ជារឿងភ្ញាក់ផ្អើលមួយចំពោះដំណើរទស្សនកិច្ចរបស់នាយករដ្ឋមន្ត្រីប្រទេសសិង្ហបុរី លោក លី សៀនឡុង ដែលបានសម្រេចជាឯកតោភាគីមកជួបប្រធានាធិបតីសហរដ្ឋអាមេរិក លោក ចូ បៃដិន នៅសេតវិមាន នៅខណៈជំនួបកំពូលអាមេរិក-អាស៊ានបន្តលើកពេលដោយមិនកំណត់ ហើយចំពេលដែលកម្ពុជាជាប្រធានប្ដូរវេននៃកិច្ចប្រជុំអាស៊ានសម្រាប់ឆ្នាំ២០២២។
ជំនួបកំពូលរវាងលោក បៃដិន និងលោក លី សៀនឡុង បានធ្វើឡើងនៅឯសេតវិមានរបស់ប្រធានាធិបតីក្នុងរដ្ឋធានីវ៉ាស៊ីនតុន កាលពីថ្ងៃអង្គារ ទី២៩ មីនា។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី៣០ ខែមីនា។
ក្នុងជំនួបនេះ ប្រធានាធិបតីសហរដ្ឋអាមេរិក លោក ចូ បៃដិន បានពិភាក្សាជាមួយនាយករដ្ឋមន្ត្រីសិង្ហបុរី លោក លី សៀនឡុង ដោយផ្ដោតសំខាន់អំពីការឈ្លានពានរបស់រុស្ស៊ីលើអ៊ុយក្រែន និងតួនាទីរបស់ចិននៅក្នុងតំបន់ឥណ្ឌូប៉ាស៊ីហ្វិក រួមទាំងវិបត្តិនៅប្រទេសភូមា។ មេដឹកនាំទាំងពីរនេះបានអង្គុយពិភាក្សាគ្នានៅក្នុងការិយាល័យប្រធានាធិបតីសហរដ្ឋអាមេរិក ហើយក្រោយមកក៏មានសេចក្ដីថ្លែងការណ៍ព័ត៌មានរួមគ្នាមួយត្រូវបានផ្សព្វផ្សាយទៅកាន់បណ្ដាញផ្សាយព័ត៌មាន។
លោក បៃដិន បានថ្លែងប្រាប់អ្នកសារព័ត៌មានថា សហរដ្ឋអាមេរិកគាំទ្រការអនុវត្តយុទ្ធសាស្ត្រឥណ្ឌូប៉ាស៊ីហ្វិក បើទោះជាពេលនេះអាមេរិកកំពុងផ្ដោតទៅលើស្ថានការណ៍នៅអឺរ៉ុបខាងកើត ដោយសារតែរុស្ស៊ីលើកទ័ពបង្កសង្គ្រាមវាយលើប្រទេសអ៊ុយក្រែនក៏ដោយ។ តាមការពន្យល់របស់លោក បៃដិន ពេលនេះទោះជាសហរដ្ឋអាមេរិកកំពុងដោះស្រាយវិបត្តិនៅអឺរ៉ុបក៏ដោយ ក៏ក្រុងវ៉ាស៊ីនតុននៅតែប្ដេជ្ញាចិត្តយ៉ាងមុតមាំក្នុងការពង្រឹងការអនុវត្តយុទ្ធសាស្ត្រឥណ្ឌូប៉ាស៊ីហ្វិកសេរី និងបើកចំហ។
ដោយទឹកមុខរីករាយ លោក បៃដិន បានសម្ដែងសេចក្ដីរីករាយចំពោះការសម្រេចរបស់សិង្ហបុរី ក្នុងការចូលរួមដាក់ទណ្ឌកម្មទៅលើរុស្ស៊ី ព្រោះតែឈ្លានពានលើអ៊ុយក្រែន។ លោក បៃដិន បានចាត់ទុកសិង្ហបុរីជាប្រទេសមានមោទកភាពមួយនៅតំបន់ឥណ្ឌូប៉ាស៊ីហ្វិក ដែលលោកធានាថាតំបន់ឥណ្ឌូប៉ាស៊ីហ្វិកនៅតែជាតំបន់សេរី និងបើកចំហ។
ចំណែកឯលោក លី សៀនឡុង វិញ បានជំរុញឱ្យមានទំនាក់ទំនងកាន់តែជិតស្និទ្ធរវាងសហរដ្ឋអាមេរិក និងបណ្ដាប្រទេសអាស៊ាន។ លោក សៀនឡុង និយាយថា ទំនាក់ទំនងអាមេរិក-អាស៊ាននឹងជួយធ្វើឱ្យសហរដ្ឋអាមេរិកមានវត្តមាននៅក្នុងតំបន់ឥណ្ឌូប៉ាស៊ីហ្វិក និងជួយឱ្យក្រុងវ៉ាស៊ីនតុនពង្រឹងទំនាក់ទំនងរបស់ខ្លួនជាមួយនឹងដៃគូជាច្រើន សំដៅពង្រឹងយុទ្ធសាស្ត្ររបស់សហរដ្ឋអាមេរិកនៅក្នុងតំបន់ផងដែរ។
ក្នុងដំណើរទស្សនកិច្ចនៅក្រុងវ៉ាស៊ីនតុន នាយករដ្ឋមន្ត្រីសិង្ហបុរី លោក លី សៀនឡុង មុននឹងជួបលោក បៃដិន លោកបានជួបពិភាក្សាជាមួយរដ្ឋមន្ត្រីការពារជាតិអាមេរិក លោក Lloyd Austin នៅឯមន្ទីរប៉ុងតាហ្គោន។ ឥស្សរជនទាំងពីរបានបង្ហាញជាថ្មីអំពីទំនាក់ទំនងការពារជាតិទ្វេភាគី និងទទួលស្គាល់តួនាទីរបស់សិង្ហបុរី ក្នុងនាមជាដៃគូកិច្ចសហប្រតិបត្តិការសន្តិសុខដ៏ធំមួយរបស់សហរដ្ឋអាមេរិកនៅក្នុងតំបន់អាស៊ី។
បើតាមសេចក្ដីថ្លែងការណ៍ចេញផ្សាយដោយការិយាល័យនាយករដ្ឋមន្ត្រីសិង្ហបុរី គឺលោក លី សៀនឡុង និងលោក Lloyd Austin បានពិភាក្សាគ្នាអំពីកិច្ចសហប្រតិបត្តិការការពារជាតិមានដូចជា វិស័យអ៊ីនធឺណិត និងការបណ្ដុះបណ្ដាល ព្រមទាំងការឯកភាពគ្នានៃការចូលរួមជាអចិន្ត្រៃយ៍របស់សហរដ្ឋអាមេរិកនៅក្នុងតំបន់អាស៊ី ក៏ដូចជាផ្លាស់ប្ដូរយោបល់គ្នាពាក់ព័ន្ធនឹងស្ថានការណ៍អន្តរជាតិ និងថ្នាក់តំបន់ ជាពិសេសគឺសង្គ្រាមនៅអ៊ុយក្រែន។
លោក លី សៀនឡុង កំពុងស្ថិតនៅក្នុងទឹកដីសហរដ្ឋអាមេរិក ដែលជាការបំពេញទស្សនកិច្ចលើកដំបូងនៅក្រោមរដ្ឋបាលលោកប្រធានាធិបតី ចូ បៃដិន។ លោក លី សៀនឡុង បានសម្ដែងនូវសុទិដ្ឋិនិយមរបស់លោកចំពោះវត្តមានរបស់កងទ័ពសហរដ្ឋអាមេរិកនៅក្នុងតំបន់អាស៊ីប៉ាស៊ីហ្វិក ថានាំមកនូវសន្តិភាព ស្ថិរភាព និងភាពរីកចម្រើននៅក្នុងតំបន់ទាំងមូល ហើយសម្រាប់សិង្ហបុរី នឹងបន្តគាំទ្រវត្តមានយោធាអាមេរិកនៅក្នុងតំបន់អាស៊ីជានិច្ច។
អ្វីជាការកត់សម្គាល់ចំពោះវត្តមានរបស់នាយករដ្ឋមន្ត្រីសិង្ហបុរី ដែលជាសមាជិកមួយនៃសមាគមអាស៊ាននៅសេតវិមាន បានធ្វើឲ្យមានការចោទសួរអំពីការលើកពេលប្រជុំកំពូលអាស៊ាន-អាមេរិក គឺចំពេលកម្ពុជាជាប្រធានអាស៊ាននៅឆ្នាំនេះ។
ក្រសួងការបរទេសអាមេរិក បានបន្តពន្យារពេលកិច្ចប្រជុំកំពូលពិសេសជាមួយមេដឹកនាំមកពីបណ្តាប្រទេសសមាគមអាស៊ានដោយមិនកំណត់ពេល ដែលពីមុន កិច្ចប្រជុំកំពូលនេះគ្រោងនឹងត្រូវបើកធ្វើនៅចុងខែមីនា នេះ។ លោក បៃដិន បានចំណាយពេលមួយខែទៅហើយដោយផ្ដោតការយកចិត្តទុកដាក់ជាខ្លាំងលើសង្គ្រាមក្នុងប្រទេសអ៊ុយក្រែន។ លោកទើបមកដល់សេតវិមានវិញ បន្ទាប់ពីដំណើរទស្សនកិច្ចរយៈពេល ៤ថ្ងៃរបស់លោកនៅទីក្រុងប្រ៊ុចសែល នៃប្រទេសបែលហ្ស៊ិក និងនៅប្រទេសប៉ូឡូញ កាលពីថ្ងៃសៅរ៍សប្ដាហ៍មុននេះ។
នៅក្នុងប្រទេសប៉ូឡូញ លោក បៃដិន បានជួប និងសួរសុខទុក្ខកងទ័ពអាមេរិកដែលដាក់ពង្រាយនៅតំបន់មួយជាប់ព្រំដែនប៉ូឡូញ និងអ៊ុយក្រែន និងបានទៅពិនិត្យផ្ទាល់ស្ថានភាពជនភៀសខ្លួនរត់ចេញពីប្រទេសអ៊ុយក្រែន ដែលមកនៅក្នុងប្រទេសប៉ូឡូញ៕