ឯកអគ្គរដ្ឋទូតសហរដ្ឋអាមេរិកប្រចាំក្រុមប្រឹក្សាសិទ្ធិមនុស្សរបស់អង្គការសហប្រជាជាតិ អំពាវនាវឱ្យរដ្ឋាភិបាលកម្ពុជាបញ្ឈប់ការចោទប្រកាន់ដែលមានចរិតនយោបាយលើលោក កឹម សុខា និងសមាជិកបក្សប្រឆាំង។
ឯកអគ្គរដ្ឋទូតសហរដ្ឋអាមេរិកប្រចាំក្រុមប្រឹក្សាសិទ្ធិមនុស្សរបស់អង្គការសហប្រជាជាតិ អ្នកស្រី Michele Taylor បានសរសេរលើបណ្ដាញសង្គមធ្វីតធឺ (Twitter) របស់ខ្លួនកាលពីថ្ងៃទី២៩ ខែមីនា ឆ្នាំ២០២២ ថា សហរដ្ឋអាមេរិកបានសម្ដែងនូវកង្វល់របស់ខ្លួនយ៉ាងខ្លាំងតាមរយៈអ្នករាយការណ៍ពិសេសទទួលបន្ទុកសិទ្ធិមនុស្សប្រចាំនៅកម្ពុជា លោក វីទិត ម៉ុនតាប៊ន (Vitit Muntarbhorn) ស្ដីពីការដើរថយក្រោយនៃលទ្ធិប្រជាធិបតេយ្យនៅកម្ពុជា។
អ្នកស្រី Michele Taylor អំពាវនាវឱ្យរដ្ឋាភិបាលកម្ពុជាបញ្ឈប់ការចោទប្រកាន់ដែលមានចរិតនយោបាយទៅលើសមាជិកបក្សប្រឆាំង សកម្មជននយោបាយ អ្នកសារព័ត៌មាន មេដឹកនាំសហជីព និងពលរដ្ឋធម្មតា ចំពោះការអនុវត្តសិទ្ធិសេរីភាពក្នុងការបញ្ចេញមតិដែលការពារដោយរដ្ឋធម្មនុញ្ញរបស់កម្ពុជា។
ការសម្ដែងការព្រួយបារម្ភនេះ ធ្វើឡើងបន្ទាប់ពីអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា ត្អូញត្អែរអំពីលំហសេរីភាពពលរដ្ឋ និងសិទ្ធិនយោបាយនៅកម្ពុជាកាន់តែរួមតូច ដោយសារតែការគ្រប់គ្រងដោយរដ្ឋាភិបាលឯកបក្សសព្វថ្ងៃ។
កាលពីថ្ងៃទី២៩ ខែមីនា ឆ្នាំ២០២២ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា លោក វិទិត ម៉ុនតាប៊ន បានលើកឡើងនៅក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤៩ នៅទីក្រុងហ្សឺណែវ ប្រទេសស្វីស ថាទិដ្ឋភាពសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេសកម្ពុជានៅតែបង្កការព្រួយបារម្ភធ្ងន់ធ្ងរដដែល។
ទោះជាយ៉ាងណាក៏ដោយ ក្រសួងការបរទេសកម្ពុជាបានចេញសេចក្តីប្រកាសព័ត៌មានកាលពីថ្ងៃទី២៩ ខែមីនា ឆ្នាំ២០២២ ប្រតិកម្មថា កម្ពុជាបានប្រកាន់យ៉ាងខ្ជាប់ខ្ជួននូវលទ្ធិប្រជាធិបតេយ្យ ក្នុងនោះរដ្ឋសភាជាតិបានធ្វើវិសោធនកម្មច្បាប់ស្ដីពីគណបក្សនយោបាយដែលបានបើកផ្លូវសម្រាប់អ្នកដែលបានបាត់បង់សិទ្ធិធ្វើនយោបាយ ឱ្យពួកគេអាចស្នើសុំសិទ្ធិធ្វើនយោបាយឡើងវិញគ្រប់ៗគ្នា។
យ៉ាងណាក៏ដោយ អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ លោក គឹម សុខ បានលើកឡើងក្នុងកម្មវិធី Idea Talk កាលពីថ្ងៃទី២៩ មីនា ថា បើរដ្ឋាភិបាលលោក ហ៊ុន សែន ពិតជាប្រកាន់ខ្ជាប់នូវលទ្ធិប្រជាធិបតេយ្យពិតមែន ពួកគេគួរតែបើកឱកាសឱ្យមេដឹកនាំបក្សប្រឆាំង លោក កឹម សុខា បានទៅចូលរួមក្នុងវេទិកាគោលនយោបាយពិភពលោកនៅប្រទេសអាល្លឺម៉ង់ កាលពេលថ្មីៗនេះដោយគ្មានការរាំងខ្ទប់។
លោក គឹម សុខ លើកឡើងថា ការបិទសេរីភាពលោក កឹម សុខា មិនឱ្យទៅចូលរួមក្នុងវេទិកានោះ បានធ្វើឱ្យកម្ពុជាខាតបង់ប្រយោជន៍ជាតិធំណាស់ ជាពិសេសការខាតបង់ការអភិវឌ្ឍលទ្ធិប្រជាធិបតេយ្យ ខាតបង់ការយកចិត្តទុកដាក់របស់សហគមន៍អន្តរជាតិ ដែលឈានទៅរកការខាតបង់សេដ្ឋកិច្ចកម្ពុជាយ៉ាងធ្ងន់ធ្ងរបន្ថែមទៀត។
អ្នកវិភាគនយោបាយ និងសង្គមរូបនេះបញ្ជាក់ថា ប្រសិនបើរដ្ឋាភិបាលលោក ហ៊ុន សែន បើកចិត្តទូលាយឱ្យលោក កឹម សុខា ទៅចូលរួមវេទិការបស់ប្រទេស G20 និង G7 នោះ ប្រហែលអាចនឹងជួយឱ្យកម្ពុជាទទួលបានប្រព័ន្ធអនុគ្រោះពន្ធ EBA ពីសហភាពអឺរ៉ុប និង GSP ពីសហរដ្ឋអាមេរិកត្រឡប់មកវិញ។
ប៉ុន្តែអគ្គនាយកមជ្ឈមណ្ឌលព័ត៌មានដើមអម្ពិល លោក សយ សុភាព បានសរសេរនៅហ្វេសប៊ុករបស់លោកនៅថ្ងៃទី៣០ មីនា ថា វេទិការបស់ក្រុមប្រទេស G7 ឬ G20 គ្រាន់តែជាលេសប៉ុណ្ណោះ។ លោកបន្តថា កុំស្រមៃឲ្យសោះថានឹងអាចបង្កើតរដ្ឋាភិបាលនិរទេស ឬចលនាក្រៅប្រទេសប្រឆាំងរដ្ឋាភិបាលខ្មែរនោះ។ លោកថា យុទ្ធសាស្ត្រនេះអាចបរាជ័យដល់ការប្រឡូកក្នុងឆាកនយោបាយបោះឆ្នោតឆ្នាំ២០២៣ ប្រសិនបើលោតផ្លោះមិនរួចពីប្រព័ន្ធយុត្តិធម៌។
ទោះជាបែបនេះក្តី រដ្ឋមន្ត្រីទទួលបន្ទុកកិច្ចការអន្តរជាតិរបស់ចក្រភពអង់គ្លេស អ្នកស្រី Amanda Milling ធ្លាប់បានអះអាងកាលពីពេលកន្លងទៅថា ចក្រភពអង់គ្លេសកំពុងបន្តតាមដានដោយយកចិត្តទុកដាក់អំពីដំណើរការ និងលទ្ធផលនៃសវនាការរបស់លោក កឹម សុខា ដែលពាក់ព័ន្ធនឹងសេរីភាពរបស់លោកក្នុងការចូលរួមដំណើរការប្រជាធិបតេយ្យនៅកម្ពុជាសព្វថ្ងៃ៕