28 C
Phnom Penh

មន្ត្រី​សិទ្ធិមនុស្ស UN ថា​លំហ​សេរីភាព​និង​នយោបាយ​កម្ពុជា​កាន់តែ​រួម​តូច​និង​ដើរ​ថយក្រោយ

ដោយ ឌឹ ខេមបូឌា ដេលី

បទវិភាគ

អ្នកជំនាញ​សិទ្ធិមនុស្ស​របស់​អង្គការ​សហប្រជាជាតិ ថា​បច្ចុប្បន្ន លំហ​ពលរដ្ឋ និង​នយោបាយ​នៅ​កម្ពុជា​កាន់តែ​រួម​តូច​ទៅ និង​ដើរ​ថយក្រោយ​ដោយសារតែ​ការ​គ្រប់គ្រង​បែប​ឯក​បក្ស។

តាមរយៈ​សេចក្ដី​ប្រកាស​ព័ត៌មាន​នៅ​ថ្ងៃ​ទី​២៩ ខែ​មីនា ឆ្នាំ​២០២២ អ្នកជំនាញ​ផ្នែក​សិទ្ធិមនុស្ស​នៃ​អង្គការ​សហប្រជាជាតិ លោក វីទិត ម៉ុនតាប៊ន (Vitit Muntarbhorn) បាន​លើកឡើង​ថា លោក​បាន​ប្រាប់​ទៅ​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ នៅ​ថ្ងៃ​នេះ​ក្នុង​អំឡុង​ការ​ធ្វើ​បច្ចុប្បន្នភាព​ផ្ទាល់មាត់​អំពី​ស្ថានភាព​សិទ្ធិមនុស្ស​នៅ​កម្ពុជា។ លោក​បញ្ជាក់​ថា បច្ចុប្បន្ន​នេះ ទិដ្ឋភាព​សិទ្ធិមនុស្ស និង​លទ្ធិប្រជាធិបតេយ្យ​នៅ​កម្ពុជា​នៅតែ​បង្ក​ការ​ព្រួយបារម្ភ​លើ​វិស័យ​ជាច្រើន ជាពិសេស​ក្នុង​ពេល​ដែល​ការ​បោះឆ្នោត​ឃុំ-សង្កាត់​កាន់តែ​ខិត​ជិត​ចូល​មកដល់ ដែល​នឹង​ប្រព្រឹត្ត​ទៅ​នៅ​ខែ​មិថុនា ឆ្នាំ​នេះ។

លោក​បន្ត​ថា មួយ​វិញ​ទៀត ខណៈ​ដែល​ប្រទេស​នេះ​មាន​ការ​កែលំអ​ទាក់ទង​នឹង​សេចក្តី​ព្រាង​ច្បាប់​ថ្មីៗ​ដើម្បី​ការពារ​ជន​ងាយ​រងគ្រោះ កិច្ច​ខិតខំ​ប្រឹងប្រែង​ក្នុង​ការ​ដោះស្រាយ​សំណុំរឿង​នៅ​តុលាការ និង​វឌ្ឍនភាព​ឆ្ពោះ​ទៅ​រក​ការ​បង្កើត​គណៈកម្មាធិការ​ជាតិ​សិទ្ធិមនុស្ស​កម្ពុជា ក៏​នៅ​មាន​ក្តី​កង្វល់​មួយ​ចំនួន​ទាក់ទង​នឹង​ការ​បិទ​លំហ​ពលរដ្ឋ និង​នយោបាយ សវនាការ​លើ​សំណុំរឿង​នយោបាយ និង​ការ​ចាប់​ខ្លួន​អ្នក​នយោបាយ​ជំទាស់​ដាក់​ពន្ធនាគារ និង​ការ​បោះឆ្នោត​នា​ពេល​ខាងមុខ។

អ្នកជំនាញ​ផ្នែក​សិទ្ធិមនុស្ស​នៃ​អង្គការ​សហប្រជាជាតិ លោក Vitit Muntarbhorn អំពាវនាវ​ចំពោះ​អាជ្ញាធរ​ទាំងអស់​នៅ​កម្ពុជា​ឱ្យ​គោរព​សិទ្ធិមនុស្ស​ជា​មូលដ្ឋាន និង​ច្បាប់​សិទ្ធិមនុស្ស​អន្តរជាតិ​ដែល​កម្ពុជា​ជា​រដ្ឋ​ភាគី រួម​ទាំង​សេរីភាព​ជា​មូលដ្ឋាន​ក្នុង​ការ​បញ្ចេញមតិ និង​ការ​ជួប​ប្រជុំ។

ការ​បង្ហាញ​ក្ដី​បារម្ភ​របស់​អ្នកជំនាញ​ផ្នែក​សិទ្ធិមនុស្ស​នៃ​អង្គការ​សហប្រជាជាតិ បាន​ធ្វើឡើង​ស្រប​ពេល​ដែល​ក្រុមប្រឹក្សា​ជំនុំជម្រះ​នៃ​សាលាដំបូង​រាជធានី​ភ្នំពេញ បាន​បដិសេធ​សំណើ​របស់​សហ​មេធាវី​ការពារ​សិទ្ធិ​ឱ្យ​លោក កឹម សុខា កាល​ថ្ងៃ​ទី​២៣ ខែ​មីនា ដោយ​មិន​អនុញ្ញាត​ឱ្យ​លោក កឹម សុខា ទៅ​ចូលរួម​កិច្ចប្រជុំ​កម្រិត​ពិភពលោក​ដោយ​ផ្ទាល់​នៅ​ប្រទេស​អាល្លឺម៉ង់។

សហ​មេធាវី​ការពារ​សិទ្ធិ​ឱ្យ​លោក កឹម សុខា បាន​ដាក់​លិខិត​ទៅ​ចៅក្រម​ស៊ើបសួរ​នៃ​សាលាដំបូង​រាជធានី​ភ្នំពេញ​កាលពី​ថ្ងៃ​ទី​២១ ខែ​មីនា ក្រោយ​ពី​អង្គការ Global Solutions បាន​ស្នើសុំ​លោក កឹម សុខា តាមរយៈ​ក្រសួង​ការបរទេស​កម្ពុជា កាលពី​ថ្ងៃ​ទី​២២ ខែ​កុម្ភៈ ធ្វើជា​វាគ្មិន​ស្ដីពី​ដំណោះស្រាយ​សកល និង​ការ​ប្រឈម​នយោបាយ​សកល រួម​ទាំង​បញ្ហា​សិទ្ធិមនុស្ស និង​សេដ្ឋកិច្ច​នៅ​ទីក្រុង​ប៊ែរឡាំង ប្រទេស​អាល្លឺម៉ង់។ វេទិកា​គោល​នយោបាយ​សកល​នេះ ប្រព្រឹត្ត​ទៅ​រយៈពេល ២​ថ្ងៃ ចាប់ពី​ថ្ងៃ​ទី​២៨ ដល់​ថ្ងៃ​ទី​២៩ ខែ​មីនា។

ក្រៅពី​បញ្ហា​នយោបាយ​ហើយ បច្ចុប្បន្ន​អាជ្ញាធរ​កម្ពុជា​បាន​និង​កំពុង​ធ្វើ​ទុក្ខបុកម្នេញ​ដោយ​រារាំង​អ្នក​សារព័ត៌មាន អ្នក​ឃ្លាំមើល​ក្នុង​ការ​ចុះ​តាមដាន​រឿង​ហា្គណា​វើលដ៍ ប្រើប្រាស់​អំពើ​ហិង្សា និង​បៀតបៀន​លើ​កូដករ​ក្រុមហ៊ុន​ណាហ្គា​វើលដ៍​អំឡុង​ពេល​ពួកគេ​ធ្វើ​កូដកម្ម​អហិង្សា​ទាមទារ​ឱ្យ​តុលាការ​ទម្លាក់​បទ​ចោទប្រកាន់ និង​ទាមទារ​ឱ្យ​ក្រសួង​ស្ថាប័ន​ពាក់ព័ន្ធ រួម​ទាំង​ថៅកែ​ក្រុមហ៊ុន​ល្បែង​មួយ​នេះ ដោះស្រាយ​វិវាទ​ការងារ​ដែល​បាន​អូស​បន្លាយ​រយៈពេល​ជាង ១​ឆ្នាំ​មក​ហើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស