហា​ចម្បងៗ​ដែល​ទាក់ទិន​នឹង​សេដ្ឋកិច្ច​សកល ដូចជា​ការ​ធ្វើ​ឱ្យ​មាន​ស្ថិរភាព​ហិរញ្ញវត្ថុ​អន្តរជាតិ សង្គ្រាម​ឈ្លានពាន​របស់​រុស្ស៊ី​នៅ​អ៊ុយក្រែន និង​វិបត្តិ​នយោបាយ​នៅ​ភូមា ជាដើម។

មន្ត្រី​ជាន់ខ្ពស់​បក្ស​ប្រឆាំង​រូប​នេះ​អះអាង​ថា លោក កឹម សុខា ដែល​ត្រូវ​បាន​អញ្ជើញ​ឱ្យ​ចូលរួម គឺ​ដោយសារតែ​គេ​បាន​ចាត់ទុក​ថា លោក កឹម សុខា ជា​អ្នក​ដឹកនាំ​នយោបាយ​ខ្មែរ​ដែល​លេចធ្លោ​មួយ​រូប​ដែល​គួរតែ​ចូលរួម​ពិភាក្សា​អំពី​ការ​ប្រឈម​ខាង​គោល​នយោបាយ​របស់ G20 និង G7 ក្នុង​ឆ្នាំ​២០២២ នេះ។

ជុំវិញ​បញ្ហា​នេះ អតីត​អគ្គ​ទីប្រឹក្សា​ស្ថានទូត​ខ្មែរ​ប្រចាំ​ប្រទេស​ឥណ្ឌូនេស៊ី បណ្ឌិត សូ ណារ៉ូ បាន​លើកឡើង​ក្នុង​កម្មវិធី Idea Talk កាលពី​រាត្រី​ថ្ងៃ​ទី​២៨ មីនា ថា ការ​បិទ​ខ្ទប់​សេរីភាព​លោក កឹម សុខា មិន​ឱ្យ​ទៅ​ចូលរួម​ពី​សំណាក់​រដ្ឋាភិបាល​កម្ពុជា កាន់តែ​ធ្វើ​ឱ្យ​មុខមាត់​កម្ពុជា​ធ្លាក់ចុះ​អន់ថយ​លើ​ឆាក​អន្តរជាតិ​ប៉ុណ្ណោះ។ ចំណែក​លោក កឹម សុខា នឹង​ទទួល​បាន​ការ​គោរព​ស្រឡាញ់​ពី​មេដឹកនាំ​នៃ​ប្រទេស​ទាំងនោះ​កាន់តែ​ខ្លាំង​ទៅវិញ។

ក្រុម​ប្រទេស G20 ឬ Group of Twenty ត្រូវ​បាន​បង្កើត​ឡើង​នៅ​ឆ្នាំ​១៩៩៩ គឺជា​វេទិកា​អន្តរ​រដ្ឋាភិបាល​ដែល​មាន​ប្រទេស​ចំនួន​២០ ដូចជា​ចក្រភព​អង់គ្លេស សហរដ្ឋ​អាមេរិក ជប៉ុន អាល្លឺម៉ង់ ចិន អ៊ីតាលី បារាំង រុស្ស៊ី ប្រេស៊ីល កាណាដា និង​ប្រទេស​ចំនួន​១០​ទៀត។ ប្រទេស​ទាំងនេះ​រួម​ទាំង​សហភាព​អឺរ៉ុប​ផង ចូលរួម​គ្នា​ធ្វើ​ការ​ដោះស្រាយ​បញ្ហា​ចម្បងៗ​ដែល​ទាក់ទិន​នឹង​សេដ្ឋកិច្ច​សកល ដូចជា​ស្ថិរភាព​ហិរញ្ញវត្ថុ​អន្តរជាតិ និង​ការ​អភិវឌ្ឍ​ប្រកប​ដោយ​ចីរភាព ជាដើម។

ដោយឡែក​ក្រុម​ប្រទេស G7 ឬ Group of Seven មាន​សមាជិក​ភាគច្រើន​ជា​មហាអំណាច​ពិភពលោក ដូចជា​កាណាដា បារាំង អាល្លឺម៉ង់ អ៊ីតាលី ជប៉ុន ចក្រភព​អង់គ្លេស និង​សហរដ្ឋ​អាមេរិក ហើយ​ប្រទេស​ទាំងនេះ​បាន​រក្សា​ទំនាក់ទំនង​យ៉ាង​ជិតស្និទ្ធ​រវាង​គ្នា​នឹង​គ្នា​លើ​ផ្នែក​នយោបាយ សេដ្ឋកិច្ច សង្គម ច្បាប់ បរិស្ថាន យោធា សាសនា វប្បធម៌ និង​នយោបាយ​ការទូត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស